ནགས་ཤོད་སྐལ་རྒྱན་པས།

ཀུན་གསལ་སྒེག་མོའི་བཞིན་རས་ཕྱོགས་སུ་འཛུམ།།
མཚམས་སྤྲིན་གསར་པའི་ལང་ཚོ་མཆོག་ཏུ་མཛེས།།
གྲང་རླུང་བསིལ་བསིལ་ལུས་ལ་སིམ་པ་ཡི། །
དྭངས་གཙང་མཁའ་ལ་འདྲེས་པའི་སེམས་པ་སྐྱིད། །

མཛེས་ལྡན་ལྗོན་པའི་མགོ་བོ་དལ་གྱིས་དགྱེ། །
སྒྲོ་ལྡན་སྤུ་སྡུག་གཤོག་ལྷབ་ཐིབས་ཀྱིས་གཡོ། ། 
སྐད་སྙན་འགྱུར་ཁུག་ནགས་མའི་ཀློང་ནས་གྲག།
ཡིད་འོང་སྐྱེད་ཚལ་ལྷགས་པའི་སེམས་པ་སྐྱིད། །

ནགས་གཡག

དགུན་ཁ།
ལྷམ་མགོ་ཁ་བ་འབྱར་བའི་ནམ་དུས་དེར།།
རྐང་ཆུང་འཁྱགས་པས་བསྡམས་པའི་ཡུལ་ལུང་དེར།།
ཇི་ཙམ་འཁྱགས་ཀྱང་སེམས་ལ་དྲོད་ཅིག་ཡོད།།
དེ་ནི་ཡུལ་མེད་བདག་འདྲ་ཉིད་ཀྱིས་དྲན།།

དཔྱིད་ཀ
སྒོ་ཟོག་གོམ་པ་འཁྱོར་བའི་ནམ་དུས་དེར།།
ཟོག་རྫི་རྫི་གླུ་ཟད་པའི་ཡུལ་ལུང་དེར།།
ཇི་ཙམ་རིད་ཀྱང་སེམས་ལ་སྟོབས་ཤིག་ཡོད།།
དེ་ཡང་ཡུལ་མེད་བདག་འདྲ་ཉིད་ཀྱིས་དྲན།།

ནགས་གཡག

བསིལ་རླུང་འཇམ་པོ་ཞིག་གི་ལྡང་ཕྱོགས་དེས།།
མཚོ་མོའི་རླབས་ཕྲེང་དག་གི་རྒྱུགས་ཕྱོགས་དེས།།
འཁྱམ་པོ་ཁེར་འདུག་ཅིག་གི་སྙིང་ཁམས་ན།།
སེམས་པ་འཁྱག་པ་སྟོང་གི་རྫོང་ཞིག་བཅས།།

གནམ་མཐའི་སྤྲིན་ནག་དེ་ཚོ་འཚུབ་ཅིག་ལངས།།
སེམས་པའི་འཆར་སྒོ་དག་ཀྱང་དྲག་ཏུ་ལྡིང།།
སྡོང་རྒན་སྐམ་པོའི་ཡལ་ག་སྐྱ་ཟིང་ཟིང་།།
ཁེར་རྐྱང་འཁྱམ་པོའི་ཅོ་སྤུ་ཚ་ཟིང་ཟིང་།།

ནགས་གཡག

{བློ་}ཁ་མཐུན་པའི་གྲོགས་པོ་ཡག་ཤོས་དེས།།
{བཟང་}པོ་ལས་ཀྱིས་སྒྲིག་པའི་ཆོས་གྲོགས་དེས།།
{བློ་}རིག་མཉམ་དུ་སྦྱོང་བའི་འཛིན་གྲོགས་དེས།།
{གཏན་}དུ་བྲལ་ནས་འགྲོ་རེད་བསམ་མྱོང་མེད།།

མི་རྟག་འཆི་བ་གཤིན་རྗེའི་རལ་གྲི་དེ།།
འགོ་མཇུག་མེད་པའི་སྨྱོ་དབྱུག་གཟའ་དབྱུག་དེས།།
ལོ་གཅིག་རྗེས་སུ་འཛོམ་རྒྱུའི་གྲོགས་པོ་དེ།།
འཇིག་རྟེན་ཕྱི་མར་བཏང་སོང་ཀྱེ་མ་ཧུད།།

འབྲི་བྱ་གླག་ནས།

དལ་འབྱོར་རྟེན་བཟང་ཟེར་བཞིན་དུ།
རྣམ་གཡེང་འཁྱུད་ནས་མི་ཚེ་འདས།།
བྱམས་དང་བརྩེ་བ་ཟེར་བཞིན་དུ།། 
རང་གཅེས་གཞན་སྡང་གློག་ལྟར་འཁྱུག །

མ་འོངས་ཕུགས་བསམ་ཟེར་བཞིན་དུ།།
ལེ་ལོ་གཡེང་བའི་འདམ་དུ་བྱིང་།། 
ཁ་ནས་ལ་ཞེན་ཟེར་བཞིན་དུ།། 
ནང་དམེ་མཚོན་གྱིས་མདུང་རྩེར་བཙུད།།

འབྲི་བྱ་གླག་ནས།

ཚ་བས་རབ་ཏུ་མནར་བའི་ལྷོ་མཐའ་ཞིག་ན།།
ཀ་གདུང་མེད་པའི་ཁང་ཆུང་གྲུ་བཞིའི་ནང་དུ།།
ཚ་གདུང་སེལ་ཕྱིར་ཉིན་གང་ནང་དུ་ཡིབས་ཀྱང་།། 
ལུས་ཕུང་གསེབ་ནས་རྔུལ་ཆུ་འཛེར་འཛེར་བཞུར་བྱུང་།།

མི་རིགས་སྣ་མང་འཛོམས་པའི་ས་མཐའ་ཞིག་ན།།
 གྲོགས་མེད་ཁེར་རྐྱང་གྲོང་མཐར་འཁྱམ་ཉུལ་བྱས་དུས།། 
གཞན་སྐད་མ་ཤེས་ཐབས་མེད་ལྐུག་བརྡ་བྱས་ཀྱང་།། 
གོ་བརྡ་མ་འཕྲོད་ཡིད་སུན་གྲངས་ཀྱི་མི་ལོན།།

འབྲི་རུ་སྐལ་བཟང་རྒྱལ་མཚན།

ང༵ག་གི་འདབ་མ་བསྐྱོད་པའི་དྲི་གཞོན་གྱིས།།
དབ༵ང་བསྒྱུར་གསུང་རབ་མཁའ་ཡི་ཆུ་འཛིན་ཀློང་།།
ཐོག༵ས་མེ༵ད་རིགས་འཕྲུལ་གློག་གི་རོལ་རྩེད་རྒྱས།།
ལེགས་བཤད་སྤྲིན་བཅུད་འབེབ་པའི་ཀླུ་དབང་རྒྱལ།།

ཚང་ཚིང་གཡུ་ལོ་འཐིབས་པ་ན༵གས་ཀྱི་ཤོ༵ད།།
ལང་ཚོའི་མྱུ་གུ་འབྲི༵་ལྗོངས་འཛིན་མ་རུ༵།།
འབུས་ཀྱང་ཐོས་པའི་ཁོ་ལག་ལྷོ་མཐར་རྒྱས།།
སྙན་གྲགས་དྲི་བསུང་འཐུལ་བའི་ལྗོན་པ་ཡིན།།

ནགས་ཤོད་ཅོང་བརྡ།

བས་མཐའི་ཁེར་བུ་ཕ་ཡུལ་དྲན་སྟངས་ཟུག་གཟེར་སྣ་ཚོགས་སྙིང་ལ་རླུང་གིས་ཚ་ཚ་ལྡང་། །
བརྗོད་ཚོད་མེད་ལ་བརྗོད་ཀྱང་དཀའ་བའི་ཉིན་མཚན་འཁོར་མོར་དྲན་གདུང་ཕ་བོང་རི་ལྟར་བརྩིགས། །
ཚིག་དང་ཐ་སྙད་ཡོད་ཚད་སྤུངས་ཀྱང་མཚོན་བྱེད་མི་རྙེད་གཉུག་སེམས་འདི་ན་ནད་ཅིག་ཁོལ། །
བག་ཆགས་ཟབ་མོ་ཆུང་ནས་བཏབ་པས་ཁ་བ་བབས་ཚེ་ཕ་ཁྱིམ་མཉམ་དུ་བྱིས་དུས་དྲན། །

བྱིས་པ་ཁྱུ་ཞིག་གངས་རྡོག་འཕེན་རེས་གབ་རེས་བརྩེ་བཞིན་ལམ་ཟུར་བརྒྱུད་ནས་འགྲོ་བ་དང་། །
ནངས་སྔ་དགོང་ཕྱིར་ཁྱི་ཡན་ཟུག་སྐད་རྒྱང་རིང་གོ་བའི་འབྲོག་དུད་ཁ་བས་བསྐོར་བ་དང་། །
ཉི་མའི་གུང་ལ་འཁྱགས་དར་ཁ་རུ་བུད་མེད་རེ་འགས་ནང་འཇམ་དམར་སྐྱ་འཁྲུད་པ་དང་། །
ལོ་ཆུང་མང་པོ་འཁྱགས་ཤུད་གློད་དེ་ཡང་ཡང་དགོད་པའི་སྣང་བ་དེ་ནི་ད་དུང་འཆར། །

ནགས་ཤོད་ཅོང་བརྡ་ནས།

དུས་རབས་ཉེར་གཅིག་བརྡ་འཕྲིན་དུས་རབས་རེད། །
གནས་ཚུལ་ཆེ་ཆུང་ཁ་བ་བུ་ཡུག་འཚུབ། །
ས་མཐའ་མི་ན་ཁྱི་ཞིག་ཤི་འདུག་ཟེར། །
གནམ་མཐའ་ཡེ་ན་འོད་ཅིག་འཕྲོ་སྐད་ཟེར། །

དེ་རིང་རྒྱ་གར་སྟོད་ཀྱི་དུས་ཆེན་རེད། །
ཁ་རྩང་རྒྱ་ནག་སྨད་ཀྱི་དུས་ཆེན་རེད། །
མདང་ནུབ་བལ་པོའི་ཡུལ་ཀྱི་དུས་ཆེན་རེད།།
དེ་རིང་གཅིག་གཅིག་གཅིག་གི་འཁྲུངས་སྐར་རེད། །

ནགས་ཤོད་ཅོང་བརྡ་ནས།

གངས་རི་གནམ་ལ་ཐུག་པའི་ཕར་ནང་ན། །
ཆུ་མོ་བདུད་རྩི་འབབ་པའི་མགོ་ཁུངས་ན། །
ཉི་མ་ཟླ་བ་འདྲ་བའི་ཤུན་ལྤགས་ཁྱེད། །
ཅང་མེད་འཁྱམ་པོས་དྲན་ཚུལ་བརྗོད་རྒྱུ་ཡིན། །

ལ་ལས་སེམས་ཅན་ཐམས་ཅད་མ་རེད་ཟེར། །
ང་ཡང་ཁྱེད་ཀྱི་ཨ་མ་བྱ་མྱོང་སྐད། །
དེ་ལྟར་བསམ་ན་ང་ཡང་ཆད་ལྷག་མེད། །
འོན་ཀྱང་དེ་ཚོ་བདག་གིས་ཉར་མ་མྱོང་། །