Sat 14 Apr 2018
བྱངས་ཅན་གྲུབ་པའི་རྡོ་རྗེ།
སྙིང་སྟོབས།
འདི་ནི་ནོར་བུ་བསམ་གྲུབ་ཀྱིས་མཛད་པའི་བརྡ་སྤྲོད་བློ་གསར་ཉེར་མཁོ་དང་བསྟུན་ནས་བསྒྲིགས་པ་ཡིན།
༡༽ རབ་བྱུང་བཅུ་བཞི་པའི་ས་སྦྲུལ། སྤྱི་ལོ་ ༡༨༠༩། གཙང་གཡས་རུའི་བྱེ་བྲག་བཀྲིས་དགེ་འཕེལ་གྱི་ཉེ་འདབས་བཞད་ཅེས་པའི་ཡུལ་དུ་འཁྲུངས། ཡབ་དྷརྨ་བྷ་དྲའི་གཅུང་བཀྲིས་དང་། ཡུམ་ཚེ་རིང་སྲིད་ཆོས་སོ། མཚན་ལ་འཇམ་དབྱངས་རྡོ་རྗེ་ཞེས་གསོལ།
༢༽ དགུང་ལོ་ལྔ། ཁུ་བོ་དྷརྨ་བྷ་དྲའི་དྲུང་དུ་འབྲི་ཀློག་བསླབས།
༣༽ དགུང་ལོ་དྲུག སྦྱོར་ཀློག་བློ་འཛིན་སོགས་ལ་ཐོགས་པ་མེད་པར་གྱུར།
༤༽ དགུང་ལོ་བཅུ་གཅིག རབ་བྱུང་བཅུ་བཞི་པའི་ས་ཡོས། སྤྱི་ལོ་ ༡༨༡༩། བཀྲིས་དགེ་འཕེལ་དགོན་དུ་ཕེབས་ནས་གྲྭ་པ་མཛད། དཀའ་ཆེན་དཀོན་མཆོག་ཆོས་འཕེལ་གྱི་མདུན་དུ་སྐྲ་ཕུད་ཕུལ། བློ་བཟང་ཆོས་འཕེལ་དུ་མཚན་གསོལ།
༥༽ དགུང་ལོ་བཅུ་གཉིས། རབ་བྱུང་བཅུ་བཞི་པའི་ལྕགས་འབྲུག སྤྱི་ལོ་ ༡༨༢༠། དཀའ་ཆེན་དཀོན་མཆོག་ཆོས་འཕེལ་ལས་དགེ་བསྙེན་དང་དགེ་ཚུལ་གྱི་སྡོམ་པ་མནོས། དེ་ནས་བཟུང་མི་ལའི་རྣམ་མགུར་སོགས་གཞུང་མང་མཐར་ཕྱིན་པར་སྦྱངས།
༦༽ དགུང་ལོ་བཅུ་དགུ། བླ་མ་དྷརྨ་བྷ་དྲའི་ཞབས་བཏུགས་ཀྱིས་སྒྲ་རྩིས་སྙན་གསུམ་དང་། མདོ་སྔགས་ཀྱི་གཞུང་ཆེན་མོ་གསན་འགོ་ཚུགས།
༧༽ དགུང་ལོ་སོ་བཞི། བླ་མའི་དྲུང་ནས་སྙན་ངག་དང་། སྒྲ་ཀཱ་ལ་པའི་རྒྱུགས་ཕུལ། བླ་མས་ཐུགས་མཉེས་ཆེན་པོས་ལེགས་སོ་དང་ལྷ་རྫས་སྲིད་དུ་རིང་བ་མགུལ་དུ་བསྩལ་ཏེ་ཀུན་བཤད་ཀྱི་མཚན་དབྱངས་ཅན་གྲུབ་པའི་རྡོ་རྗེ་ཞེས་གནང་། ཟླ་བ་བཞི་པར་བླ་མའི་དྲུང་ནས་དགེ་སློང་གི་སྡོམ་པ་མནོས། དེ་ནས་བཟུང་འདུལ་བའི་སྐོར་གྱི་གཟབ་ཁྲིད་རྒྱ་མཚོ་ལྟ་བུ་གསན། རིག་གནས་ཆེ་ཕྲ་ཀུན་ལ་མཁས་པའི་ཡང་རྩེར་སོན། བླ་མའི་གསུང་རྩོམ་འགའི་ཡི་གེའང་ཁོང་གིས་མཛད།
༨༽ དགུང་ལོ་ཞེ་གསུམ། རབ་བྱུང་བཅུ་བཞི་པའི་ལྕགས་ཕག ༼སྤྱི་ལོ་ ༡༨༥༡༽ ལོའི་ཟླ་བ་བཞི་པའི་ཚེས་བརྒྱད། བླ་མ་དམ་པ་སྐུ་བཤེགས། ཁོང་གི་པུར་ཁང་བརྩིགས་པ་དང་། དངུལ་གྱི་གདུང་རྟེན་བཞེངས་པ་སོགས་དགོངས་རྫོགས་ཀྱི་བྱ་བ་ལེགས་པར་བསྒྲུབས། བླ་མའི་རྗེས་འཛིན་མཛད་ནས་གདན་ས་ ༼བཀྲིས་དགེ་འཕེལ་དགོན་ཡིན་པ་འདྲ།༽ རྒྱ་བསྐྱེད་དང་། སྐུ་གསུང་ཐུགས་རྟེན་གསར་བཞེངས་མཛད། བླ་མའི་གསུང་འབུམ་པར་དུ་བརྐོས།
༩༽ དགུང་པོ་རེ་གཅིག རབ་བྱུང་བཅོ་ལྔ་པའི་ས་སྦྲུལ། སྤྱི་ལོ་ ༡༨༦༩། དབུས་སུ་ཕེབས། དགོན་གནས་དང་རྟེན་ཁྱད་འཕགས་ལ་ཕྱག་མཆོད་དང་བླ་དཔོན་ཆེན་པོ་རྣམས་ལ་དམ་པའི་ཆོས་ཀྱི་བདུད་རྩི་ཕུལ།
༡༠༽ དགུང་ལོ་རེ་གཉིས། ཕྱིར་གདན་སར་ཕེབས། བཤད་སྒྲུབ་གཉིས་ཀྱི་སྒོ་ནས་དགེ་ལྡན་བསྟན་པའི་རྒྱལ་མཚན་སྲིད་རྩེར་བསྒྲེངས། གངས་ཅན་མཁས་པ་ཡོངས་ཀྱིས་གཙུག་གི་ཏོག་ལྟར་བཀུར།
༡༡༽ སློབ་མ། རྗེ་དྲུང་སངས་རྒྱས་རྒྱ་མཚོ། ཆབ་མདོ་འཕགས་པ་ལྷ། ཆུ་བཟང་ཧུ་ཐོག་ཐུ་བློ་བཟང་འཇིགས་མེད་སོགས་བླ་ཆེན་མཁས་མཆོག་ཤིན་ཏུ་མང་།
༡༢༽ བརྩམས་ཆོས། གསང་སྔགས་སྒྲུབ་ཐབས་སྐོར། ཐུན་མོང་གི་རིག་གནས་སྙན་ངག་སུམ་རྟགས་སྐོར་སོགས་པོ་ཏི་གསུམ་བཞུགས།
༡༤༽ དགུང་ལོ་དོན་དགུ། རབ་བྱུང་བཅོ་ལྔ་པའི་མེ་ཕག ༼སྤྱི་ལོ་ ༡༨༨༧༽ ལོའི་ཟླ་བ་བཅུ་པའི་ཚེས་དྲུག དགོངས་པ་རྫོགས། ༡༢/༡༡/༢༠༡༣།
རྩོམ་ཡིག་འདི་ཐེངས་ 1863 བཀླགས་འདུག
སྡེ་ཚན།
རྣམ་ཐར།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
