Subscribe to this RSS feed

སྙན་རྩོམ།

Sun 30 May 2021

རྗེས་དྲན་ཡིད་ཀྱི་མེ་ཏོག །

ནགས་ཤོད་སྐལ་རྒྱན།   

སྐལ༵་ལྡན་སྐྱེ་བོ་ཀུན་གྱི་ཕན་བདེའི་གཞི། །
བཟང༵་པོའི་མདོ་སྔགས་རིག་པའི་གནས་འདི་ཞེས། །
རྒྱལ༵་བའི་ལུང་གིས་ཡང་ཡང་བསྔགས་པ་བཞིན། །
མཚ༵ན་ལྡན་བཤེས་ཀྱིས་ཤེས་རིག་སྐྱོང་ཚུལ་གླེང་། །

སྔོན་ཚེ་སློབ་དཔོན་ཐོན་མི་བོད་ལ་འཁྲུངས། །
བོད་ཀྱི་སྐད་ཡིག་རིག་པའི་ལམ་སྲོལ་གཏོད། །
ཤེས་རིག་ཁ་བའི་རི་བོའི་དབུ་རྩེ་འཕུར། །
སློབ་དཔོན་ཐོན་མི་བཀའ་དྲིན་ཆེ་བའི་དཔེ། །

ད་ཀོ་བོད་ཀྱི་སྐད་དང་ཡི་གེའི་སྲོག །
མི་ཚེ་གང་པོར་འཛིན་སྐྱོང་སྤེལ་གསུམ་དུ། །
དཀའ་སྤྱད་འབད་པ་བརྒྱ་ཡིས་སྲུང་བྱེད་པ། །
འབྲི༵་ཡི་དགེ༵་བཤེས༵་རིང༵་མཐོང༵་སླར་ཡང་དྲན། །

ཆུང་ཆུང་བྱིས་པའི་དབྱངས་གསལ་སློབ་གསོ་ནས། །
ཚིག་ཕྲད་རྣམ་དབྱེའི་སྦྱོར་བ་སྤེལ་སྟངས་དང་། །
དུས་གསུམ་དག་ཆ་མ་ནོར་འབྲི་ཐབས་སོགས། །
སྐད་ཡིག་རྨང་གཞི་རྩ་བ་ཚུགས་པའི་བར། །

དགག་སྒྲུབ་རིག་པའི་བརྡ་སྤྲོད་རིགས་ལམ་ནས། །
ནང་དོན་འཇམ་རྩུབ་བརྗོད་བྱའི་ཁྱད་པར་ལས། །
སྒྲིག་ལེགས་ཚིག་དོན་གོང་འོག་འབྲེལ་བ་དང་། །
སྙན་རྩོམ་ཆེན་མོའི་སྡེབ་སྦྱོར་ཉམས་འགྱུར་བར། །

ནགས༵་ལྷའི༵་སྒྲོན༵་མེའི༷་དེབ་ཕྲེང་དང་པོ་ནས། །
བོད་ཀྱི་སྐད་ཡིག་རིག་པའི་བང་མཛོད་ཆེ། །
སྙན་འཇེབས་རྣ་བའི་བདུད་རྩིས་གཏམ་པ་ཡི། །
རྩོམ༵་རིག༵་རིན་ཆེན་རིགས་པས་གང་བའི་བར། །

མདོ་སྔགས་གསུང་རབ་ཟབ་མོའི་རིགས་ལམ་ནས། །
དེང་རབས་ཚན་རིག་མཁས་པའི་དཔྱད་ཐབས་ཀྱི། །
གནའ་དེང་མཁས་པའི་རིགས་པའི་གསང་ཚིག་ཀུན། །
གདམས་ངག་བདུད་རྩིའི་རྒྱ་མཚོ་འཁྱིལ་བའི་བར། །

རིག་གནས་ཆེ་ཆུང་སྤྱི་དང་སྙན་ངག་ལ། །
ལྷག་པར་དུང་བའི་ནགས་ཤོད་སློབ་མ་ལ། །
སྙན༷་རྩོམ༵་འགྲན༵་བསྡུར་ཆེན༵་མོའི༵་བྱ་དགའ་དང་། །
ལེགས་སོ་བསྔགས་བརྗོད་སྤོབས་པ་དགེ་བའི་བར། །

སྒྱུ་རྩལ་རྩོམ་རིག་བཀོལ་སྤྱོད་བདེ་ཐབས་སུ། །
ལྷོ་མཐའི་ཁ་བ་ཨེ་ཝམ་རང་སྒྲ་སོགས། །
ལྷག་པར་ནགས་ལྷའི་སྒྲོན་མེའི་མཚན་སྙན་ལྷན། །
བོད་ཀྱི་སྐད་ཡིག་དབུ་འཕང་དགུང་དུ་བཏེགས། །

ཚོགས་ཀྱི་དབུས་སུ་གཏམ་ཁོག་འབུབས་སྟངས་ནས། །
ནང་དོན་གནས་བསྡུས་རིགས་པས་བརྡར་ཤ་དང་། །
དྲི་བ་དྲིས་ལན་སྐད་བརྡ་སྦྱོར་སྟངས་སོགས། །
ཡང་ཡང་རྩོད༵་པ༵འི་སྡིངས་ཆའི་མཐུན་རྐྱེན་བར། །

བ༵རྡ་སྤྲོད༵་རི༵ག་པ༵འི་བ༵གྲོ་གླེང༵་ཆེ༵ན་མོ༵་ནས། །
ངག་རིག་འཆད་པའི་རྩལ་ཆེན་འགྲན་པ་ལས། །
མ༵དོ་ཁམ༵ས་ནགས༵་ཤོད༵་འབྲི༵་རུ༵འི་སློ༵བ་མ༵་ཞེས། །
འཆ༵ད་རྩལ་བླ་ན་འཕགས་པའི་སྒྱུ་རྩལ་བར། །

དེང་རབས་ཡར་ཐོན་རིགས་པའི་ལམ་ངོགས་ནས། །
མདུན་བསྐྱོད་གོམ་སྒྲ་མཉམ་དུ་སྒྲིག་བྱེད་པའི། །
ཕྱི་ནང་ཀུན་ཏུ་ཡིད་སེམས་མགུ་བྱེད་པ། །
ནགས༵་ལྷའི༵་དྲ་༵མཛོད༵་ཆེན་༵མོའི༵་མཛེས་སྡུག་བར། །

དེ་དག་ཤེས་ཡོན་རིག་པའི་སློབ་གསོ་ནས། །
ལག་ལེན་ལག་ཏུ་བསྟར་བའི་མཛད་པ་རྣམས། །
རགས་རིམ་ཚིགས་སུ་བཅད་པའི་སྦྱོར་བ་ཡིས། །
ཁོང་གི་སྐུ་ཚེ་མཐའ་མའི་མཛད་པ་བར། །

ད་དུང་ཡ་རབས་བཟང་སྤྱོད་ལུགས་སྲོལ་ནས། །
མཛའ་གྲོགས་ཕན་ཚུན་ཡིད་ཆེས་བློས་འགེལ་དང་། །
སྟོད་སྨད་བར་གསུམ་ཀུན་སྙོམས་འདུ་ཤེས་སོགས། །
ཀུན་ལ་དགེ་བའི་མིག་དཔེ་བཟང་པོའི་བར། །

རིགས་ཞེན་ལྷག་བློ་དུང་ལྟར་དཀར་བ་ནས། །
གང་དགོས་འབད་བརྩོན་ནམ་ཡང་གཡོ་མེད་པ། །
རྒྱལ་རབས་ལོ་རྒྱུས་དེབ་ཐེར་གུང་བསྒྲིགས་ནས། །
ཡུལ་ལུང་དགེ་བའི་སྤོབས་པ་སྩོལ་བའི་བར། །

ལ་དང་ལུང་པའི་ཆགས་སྟངས་བཀོད་པ་ནས། །
ཆབ་དང་ཆུ་བོའི་འབབ་སྟངས་མགོ་ཁུངས་དང་། །
ཡ་མཚན་ས་གཞི་རི་བྲག་ཆུ་མཚོ་སོགས། །
གཅེས་པའི་ནོར་མཆོག་འཛིན་པའི་བསམ་སྦྱོར་བར། །

མདོར་ན་ཀུན་ལ་དགེ་བའི་བསམ་པ་ནས། །
ཚེ་འདིའི་སྣང་བ་ནུབ་པ་མ་གྱུར་བར། །
སྐད་ཡིག་རིག་གཞུང་འཛིན་སྐྱོང་སྤེལ་གསུམ་སོགས། །
སློབ་དཔོན་ཐོན་མིའི་དགོངས་པ་སྒྲུབ་ཚུལ་ཡིན། །

༢༠༢༡་ ༥་ ༢༩

སྡེ་ཚན། སྙན་རྩོམ།
བསམ་ཚུལ།....
བཀླགས་འཕྲོ...
Fri 25 Dec 2020

རང་ཡུལ་གྱི་རང་བཞིན་མདོར་ཙམ་བརྗོད་པ།

                   གྱི་ན་བ་ལམ་བཟང་པོ།
སྣ་ལྔའི་འདབ་མ་བཞད་པའི་པདྨ་ཡི་གདན་ལ།།
བཞིན་མཛེས་ངག་གི་ལྷ་མོ་བཅུ་དྲུག་གི་ལང་ཚོ།།
འཇའ་ཚོན་དར་གོས་བཀླུབས་ཏེ་པི་ཝང་ཡང་འཁྲོལ་བ།།
བདག་གི་མགྲིན་པའི་རྩ་མདུད་འགྲོལ་ཙམ་ཞིག་གནང་རོགས།།

ལ་ལུང་ཁྲི་སྟོང་བརྒལ་ཏེ་རང་ཡུལ་ནས་བྱོལ་ཡང་།།
ས་མཐའ་གནམ་མཐར་འགྲིམ་དུས་དྲན་པ་ཡིས་མ་བཟོད།།
ཕུན་ཚོགས་རི་ཆུའི་བཀོད་པ་ལམ་ལམ་དུ་འཆར་ཚེ།།
འགོག་མེད་རང་བཞིན་བརྗོད་པའི་གླུ་དབྱངས་འདི་ཤོར་འགྲོ།།

སྤུ་རྒྱལ་བོད་ཀྱི་རྒྱལ་སའི་བྱང་ཤར་གྱི་ཕྱོགས་སུ།།
མདོ་ཁམས་ཤོད་ཆེན་བཅོ་བརྒྱད་ཡ་གྱལ་དུ་བསྔགས་ཤིང་།།
སྦལ་ཡུལ་ལུང་གསུམ་སྨན་ལྗོངས་དབུས་མ་རུ་ཆགས་པ།།
དགེ་བཅུ་ཚང་བའི་ཡུལ་འདི་ནགས་ཤོད་ཀྱི་ལུང་པ།།

མ་བཞེངས་ལྷུན་གྱིས་གྲུབ་པ་དཔལ་རི་ཡི་ཕོ་བྲང་།།
མ་བོས་མགྲོན་དུ་གཤེགས་པ་རྩ་གསུམ་གྱི་ཚོགས་ཞིང་།།
མ་བརླབས་བྱིན་ཆེན་ཆགས་པ་མཚོ་སྐྱེས་ཀྱི་གནས་མཆོག།
ཤར་གྱི་རི་བོ་སྲིན་མོ་རྫོང་གསུམ་འདི་ངོ་མཚར།།

རང་བྱུང་མཁའ་རུ་བསྙེགས་པའི་ཤེལ་དཀར་གྱི་མཆོད་རྟེན།།
ཉི་ཟླའི་རྣ་ཆ་འཕྱང་བའི་འཛམ་བུ་ཡི་ཀླུ་རི།།
མེས་པོའི་བླ་སྲོག་འཛིན་པའི་སྲིད་པ་ཡི་གངས་རྒན།།
ལྷོ་ཡི་རི་བོ་མགོན་ལྷ་དཀར་ཆུང་འདི་ཟིལ་ཆེ།།

ཆེ་དགུའི་ནོར་བུ་འཛིན་པའི་བྱང་ཕྱོགས་ཀྱི་གནོད་སྦྱིན།།
ཕུན་ཚོགས་སྡེ་བཞི་སྩོལ་བའི་མངའ་ཐང་གི་རྒྱལ་པོ།།
ཀླ་ཀློའི་དཔུང་ཚོགས་འཇོམས་པའི་ཤམ་བྷ་ལའི་དམག་དཔོན།།
ནུབ་ཀྱི་རི་བོ་ནགས་ལྷ་ཛམ་བྷ་འདི་ཉམས་བརྗིད།།

སྡེ་ཚན། སྙན་རྩོམ།
བསམ་ཚུལ།....
བཀླགས་འཕྲོ...
Tue 04 Feb 2020

བློན་ཆེན་མགར་སྟོང་བཙན། ད་དུང་ཁོང་གི་བུ།

ནགས་ཤོད་ཅོང་བརྡ།

གྲགས་པའི་གདུགས་དཀར་རིང་དུ་ཁྱབ་པ་ཡི།།
བཙན་པོ་སྲོང་བཙན་ཁྲི་གདུགས་ཉི་མ་ལ།།
ཆབ་འབངས་སྐར་ཚོགས་གྲངས་ལྟར་བཀྲ་བའི་དབུས།།
བློན་ཆེན་ཡུལ་བཟུང་དུང་གི་ཟླ་བ་ཚེས།།

མཛངས་བློན་དེ་ཡིས་ཁོད་ཀྱི་གཞི་རྟེན་བགྱིས།།
རྗེ་ལ་ཞོ་ཤ་འབུལ་དང་ཁབ་མཐའ་བསྐྱེད།།
དེ་ཀུན་ལྷག་མེད་འབྲི་བར་མི་སྤོབས་ཀྱང་།།
ཡབ་མེས་བློན་ཆེན་དྲན་པས་ཅུང་ཟད་འབྲི།།

ཟླ་མེད་བློན་ཆེན་དེ་ཡིས་ལེགས་བསྐྱངས་པའི།།
བུ་སྤུན་སྟག་ཕྲུག་འདྲ་བ་ལྔ་མཆིས་པ།།
བོད་ཐང་ཡིག་རྙིང་དག་ལས་གསལ་པ་ན།།
ཕ་གཅིག་བུ་ལྔ་དུས་འདིར་དྲན་པར་འོས།།

བློན་ཆེན་ཡུལ་བཟུང་ཞི་དྲག་ཀུན་འཛོམ་དེས།།
གཡོ་ཆེན་ཟུ་རྩེའི་ཇུས་ཆེས་ཆུ་ལ་བསྐྱུར།།
བཙན་པོའི་བཀའ་བཞིན་ཞལ་ལྕེ་ཡི་གེར་བྲིས།།
རྒྱལ་འབངས་བདེ་བའི་ལས་འདི་སུ་ཡིས་ནུས།།

མ་ཆུང་བལ་པོའི་བྲང་ལ་ཕྱག་རྗེས་དཔར།།
རྒྱལ་བློན་དྲེགས་ལྡན་དབུས་སུ་ཕོ་ཤེད་ངོམ།།
དཔྲལ་བའི་མིག་བཞིན་གཅེས་པའི་ནུ་རྒྱས་མ།།
ཕྱེ་ལེབ་འཐོར་རླུང་དེད་ལྟར་བོད་དུ་དྲངས།།

ཆེན་པོ་ཐང་གི་མགོ་ལ་ཞབས་རྗེས་ཕབ།།
སྐྱེན་པོ་བློན་མང་ཁྲོད་ནས་རིག་སྟོབས་ངོམ།།
ཁོག་པའི་སྙིང་བཞིན་བརྩེ་བའི་སྐེད་མེད་མ།།
སྟོང་ལོ་ལྷགས་པས་ཁུར་ལྟར་བོད་དུ་དྲངས།།

འདོ་ཆེན་རྨིག་པའི་རྡུལ་གྱིས་ཉི་ཟླ་བསྒྲིབས།།
རྒྱོབ་སོད་ཆོམ་སྒྲས་སྡར་མ་དར་ཤིང་བཞིན།།
སྐབས་དེའི་གྲུ་གུར་ཁྲག་གི་ཆར་ཤོད་བབས།།
སྟོང་བཙན་ཡུལ་བཟུང་དཔའ་ཡ་སྲིད་འདིར་མེད།།

རལ་གྲིའི་སོ་ཁར་བསད་པའི་ཁྲག་ཞག་ཆགས།།
ཁྲབ་ཀྱི་བྱང་བུར་དགྲ་བོའི་ཀླད་ཞོ་འཁྱིལ།།
སྐབས་དེའི་ཐང་བོད་མཚམས་ཀྱི་གནམ་ས་དམར།།
ལག་དམར་ཡ་མེད་སྟོང་བཙན་ཡུལ་བཟུང་ཡིན།།

དཔའ་བོའི་ཀི་བསྭོས་སྒྲ་གཞན་ཉམ་པར་གྱུར།།
ཁྲབ་ཀྱི་སིང་སྒྲས་རོལ་མོར་ཅོ་འདྲི་བགྱིས།
འ་ཞའི་འཛིན་མས་རུས་པའི་གོས་དཀར་གོན།།
སྟོང་བཙན་ཡུང་བཟུང་ཞི་དྲག་གཉིས་འཛོམ་ཡིན།།

དམག་རྟའི་རྨིག་པས་འཛིན་མའི་སྙིང་ཁ་བརྡུངས་།།
བ་དན་རྩེ་མོས་ཀུན་གསལ་ལྟོ་བ་དབྲལ།།
རྒྱལ་ཁའི་དུང་ཆེན་མཚོ་ནག་འགྲམ་ནས་བུད།།
རྒྱ་ནག་ལྕགས་ནག་བརྡུངས་མཁན་ཁྲི་འབྲིང་[1]ཡིན།།

 

བོད་ཐང་སོ་མཚམས་དཔའ་ཡ་རྒོད་ཀྱང་རུང་།།
བློན་ཆེན་ཁྲི་འབྲིང་འགྲན་པར་རློམས་པ་ནི།།
གནག་བརྫི་བློ་ཆུང་འཇའ་ཚོན་འཛིན་པ་བཞིན།།
རེ་འབྲས་མི་ལོན་ནམ་མཁའི་མེ་ཏོག་མཚུངས།།

ཡ་མེད་ཁྲི་འབྲིང་མིང་གི་རྩུབ་མོའི་མདའ།།
གབ་ཡངས་ཁང་ཁྱིམ་ནང་དུ་དྲེགས་པའི་གཏམ།།
སྨྲ་བར་གོམས་པའི་ཐང་གི་དཔོན་བློན་རྣར།།
ཐེབས་པ་ཙམ་གྱིས་སྤ་གོང་དཔུང་ཡང་འཐོར།།

རུ་དར་བསྒྲེངས་པས་ཉི་ཟླའི་བགྲོད་ལམ་དོག།
འདོ་ཆེན་རྒྱུགས་པས་སྟོན་གྱི་ལོ་ཏོག་བཅོམ།།
སྐབས་དེའི་འཇང་གི་ནོམ་པར་བདག་པོ་མེད།།
མགར་བུ་བཙན་སྙ[2]འི་དཔའ་མཛངས་ཅི་འདྲ་རེད།།

སྡེ་ཚན། སྙན་རྩོམ།
བསམ་ཚུལ།....
བཀླགས་འཕྲོ...
Tue 04 Feb 2020

གྲོགས་པོ་འགའ་ལ་སྦ་གསང་མེད་པའི་མོལ་མཆིད།

ནགས་ཤོད་ཅོང་བརྡ།

བཅུ་དྲུག་ལང་ཚོ་འོ་མའི་ཁུར་ལྕི་ཞིང་།།
གླང་ཆེན་འགྲོས་ལྡན་ཟླ་བ་རྒྱས་པའི་བཞིན།།
རི་དྭགས་མིག་གཡོ་དག་ནི་རིང་སྤངས་ཏེ།།
སུམ་ཅུའི་མྱོས་བུམ་ལག་སེན་རི་མོ་བབས།།

དཀའ་དམར་མཚོན་གྱིས་བཞིན་གཉེར་ལེཌ་སུབ་པ།།
ཆགས་མིག་ཡང་ཡང་གཡོ་ལ་གོམས་པ་དེ།།
རྐུས་ན་ཆོག་ཀྱང་གཏན་གྲོགས་རུང་བ་མིན།།
ཁ་སེམས་མ་བཅོས་འོ་མའི་མདངས་ལྡན་ཞིང་།།

འོ་མ་འཇོ་ཞོར་འོ་མས་འདྲུད་ཞོར་དུ།།
འོ་དྲི་ཐུལ་ལེ་ཐུ་སྣེ་རླུང་གིས་བསྐྱོད།།
ལང་ཚོ་སྨིན་ཀྱང་ངོ་ཚའི་གོས་ཀྱིས་བཀབ།།
འབྲོག་མོ་འབྲུག་མོ་འདྲ་ཞིག་རྒྱབ་ཕྱོགས་སྟེ།།
མིག་སྔོན་སྐྲ་ལོའི་ཁ་མདོག་མི་གཅིག་པར།།
སྣ་རིང་བརླ་རིང་མ་ཞིག་འགྲོགས་འདོད་པ།།
ཞག་གཅིག་བདེ་ཆེན་སྒྲུབ་ན་ཆོག་མོད་ཀྱང་།།
ཡུན་གྱི་རྩམ་པ་བཟའ་རོགས་འོས་པ་མིན།།

སྦྲ་ནག་དུ་ནག་ཅན་གྱི་འབྲོག་ནག་མ།།
ཤ་ཁ་རྩུམ་མོ་གཤིས་ཀ་འཇམ་མོ་ཅན།།
ཁ་ཉུང་ཁོག་ཡངས་ཚིགས་ཐུབ་གཤིས་སུ་འཇག །
ལས་ལ་བྲེལ་ཞིང་འཁོན་སེམས་མི་མངའ་བ།།
འབྲོག་མོ་ལྷ་མོ་འདྲ་ཞིག་མི་འགྲོགས་ནས།།
རྒྱ་མདོ་ཆུ་མདོའི་རྒྱ་མོ་རྒྱ་ལམ་འདྲའི།།
སྐྱི་མོ་དཀར་འཇམ་ཁོ་ནར་ཞེ་འཁྲེང་སྟེ།།
འགྲོ་ཞོར་ལག་ཞོར་བྱས་ན་མཚར་མོད་ཀྱང་།།
སྐྲ་བདག་བྱ་རྒྱུ་ཟེར་ན་དཀའ་ལས་རེད།།

སྡེ་ཚན། སྙན་རྩོམ།
བསམ་ཚུལ།....
བཀླགས་འཕྲོ...
Page 4 of 18

རྩོམ་ཡིག་གསར་ཤོས།

ཡ་བཏགས་ལ་དཔྱད་པ་མེས་པོའི་ཞལ་ལུ…

སྡེ་ཚན། དཔྱད་རྩོམ། | ཟླ་ཚེས་ 28-07-2023 | ཀློག་གྲངས། 99

ནགས་ཤོད་སྐལ་རྒྱན། བསླབ་ལ་བརྩོན་པའི་གང་ཟག་གིས། ། དང་པོ་ང་རོ་རྣམས་ལ་སྦྱངས། ། སྔོན་འཇུག་མི... བཀླགས་འཕྲོ...

མཛོད་ལུགས་འདུས་མ་བྱས་ཀྱི་གྲངས་…

སྡེ་ཚན། དཔྱད་རྩོམ། | ཟླ་ཚེས་ 28-07-2023 | ཀློག་གྲངས། 87

ནགས་ཀྱི་ཤིང་ལོ། བརྩེ་ཆེན་ཐུགས་རྗེའི་ཐབས་ཀྱིས་འགྲོ་རྣམས་ཞི་བར་བགྲོད་པའི་ལམ་བསྟན་ནས། ། དྲི... བཀླགས་འཕྲོ...

བོད་ཀྱི་སྐད་ཡིག་དང་འབྲེལ་པའི་༸…

སྡེ་ཚན། དཔྱད་རྩོམ། | ཟླ་ཚེས་ 28-07-2023 | ཀློག་གྲངས། 97

ནག་པོ་བཀྲ་ཤིས། [ནང་དོན་གནད་བསྡུས།] དཔྱད་རྩོམ་འདི་ཉིད་ཀྱི་བརྗོད་དོན་གཙོ་བོ་ནི་དུས་རབས་ཉི་ཤ... བཀླགས་འཕྲོ...

གྲངས་དང་ཚད།

མཆན་གསར་ཤོས།

མཆན་མང་ཤོས།