ནགས་ཤོད་ཅོང་བརྡ།

མཁའ་ལམ་གཅིག་དང་འཁོར་ལམ་གཉིས་ལས་མེད་པའི་ལ་དྭགས་གླེད་ཀྱི་གྲོང་། །
འགྲོ་འདུག་དེ་ཙམ་བདེ་རྒྱུ་མེད་པའི་བྱེ་མའི་མངའ་སྡེ་ཆེན་པོ་དེར། །
ད་ལོ་དུས་དབང་སྐབས་སུ་གོ་སྐབས་བཟུང་ནས་གནས་དེར་ཐེངས་ཤིག་ཕྱིན། །
ལམ་འགག་འཇིགས་ཤིང་འཚོ་བ་དབེན་པའི་ལ་དྭགས་ཡི་དྭགས་གྲོང་ཁྱེར་ཉིད། །

དབུག་ཐེངས་གཅིག་གིས་ཅུང་ཙམ་འགྲེལ་ན་ལ་དྭགས་ཅེས་པ་འདི་མོ་ཙམ། །
གཡང་གཟར་ཕན་ཚུན་དྲན་གདུང་ཚུལ་དུ་དམ་པོར་འཁྱུད་ནས་འོ་བྱས་པ། །
རི་བོ་རེ་རེས་ང་མཐོ་ཁོ་མཐོ་ཞེས་ཏེ་ཕྱི་རྟིང་གནམ་ལ་ཀྱག །
ཆུ་མོ་འགའ་རེར་ཕྲག་དོག་ལངས་ནས་གདོང་པ་དམར་པོར་གྱུར་ཏེ་རྒྱུགས། །

ནགས་ཧ་ཧ་སྐལ་བཟང་།

དཀར་དཀར་གངས་རི་དཀར་པོ་བརྗིད་ཅིང་ཆགས།།
མཐོ་མཐོ་རྫ་རི་སྨུག་པོ་བརྔམས་ཞིང་འགྱིང་།།
ཤང་ཤང་ཆུ་བོ་སྔོ་མོ་དལ་གྱིས་འབབ།།
མཛེས་མཛེས་ཕ་ཡུལ་གངས་ལྗོངས་ལུང་པ་དྲན།།

ལྗང་ལྗང་གཡུ་མདོག་མྱུ་གུ་ཡར་ཡར་རྒྱས།།
ཁྲ་ཁྲ་མེ་ཏོག་སྣ་ཚོགས་རྣམ་པར་བཀྲ།།
སྙན་སྙན་ཁུ་བྱུག་སྐད་ངག་ལྷང་ལྷང་གྲག།།
དུང་དུང་དཔྱིད་ཀྱི་གངས་ལྗོངས་ལུང་པ་དྲན།།

ནགས་ཤོད་སྐལ་རྒྱན།

དཀར་ཕྲོམ་ཕྲོམ་དད་པའི་ཟླ་ཞུན་ལ་ཆགས་པ། །
ཞལ་འཛུམ་འཛུམ་ཀུན་ད་རྒོད་འཛུམ་གྱི་ཀློང་ནས། །
གསུང་འཇམ་འཇམ་ཁ་སྒོ་འཁྲི་ཤིང་རྩེར་བཞད་པ། །
ལུས་ལྡེམ་ལྡེམ་གཡོ་བའི་སྟངས་སྟབས་སུ་བྱོན་ནས། །

སྒྲ་སྙན་འཇེབས་དྲི་ཟའི་གླུ་དབྱངས་ལ་མཁུ་བ། །
ཕྱག་འཇམ་ཤ་མཉེན་མོའི་སོར་རྩེ་ནས་རྡུང་པ། །
རྒྱུད་པི་ཝང་སྦྲེང་པའི་སྒྲ་བརྒྱ་དེ་རྩེག་པའི། །
མ་མཚོ་བྱུང་སྒེག་མོ་བདག་མགྲིན་དུ་རོལ་ཅིག །

ནགས་ཤོད་སྐལ་རྒྱན།

ཡ་གི་གནམ་མདོག་མོག་པའི་སྤྲིན་གསེབ་ནས་འཕྲོས་པའི། །
མཚམས་སྤྲིན་དམར་སེར་སྒྱུར་བའི་ཟེར་ཕྲེང་དེ་ལྡོག་དུས། །
ས་སྲོད་སྨག་ཏུ་ལང་པའི་འུག་པ་ནི་མིན་ན། །
མལ་སར་གཉིད་དུ་ཡུར་བའི་སྟ་གོན་ལ་ཆས་ཤོག །

འཁྲུལ་སྣང་སྒྱུ་མར་ཤར་བའི་རྨི་ལམ་ཞིག་སྒོམ་པའི། །
སྣང་བ་མུན་པས་གཡོགས་པའི་མཚན་མོ་ལ་བབས་དུས། །
ཡིད་སེམས་རྣལ་དུ་མི་གནས་སྨྱོན་པ་ནི་མིན་ན། །
བདེ་ཆེན་གཉིད་ཀྱི་ཞིང་ཁམས་ཅི་དགར་དུ་རོལ་ཤོག །

ལམ་བཟང་པོས།

ག་དུས་བྲེལ་བ་ཆེ་ནས་ཤག་ཤག་ཤག།
ཆར་པ་ཁྱོད་ནི་དེ་འདྲའི་མ་རབས་ལ།།
ང་ནི་ཁྱོད་འདྲ་སྒྲིག་མེད་དེ་འདྲ་མིན།།
དུས་ཚོད་ཏག་ཏག་སློབ་གྲྭར་འབྱོར་དགོས་ཡོད།།

ག་དུས་སྒོ་རུ་དོན་ནས་ཟིམ་ཟིམ་ཟིམ།།
ཆར་པ་ཁྱོད་ནི་དེ་འདྲའི་མ་རབས་ལ།།
ང་ལ་དུག་ལོག་འབེལ་བོ་དེ་འདྲ་མེད།།
འདི་དག་སྦངས་ན་སང་ཉིན་ཅི་ཞིག་གོན།།

ལམ་བཟང་པོས།

པདྨ་ཀ་ར་ཡི་གདུང་འཚོབ།།
ཟས་གཙང་སྲས་པོ་ཡི་ཐུགས་སྲས།།
བྱམས་དང་སྙིང་རྗེ་ཡི་བསྡུས་གཟུགས།།
གྲུབ་དབང་བླ་མ་ཁྱེད་དྲན་སོང་།།

མདོ་བསྟན་གསལ་བྱེད་ཀྱི་ཉི་མ།།
སྔགས་བསྟན་རྒྱས་བྱེད་ཀྱི་ཟླ་བ།།
མདོ་སྔགས་བསྟན་པ་ཡི་ཀ་ཆེན།།
གྲུབ་དབང་བླ་མ་ཁྱེད་དྲན་སོང་།།

ལམ་བཟང་པོས།

བཞུད་ཁ་ལ་མོའི་ཉི་མ་དེར།།
གྲིབ་སོ་བཀུགས་ཏེ་རྒྱང་ལྟ་བྱས།།
གཙང་ཆུའི་གཞུང་ནས་རྒལ་སྟངས་ཀྱིས།།
ཞེན་ཆགས་ཕྱོགས་འདིར་མེད་པ་འདྲ།།

ངང་པ་ཆ་གཅིག་ཚང་དུ་འཕུར།།
གསེར་ཉ་ཟུང་འགའ་མལ་དུ་ལོག།
མུན་པ་འཇབ་པའི་མཚོ་ངོགས་སུ།།
ཁྱོད་རང་ད་དུང་སུ་ཞིག་སྒུག།

ལམ་བཟང་པོས།

ཟླ་བ་ལྷ་མོའི་སྐྲ་ལོ་འཛིངས་བཞག།
ཤར་ལ་གནས་བཟོད་མ་བདེ་མིན་ནམ།།
བཞིན་གྱི་མདངས་དེ་དཀར་བར་མངོན་ཡང་།།
སྤྱན་ཆབ་མ་ཆད་དག་པ་མིན་ནམ།།

འདི་རུ་རེ་བའི་མཚོ་མོ་མི་འདུག།
ཁྱེད་རང་སྟོང་ལོག་ཡིན་ཐག་ཆོད་པ།།
མུན་པས་བཀབ་པའི་ས་གཞི་སུལ་མ།།
དཀར་ངོགས་མཐོང་འདོད་ཡོད་ས་མ་རེད།།

ལམ་བཟང་པོས།

ལང་ལོང་སྤྲིན་པ་འཕྱུར་བའི་ཉིན་མོ་དེར།།
ཤག་ཤག་ཆར་པ་འབབ་པའི་ཉིན་མོ་དེར།།
བསིལ་བསིལ་རླུང་བུ་ལྡང་བའི་ཉིན་མོ་དེར།།
ཁང་ཆུང་གྲུ་བཞིའི་ནང་ནས་མ་ཁྱོད་དྲན།།

ཉི་མ་སྤྲིན་གསེབ་ཡིབ་པའི་ཉིན་མོ་དེར།།
ཟླ་བ་ཁྲུས་ལ་བྱོན་པའི་ཉིན་མོ་དེར།།
སྐར་མ་ཁོག་འདར་ཞུགས་པའི་ཉིན་མོ་དེེར།།
ལྗོན་ལོ་སེར་པོའི་འོག་ནས་མ་ཁྱོད་དྲན།།

ལམ་བཟང་པོས།

གནམ་གྱི་ཆུ་མཛོད་དེང་སང་ཨེ་ཁུང་བུག་བཞག།
ཉིན་དང་མཚན་མེད་ཆར་ཆུ་ཤག་ཤག་འབབ་ཀྱིས།།
འབྲུག་སྒྲ་ཆ་མེད་ཡ་མེད་རྫ་རྡོ་ཉིལ་ཉིལ།།
གློག་འོད་ཞེད་སྣང་ཚ་བོ་སྐར་མདའ་འཕེན་འཕེན།།

ས་ཡི་གདོང་པ་བཀྲུས་བཀྲུས་རྨ་ཤུལ་དོད་འདུག།
ཀ་ཆུ་ལུང་ཆུ་དེ་ཚོའང་འུར་གྱིས་གཤར་དུས།།
སྲང་ལམ་གཞུང་ལམ་འགའ་ཡི་ཁ་ཤ་དབྲལ་གདའ།།
ས་འབུ་གྲོག་སྦུར་རྐང་ལག་ནར་ནར་ཁུར་སོང་།།