འབྲི་སྐལ་བཟང་། བདག་ཅག་གི་སྟོན་པ་བླ་ན་མེད་པ།

སངས་རྒྱས་ཤཱཀྱ་ཐུབ་པ་མི་ཡུལ་ནས་ལྷ་ཡུལ་ལ་ཕེབས། དེར་ཆོས་གསུངས་ནས་ཉིན་ཞག་དགུ་བཅུ་བཞུགས་པ་དང་། སླར་ཡང་འཛམ་བུ་གླིང་གི་གདུལ་བྱ་རྣམས་ཀྱི་དོན་དུ་མི་ཡུལ་ལ་ཕེབས་པའི་དུས་ལ་རྒྱལ་བ་ལྷ་ལས་བབས་པའི་དུས་ཆེན་ཟེར། དེ་ནི་བོད་ཟླ་དགུ་པའི་ཚེས་ཉེར་གཉིས་ལ་སྲུང་བརྩི་ཞུ་སྲོལ་ཡོངས་སུ་དར། དེ་ཡང་མ་ཡུམ་གྱི་ཆེད་དུ་ལྷ་ཡུལ་ལ་ཕེབས་པའི་ཚུལ་ནི་འདུལ་བ་ལུང་ལས་བྱུང་བ་དང་། སྐྱེས་རབས་དཔག་བསམ་འཁྲི་ཤིང་ལས་ཀྱང་གསུངས། འདིའི་སྐོར་རྒྱས་པ་ནི་མདོ་མང་པོད་སོ་གཉིས་པ་ཐབས་ལ་མཁས་པ་སངས་རྒྱས་ཀྱི་དྲིན་ལན་བསབ་པའི་མདོ་ཞེས་པ་བམ་པོ་ཕྱེད་བརྒྱད་ལེའུ་དགུའི་བདག་ཉིད་ཅན་དེ་ཡིན། ལེའུ་གཉིས་པ་སྲི་ཞུའི་ལེའུ་སྟེ། རྒྱལ་བུ་དགེ་དོན་གྱིས་རང་གི་སྲོག་བཏང་ནས་ཡབ་ཡུམ་གྱི་སྲོག་བླུས་པའི་ཚུལ་སོགས་སྒོ་སྣ་ཚོགས་ནས་དྲིན་ལན་བསབ་པའི་ཚུལ་བསྟན། གསུམ་པ་གཉེན་པོའི་ལེའུ། བཞི་པ་སེམས་བསྐྱེད་པའི་ལེའུ་གཉིས་ཀྱིས་ཀྱང་རྣམ་གྲངས་ཐ་དད་པའི་སྒོ་ནས་དྲིན་ལན་བསབ་པའི་སྐོར་གསུངས། ལེའུ་ལྔ་པ་བསྟན་བཅོས་ཀྱི་ལེའུས་དམིགས་བསལ་ལྷ་ལས་བབས་པའི་སྐོར་དང་འབྲེལ་བའི་ཡུམ་ལྷ་མཛེས་མ་དང་སངས་རྒྱས་ཉིད་མ་བུར་གྱུར་པའི་རྒྱུ་རྐྱེན་སོགས་གསུངས་ཡོད། མདོར་ན་སྐྱེས་རབས་ཀྱི་ཕྲེང་བ་མང་པོར་ཡབ་ཡུམ་གྱི་དྲིན་ལན་བསབ་པའི་ཚུལ་རྒྱས་པར་འཆད་པའི་ནང་ཚན་སྐུ་ཚེ་དེ་ཉིད་ཀྱི་མར་གྱུར་པ་ཡུམ་སྒྱུ་མ་ལྷ་མཛེས་མའི་དྲིན་ལན་བསབ་པའི་ཆེད་ལྷ་ཡུལ་དུ་ཕེབས། དེ་ནས་མི་ཡུལ་གྱི་གདུལ་བྱ་རྣམས་ལ་གཟིགས་ནས་ཕྱིར་ཕེབས་པར་འདོད། སངས་རྒྱས་ལྷ་ཡུལ་དུ་བཞུགས་རིང་རྒྱལ་པོ་ཨུ་ཏྲ་ཡ་ནས་སངས་རྒྱས་དྲན་དྲག་ནས་དད་པའི་རྟེན་ཙན་དན་ལས་གྲུབ་པའི་སངས་རྒྱས་དངོས་ལྟ་བུའི་སྐུ་བརྙན་ཞིག་ཀྱང་བཞེངས་པར་གྲགས། སྐབས་དེར་རྒྱལ་བ་ལྷ་ལས་བབས་པའི་གནས་སུ་ལྷ་བབས་མཆོད་རྟེན་ཞེས་པ་ཞིག་དད་པའི་རྟེན་དུ་བཞེངས་པ་དེང་སང་ཀེ་ས་ར་ཞེས་པའི་ཡུལ་ལ་མཇལ་དུ་ཡོད། བོད་པ་རྣམས་ཀྱིས་ཀྱང་དུས་ཚེས་དེ་ལ་རྣམ་དཀར་དགེ་བའི་ལས་ལ་བརྩོན་པ་དང་། ལྷ་ཁང་དང་མཆོད་རྟེན་སོགས་ལ་དཀར་རྩི་གསོལ་བའི་ལུགས་སྲོལ་ཡོད། སྟོན་པའི་བཀའ་དྲིན་རྗེས་དྲན་གྱི་མཚོན་བྱེད་ཙམ་དུ།

རྡོ་དཀར་ཁྲ།     

ང་རང་རྒྱ་གར་ན་གྲགས་ཆེ་བའི་ཀང་རའི་མཁར་རྫོང་གི་ཉེ་འཁོར་འདིར་འཚོ་བ་བསྐྱལ་ནས་མི་ལོ་ཧྲིལ་པོ་མང་དག་ཅིག་ཕྱིན་མོད།

ལྷ་སའི་རྒས་མོས་ལྷ་སའི་ཇོ་བོ་མི་མཇལ་ཞེས་པའི་དཔེ་ལྟར་ལོ་དེ་དག་གི་རིང་ལ་ངས་ཀང་རའི་མཁར་རྫོང་ཇི་འདྲའི་རྫིག་ཉམས་ལྡན་པ་ཞིག་ཡིན་པ་མིག་གིས་ལོངས་སུ་སྤྱོད་མ་ཐུབ་པར་ལུས། དེ་ནི་གཙོ་བོར་རྒྱུ་མཚན་གཅིག་ཁོ་ན་ལས་མེད་དེ་རང་ཉིད་རླངས་འཁོར་ནང་མི་འཕྲོད་པ་དེ་རེད། ངས་རྒྱུན་དུ་རང་ཉིད་ཅིའི་ཕྱིར་རླངས་འཁོར་ནང་མི་འཕྲོད་པ་རེད་ཅེས་སོ་སོས་སོ་སོར་འཁང་ར་བྱེད་ཀྱི་ཡོད།

གལ་སྲིད་རླངས་འཁོར་ནང་འགྲོ་སྐབས་མགོ་ཡུ་འཁོར་བ་སོགས་ཀྱི་དཀའ་ངལ་མེད་ཚེ། ངས་མ་མཐར་ལ་གུང་སེང་གི་དུས་ཚོད་དག་བེད་སྤྱད་ནས་རྒྱ་གར་དུ་གྲགས་ཆེ་བའི་གནའ་བོའི་དགོན་རྙིང་དང་རྒྱལ་ཁང་སོགས་མང་པོ་ཞིག་མིག་གིས་ལོངས་སུ་སྤྱད་ཚར་ཡོད་ངེས་རེད་ལ། མ་འོངས་པར་ང་རང་བོད་དུ་ཕྱིར་ལོག་ཐུབ་པའི་གོ་སྐབས་ཤིག་ཤར་ཚེ། ངས་ཁོང་ཚོ་ལ་གནས་འདིར་གྲགས་ཆེ་བའི་དགོན་རྙིང་དང་མཁར་རྫོང་སོགས་མང་དག་ཅིག་གི་མཛེས་སྡུག་ངོ་སྤྲོད་བྱེད་ཐུབ། ཡིན་ན་ཡང་། ང་རང་ཡུལ་གྱར་གྱི་འཚོ་བ་བསྐྱལ་ནས་ལོ་མང་འདས་ཀྱང་མཁའ་དབུགས་དོག་པའི་ཤིང་ནགས་འདིའི་དཀྱིལ་དུ་ལུས་ནས་རྒྱུས་ཡོད་དུ་གྱུར་བ་ནི་གྲོག་མ་དང་ཤིང་འབུ་ཙམ་དུ་ཟད། སྟབས་ལེགས་པ་ཞིག་ལ་དགེ་རྒན་མེ་འོད་ཀྱི་བཀའ་དྲིན་ལ་བརྟེན་ནས་ང་རང་འཚོ་སྡོད་བྱེད་སའི་ཉེ་འཁོར་ན་མི་ལོ་ཧྲིལ་པོ་སུམ་སྟོང་ལྔ་བརྒྱ་ལྷག་གི་ལོ་རྒྱུས་ལྡན་པའི་ཀང་རའི་མཁར་རྫོང་གི་མཛེས་སྡུག་འཛིན་གྲོགས་ཚོ་དང་ལྷན་དུ་མཉམ་སྤྱོད་བྱེད་པའི་ཉིན་བཟང་ཞིག་དེ་རིང་གཞི་ནས་ཤར་བ་རེད།

སློབ་གྲྭ་བ་འབྲི་རུ་བསླབ་གསུམ་དར་རྒྱས།

རྭ་བ་གངས་རིས་བསྐོར་བའི་བསིལ་ལྡན་གྱི་ལྗོངས་ནས། །སྤྲ་སྲིན་ལས་ཆད་ལྷད་མེད་སྤྲེའུ་ཕྲུག་གི་ཁྱུ་དང༌།།
ཀྱག་ཀྱོག་སྲང་ལམ་དོག་པོ་དུ་མ་ཞིག་བརྒྱུད་དེ། །འཕགས་ཡུལ་འཕགས་པའི་ཕྱོགས་སུ་གོམ་སྟབས་ཤིག་བསྒྱུར་ཡིན།།

འཇིགས་རུང་གཤིན་རྗེས་བསྐོར་བའི་འཕྲང་འགག་ཅིག་བརྒྱུད་དེ། །ཚེ་སྲོག་རྩམ་རྐྱང་ཆུ་ལ་སྐྱབས་གནས་ཤིག་བཅོལ་ནས།།
ངམ་ནག་སོ་བལྟས་བསྲུང་བའི་ལ་མོ་ཞིག་བརྒྱབ་སྟེ། །ཚེ་སྲོག་མ་ཤོར་ཙམ་དུ་འཕགས་ཡུལ་དུ་སླེབས་སོང༌།།

འཕགས་མཆོག་སྤྱན་རས་གཟིགས་ཀྱི་བྱིན་མཐུ་ལ་བརྟེན་ནས། །གདན་ས་སེ་རྭ་ཐེག་པ་ཆེན་པོ་ཡི་གླིང་དུ།།
འདི་ཕྱིའི་དགོས་འདོད་སྩོལ་བའི་ཡིད་བཞིན་གྱི་ནོར་བུ། །འདི་ན་ཤེས་རིག་རྒྱ་མཚོའི་གཏེར་ཁ་ཞིག་བརྡོལ་འདུག །

ཁ་བའི་ལྗོངས་ལ་ལྟེ་ཁྲག་འཕོས་པའི་གངས་ཕྲུག་དར་མ།།མི་རིགས་གཞན་གྱི་སྐད་ཡིག་དག་ལ་མཁས་པར་གྱུར་ཀྱང༌།།

ཕ་མེས་བཟང་པོའི་རང་སྐད་སྨྲ་ལ་ལྕེ་རྩེ་འཁུམ་ན།།ཁ་བ་གངས་ཅན་བོད་པ་ཚང་གི་རྒྱུད་པ་མ་རེད།།

ཕ་ཡུལ་གངས་ལྗོངས་ཆོལ་ཁ་གསུམ་ལ་དུང་ཞེན་ཆེ་བའི།།ཤ་ཁྲག་རིགས་རུས་གཅིག་ལས་ཆད་པའི་དྭངས་མའི་སྤུན་གྲོགས།།
ཡབ་མེས་དག་གིས་བསྐྲུན་པའི་སྐད་ཡིག་མཐོང་ཆུང་མ་བརྩི། །སྒང་པ་བོད་ཀྱི་ཕ་མས་བཞག་པའི་བླ་སྲོག་འདི་ཡིན།།

བརྗིད་ཆགས་གངས་དཀར་ལྷུན་པོའི་འདབས་ནས་འཚར་ལོངས་བྱུང་བའི།།རིགས་མཐུན་ལས་ཀྱིས་བསྐོས་པའི་དེང་དུས་གངས་ཕྲུག་འགའ་ཡིས།།
རང་སྐད་དོར་ནས་འདྲེས་མའི་ཤན་སྐད་འབོད་པ་འདི་ནི།།ཕ་སྐད་གཙང་མ་གཏོར་བའི་ཕོ་ཉ་སླེབས་པ་མིན་ནམ།།

མདོར་ན་འཛམ་གླིང་གོ་ལ་ཟླུམ་པོའི་རྩེ་མོར་གནས་པའི།།སེམས་ཀྱི་འདུན་པ་གཅིག་པའི་ཁ་བའི་སྤུན་ཟླ་ཚང་མས།།
མི་མཛེས་མི་སྙན་འདྲེས་མའི་ཐན་སྐད་སྣང་མེད་ཞོགས་ལ།།གདོང་དམར་བོད་པའི་རང་སྐད་གཙང་མ་རྒྱུན་དུ་སྤྱོད་རོགས།།

འཇམ་དབྱངས་ནོར་བུ།

ནགས་ཤོད་སྐལ་རྒྱན།

ཕ་ཡུལ་ས་ཐག་རིང་བའི་ཕ་རོལ་ན། །
ཕ་མའི་གནས་ལུགས་གླེང་བའི་ཕ་བཟང་བུ། །

ཕ་མའི་ལ་རྒྱ་འཚོ་ནས་ཕ་རྗེས་འབྲང། །
ཕ་མེས་དམ་པའི་ཕ་ཡུལ་སྐྱོང་ནས་ཤོག །

ཕ་མ་བཟང་པོའི་ཕ་སྐད་ངག་སྒོ་དབྱེ། །
ཕ་ཡུལ་ལོ་རྒྱུས་རིང་མོའི་ཕ་ཡུལ་འཚོལ། །
ཕ་མའི་གཤིས་ཀ་བཟང་བའི་ཕ་ཡུལ་ན། །
ཕ་མའི་བསླབ་བྱ་ཕ་བུའི་ལ་རྒྱ་ཡོད། །

ཕ་ཁྱིམ་དྲོན་མོ་ཕ་མའི་དྲོད་ཁོལ་ལྡན། །
ཕ་བཟང་བུ་སྐྱིད་ཕ་མའི་བཀའ་དྲིན་ཡིན། །
ཕ་མ་མ་བརྗེད་ཕ་བུའི་དམ་ཚིག་ཡོད། །
ཕ་མ་ལ་གུས་ཕ་མའི་དྲིན་ལན་ཡིན། །

མདོ་ཁམས་ནགས་ཤོད་བློ་བཟང་ཕུན་ཚོགས་། 

ཨོཾ་སྭ་སྟི།བླ་མ་དཀོན་མཆོག་གསུམ་གྱིས་དགེ་ལེགས་སྩོལ།། རླུང་སྦྱོར་ལུས་ཁམས་བདེ་སྦྱིན་ཞེས་བྱ་བ།།
དགེ་སློང་བློ་བཟང་དོན་ལྡན་ལམ་སྟོན་བཞིན།། གཞན་ལ་ཕན་ཕྱིར་ཅུང་ཟད་འབྲི་བར་བྱ།།

ནང་ཆོས་གསང་བ་སྔགས་ཀྱི་ཐེག་པ་ལས།། རྩ་་ཐིག་རླུང་གསུམ་ཉམས་སུ་ལེན་པའི་ཚུལ།།
ཟབ་ཅིང་རྒྱས་པའི་ལེགས་བཤད་ཡོད་ན་ཡང༌།། ད་ལྟ་དེ་དག་བཤད་ཆོས་ཙམ་ཞིག་ལས།།

ལག་ལེན་དངོས་ཐོག་ཁེལ་མཁན་དཀོན་འདི་སྐྱོ།། ད་ནི་མགོ་ཟླུམ་གོས་དམར་སྡེ་པ་འདི།།
ཕྱག་གི་ཐལ་མོ་བྲང་ལ་རབ་སྦྱར་ཏེ།། དབང་ཕྱུག་རྗེས་འབྲང་ཕྱི་པ་རལ་ཅན་ལ།།

ནགས་ཤོད་སྐལ་རྒྱན།

ངས་བསམ་ཚུལ་ཐུང་ངུ་ཞིག་ཞུ་འདོད། སྐད་ཡིག་ཡར་རྒྱས་གཏོང་སྟངས་ནི་བེད་སྤྱོད་མང་ཙམ་བྱེད་ནས་དོ་སྣང་བྱ་རྒྱུ་དེ་རེད།

དེ་ཡོང་བ་ལ་ཡིག་རྨོངས་སེལ་དགོས་པ་རེད། ཡིག་རྨོངས་ཟེར་དུས་ཀ་ཁ་མ་ཤེས་པ་ནས་བརྡ་སྤྲོད་ཚད་ལྡན་མ་ཤེས་བར་བཞག་ཆོག གང་ལྟར་ཡི་གེ་མ་ཤེས་པ་ཤེས་པར་བྱ་རྒྱུ་དེ་རེད། མི་ཚང་ནས་མི་ཚང་། གྲོང་པ་ནས་གྲོང་པ། ལུང་པ་ནས་ལུང་པར་བརྒྱུད་ནས་ཡི་གེ་བསླབ་རྒྱུ་དེ་ཤིན་ཏུ་གལ་འགངས་ཆེ་བ་མཐོང་། དེར་བརྟེན་སྤྱི་ཚོགས་ཐོག་ལྷག་བསམ་དང་ཤེས་ཡོན་དཔལ་འབྱོར་ཡོད་མཁན་ཚོས་ཤུགས་སྣོན་རྒྱག་ཐུབ་ན་དགེ་མཚན་ཆེ་བའི་བྱ་བཞག་རེད་དྲན། དེ་ཡང་ཆེ་ས་སློབ་གྲ་ལྟ་བུ་དང་། ཆུང་ས་ཆུ་ཚོད་ནས་ཉིན་ཞག་གང་ལྟར་དུས་ཚོད་ཉུང་ངུ་ལས་མེད་ན་ཡང་། ཀ་ཁ་བསླབ་ཐུབ་མཁན་གྱིས་ཀ་ཁ། སུམ་རྟགས་དག་གསུམ་བསླབ་ཐུབ་མཁན་གྱིས་སུམ་རྟགས་དག་གསུམ་བསླབས་པ་ཡིན་ན་རིམ་པས་ཤེས་ཡོན་གོང་མཐོར་འགྲོ་བའི་ཐབས་ལམ་བཟང་ཤོས་སུ་མཐོང་། ་ལོ་ཟླ་དུས་ཁོམ་མེད་མཁན་ཡིན་ཀྱང་སྔ་དྲོ་དང་ཕྱི་དྲོ་རེ་ཙམ་དང་། མ་མཐའ་བདུན་རེའི་ནང་ལ་ཀ་ཁ་ཐེངས་རེ་བསླབས་ན་མི་རིང་བར་ཤེས་ཐུབ་རྒྱུ་ཐེ་ཚོམ་མེད། སློབ་མ་ཡང་གཅིག་གཉིས་ལས་མེད་ཀྱང་གྲངས་འབོར་གྱི་གནས་འགག་མ་རེད་ངེས་པར་དུ་སློབ་སྦྱོང་སྤྲོད་ཐབས་བྱེད་དགོས་པ་རེད། དེ་བཞིན་ཆེ་ས་སློབ་ཁང་ནས་ཆུང་ས་སྙུ་གུ་འབྲི་དེབ་སོགས་མཐུན་རྐྱེན་དགོས་པས་འབྱོར་བ་ལ་གཞིག་པའི་རྒྱབ་སྐྱོར་རེ་གནང་བ་ཡིན་ན་ང་ཚོས་སྐད་ཡིག་དང་སྐད་ཡིག་ཅེས་པའི་མངོན་འདོད་དེ་མངོན་དུ་འགྱུར་ཐུབ་སྙམ་མོ། །

 ནགས་ཤོད་སྐལ་རྒྱན་པས།

ཀ་སོགས་གངས་ཅན་བོད་ཀྱི་ཡི་གེ་ཡིན། ། ཁ་བ་བོད་པའི་གཞོན་ནུ་ཕོ་མོས་སྦྱོངས། །
ག་ཚད་དཀའ་ལས་ཁ་ཡང་སྡུག་རུས་བྱོས། ། ང་ཚོའི་སྐད་ཡིག་མ་ཤེས་ངོ་ཚ་ཡིན། །

ཅ་གས་བཅང་རྒྱུ་ནང་གི་སྐད་ཡིག་དང་། ། ཆ་ལུགས་ཕྱི་ཡི་སྤྱོད་ལམ་མ་འགྱུར་བར། །
ཇ་མར་ཐུད་སོགས་བོད་ཟས་གཙང་མ་ལས། ། ཉ་འབུ་སྡིག་སྲིན་ཟ་བ་ངོ་ཚ་ཡིན། །

ཏ་ཐ་ག་ཐའི་བསྟན་འདི་དགག་བྱ་མིན། ། ཐ་སྙད་གནའ་དེང་རིག་གཞུང་འཛེམས་བྱ་མིན། །
ད་གཟོད་རིན་ཐང་མ་ཤེས་མཁས་པ་མིན། ། ན་རེ་སྐྱོན་དུ་ལྟ་བ་ངོ་ཚ་ཡིན། །

འགོམ་ལམ་བཟང་།

རི་ཆུ་གྲངས་མེད་དང་ལེ་བར་ཁྲི་ཕྲག་གིས་བསྐལ་བའི་ཕར་ནང་ནས་རང་ཡུལ་ལ་འཕྲེང་བའི་མི་བུ་

ཞིག་གིས་དུས་ཀྱི་ཡོལ་བའི་ཕག་ནས་རྒྱང་ལྟ་བྱས་པའི་ཚོར་བའི་དུམ་བུ་འགའ་ཞིག།

ཞིང་འབྲོག་གཉིས་ལ་ལྟ་བའི་ཚོར་བའི་དུམ་བུ།
ཕྱིའི་དངོས་པོའི་འཕེལ་རིམ་གྱི་ཚ་རླབས་འཕྱུར་བཞིན་པར་བརྟེན་མི་རྣམས་ཀྱང་ཁྲ་ཁྲ་ཟིང་ཟིང་གི་ཁོེར་ཡུག་དང་ཅ་དངོས་དག་ལ་ཡིད་སྨོན་ནས། རང་གི་མི་རབས་ནས་བརྒྱུད་པའི་ལམ་དང་ལུགས་སྲོལ་རྣམས་ཡལ་བར་འདོར་ལ་བྲེལ་བཞིན་ཡོད། ཕ་མེས་ཡང་མེས་ནས་བདམས་པའི་འཚོ་རྟེན་དངོས་ཕུ་ལ་འབྲོག་ས་དང་མདོ་ལ་ཞིང་ས་དེ་དག་ལས་བྱུང་བའི་ཐོན་བསྐྱེད་རྣམས་ལོངས་སྤྱད་ནས་ད་ལྟ་ང་ཚོའི་མི་རབས་བར་དུ་འཚོ་ཐུབ་པ་བྱུང་ཡོད་མོད། ཨ་གསར་ལ་དགའ་བའི་མི་བུ་དག་གིས་གནས་སྐབས་ཀྱི་བདེ་སྐྱིད་ཕྲན་བུ་མ་ལྟོགས་མ་འཁྱག་ཙམ་གྱིས་ཆོག་པར་བྱས་ནས། ཕུགས་བསམ་དང་། མདུན་རྒྱང་། འབྱུང་འགྱུར་བྱ་བཞག་ལ་མནོ་བསམ་གང་ཡང་མེད་པར་ཧོལ་རྒྱུགས་ཁོ་ནར་མོས་པ་འདི་བཟང་རྟགས་ཤིག་ལར་ནས་འགའ་ཤས་ཀྱིས་ད་བར་དུ་ཞིང་འབྲོག་ལ་བརྩོན་བཞིན་པ་ནི་རྗེས་ལུས་ཡང་ལུས་སུ་སེམས་ཀྱིན་འབྲོག་པས་རྟ་ནོར་ལུག་གསུམ་སོགས་འཚོང་གང་ཐུབ་དང་། ཞིང་པས་ས་ཞིང་རྨོ་འདེབས་མི་བྱེད་པར་ཞིང་ཁ་སྤང་ལ་འཇོག་པ་དང་། གཞན་ལ་བཙོངས་ནས་ཁང་པ་རྒྱག་ས་བྱས་པ་སོགས། མདོར་ན་བློ་གཏད་ཡོད་ཚད་རྟག་བརྟན་འགྱུར་མེད་དུ་རློམ་པའི་དབྱར་རྩྭ་དགུན་འབུ་ལ་བཅོལ་ནས་རིན་བྲལ་གྱི་ས་ཞིང་རྣམས་རྩ་མེད་གཏོང་བཞིན་ཡོད། དེར་བརྟེན་འབྲོག་པའི་ས་ཆར་གཞིགས་ན། རྟ་ནོར་ལུག་སོགས་ནི་མེད་དུ་མི་རུང་བའི་ནོར་བུ་ཞིག་ཡིན་རུང་། ནོར་བུའི་ནོར་ཉམས་མ་ཆོད་ནས། དེང་སང་ལུག་དང་ར་ཕལ་ཆེར་བཙོངས་ནས་མེད་པར་བྱས་ཟིན་ལ། རྟ་ནི་བེད་མེད་གྱུར། གཡག་དང་འབྲི་དག་ཞོགས་པ་རི་ལ་གཏོང་བ་དང་དགོང་མོ་ལྷས་སུ་སྐོར་ཐུབ་ཙམ་ལས་ཉིན་གང་པོར་སྔ་ལྟས་མེད་པར་འཁྱམས་འཇུག་གིན་ཡོད། དེ་དག་གིས་མཚོན་ད་ཆར་ཟོག་རྣམས་ཉར་སྙིང་འདོད་ལ་མི་འདོད་ཀྱི་ཚད་དུ་ལྷུངས་ཡོད། འབྲོག་པའི་ནོར་བུ་སྟོང་ལ་ཉེ་བ་དང་འདི་སྟོངས་ན་ཚད་གང་དུ་ལྷུང་མིན་ནི་ཨ་རོགས་འབྲོག་པ་རྣམས་ཀྱིས་བསམ་གཞིགས་གང་ཡང་བྱས་མེད་ཚོད་རེད།

ནགས་ཧ་ཧ་སྐལ་བཟང་།

དེང་སྐབས་འཛམ་བུ་གླིང་འདིར་རྒྱལ་ཁབ་དང་ཡུལ་ལུང་གང་སར་དར་གུད་སྣ་ཚོགས་པ་འདིའི་ཁྲོད་དུ་དབུལ་ཕྱུག་གི་འཕོ་འགྱུར་གྲངས་མེད་པ་ཞིག་འགྲོ་བཞིན་པ་དང་དུས་མཚུངས།ར་བྭ་གངས་རིའི་ཕྲེང་བས་ཡོངས་སུ་བསྐོར་བའི་བོད་ཆོས་ལྡན་གྱི་ཞིང་དུ་ཡང་དབུལ་ཕྱུག་གི་འཕོ་འགྱུར་དང་།གཞན་ནང་ཆོས་དང་བོད་ཀྱི་སྐད་ཡིག་སོགས་ཐུན་མོང་མ་ཡིན་པའི་རིག་གཞུང་རྣམས་ཉམས་རྒུད་ཆེན་པོ་ཞིག་འགྲོ་བཞིན་ཡོད་ལ།དེ་འདྲ་འབྱུང་བའི་རྒྱུ་རྐྱེན་མང་པོ་ཞིག་ཡོད་ཀྱང་མི་མངོན་པའི་རྒྱུ་རྐྱེན་གཙོ་བོ་ཞིག་ནི་དབྱར་རྩྭ་དགུན་འབུ་ཞེས་པ་འདི་ཡིན་པར་སེམས།དེ་ཡང་བོད་ཀྱི་ས་ཁུལ་མང་པོ་ཞིག་དེ་སྔོན་སྲོལ་རྒྱུན་གྱི་འཚོ་རྟེན་ཞིང་པ་ཚོས་ས་ཞིང་འདེབས་ལས་བྱེད་པ་དང་འབྲོག་པ་ཚོས་སྒོ་ཟོག་གསོ་སྐྱོང་བྱས་ནས་འཚོ་བ་སྐྱེལ་གྱི་ཡོད་ན་ཡང་།ད་སྐབས་ཞིང་འབྲོག་མང་ཚོགས་ཀྱི་ཐོན་སྐྱེད་ཆ་ཚང་དང་ཁ་བྲལ་ཏེ་དབྱར་རྩྭ་དགུན་འབུ་ཁོ་ན་ལ་བརྟེན་ནས་འཚོ་བ་སྐྱེལ་མཁན་མི་ཉུང་བ་ཞིག་བྱུང་དང་འབྱུང་བཞིན་ཡོད།