འབྲི་ལྷ་རམས་དགེ་བཤེས་ངག་དབང་ཐོགས་མེད།

ཐེག་གསུམ་བྱང་ཆུབ་བགྲོད་ལ་ལྟ་བའི་མིག །
ཡང་དག་ཇི་བཞིན་གསལ་བར་སྟོན་མཛད་པའི།།
སྟོན་མཆོག་ཤིང་རྟ་ཆེན་པོ་ཡབ་སྲས་དང་།།
འཇམ་མགོན་བླ་མ་སྲས་དང་བཅས་ལ་འདུད།།

རྗེའི་དངོས་སློབ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པས་ཆོས་ཀྱི་སྡེ་ཆེན་པོ་དཔལ་ལྡན་འབྲས་དཀར་སྤུངས་པ་ཕྱག་བཏབ་ནས་ལོ་ངོ་དྲུག་བརྒྱ་འཁོར་བའི་བཀའ་དྲིན་རྗེས་དྲན་དུ།  མཁས་པའི་བགྲོ་གླེང་གི་སྐབས་སུ།  གུས་ལ་བརྗོད་གཞི་རྩ་ཤེས་རབ་བྱེད་བཅོ་བརྒྱད་པའི་དཀའ་གནད་ཞིག་ལ་དཔྱད་རྩོམ་དགོས་ཞེས་བཀའ་གནང་བ་ལྟར། འདིར་རབ་བྱེད་བཅོ་བརྒྱད་པའི་དོན་ལ་ཅུང་ཟད་དཔྱད་ན།།

རབ་བྱེད་བཅོ་བརྒྱད་པའི་བརྗོད་བྱ་བསྟན་ཚུལ་ནི།  དབུ་མའི་གཞུང་ཆེ་མོ་རྣམས་སུ་ཆོས་ཅན་སོ་སོ་བ་དཔག་དུ་མེད་པ་ལ་རང་བཞིན་འགོག་པའི་རིགས་པ་ཡང་ཚུལ་དུ་མ་གསུངས་ཀྱང་། འདིར་རྣལ་འབྱོར་པས་ཐོག་མར་འཇུག་པའི་ཚེ། འཇིག་ལྟས་བཟུང་བའི་བདག་དེ་ཕུང་པོ་དང་གཅིག་ཐ་དད་གང་དུ་ཡོད་བརྟགས་ཏེ།  དེའི་ཡུལ་སུན་ཕྱུང་བའི་སྒོ་ནས་བདག་དང་བདག་གི་བ་ལ་རང་བཞིན་མེད་པ་གཏན་ལ་ཕབ་ནས་བསྒོམ་པ་ནི། རབ་བྱེད་འདིའི་དོན་ཡིན་པར་སློབ་དཔོན་སངས་རྒྱས་བསྐྱངས་ཀྱིས་གསུངས་པའི་རྗེས་སུ་འབྲངས་ནས་དཔལ་ལྡན་ཟླ་བའི་འཇུག་པར་གང་ཟག་གི་བདག་མེད་སྟོན་པ་རྣམས་ཀྱང་རབ་བྱེད་བཅོ་བརྒྱད་པ་འདི་ཉིད་རྒྱས་པར་འཆད་པ་ཡིན་ནོ།  འོ་ན་རབ་བྱེད་བཅོ་བརྒྱད་པ་འདིས་བདག་དང་བདག་གི་བ་མེད་པ་གཏན་ལ་འབེབས་པའི་ཚུལ་ཇི་ལྟ་བུ་ཞིག་གོ་སྙམ་ན།  འདི་ལ་ཚིགས་སུ་བཅད་པ་བཅུ་གཉིས་ལས། དང་པོས་ནི་གནད་བཞིའི་སྒོ་ནས་འཇིག་ལྟའི་ཞེན་ཡུལ་འགོག་ཚུལ་བསྟན། འདི་གལ་ཆེ་བ་མཐོང་སྟེ་ཅུང་ཟད་སྤྲོས་ནས་འོག་ཏུ་འཆད་པར་འདོད་དོ།  དེ་ནས་ཚིག་རྐང་གཉིས་ཀྱིས་བདག་གི་བ་ལ་རང་བཞིན་མེད་པ་བསྟན། དེ་ནས་རྐང་པ་གཉིས་ཀྱིས་དེ་འདྲའི་བདག་མེད་རྒྱུན་ལྡན་དུ་བསྒོམས་པས་འཇིག་ལྟ་ལྡོག་པའི་ཚུལ་བསྟན། དེ་ནས་ཚིགས་སུ་བཅད་པ་གཅིག་གིས་བདག་མེད་བསྒོམས་པ་དང་བདག་འཛིན་སྤོང་བའི་རྣལ་འབྱོར་པ་ཡོད་པས་བདག་ཡོད་དོ་ཞེས་རྩོད་པའི་ལན་བསྟན། དེ་ནས་གཅིག་གིས་ཕྱི་ནང་གི་ཆོས་ལ་བདག་དང་བདག་གི་བ་ཟད་པས་ལེན་པ་ཟད་པ་དང་། དེ་ཟད་པས་སྐྱེ་བ་ཟད་པ་བསྟན། དེ་ནས་གཅིག་གིས་རྒྱུ་གང་ཞིག་ཟད་པས་ལས་ཉོན་ཟད་པ་དང་།    དེ་ཟད་པས་ཐར་པ་ཐོབ་པར་བསྟན་ཏོ།   །ཤེས་རབ་སྒྲོན་མར།  སྔ་མ་འདི་ཡན་ཆད་ཀྱིས་ཉན་རང་གི་ཐར་པ་དང་། ཕྱི་མ་འདིས་ཐེག་ཆེན་གྱི་ཐར་པ་བསྟན་པར་འཆད་ལ། བུདྡྷ་པཱ་ལི་ཏ་དང་ཚིག་གསལ་ལས། དེ་གཉིས་ཀས་འཁོར་བ་ལས་གྲོལ་བའི་ཐར་པ་ཐེག་པ་ཆེ་ཆུང་ཐུན་མོང་བ་བསྟན་པར་བཞེད་དོ། །དེ་ནས་གཅིག་གིས་ལུང་དང་མི་འགལ་བ་བསྟན་པ་སྟེ། མདོ་སྡེ་འགའ་ཞིག་ཏུ་བདག་ཡོད་པར་གསུངས་པ་དང་།  ཁ་ཅིག་ཏུ་མེད་པ་བསྟན་པ་དང།   ཁ་ཅིག་ལས་བདག་དང་བདག་མེད་པ་འགའ་ཡང་ངོ་བོ་ཉིད་ཀྱིས་གྲུབ་པ་མེད་དོ་ཞེས་ཀྱང་བསྟན་པ་ནི། གདུལ་བྱ་དམན་པ་རྣམས་ལ་སྐུར་འདེབས་སོགས་སྡིག་པ་ལས་བཟློག་པའི་ཕྱིར་དང་། བར་མའི་གདུལ་བྱ་རྣམས་འཇིག་ལྟ་ལྷོད་པ་དང་མྱང་འདས་ལ་འདུན་པ་བསྐྱེད་པའི་ཕྱིར་དང་། བློ་མཆོག་གི་གདུལ་བྱ་རྣམས་ལ་ཟབ་མོའི་དོན་བསྟན་པར་མཛད་དོ། ཞེས་བདག་ཡོད་པར་གསུངས་པའི་དགོངས་པ་བསྟན་ནས་ལུང་དང་མི་འགལ་བ་བསྟན་ཏོ། དེ་ནས་གཅིག་གིས་དོན་དམ་པར་བརྗོད་མི་ནུས་པའི་རྒྱུ་མཚན་དཔེ་དང་བཅས་པ་གསུངས་སོ།