ངུར་སྨིག་གྱོན་པའི་ནང་བསྟན་མཐོ་སློབ་ཞིག་ན།།
ལུས་ཕུང་ཆོས་གྲལ་གནས་ཀྱང་སེམས་པ་ངེས་མེད།།
རླུང་བུར་འཁྱུད་ནས་རྒྱ་གྲོང་ཉུལ་བཞིན་འདས་དུས།།
ཕྱིར་ལྟས་ཤིག་གིས་བྲང་ཁར་ན་ཟུག་རེ་རེ།།
ལེ་ལོ་གཡེང་བས་ལུས་ཡིད་དམ་པོར་བཀྱིགས་དུས།།
ཉིན་མཚན་འཁོར་མོར་འབྲལ་མེད་བརྙན་འཕྲིན་འགྲོགས་ཏེ།།
རིན་ཟླ་བྲལ་བའི་རྩ་ཆེའི་དུས་ཚོད་འདི་ནི།།
ཉིན་རེར་དོན་མེད་མིག་མདུན་ཤོར་འདི་སྐྱོ་བ།།
མདོར་ན་ཆུང་ནས་མཉམ་དུ་འགྲོགས་པའི་ལེ་ལོས།།
ང་ཡི་དམིགས་འདུན་མཐའ་དག་འཁུམས་སུ་བཅུགས་ཤིང་།།
རིག་གསར་མཇལ་བའི་ཀླད་རྩར་རྒོལ་བ་མཐོང་དུས།།
གས་ཆག་ཕྱིན་པའི་སེམས་ཁོངས་འགྱོད་པས་གདུང་སོང་།།
