པ་རུ་པུ་རུ་དགོང་མོའི་མཚམས་སུ།། ཕ་གི་གྲོང་པའི་རྩེད་ཐང་ར་བ།།
བ་རེ་བོ་རེ་ཅུང་ཙམ་གཡེང་བ།། མ་གཏོགས་གང་ནུས་བརྩོན་ཁུལ་བྱེད་བཞིན།།
ཙ་རེ་བ་ཡི་སྦྱོར་བའི་ཚེ་ན།། ཚ་བ་མ་གཏོགས་གཞན་པའི་དགྲ་མེད།།
ཛ་དྲག་མེད་པར་ག་ལེར་སྐྱོར་དུས།། ཝ་ལེར་འཆར་བ་ཞུ་བ་སྤྱིར་བསྟན།།
ཞ་དང་ཞོར་དུ་སྙུ་གུ་བཟུང་ནས།། ཟ་འཐུང་བར་དུ་ཡིད་ལ་འཆར་བའི།།
འ་འུར་མེད་པར་ཁུ་སིམ་ངང་དུ།། ཡ་མ་བརླ་ཡི་སྙན་ངག་འབྲི་བཞིན།།
ར་སྐོར་མེད་པའི་ཁང་ཆུང་ཙོག་ཙོག ། ལ་ཐུར་དབེན་པའི་འགྲོ་ལམ་ཀྱག་ཀྱོག །
ཤ་མདོག་ནག་པའི་ཡུལ་མི་སྐྱོ་བོ།། ས་ཁུག་འདི་ན་ཅི་འདྲ་འཛོམས་འདུག །
ཧ་དང་ཨ་གཉིས་ཅི་འབྲི་མ་རྙེད།། ཨ་སྟོང་རྒྱག་བཞིན་བསམ་གནོ་སྐོར་དུས།།
ཧ་ལམ་མིན་ན་ད་ནི་རྫོགས་འདུག ། ཨ་ཀྱང་རྩེད་མོ་ཞིག་གིས་མཇུག་བསྡུས།།
༢༠༡༧—༢—༩
