རི་ལས་ལྗིད་པའི་ལུས་པོ་འདི།།
ཡར་དུ་བསླངས་ཀྱང་ཚ་བས་བཟི།།
དྭངས་ཤིང་གསལ་བའི་རྣམ་ཤེས་འདི།།
ཚ་བའི་ཀློང་དུ་མུན་ལྟར་འཐིབ།།
དེ་རིང་གནམ་ལ་སྤྲིན་པ་འཁོར།།
རླུང་བུ་དེ་ཡང་གྲང་ཞིང་བསིལ།།
ཚ་བའི་དྲོད་ཀྱིས་གཙེས་གཙེས་ཀྱིས།།
དལ་ཅིག་སེམས་འདི་ལྷོད་དུ་གྱུར།།
གློ་བུར་ཅི་ཞིག་བྱས་སམ་ཅི།།
ལུས་ཕྲ་འཁྱུགས་པའི་སྣེ་མོ་ནས།།
དབྱར་གྱི་རྔ་སྒྲ་འུར་གྱིས་ལྡིར།།
སྤྲིན་གྱི་མེ་ཏོག་ས་རུ་འཐོར།།
འཛིན་མ་ལན་ཅིག་ཁྲུས་ལ་རོལ།།
རྐང་འཐུང་འདི་རྣམས་གཉིད་ལས་བསླངས།།
ད་རུང་སྒེའུ་ཁུང་བར་གསེང་ནས།།
ཆར་གྱི་ཟིལ་བ་གདོང་ལ་འཐོར།།
དེ་ནས་རིམ་གྱི་སྒྱུ་སྐར་ལམ།།
སྤྲིན་གྱི་དར་སྒོ་བྱེ་བ་ན།།
སྣང་བྱེད་བུ་མོས་འཛུམ་ཙམ་གྱིས།།
ས་ཡི་ངོས་ནས་སྨུག་པ་འཁྱིལ།།
༢༠༡༧—༣—༦
