Fri 14 Jul 2017
གྲུབ་དབང་བླ་མ།
ལམ་བཟང་པོས།
པདྨ་ཀ་ར་ཡི་གདུང་འཚོབ།།
ཟས་གཙང་སྲས་པོ་ཡི་ཐུགས་སྲས།།
བྱམས་དང་སྙིང་རྗེ་ཡི་བསྡུས་གཟུགས།།
གྲུབ་དབང་བླ་མ་ཁྱེད་དྲན་སོང་།།
མདོ་བསྟན་གསལ་བྱེད་ཀྱི་ཉི་མ།།
སྔགས་བསྟན་རྒྱས་བྱེད་ཀྱི་ཟླ་བ།།
མདོ་སྔགས་བསྟན་པ་ཡི་ཀ་ཆེན།།
གྲུབ་དབང་བླ་མ་ཁྱེད་དྲན་སོང་།།
མཁྱེན་པ་ནམ་མཁའ་ལྟར་ཡངས་པ།།
ཐུགས་རྒྱུད་བལ་ལོ་ལྟར་འཇམ་པ།།
བརྩེ་བ་མཐོ་དམན་ཀུན་སྙོམ་པ།།
གྲུབ་དབང་བླ་མ་ཁྱེད་དྲན་སོང་།།
དགྲ་ལ་འཁོན་ལན་གྱིས་མི་རྒོལ།།
གཉེན་ལ་ཆགས་ཞེན་གྱིས་མི་སྐྱོང་།།
འགྲོ་ཀུན་བུ་ཕྲུག་བཞིན་གཅེས་པའི།།
གྲུབ་དབང་བླ་མ་ཁྱེད་དྲན་སོང་།།
བསླབ་པ་མིག་འབྲས་བཞིན་སྲུང་བ།།
ཉམས་ལེན་ཆུ་རྒྱུན་བཞིན་བརྩོན་པ།།
སྒོ་གསུམ་གསེར་དངུལ་བཞིན་རྟོག་པ།།
གྲུབ་དབང་བླ་མ་ཁྱེད་དྲན་སོང་།།
རྟོགས་པ་མཁའ་དབྱིངས་ལས་འཕགས་ཀྱང་།།
སྤྱོད་པ་ཞི་དུལ་གྱི་དགེ་སྦྱོང་།།
བཤད་སྒྲུབ་ཆོ་ག་ཡི་བྱེད་པོ།།
གྲུབ་དབང་བླ་མ་ཁྱེད་དྲན་སོང་།།
རྟག་འཛིན་གདུལ་བྱ་ཡི་མིག་ངོར།།
རྨི་རྟག་སྒྱུ་མ་རུ་སྟོན་ཕྱིར།།
ཞལ་ཁ་ཆོས་དབྱིངས་སུ་བསྒྱུར་བའི།།
གྲུབ་དབང་བླ་མ་ཁྱེད་དྲན་སོང་།།
དུག་ལྔའི་བརྙས་བཅོས་ཀྱིས་མནར་ཞིང་།།
བླ་མར་སྐྱོ་གདུང་གིས་འབོད་པ།།
ཉམ་ཐག་སྐལ་དམན་ཚོར་གཟིགས་པའི།།
གྲུབ་དབང་བླ་མ་ཁྱེད་དྲན་སོང་།།
ཕྱག་གིས་བྱིལ་བྱིལ་རེ་གནང་གིན།།
གསུང་གིས་སྙན་སྙན་རེ་གསུང་གིན།།
ཐུགས་ཀྱིས་གཅེས་གཅེས་བྱས་སྙལ་བའི།།
གྲུབ་དབང་བླ་མ་ཁྱེད་དྲན་སོང་།།
སངས་རྒྱས་གདོད་མ་ནས་མི་འབོད།།
རྒྱལ་སྲས་ཐག་རིང་ནས་མི་འཚོལ།།
མཛད་པ་གཅིག་མཐུན་གྱི་བདག་ཉིད།།
གྲུབ་དབང་བླ་མ་ཁྱེད་དྲན་སོང་།།
རྒྱལ་བསྟན་གསེར་འོད་ལྟར་འཕྲོ་ཞིང་།།
བསྟན་འཛིན་དབྱར་མཚོ་བཞིན་ལུད་པ།།
གང་གི་ཐུགས་བསྐྱེད་ཀྱིས་བསྐྲུན་པའི།།
ཆོས་ཀྱི་གྲོང་ཁྱེར་དེ་དྲན་སོང་།།
གང་གི་མཛད་པ་རེ་བརྗོད་ན།།
སོ་སྐྱེས་ལྕེ་རྩེ་ཡང་དིག་འགྲོ།།
འཕྲིན་ལས་ཆ་ཤས་རེ་བགྲངས་ན།།
ལག་གི་སོར་འདབ་ཀྱིས་མི་འདང་།།
གང་གི་ཡང་སྤྲུལ་གྱི་ཉི་གཞོན།།
ཤར་གྱི་ལྷུན་པོ་ནས་འགོད་དུས།།
སྐལ་ལྡན་གདུལ་བྱ་ཡི་པད་ཚལ།།
དགའ་བའིི་འདབ་ལོ་དེ་གྲོལ་སོང་།།
སྐུ་ཚེ་རྡོ་རྗེ་ཡི་ངོ་བོ།།
མི་ཞིག་བསྐལ་པའི་མཐར་བསྲིངས་ཏེ།།
མཛད་པ་རྟ་བདུན་གྱི་དབང་པོས།།
གོ་ལ་ཧྲིལ་པོ་རུ་ཁྱབ་ཤོག།།
༧སྐྱབས་རྗེ་གྲུབ་དབང་ཡིད་བཞིན་ནོར་བུ་ཞལ་མཇལ་གསུང་ཐོས་ཀྱི་སྐལ་བ་ལྡན་མྱོང་བའི་ས་མཐའི་འཁྱམ་པོ་འབྲི་རུ་བ་ལམ་བཟང་འབོད་པས་དྲན་གདུང་དབྱངས་སུ་གྱེར་བའོ།།
སྡེ་ཚན།
སྙན་རྩོམ།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
