ཀྱེ་ཀྱེ་གངས་རིའི་ཞིང་བཞུགས་བདག་གི་ནི་གྲོགས་མཆེད། །ཤེས་རྨོངས་གཉིད་ཀྱི་ཞིང་ནས་མིག་ཟུང་ཞིག་གདངས་ནས།།
ཀུན་ཕན་གཟི་བྱིན་འབར་བའི་རེ་སྐོང་གི་ནོར་བུ། །ལེན་ལ་སོམ་ཉི་མེད་པར་འདི་ན་རུ་ཕེབས་ཤོག །
ཁ་བའི་མདངས་ལ་འཁུ་བའི་རིགས་ཞེན་གྱི་ལ་རྒྱ། །རང་རིགས་གསོན་པོར་གནས་པའི་ཚེ་སྲོག་གི་རྒྱུ་ཐག །
མི་ཉམས་རྒྱུན་འཛིན་བྱེད་འདོད་སྙིང་སྟོབས་ཤིག་ཡོད་ན། །སོམ་ཉིའི་དྲྭ་བ་བཅད་དེ་འདི་ན་རུ་ཕེབས་ཤོག །
མཉམ་མེད་ཐུབ་པའི་དབང་པོའི་ཞི་བསིལ་གྱི་དམ་ཆོས། །ཞི་བདེའི་ཚེ་སྲོག་གསོ་བའི་འཆི་མེད་ཀྱི་བདུད་རྩི།།
ཉོན་མོངས་གདོན་གྱིས་གཟིར་བའི་ཟུངས་ཟེད་ཀྱི་ནད་པར། །སྦྱིན་ལ་སྙིང་རྗེ་ཡོད་ན་འདི་ན་རུ་ཕེབས་ཤོག །
དཀའ་སྡུག་སྣ་དགུས་བསགས་པའི་རྒྱུ་ནོར་གྱི་ཕུང་པོ། །ཕངས་མེད་སྦྱིན་པར་ནུས་པའི་དྲིན་ཅན་གྱི་ཕ་མའི།།
ལྷད་མེད་བྱམས་བརྩེས་བསྐྱངས་པར་དྲིན་བཟོ་ཞིག་འདོད་ན། །སྒྱིད་ལུག་ལྕགས་སྒྲོག་བཅད་དེ་འདི་ན་རུ་ཕེབས་ཤོག །
