Tue 01 Aug 2017
སྨན་ཁང་ནང་གི་སེམས་ཚོར།
ནགས་ཀྱི་ཤིང་ལོ་ནས།
ཀ་མ་རུ་ཡི་རྡོ་ཡིས་བསྐྲུན་པའི་གཙང་ཞིང་དྭངས་བའི་སྨན་ཁང་དེར།།
ཁ་དོག་མི་གཅིག་མི་ཚོགས་དེ་རྣམས་འཚང་ཁ་ཤིག་ཤིག་ནང་དུ་འཛུལ།།
ག་ལེར་ཉན་དུས་ཟུག་དང་གཟེར་གྱི་སྐད་ཅོར་དེ་ཡིས་རྣ་བ་སུན།།
ང་ཡི་སེམས་འདི་རང་ལ་བསྐོར་དུས་གནས་སྐབས་བདེ་བའི་ཚོར་སྣང་སྐྱེས།།
ཅ་ཅོའི་སྐད་ཀྱིས་ག་ས་ག་ནས་ན་དང་ཚ་བའི་ཨག་སྐད་དང་།།
ཆ་ལུགས་བཞིན་གྱི་མདངས་ཤོར་མིག་ནས་མཆི་མ་འཛག་པའི་སྣང་ཚུལ་དེས།།
ཇ་ཕོར་ནང་གི་ཇ་ཡི་བྲོ་བ་རེ་ཞིག་སྟོང་པའི་ངང་དུ་འཐིམ།།
ཉ་བེ་ཉོབ་ཀྱིས་ཁང་བཟང་དེ་ཡང་མིག་གི་མཐོང་དུས་སུན་སྣང་སྐྱེས།།
ཏ་ཀུ་ལག་ཏུ་ཐོགས་པའི་བརྒྱད་བཅུའི་རྒན་ཁོགས་སྐྲ་དཀར་མན་ཆོད་ནས།།
ཐ་ན་རྙེད་པར་དཀའ་བའི་མི་ལུས་རིན་ཆེན་ལན་གཅིག་ཐོབ་གྱུར་ནས།།
ད་ལྟ་ཨ་མའི་མངལ་ནས་མི་ཡི་ཡུལ་འདིར་སླེབས་མ་ཐག་པ་ཡན།།
ན་འཆི་ཞེས་པའི་འཕྲང་ལམ་དེ་རུ་སྔོན་དུ་སུ་འགྲོའི་གདམ་ཀ་མེད།།
པ་ཕ་ཞིག་ནི་རང་གི་མིག་ཟུང་གཅེས་པའི་བུ་ཡི་གདོང་ལ་ཅེར།།
ཕ་རྒན་ནད་པའི་ཉལ་ཁྲིའི་སྔས་མགོ་བུ་ཕྲུག་ཟུང་གིས་མིག་ཆུ་གཏོང་།།
བ་མོས་བཅོམ་པའི་སྟོན་ཐོག་བཞིན་དུ་ལུས་ཟུངས་ཉམས་པའི་ཨ་མའི་པང་།།
མ་དང་མ་ཞེས་ངུ་སྐད་ལྷན་དུ་དམར་འབྱར་ཞིག་གིས་འོ་མ་འཐུང་།།
ཙ་ར་ཀ་ཡིས་ཉིན་མཚན་བར་མེད་ནད་པའི་ལུས་ལ་དཔྱད་ན་ཡང་།།
ཚ་གྲང་གཉིས་ཀྱི་ནད་ཀྱིས་བཏབ་པའི་ཉམ་ཆུང་ནད་པའི་ཁ་ངོ་ལས།།
ཛ་དྲག་ཆེ་བའི་སྣང་ཚུལ་སྐྱུར་མོས་ཚོར་བའི་ཁ་དོག་གྲང་བའི་ཚེ།།
ཝ་མོ་བཞིན་དུ་སྡར་བའི་ནར་སིས་མིག་གིས་མཐོང་དུས་སྙིང་རྩ་འདར།།
ཞ་ལོང་མིན་ལ་བདེ་ཞིང་སྐྱིད་པའི་འཚོ་བས་ད་ལྟ་ལྷོད་ན་ཡང་།།
ཟ་བྱེད་འཆི་བདག་འཇིགས་རུང་དེ་ཡིས་སྐེ་ལ་ཞགས་པ་ཐེབས་པའི་ཚེ།།
འ་འུར་སྐད་ཀྱིས་འཇིག་རྟེན་བསྒུལ་ཡང་སྐྱོབ་པའི་ནུས་པ་སུ་ལ་མེད།།
ཡ་ང་མེད་པའི་འཆི་བདག་འདི་ལ་ང་ནི་སྙིང་ནས་ཁོང་ཁྲོ་ཟ།།
ར་བ་གངས་ཀྱིས་སྐོར་བའི་ཕ་ས་ཕ་ཡུལ་རི་ཆུ་སྟོང་གིས་ཆོད།།
ལ་དང་ལུང་པ་གོམ་གྱིས་འཇལ་ནས་རྒྱུས་མེད་གཞན་ཡུལ་སྨན་ཁང་ལྷུང་།།
ཤ་ཁྲག་འབྲེལ་བའི་ཕ་མ་སྤུན་མཆེད་སྐད་ཀྱིས་བོས་ཀྱང་ཉེ་སར་མེད།།
ས་མཐའ་འདི་རུ་གདུང་བས་མནར་བའི་ནད་པ་འདི་ནི་ཨ་མའི་བུ།།
ཧ་ཅང་ན་ནས་ལུས་ཀྱི་ཕུང་པོ་རྐང་པ་ཟུང་གི་མི་ཁྱོག་ཡང་།།
ཨ་ར་ཨ་ནའི་ཚིག་གཅིག་མི་ཤོར་ཨམ་གཙིགས་བསྡམས་པ་གདོང་དམར་བུ།།
ཧ་ལམ་མིན་ན་གཞན་ཞིག་ཡིན་ན་ད་ལྟ་འཚོ་བའི་རེ་བ་མེད།།
ཨ་མའི་བུ་ཁྱོད་སེམས་ཀྱི་རྒྱ་ནི་སུ་དང་གང་གིས་ཚད་དུ་མེད།།
༢༠༡༧—༡—༢༠
སྡེ་ཚན།
སྙན་རྩོམ།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
