ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
བསྟན་པ་དར་ཕྱུག
[གནད་ཚིག] ནང་མ། ཕོ་བྲང་ནང་མ། གམ་བཅར་ནང་མ། ནང་མའི་སྐྱིད་སྡུག །ནགྷམ།
[དོན་དག་གཙོ་བོ།] ནང་མ་ཞེས་པའི་བརྡ་ཆད་འདིའི་གོ་བ་དང་། དར་ཡུལ་དང་འཕེལ་རིམ། འབུད་དཀྲོལ་གྱི་རོལ་མོ། དེ་བཞིན་བརྗོད་དོན་བཅས་ཀྱི་སྐོར་ཡིན།
ཐོག་མའི་གཏམ།
བོད་ཀྱི་དམངས་ཁྲོད་དུ་དར་ཤུགས་ཆེ་བའི་གཞས་རིགས་མང་པོ་ཡོད་པའི་ཁྲོད་དུ་“ནང་མ་”ཞེས་པ་འདི་མི་དམངས་ཀྱི་ཁྲོད་དུ་གོ་ས་ངེས་ཅན་བཟུང་བའི་དམངས་གཞས་ཀྱི་རིགས་ཤིག་རེད། འདི་ལ་རྒྱུས་ལོན་གཏིང་ཟབ་དགོས་ན་འདི་དང་འབྲེལ་བའི་མི་སྣ་དང་དར་ཡུལ་གྱི་ས་གནས་ས་ཐོག་ལ་འགྲོ་བ། དེ་བཞིན་འབྲེལ་ཡོད་ཀྱི་དཔྱད་རྩོམ་གང་མང་ཞིག་བཀླག་དགོས་པ་བཤད་མིི་དགོས་ཀྱང་། ཁོ་བོ་ནི་“ནང་མ་”ཞེས་པའི་གླུ་གཞས་འདི་ལ་རྒྱུས་ལོན་བྱས་ནས་དུས་ཚོད་ཐུང་ཐུང་ལས་སོང་མེད་རྐྱེན་འདིའི་ཐོག་ལ་ལྟ་ཚུལ་གསར་པ་ཅི་ཡང་སླེབས་མི་ཐུབ་མོད། རོལ་དབྱངས་འདིའི་ལས་ལ་དངོས་སུ་ཞུགས་མྱོང་བ་དང་། དེ་བཞིན་འདིའི་ཐོག་ལ་ཐུགས་ཁུར་དང་དོ་སྣང་བྱེད་མཁན་རྣམས་ཀྱིས་བྲིས་པའི་དཔྱད་རྩོམ་ལག་སོན་བྱུང་བ་དག་བཀླགས་རྗེས་ཁོང་ཚོའི་འདོད་ཚུལ་རྣམས་མ་འཁྲུག་པར་ཕྱོགས་གཅིག་ཏུ་སྤུང་ཁུལ་བྱས་ཡོད་ལ། དེ་བཞིན་བརྗོད་དོན་གྱི་ཐད་ལ་རང་བློས་དཔག་ཚོད་ཀྱིས་དཔྱད་པ་ཕྲན་བུ་ཞིག་བྱས་ཡོད།
སྡེ་ཚན།
དཔྱད་རྩོམ།
ནང་གསེས་དབྱེ་འབྱེད།
Fri 28 Jul 2023
པཎ་ཆེན་སྐུ་ཕྲེང་བཅུ་པ་ཆེན་པོས་བོད་ཀྱི་སྐད་ཡིག་སྲུང་སྐྱོབ་ཆེད་རླབས་ཆེན་གྱི་མཛད་འཕྲིན་སྐོར་ལ་དཔྱད་པ།
བསྟན་འཛིན་དར་ལྡན།
[ནང་དོན་གནད་བསྡུས།] ཚིག་ཉུང་དོན་བསྡུས་ཀྱིས་༸པཎ་ཆེན་སྐུ་ཕྲེང་བཅུ་པ་ཆེན་པོའི་ཐུགས་དགོངས་ལ་མངའ་བའི་བོད་སྐད་ཡིག་གི་གལ་གནད་དང་། བོད་སྐད་ཡིག་གི་རིན་ཐང་ཇི་འདྲ་ཡིན་མིན་ཕྱོགས་བསྡུས་གསལ་འདོན་དང་འབྲེལ། བོད་སྐད་ཡིག་སྦྱོང་སྤྱོད་སྤེལ་གསུམ་རྒྱ་ཁྱབ་སླད། གོང་རིམ་ལ་སྙན་ཞུ་རིམ་པར་ཕུལ་ཚུལ་དང་། བོད་ཁུལ་གང་སར་བོད་ཡིག་སློབ་གྲྭ་ཆེ་ཆུང་ཉི་ཤུ་ལྷག་འཛུགས་བསྐྲུན་བཀའ་དྲིན་ཅི་ལྟར་བསྐྱངས་ཚུལ་བཅས། གསུང་རྩོམ་ཡིག་འབྲུ་ཁྲི་བདུན་གྱི་སྙན་ཞུས་གཙོས་འབྲེལ་ཡོད་བཀའ་སློབ་ཡིག་ཆ་ཁག་ཁུངས་སུ་བྱས་ཏེ་གསལ་འདོན་ཅི་ནུས་བྱས་ཡོད།
[གནད་ཚིག] བོད་སྐད་ཡིག་སྲུང་སྐྱོབ། པཎ་ཆེན་སྐུ་ཕྲེང་བཅུ་པ། ཡིག་འབྲུ་ཁྲི་བདུན་གྱི་སྙན་ཞུ།
སྔོན་གླེང་།
༸ཀུན་གཟིགས་༸པཎ་ཆེན་རིན་པོ་ཆེ་མཆོག་ནི་ལར་ཞེན་ཆེ་ཞིང་དཔའ་ངར་ལྡན་ལ། མི་རིགས་དང་རིག་གཞུང་ཆེད་སྐུ་ཚེ་ཧྲིལ་བོར་སྐུ་ལས་ཚད་མེད་བསྐྱངས་ཤིང་། བོད་མི་རིགས་འདིའི་ཆེད་རླབས་ཆེའི་བྱས་རྗེས་བཞག་ཡོད་པ་ནི། བོད་མི་ཡོངས་ཀྱི་མངོན་སུམ་མིག་གི་སྤྱོད་ཡུལ་དུ་གྱུར་ཡོད་པ་རེད། ལྷག་ཏུ་ཁོང་གིས་བོད་ཀྱི་སྐད་ཡིག་ཉམས་པ་སླར་གསོ་དང་རྒྱུན་གནས་ཡོང་སླད་སྐུ་ངལ་ཚད་མེད་བསྐྱངས་ཡོད་པ་སྨོས་མི་དགོས་པ་ཞིག་རེད་མོད།
སྡེ་ཚན།
དཔྱད་རྩོམ།
ནང་གསེས་དབྱེ་འབྱེད།
Fri 28 Jul 2023
ཕོ་ཉ་གཞོན་ནུ་དོན་གྲུབ་བཀླགས་སྦྱངས་ཀྱི་མྱོང་བ་མཛེས་དཔྱོད་རིག་པའི་ངོས་ནས་ཉུང་ཙམ་གླེང་བ།
བསྟན་འཛིན་སྟོབས་ལྡན།
སྤྱི་གླེང་།
རྩོམ་རིག་གི་ལོ་རྒྱུས་རིང་མོའི་ནང་དུ་སྒྱུ་རྩལ་གྱི་རྩོམ་རིག་སྣ་ཚོགས་བྱུང་ཞིང་། དེ་ཉིད་ཉམས་སུ་མྱོང་སྟངས་སམ་མྱོང་བྱེད་མི་འདྲ་བ་བྱུང་བས། སྙན་རྩོམ་ལ་གཞུང་ལུགས་ངོས་ནས་མྱོང་རོལ་བྱེད་པ་དང་། སྒྱུ་རྩལ་གྱི་ཐོག་ནས་རོ་འཚོལ་བ། མཛེས་དཔྱོད་རིག་པའི་ངོས་ནས་སྙན་ངག་གི་མཛེས་པ་མྱོང་བ་བཅས་མཆིས་རུང། ད་སྔ་ཡན་བོད་ཀྱི་སྙན་རྩོམ་ཀློག་པ་པོ་རྣམས་ཀྱིས་གཞུང་ལུགས་དང་སྒྱུ་རྩལ་ངོས་ནས་ལྟ་བ་ལས་མཛེས་དཔྱོད་རིག་པས་བཀླག་མྱོང་བྱས་པ་ཤིན་ཏུ་ཉུང་།
གཅིག་ནི་མཛེས་དཔྱོད་རིག་པའི་གཞུང་ལུགས་དར་ཕྱིས་པ་དང་། གཉིས་ནི་མཛེས་དཔྱོད་རིག་པའི་གཞུང་ལུགས་རང་རྩོམ་དང་འགྱུར་རྩོམ་གཉི་ག་ཚད་ལྡན་མེད་པ[1]། གསུམ་ནི་དེའི་ཕྱོགས་ལ་བློ་ཁ་འཁོར་བ་ཉུང་བས། བོད་ཀྱི་སྙན་རྩོམ་ལ་ཟུར་ངོས་གཅིག་ནས་མྱོང་རོལ་བྱ་རྒྱུ་ལྷག་ཡོད། བློ་བཟང་དཔལ་ལྡན་ཚང་གི་“ཕོ་ཉ་གཞོན་ནུ་དོན་གྲུབ”་ལྟ་བུ་བོད་ཀྱི་སྙན་རྩོམ་གྱི་ཁྲོད་ནས་གྲལ་མགོ་བསླེབས་པ་ཞིག་ཡིན་རུང་། དེ་ཉིད་ལ་འགྲེལ་བ་དང་འཆད་འཁྲིད། དཔྱད་བརྗོད། མྱོང་གཏམ་སྤེལ་བ་སོགས་ལས། མཛེས་དཔྱོད་རིག་པའི་ངོས་ནས་གླེང་སློང་བྱས་པ་མིག་གི་མཐོང་ལམ་དུ་དཀོན། ཕོ་ཉ་གཞོན་ནུ་དོན་གྲུབ་ནི་སྒྱུ་རྩལ་གྱིས་ཕྱུག་ཅིང་མཛེས་པས་གང་བའི་སྙན་རྩོམ་ཞིག་ཡིན་པས། ཁོ་བོས་ཤེས་ཚོད་ཀྱིས་མཛེས་དཔྱོད་རིག་པའི་ངོས་ནས་ཕོ་ཉ་གཞོན་ནུ་དོན་གྲུབ་ལ་ཅུང་ཟད་ཙམ་གླེང་བར་འདོད།
སྡེ་ཚན།
དཔྱད་རྩོམ།
ནང་གསེས་དབྱེ་འབྱེད།
Fri 28 Jul 2023
འདས་གསོན་གྱི་ཆིག་ལབ།
མ་ཏི་བྷ་དྲ།
འདི་ནས་བརྩིས་པའི།
འཇིག་རྟེན་གྱི་སྣང་བ་གཞན་ཞིག་རེད།
ན་བུན་དང་རེ་འབྲས་དབེན་པའི་གོ་ལ་ཞིག་ཀྱང་ཡིན་སྲིད།
ཉི་ཟེར་དང་ཟླ་འོད་དབེན་པའི་ལོ་ཟླ་དག་ལ།
དྲོད་ཁུལ་དང་འོད་ཐིགས་ཀྱི་ཆ་ཤས་ཤིག་གང་ནས་འཚོལ།
རེ་སྒུག་དང་མཇལ་འཛོམས་ཀྱི་སྣང་བ་ཡང་དུས་དེ་ནས་ཡལ་སོང་ངམ།
གནས་འདི་ནས་རང་སྣང་གི་ཚོར་བ་རེ་ཁྱེར་ནས།
མངར་སྐྱུར་གྱི་འཚོ་བ་ལ་ཚིག་དུམ་འགས་གསོ་བར་བྱ།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
ངའི་ཕ་ས།
བསྟན་འཛིན་དར་རྒྱས།
སེམས་ཀྱི་འཁོར་ས།
རྨི་ལམ་གྱི་འཁྲུལ་ས།
ཕ་ཡུལ་བསིལ་ལྗོངས།
ས་ཆ་དེ་ན་ངའི་ལུས་ཀྱི་ལྟེ་ཁྲག་འཐོར་ས།
བྱིས་དུས་འཚར་ལོངས་དང་མི་ཚེ་སུམ་ཆའི་སོང་ཤུལ།
འདས་པའི་ལོ་ཟླ་རིང་མོ།
ཕྱིར་དྲན་བྱེད་དུས་དགའ་སྐྱོ་འདྲེས་མའི་རོལ་དབྱངས།
ད་ཆ་ང་ལུས་པོ་གཞན་ཡུལ་དུ་གྱར་ཡང་།
གནམ་སའི་བར་ཐག་རིང་ཡང་།
ངས་བརྗེད་མི་ཐུབ་པའི་ཕ་ས་དང་ཕ་ཡུལ།
མྱོང་འདྲིས་ཆེ་བའི་གཤིས་ལུགས་ཀྱི་བག་ཆགས་མཐུག་པོ།
གངས་རིས་བསྐོར་བའི་ཞིང་ཁམས།
སྔོ་ཞིང་དྭངས་པའི་ནམ་མཁའ།
འབག་བཙོག་གིས་མ་བསླད་པའི་རང་བྱུང་གི་ཁོར་ཡུག།
དྭངས་གཙང་ཆུ་མོ།
སྦྲ་ནག་གི་འཚོ་བ།
རྟ་ནོར་ལུག་གསུམ་གྱི་གཡང་ཟོག།
མེ་ཏོག་གི་འཇའ་མཚོན།
སྤང་ལྗོངས་ཀྱི་ནེའུ་གསེང་།
རི་བོ་ནི་ཧ་ཅང་མཐོ།
མུ་མཐའ་མེད་པའི་རྩྭ་ཐང་།
མ་མཐོང་བགྲང་བྱ་བཅུ་ཕྲག་འགར།
མིག་ཟུང་ཡུན་རིང་བོར་ཡང་དུང་བའི་སེམས་པ་ནམ་ཡང་བྲལ་ཐབས་མེད།
ལུས་པོ་ཁ་ཐག་རིང་ཡང་སེམས་པ་ཁ་ཐག་རིང་བ་མེད།
ད་ལྟ་ཕ་ཡུལ་གྱི་སྣང་བརྙན་ནི་མིག་ལ་རབ་རིབ་ཅིག་དང་།
སེམས་ལ་མག་མོག་ཅིག་ལས་མ་འདས་མོད།
ཕ་ཡུལ་ལ་དགའ་བའི་སེམས་པ་དང་།
ཕ་ཡུལ་ལ་དུང་བའི་ཚོར་བ་ནི་དུས་བཞིའི་ཁ་ཆར་རླུང་འཚུབ་ཀྱིས་བསུབ་མི་ཐུབ་ལ།
ལོ་ཟླའི་གཙང་བོའི་རླབས་ཕྲེང་གིས་འཁུར་མི་ནུས་ཏེ།
ཕ་ཡུལ་ནི་ནམ་ཡང་སེམས་པ་དང་འབྲལ་ཐབས་བྲལ་བའི་བག་ཆགས་ཀྱི་གཏིང་རུམ་ལ་ཟུག་པའི་དྲན་ཤིང་གསོན་པོ་དེ་ཡིན།
ཕ་ཡུལ་ནི་དུས་རྒྱུན་ཚེ་སྲོག་དང་དབྱེ་བར་དཀའ་བའི་ཤ་ཁྲག་རུས་གསུམ་གྱི་བར་གསེང་ན་དལ་མེད་རྒྱུ་བའི་ཚོར་བ་ཕྲ་མོ་དེ་ཡང་ཡིན་པས་སོ། །
ཕ་ཡུལ་གྱི་རི་ལུང་ནགས་གསུམ་གྱི་ཁ་དོག་དང་། ཡུལ་དགོན་གྱི་ཆགས་དབྱིབས། ཞིང་འབྲོག་གི་འཚོ་ཐབས།
རི་ཆུའི་བཏགས་མིང་སོགས་ཀྱང་ད་ལྟ་སེམས་ལ་ཤིན་ཏུ་གསལ་ཡོད།
ད་ཆ་ལུས་པོ་གཞན་ཡུལ་འཁྱམས་ཀྱང་སེམས་པ་ཕ་ཡུལ་ལ་འཕྲེང་ཡོད།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
སློབ་དཔོན་དམ་པ།
འཇམ་དབྱངས་བསྟན་མཚོ།
བདག་གི་སློབ་དཔོན་དམ་པ།
དུས་སྐབས་འདིར།
གོ་ས་དང་འབྱོར་བའི་མགོ་འཕང་མཐོ་དྲགས་པས།
ཁྱེད་ཀྱི་ཤེས་རབ་དང་ལྷག་བསམ་མཐོང་མཁན་ཤིན་ཏུ་དཀོན།
བདག་གི་སློབ་དཔོན་དམ་པ།
དུས་སྐབས་འདིར།
སྒེར་གཅོད་དང་ཕྱོགས་འཛིན་གྱི་ཆགས་སྡང་ཐལ་དྲགས་པས།
ཁྱེད་ཀྱི་གཞན་ཕན་དང་དཀྱེལ་ཡངས་ཀྱི་བསམ་བློའི་གཏིང་དཔོག་མཁན་ཧ་ཅང་ཉུང་།
བདག་གི་སློབ་དཔོན་དམ་པ།
དུས་སྐབས་འདིར།
ངོ་སོ་དང་གཡོ་ཟོལ་གྱི་རྣམ་པ་རྫོབ་དྲགས་པས།
ཁྱེད་ཀྱི་ཆོག་ཤེས་དང་སྨྲ་ཉུང་གི་བདེན་ཚུགས་ཤེས་མཁན་ཧ་ཅང་ཉུང་།
བདག་གི་སློབ་དཔོན་དམ་པ།
དུས་སྐབས་འདིར།
ཕྱིའི་ཆ་ལུགས་ཀྱི་རྣམ་པ་དོད་དྲགས་པས།
ཁྱེད་ཀྱི་ནང་སེམས་ཀྱི་མཛེས་པ་མཐོང་མཁན་ཧ་ཅང་དཀོན།
བདག་གི་སློབ་དཔོན་དམ་པ།
དུས་སྐབས་འདིར།
ཕྱོགས་ལྷུང་དང་རིས་འབྱེད་ཀྱི་སྣང་ཚུལ་སྐྱུག་བྲོ་བས།
ཁྱེད་ཀྱི་བཏང་སྙོམས་དང་དྲང་ཚུགས་ཀྱི་མི་གཞི་མཐོང་མཁན་ཧ་ཅང་དཀོན།
དེར་བརྟེན།
བདག་གི་སློབ་དཔོན་ལགས།
ཁྱེད་ཀྱིས་རྙེད་པ་དང་ཁེ་གྲགས་དོན་དུ་མ་གཉེར་བས།
ཐམས་ཅད་ཀྱི་གྲལ་མཐར་སྡོད་ལ།
བདོག་པ་ཕུན་སུམ་ཚོགས་པའི་འབྱོར་བས་ཀྱང་ཕོངས།
བྱས་པ་དྲིན་དུ་འདྲེན་པའི་གཏམ་སྙན་ཀྱང་མེད།
དེ་ལྟ་ནའང་།
དངོས་ཡོད་ལ་ཁྱེད་ནི།
རང་གི་རིགས་ལ་ཞེན་པ་དཀར་ཞིང་།
རང་སེམས་གཙང་མའི་ཐུགས་རྒྱུད་ཕྱུག།
ལེགས་ཉེས་འབྱེད་པའི་རྣམ་དཔྱོད་རྣོ་བས།
བཞུད་པའི་ལམ་ལ་བདེན་པ་གསལ།
དངོས་ཡོད་ལ་ཁྱེད་ནི།
ཡེ་ཤེས་ཀྱི་སྒྲོན་མེ་ཞིག་སྟེ།
མ་རིག་པའི་སྨག་ཆེན་སེལ་བར་བྱེད།
མཉེས་གཤིན་གྱི་ཐུགས་རྒྱུད་དྲང་བས།
བདེན་པ་སྲུང་བའི་ལྷ་དང་མཐུ་བོ་ཆེ་དག་ཁྱེད་ལྟ་བུར་ཤིན་ཏུ་ནས་མཉེས།
དངོས་ཡོད་ལ།
ཁྱེད་ནི་གདུང་མ་འདེགས་པའི་ཀ་བ་བཞིན།
མི་རིགས་ཤིག་གི་སྲོག་རྩ་སྐྱོར་བའི་དབྱངས་གསལ་གྱི་ཀ་ཆེན་དེའང་ཡིན།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
སྐྱིད་པའི་ཚོར་སྣང་།
བསམ་གཏན་དཔལ་འཛོམས།
ནག་ནོག་དྲི་མས་མ་གོས་པའི། །
རྒྱ་ཤོག་དཀར་པོ་ཇི་བཞིན་དུ། །
ཆགས་སྡང་རྨོངས་པས་མ་གོས་པའི། །
ལོ་ཆུང་བྱིས་པའི་སེམས་ཁམས་གཙང་། །
ང་དགའ་ཁྱོད་སྡུག་རྣམ་རྟོག་དང་། །
འཁྱག་ལྟོགས་བཀྲེས་སྐོམ་སེམས་འཁྲལ་དག །
རྣམ་པར་དབེན་ཞིང་རྩེད་མོ་ལ། །
གཡེང་བའི་བྱིས་པ་འདི་དག་མོས། །
གུས་མོ་སློབ་གྲྭ་འདིར་སླེབས་ནས། །
ལོ་འཁོར་གསུམ་ལྷག་ཕྱིན་ན་ཡང་། །
ཟླ་ཤས་ལྟ་བུའི་ཚོར་སྣང་འདི། །
བྱིས་པ་འདི་ཚོའི་བཀའ་དྲིན་ཡིན། །
གང་གིས་ཤེ་ན་སློབ་ཕྲུག་རྣམས། །
ཕལ་ཆེར་གྲོང་གསེབ་དབུལ་པོ་དང་། །
ཕ་མ་མེད་པའི་དྭ་ཕྲུག་དག །
གསོ་སྐྱོང་བྱས་པ་ཤ་སྟག་ཡིན། །
དེ་ལྟའི་ཉམ་ཐག་སློབ་ཕྲུག་ཚོའི། །
གནས་སྟངས་དངོས་སུ་མཐོང་བའི་ཚེ། །
ལྷག་བསམ་རྣམ་པར་དག་པ་ཡིས། །
ངལ་བ་དང་ལེན་སློབ་ཁྲིད་བྱས། །
དེ་ཡང་སློབ་དུས་ཡོལ་མེད་ངང་། །
སོ་སོའི་སློབ་ཚན་ཆད་མེད་ཀྱིས། །
ཁ་གསལ་གོ་བདེ་གཙོར་བཟུང་བའི། །
སློབ་ཁྲིད་དགའ་བའི་འཛུམ་གྱིས་བསུས། །
སྐབས་རེ་དགོས་པ་རྒྱུ་མཚན་གྱིས། །
ལེ་ལོའི་དབང་གྱུར་སློབ་ཕྲུག་འགར། །
སེམས་པ་གངས་རི་ལས་དཀར་ཡང་། །
ངོ་གདོང་རྫ་རི་ལས་གནག་ཅིང་། །
ཕྲ་རིང་དབྱུག་པ་འཕྱར་ཙམ་དང་། །
སྡིགས་མོའི་སྐད་གསང་བསྒྲགས་པ་ཡིས། །
རྣམ་གཡེང་ལེ་ལོའི་ངན་སྤྱོད་ལས། །
བཅུན་པའི་ཐབས་ལམ་འབད་བརྩོན་བྱས། །
སྐབས་འགར་ན་ཆུང་སློབ་ཕྲུག་ཚོ། །
མཉམ་དུ་རྩེད་མོ་རྩེ་བ་དང་། །
སྙན་པའི་སྒྲུང་དང་མཚར་བའི་གཏམ། །
སྣང་བ་སྐྱིད་པའི་འཚོ་བར་རོལ། །
སྐབས་རེ་ཤེས་ཡོན་ཀུན་སྤྱོད་ཐད། །
སློབ་ཕྲུག་སེམས་ཁམས་དང་མཐུན་པའི། །
སློབ་ཞོར་ཁ་ཏ་བསླབ་བྱ་དག །
གང་ཤེས་དུས་དང་འཚམ་པར་བྱས། །
ཉམས་ཆུང་བྱིས་པ་སློབ་ཕྲུག་ཚོའི། །
མཉམ་དུ་འགྲོ་འདུག་ཚོར་སྣང་ནི། །
མི་ཚེའི་ནང་གི་སྐྱིད་ཤོས་ཤིག །
ཡིན་སྣང་ཤར་བས་སྤྲོ་བ་འཕེལ། །
དེས་ན་གཅེས་པའི་སློབ་ཕྲུག་ཚོ། །
ཤེས་ཡོན་ཀུན་སྤྱོད་ཡར་རྒྱས་ངང་། །
བདེ་སྐྱིད་ལྡན་པའི་འཚོ་བ་ལ། །
རོལ་བའི་བཀྲ་ཤིས་སྨོན་ལམ་འདེབས། །
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
དྲན་གདུང།
འབྲི་བཟའ་ཟླ་སྒྲོན།
བྱང་ཕྱོགས་སྤྲིན་ཕུང་དཀར་པོའི་ཡུལ་དེ་ན། །
དབུ་ལོ་དར་དཀར་འདྲ་བའི་མ་ལོ་བཞུགས། །
གངས་རིའི་ཕྲེང་བ་བསྒྲིགས་པའི་བསིལ་ལྡན་ཞིང་། །
ལག་ཟུང་སེར་ག་གས་ཤིང་ལས་བརྩོན་མ། །
ཁྱེད་ཉིད་དྲན་དུས་བས་མཐའི་བུ་མོ་ངའི། །
མིག་མཐར་མཆི་མས་བརླན་ཞིང་སྐྱེད་མ་དྲན། །
མིག་ཟུང་བྱང་ལ་གཏད་དེ་གདུང་དབྱངས་ཤོར། །
ལས་ངན་ང་ཡི་བསོད་ནམས་དབེན་པའི་རྐྱེན། །
མ་ལོའི་ཞལ་བཟང་མ་མཇལ་ལོ་དྲུག་དང། །
བརྩེ་བའི་གསུང་སྙན་མ་ཐོས་ལོ་གཉིས་འདས། །
སྙིང་ཁར་ལག་ཆུང་བཞག་སྟེ་འདང་རྒྱག་དུས། །
དྲན་གདུང་དྲག་པོའི་སེམས་པ་འཁྱག་སིབ་སིབ། །
མིག་ཟུང་བཙུམས་ཤིང་ད་ལྟའི་གནས་བབ་ལ། །
བསམ་དུས་རང་ཡུལ་འགྲོ་སྐལ་ཨེ་ཡོད་སྙམ། །
མགོ་བོ་ཐུར་དུ་གུག་སྟེ་འབྱུང་འགྱུར་གྱི། །
ཕུགས་བསམ་འཆར་གཞི་ཡང་ཡང་བསམ་པའི་ཚེ། །
ཨ་མ་མཇལ་བའི་སྐལ་བཟང་གོ་སྐབས་ཤིག །
བདག་ལ་རྙེད་པའི་ཚོར་སྣང་ཞིག་ཀྱང་སླེབས། །
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
རྟགས་བརྟག་པ།
ནགས་ལྷའི་གཡག་རྒོད།
རྒྱལ་བུ་ནོར་བཟང་ཐོན་ལ་ཉེ་བ་ན། །
ནག་མོ་ཞིག་གི་སོ་དག་བཙལ་དགོས་བྱུང་། །
ལྷག་མ་ལྔ་ལས་རྙེད་པ་མ་བྱུང་སྟབས། །
བློ་ཁོག་སོར་གང་ཙམ་གྱིས་མ་སྙོབ་སོང་། །
ཚོང་དཔོན་ནོར་བཟང་ཟླ་ལ་ཉེ་བ་ན། །
གྲྭ་རྒན་ཞིག་གི་དབུ་ལ་ཉུལ་དགོས་བྱུང་། །
མགོ་ནག་མི་ཡི་སྐྲ་ནི་མ་རྙེད་པས། །
བློ་ཁོག་སོར་གང་ཙམ་གྱིས་མ་དོ་སོང་། །
ནོར་བཟང་དག་གི་རིགས་དེ་ཆད་པ་ལ། །
མ་འདང་བ་དག་རྟགས་སུ་བརྩི་ཆོག་གམ།
ནམ་ཞིག་ཡིད་འཕྲོག་ལྷ་མོའི་རྒྱུད་དེ་ལ། །
དཔལ་ལྡན་ཆོས་ཀྱི་གྲགས་པ་འདྲེ་སྲིད་དམ།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
རི་བོང་གཉོམ་ཆུང་།
དར་ལྕེ་ཟད་པོ།
རི་སྐྱེས་ཀུན་ལ་འབྲེལ་ལམ་ལས་ཀྱིས་ཆད། །
སུག་བཞི་མགྱོགས་པ་ལུས་ཀྱི་གྲུབ་སྟངས་ཤིག །
ཤ་གཟན་རིགས་སུ་མ་སྐྱེས་མཆེ་བ་མེད། །
ལྟོ་ཕྱིར་གཞན་སྲོག་གཅོད་པའི་འདོད་རྔམས་མེད། །
རྩ་སྔོན་ཆུ་གཙང་སོ་སོས་བཙལ་བས་རྙེད། །
སྤེན་ཕུང་བྲག་ཕུག་རང་བྱུང་སྡོད་ཁྱིམ་ཉིད། །
སུ་ལའང་མི་གནོད་འཚོ་བ་རོལ་ན་ཡང་། །
རི་བོང་རྣ་ཅོག་མཐོ་ཞེས་ཀུན་གྱིས་སྨོད། །
སྟག་མོའི་མཆེ་སྡེར་མཐོང་ན་སྙིང་རྩ་འདར། །
འབྲོང་གཡག་གློ་སྙིང་བཤད་ན་བླ་སྲོག་འཆོར། །
དེ་གཉིས་བར་ན་འཚང་བའི་དཔའ་མེད་ཀྱང་། །
རི་བོང་གཡོ་སྒྱུས་སྟག་མོ་ཆུར་གཡུགས་ཟེར། །
རྫི་བོས་མཐོང་ན་འུར་རྡོ་ཀླད་ལ་བསྐོར། །
བྱིས་པས་མཐོང་ན་རང་བྱུང་ཉལ་ཚང་གཏོར། །
རང་ལས་གཞན་པ་ཐམས་ཅད་དགྲར་ལངས་པ། །
བརྟགས་ན་རང་ཉིད་སྟོབས་ཤུགས་མེད་པས་ལན། །
རང་མཉམ་སུ་ལ་མཐུན་པས་བཀུར་ན་ཡང་།
སྲེ་མོང་ཨ་བྲ་འདེད་པའི་འབྲོས་ཞོར་དུ། །
རི་བོང་ཐུག་ན་རང་གི་མཆེ་བ་ངོམས། །
ཀུན་གྱིས་དགྲ་ལན་འཇལ་ས་རི་བོང་ང་། །
རང་འོག་གྲོག་མ་ཙམ་ལ་གནོད་མ་བསྐྱལ། །
མི་གཅིག་རིག་ན་འདབ་ཆགས་བྱ་ལྟར་འབྲོས། །
སྲོག་དམར་བཅད་ཀྱང་ཡ་ལན་ཞེ་ལ་མེད། །
རི་བོང་ཁ་ཤོ་ཀུན་གྱིས་ཐན་ལྟས་འབོད། །
ནམ་མཁའ་རྡིབ་པའི་སྣང་བ་ཡིད་ལ་མེད། །
ས་གཞི་འཇིག་པའི་དུས་ཀྱང་དཔྱོད་མི་ཤེས། །
གླེན་ལྐུགས་སྡུག་གིས་མནར་བའི་དུད་འགྲོ་ང་། །
རི་བོང་གནམ་རྡིབ་སྡུག་བསྔལ་ཡོད་ཅེས་གླེང་། །
མདོར་ན་ཉེས་ཚད་ཉམ་ཆུང་མགོ་ལ་གཡོགས། །
བཟང་ཚད་ངོ་སོ་བཙན་པོས་ཁྱེར་བ་འདི། །
དྲང་བདེན་འགོ་མཇུག་ལྡོག་པའི་འཇིག་རྟེན་འདིར། །
རི་བོང་ལུས་ཤིག་བླངས་ན་དམྱལ་བླ་ཡིན། །
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
