༢༠༡༣ ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

འབྲི་རུ་བ་སྐལ་བཟང་འགྲོ་མགོན།

འཇིག་རྟེན་ས་ཡི་གོ་ལའི་ཡང་རྩེ་ན།།
འགྲོ་བ་མི་ཡི་སྤྱི་ཚོགས་འདྲ་མིན་ནང་།།
ལ་ལ་ཡར་ཐོན་ལ་ལ་རྗེས་ལུས་འདི།།
སློབ་གསོའི་ཁ་ཕྱོགས་བཟང་ངན་ལས་ལ་རག།

འཚོ་གནས་དཔལ་འབྱོར་ངེད་ཅག་དགོས་མཁོ་ཡིན།།
རིག་པའི་གནས་ལྔ་ཀླད་པའི་གནད་དོན་ཡིན།།
ཚན་རྩལ་ཤེས་བྱ་ཉེར་གཅིག་ལག་རྩལ་ཡིན།།
ཁ་བ་བོད་པ་ཚན་རྩལ་ལམ་དུ་སྐྱོད།།

༢༠༡༣ ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

བསྟན་འཛིན་སྐལ་ལྡན།

རྩེ་གསུམ་གངས་དཀར་རི་བོ་གདན་ལ་བཞུགས།།
སྐེད་གསུམ་སྤང་ལྗོངས་མེ་ཏོག་གོས་ཀྱིས་བརྒྱན།།
མདའ་གསུམ་གཡུ་མདོག་ལྗོན་པའི་ཤམ་ལྭ་གྱོན།།
མཛེས་ལྗོངས་ལྷ་ཡུལ་འགྲན་པའི་གནས་མཆོག་འདིར།།

རིག་གཞུང་ལྗོན་པ་ཞེས་པའི་ལྷ་མོ་ཞིག།
འདོད་པའི་དཀྱིལ་ནས་གོམ་སྟབས་སྒྱུར་བཞིན་ཡོང་།།
ཉེར་གཅིག་རི་བོ་བརྒལ་ཏེ་འགྲོ་ལ་རྩོམ།།
མཛེས་སྡུག་ལྡན་པའི་གཞུང་ལུགས་དགའ་མ་དེ།།