Fri 14 Jul 2017
ཞབས་དཀར་ཚོགས་དྲུག་རང་གྲོལ་ལ་ཕུལ་བ།
འབྲི་རུ་ལམ་བཟང་།
ལོ་བཅུ་ཕྲག་ཉི་ཤུ་ཡི་ཡར་སྔོན་དུ།།
རྗེ་མི་ལ་འདྲ་བའི་གྲུབ་ཆེན་ཞིག།
ཤ་རུས་པ་བྲག་རྩི་འགོས་པ་ཞིག།
འཕྱོར་ཁ་དོག་སྔོ་གམ་ཆགས་པ་ཞིག།
མགོའི་རལ་པ་རླུང་གིས་གཡོ་བ་ཞིག།
མགུར་སང་སང་ལམ་ནས་ལེན་པ་ཞིག།
གོས་ན་བུན་ལུས་ལ་གྱོན་པ་ཞིག།
ས་མདོ་སྨད་རེབ་གོང་ཡུལ་ནས་ཡོང་།།
ལ་ལུང་པ་གྱེན་དང་ཐུར་གྱིས་བརྒལ།།
ཆུ་གྲམ་པ་གསེག་དང་འཕྲད་ཀྱིས་བཅད།།
ཐང་སྐྱ་མོ་དལ་དང་ལྷོད་ཀྱིས་གཤགས།།
དཔོན་བསོན་ནམས་ཅན་ལས་སློང་གིན་ཡོང་།།
དབུལ་མུ་གེས་མནར་ལ་སྟེར་གྱིན་ཡོང་།།
ཇག་ཆོམ་རྐུན་དགེ་ལ་འགོད་ཀྱིན་ཡོང་།།
ཡོང་ཡོང་བས་ཉི་མ་ལྷ་ས་འབྱོར།།
ལྷ་ཇོ་བོའི་མདུན་དུ་མཆོད་མེ་ཕུལ།།
དྲིན་ཨ་མའི་ཕྱི་ལམ་གསལ་བར་སྨོན།།
མགོན་རྒྱལ་བའི་གསེར་ཞལ་དད་པས་མཇལ།།
དགོན་བསམ་ཡས་ལ་སོགས་གནས་འབྲེལ་བཞག།
རྐང་འཁོར་ལོས་ཙཱ་རི་གངས་སོགས་བསྐོར།།
མཚམས་སྒྲུབ་པ་ལོ་ཟླ་ཞག་དུས་བསྡད།།
སྡེ་སྐྱ་སེར་འདི་ཕྱིའི་ལམ་བུ་སྟོན།།
གློ་ཆུ་མིག་བརྒྱ་རྩ་གཡས་གཡོན་བཞག།
ཡུལ་བལ་པོའི་མཆོད་རྟེན་རྣམ་གཉིས་མཇལ།།
དཔོན་གོར་ཁའི་བཀའ་བཟང་འཁོར་བ་ལས།།
གསེར་སེར་པོས་བཅུ་གསུམ་འཁོར་ལོ་བརྒྱན།།
འབྲོག་ལ་ཕྱི་གངས་ཀྱི་ར་བར་སོང་།།
རྗེ་མི་ལ་རས་པའི་རྣམ་ཐར་བསྐྱངས།།
ཉམས་རྟོགས་པའི་མགུར་དབྱངས་ལྷངས་སེ་ལྷང་།།
ཡེ་གདོད་མའི་བྱ་ལམ་གོང་མ་རུ།།
ལམ་རིམ་གྱི་རྟ་ཕོ་བཞོན་བཞིན་དུ།།
ཕྱག་རྫོགས་ཀྱི་གཤོག་པ་གཡོབ་ཀྱིན་འཕུར།།
ཉོན་མོངས་པའི་དགྲ་དཔུང་ཆམ་ལ་ཕབ།།
ཁྱེད་ས་ཐོག་གི་སངས་རྒྱས་གསོན་པོ་འདྲ།།
སྡིག་ཤན་པ་ཚོས་ལག་གི་བཤས་གྲི་ཤོར།།
ལམ་ཇག་པ་རྣམས་སྔར་འགྱོད་ཕྱིས་སྡོམ་བྱས།།
ས་ནག་པོར་ཆོས་ཀྱིས་དཀར་བར་བྱས།།
ཁྱེད་སྔགས་པ་དང་འདྲ་ལ་སྔགས་པ་ཡིན།།
དབུའི་རལ་ལོ་རེ་དུག་ལྔའི་ལྕག་ཚན་ཡིན།།
རྩ་རླུང་དང་ཐིག་ལེ་ནི་རང་དབང་ཡོད།།
ཁྱེད་བཙུན་པ་དང་འདྲ་ལ་བཙུན་པ་ཡིན།།
གོས་ངུར་སྨྲིག་དེ་འཁོར་བའི་ཡོལ་གོ་ཡིན།།
ཁྲིམས་ཉིས་བརྒྱ་ལྔ་བཅུ་ཡི་ལྕགས་རི་བརྟན།།
ལམ་ལུགས་སྲོལ་ཞིག་གང་བརྒྱུད་མ་བལྟས་པར།།
ཆོས་རྩ་ཆེན་ནི་གྲངས་མེད་ཐུགས་ལ་མནོས།།
ཕྱོགས་ཤར་ནུབ་ནི་གང་ལ་མ་གཟིགས་པར།།
དགོན་རི་ཁྲོད་ནི་དུ་མ་ཕྱག་ཏུ་བཏབ།།
ཞྭ་དམར་སེར་གྱི་ཁ་དོག་མ་དྲན་པར།།
རྗེ་བླ་མ་ཀུན་ཞབས་རྡུལ་སྤྱི་བོར་བླངས།།
ལམ་རིང་ཐུང་གི་འགྲོ་ཡུན་མ་འཛེམས་པར།།
གནས་ངེས་མེད་དུ་རྩེ་བསྐོར་མཐའ་བསྐོར་བརྒྱབ།།
གསེར་རྡོག་པོ་དང་རྡོག་པོར་ཆགས་མྱོང་མེད།
ཞིང་ཆུ་མ་དང་ཆུ་མར་ཞེན་མྱོང་མེད།།
སྨན་མཛེས་མ་དང་འཕྱོར་མས་བསླུ་མྱོང་མེད།།
མགོན་བླ་མ་ཡི་གདམས་ངག་སྙིང་ལ་བཅངས།།
གཉེན་ཉེ་འདུ་ཀུན་དོར་ཏེ་དམ་ཆོས་བསྒྲུབ།།
ཚེ་སྒྲུབ་པ་དང་མཉམ་པའི་གྲུབ་ཐོབ་ཁྱེད།།
ལུས་རི་མགོ་རུ་ཟད་པའི་རི་པ་ཁྱེད།།
ཁྱེད་དངོས་མཇལ་ཞིག་དུས་ཀྱིས་བསྐལ་ན་ཡང་།།
ལས་སྨོན་ལམ་གྱིས་རྣམ་ཐར་གསེབ་ནས་མཇལ།།
དུས་དེང་སང་གི་དུས་ངན་སྙིགས་མ་རུ།།
རྟགས་ཙམ་གྱི་བསྟན་པ་ཡི་མར་ཁུག་ན།།
ཉོན་མོངས་པ་ཡི་འདུ་ལོང་རྒོད་ས་འདིར།།
དམར་སེར་སེར་གྱི་ཁ་དོག་བཙན་ན་ཡང་།།
ཁྱེད་སྤུ་རྐང་གཅིག་དོ་མཁན་དཀོན་དཀོན་རེད།།
ཞིང་གང་ཞིག་ཏུ་བཞུགས་མིན་མ་ཤེས་ཀྱང་།།
ས་འདི་ཐོག་གི་བདག་འདྲའི་ས་འབུའི་ཚོགས།།
ཐུགས་བརྩེ་བ་ཡིས་མ་འདོར་བླ་མ་མཁྱེན།།
ཞབས་དཀར་ཚོགས་དྲུག་རང་གྲོལ་གྱི་རྣམ་ཐར་ཞིག་བཀླགས་རྗེས་མཐོང་ཐོས་མྱོང་གསུམ་འགའ་ཚིགས་སུ་བཅད་པ།
སྡེ་ཚན།
སྙན་རྩོམ།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
