Tue 04 Feb 2020
བློན་ཆེན་མགར་སྟོང་བཙན། ད་དུང་ཁོང་གི་བུ།
ནགས་ཤོད་ཅོང་བརྡ།
གྲགས་པའི་གདུགས་དཀར་རིང་དུ་ཁྱབ་པ་ཡི།།
བཙན་པོ་སྲོང་བཙན་ཁྲི་གདུགས་ཉི་མ་ལ།།
ཆབ་འབངས་སྐར་ཚོགས་གྲངས་ལྟར་བཀྲ་བའི་དབུས།།
བློན་ཆེན་ཡུལ་བཟུང་དུང་གི་ཟླ་བ་ཚེས།།
མཛངས་བློན་དེ་ཡིས་ཁོད་ཀྱི་གཞི་རྟེན་བགྱིས།།
རྗེ་ལ་ཞོ་ཤ་འབུལ་དང་ཁབ་མཐའ་བསྐྱེད།།
དེ་ཀུན་ལྷག་མེད་འབྲི་བར་མི་སྤོབས་ཀྱང་།།
ཡབ་མེས་བློན་ཆེན་དྲན་པས་ཅུང་ཟད་འབྲི།།
ཟླ་མེད་བློན་ཆེན་དེ་ཡིས་ལེགས་བསྐྱངས་པའི།།
བུ་སྤུན་སྟག་ཕྲུག་འདྲ་བ་ལྔ་མཆིས་པ།།
བོད་ཐང་ཡིག་རྙིང་དག་ལས་གསལ་པ་ན།།
ཕ་གཅིག་བུ་ལྔ་དུས་འདིར་དྲན་པར་འོས།།
བློན་ཆེན་ཡུལ་བཟུང་ཞི་དྲག་ཀུན་འཛོམ་དེས།།
གཡོ་ཆེན་ཟུ་རྩེའི་ཇུས་ཆེས་ཆུ་ལ་བསྐྱུར།།
བཙན་པོའི་བཀའ་བཞིན་ཞལ་ལྕེ་ཡི་གེར་བྲིས།།
རྒྱལ་འབངས་བདེ་བའི་ལས་འདི་སུ་ཡིས་ནུས།།
མ་ཆུང་བལ་པོའི་བྲང་ལ་ཕྱག་རྗེས་དཔར།།
རྒྱལ་བློན་དྲེགས་ལྡན་དབུས་སུ་ཕོ་ཤེད་ངོམ།།
དཔྲལ་བའི་མིག་བཞིན་གཅེས་པའི་ནུ་རྒྱས་མ།།
ཕྱེ་ལེབ་འཐོར་རླུང་དེད་ལྟར་བོད་དུ་དྲངས།།
ཆེན་པོ་ཐང་གི་མགོ་ལ་ཞབས་རྗེས་ཕབ།།
སྐྱེན་པོ་བློན་མང་ཁྲོད་ནས་རིག་སྟོབས་ངོམ།།
ཁོག་པའི་སྙིང་བཞིན་བརྩེ་བའི་སྐེད་མེད་མ།།
སྟོང་ལོ་ལྷགས་པས་ཁུར་ལྟར་བོད་དུ་དྲངས།།
འདོ་ཆེན་རྨིག་པའི་རྡུལ་གྱིས་ཉི་ཟླ་བསྒྲིབས།།
རྒྱོབ་སོད་ཆོམ་སྒྲས་སྡར་མ་དར་ཤིང་བཞིན།།
སྐབས་དེའི་གྲུ་གུར་ཁྲག་གི་ཆར་ཤོད་བབས།།
སྟོང་བཙན་ཡུལ་བཟུང་དཔའ་ཡ་སྲིད་འདིར་མེད།།
རལ་གྲིའི་སོ་ཁར་བསད་པའི་ཁྲག་ཞག་ཆགས།།
ཁྲབ་ཀྱི་བྱང་བུར་དགྲ་བོའི་ཀླད་ཞོ་འཁྱིལ།།
སྐབས་དེའི་ཐང་བོད་མཚམས་ཀྱི་གནམ་ས་དམར།།
ལག་དམར་ཡ་མེད་སྟོང་བཙན་ཡུལ་བཟུང་ཡིན།།
དཔའ་བོའི་ཀི་བསྭོས་སྒྲ་གཞན་ཉམ་པར་གྱུར།།
ཁྲབ་ཀྱི་སིང་སྒྲས་རོལ་མོར་ཅོ་འདྲི་བགྱིས།
འ་ཞའི་འཛིན་མས་རུས་པའི་གོས་དཀར་གོན།།
སྟོང་བཙན་ཡུང་བཟུང་ཞི་དྲག་གཉིས་འཛོམ་ཡིན།།
དམག་རྟའི་རྨིག་པས་འཛིན་མའི་སྙིང་ཁ་བརྡུངས་།།
བ་དན་རྩེ་མོས་ཀུན་གསལ་ལྟོ་བ་དབྲལ།།
རྒྱལ་ཁའི་དུང་ཆེན་མཚོ་ནག་འགྲམ་ནས་བུད།།
རྒྱ་ནག་ལྕགས་ནག་བརྡུངས་མཁན་ཁྲི་འབྲིང་[1]ཡིན།།
བོད་ཐང་སོ་མཚམས་དཔའ་ཡ་རྒོད་ཀྱང་རུང་།།
བློན་ཆེན་ཁྲི་འབྲིང་འགྲན་པར་རློམས་པ་ནི།།
གནག་བརྫི་བློ་ཆུང་འཇའ་ཚོན་འཛིན་པ་བཞིན།།
རེ་འབྲས་མི་ལོན་ནམ་མཁའི་མེ་ཏོག་མཚུངས།།
ཡ་མེད་ཁྲི་འབྲིང་མིང་གི་རྩུབ་མོའི་མདའ།།
གབ་ཡངས་ཁང་ཁྱིམ་ནང་དུ་དྲེགས་པའི་གཏམ།།
སྨྲ་བར་གོམས་པའི་ཐང་གི་དཔོན་བློན་རྣར།།
ཐེབས་པ་ཙམ་གྱིས་སྤ་གོང་དཔུང་ཡང་འཐོར།།
རུ་དར་བསྒྲེངས་པས་ཉི་ཟླའི་བགྲོད་ལམ་དོག།
འདོ་ཆེན་རྒྱུགས་པས་སྟོན་གྱི་ལོ་ཏོག་བཅོམ།།
སྐབས་དེའི་འཇང་གི་ནོམ་པར་བདག་པོ་མེད།།
མགར་བུ་བཙན་སྙ[2]འི་དཔའ་མཛངས་ཅི་འདྲ་རེད།།
དམག་དཔུང་ཟིལ་གྱིས་གཤིན་རྗེའི་བརྗིད་པ་འཕྲོག།
དར་མདུང་སོ་ནས་ཁྲག་རྒྱུན་དྲོན་མོ་འཐིག།
སྐབས་དེའི་ཙི་ནའི་བུད་མེད་ཡུགས་མོར་བསྒྱུར།།
འབྲིང་རྩན་རྩང་སྟོན་[3]མཛད་རྗེས་ཆུང་ལེ་མིན།།
བཙན་ཉེན་གུང་རྟོན་[4]གཡུལ་ངོར་ཆས་པ་དང་།།
དཔའ་བོའི་ཁྲག་རྒྱུན་འཛིན་མས་ངོམས་པར་བཏུང་།།
སྡར་མ་འཇིགས་པས་མིག་གིས་རབ་འཁྲུལ་ཏེ།།
དགྲ་བོའི་གམ་དུ་དོགས་མེད་འབྲོས་འདི་མཚར།།
མ་བརྟགས་གྱ་ཚོམ་བྱ་བར་བཞུགས་པ་ཡིས།།
དཔའ་བར་གྲགས་འདོད་ཆེ་བའི་དྲེགས་བློན་དག།
རང་མགོ་སྐྱེས་སུ་འབུར་དུ་ཡོང་བ་དང་།།
གཉིས་སུ་མ་མཆིས་སྟ་གུ་རི་ཟུང་[5]ཐུག།
སྟོང་བཙན་ཕ་བུས་གཡུལ་ངོ་བཤམས་པ་ན།།
དགྲ་བོས་འོ་དོད་འབོད་བཞིན་ཁུང་དུ་འཛུལ།།
དགུང་གི་སེར་རྒོད་འདྲིལ་བའི་ཁ་འོག་ཏུ།།
དགྲ་བོ་རམ་ནག་ལྷག་པའི་ལོ་རྒྱུས་མེད།།
དགྲ་ལ་སྡོང་བའི་མིག་རྩ་དམར་བ་ཁྲག།
གཉེན་ལ་བྱམས་པའི་སེམས་རྩ་དཀར་བ་དར།།
གཡུལ་ལ་དཔའ་བའི་སྙན་པ་མི་དམའ་བའི།།
སྟོང་བཙན་ཕ་བུའི་གཤིས་འདི་མཛངས་པ་ལ།།
སྤུ་རྒྱལ་བཙན་པོའི་དབུ་རྨོག་བཙན་པ་དང་།།
མགར་བློན་ཕ་བུ་དགྲ་ལ་རྒོད་པ་གཉིས།།
གདོང་དམར་བུ་རྟ་གཡུལ་ལ་དཔའ་བ་གསུམ།།
བོད་ཀྱི་ཁབ་མཐའ་གནམ་སའི་མཚམས་སུ་བསྐྱེད།།
བཙན་པོའི་དབུ་འཕང་ཡར་གྱི་གནམ་ལས་མཐོ།།
བློན་པོའི་དཔའ་མཛངས་མར་གྱི་མཚོ་ལས་ཟབ།།
མངའ་འབངས་ཁ་ཞིང་ཆེ་བ་གནམ་གྱི་སྐར།།
རྒྱལ་བློན་བྱས་པ་ཅན་རྣམས་ཡུན་དུ་དྲན།།
1 ཁྲི་འབྲིང་། མགར་གྱི་བུ་གཉིས་པ་ཡིན།
2བཙན་སྙ། མགར་གྱི་བུ་ཆེ་བ་ཡིན།
3 འབྲིང་རྩན་རྩང་སྟོན།མགར་གྱི་བུ་གསུམ་པ་ཡིན།
4 བཙན་ཉེན་གུང་རྟོན། མགར་གྱི་བུ་ཐ་ཆུང་ཡིན།
5 སྟ་གུ་རི་ཟུང་། མགར་གྱི་བུ་བཞི་པ་ཡིན།
སྡེ་ཚན།
སྙན་རྩོམ།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
