འབྲི་བྱ་གླག་ནས།
དལ་འབྱོར་རྟེན་བཟང་ཟེར་བཞིན་དུ།
རྣམ་གཡེང་འཁྱུད་ནས་མི་ཚེ་འདས།།
བྱམས་དང་བརྩེ་བ་ཟེར་བཞིན་དུ།།
རང་གཅེས་གཞན་སྡང་གློག་ལྟར་འཁྱུག །
མ་འོངས་ཕུགས་བསམ་ཟེར་བཞིན་དུ།།
ལེ་ལོ་གཡེང་བའི་འདམ་དུ་བྱིང་།།
ཁ་ནས་ལ་ཞེན་ཟེར་བཞིན་དུ།།
ནང་དམེ་མཚོན་གྱིས་མདུང་རྩེར་བཙུད།།
ལྷག་བསམ་གཞུང་དྲང་ཟེར་བཞིན་དུ།།
སྒེར་སེམས་རྒྱ་མཚོའི་རླབས་བཞིན་འཕྱོ།།
མེས་པོའི་ཕ་སྐད་ཟེར་བཞིན་དུ།།
གཞན་སྐད་བསྲེས་ནས་སྙིང་རྩ་བསྒུལ།།
རང་གཞན་གཉིས་ཕན་ཟེར་བཞིན་དུ།།
སྒེར་དོན་ཁོག་ཏུ་མེ་ལྕེ་འཚུབས།།
ཆགས་ཞེན་སྤོང་དགོས་ཟེར་བཞིན་དུ།།
ཉིན་མཚན་དབྱེར་མེད་ནོར་ལ་འཁྲེང་།།
དུས་རབས་ཉེར་གཅིག་ཟེར་བཞིན་དུ།།
རྙིང་ཞེན་ལྟ་བའི་དུ་ནག་འཁྲིགས།།
རྡོག་རྩ་གཅིག་སྒྲིལ་ཟེར་བཞིན་དུ།།
ཕྱོགས་འཐེན་སྤུན་ཟླའི་ཚེ་སྲོག་རྒོལ།།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།