འབྲི་སྐལ་བཟང་།  རྒྱལ་མོ་དངུལ་ཆུ་ཞེས་འབོད་པའི

མིང་ཟུར་གྱི་རྒྱལ་མོ་དེ་ག་འདྲ་བྱས་ནས་འབོད་སྲོལ་དར་བ་ཡིན་ཞེ་ན། མདོ་ཁམས་ཆུ་བཞིའི་ནང་ཚན་དངུལ་ཆུ་ཁམས་པ་ལ་རྒྱལ་མོ་དངུལ་ཆུ་འབོད་དོན་ནི་མིང་འདྲ་བའི་ཆུ་བོ་གཞན་གྱི་མིང་ཟླ་འདིར་ཡོང་བ་ཞིག་མིན་ནམ་སྙམ། གང་ཡིན་ཞེ་ན་རྒྱལ་རོང་རྒྱལ་ཁབ་བཅོ་བརྒྱད་ནས་འབབས་པའི་རྒྱལ་མོ་རྔུལ་ཆུ་ཞེས་པའི་ཆུ་ཆེན་ཞིག་ཡོད། ཆུ་བོ་དེའི་མིང་གི་སྐོར་འཆད་སྐབས་ལྷ་མཆོག་རྒྱལ་མོ་དམུ་རྡོ་ཚ་བས་གདུང་ནས་རྔུལ་ཆུ་དོན་པ་ཡིན་པས་རྒྱལ་མོ་དངུལ་ཆུ་འབོད་པར་བཤད། ཆུ་བོ་དེ་དང་འདི་གཉིས་ཀྱི་མིང་རྔུལ་ཆུ་དང་དངུལ་ཆུ་གཉིས་ངག་ནས་བརྗོད་སྐབས་སྒྲ་ཕལ་ཆེར་འདྲ་བས་སྔོན་མའི་མིང་ཟླ་དེ་ཤུགས་མ་ཐུབ་པའི་ཚུལ་གྱིས་འབོད་སྲོལ་དར་བ་ཞིག་མིན་ནམ་སྙམ། དཔེར་ན། ཨ་ཁུ་སྟོན་པ་ཞེས་པའི་མིང་ཡོངས་གྲགས་ལ་སོང་བས་སྟོན་པ་ཞེས་པའི་མིང་ཅན་གྱི་རྒས་པོ་གཞན་ལ་ཡང་ཨ་ཁུ་ཞེས་པའི་མིང་ཤུགས་མ་ཐུབ་པའི་ཚུལ་གྱིས་ཡོང་ནས་ཨ་ཁུ་སྟོན་པ་ཞེས་འབོད་པ་བཞིན། འདི་དག་ནི་རང་གི་བསམ་ཚུལ་ཞིག་དཔྱད་གཞིའི་ཚུལ་དུ་ཕུལ་བ་ཡིན་པ་ལས་འདི་ལྟར་ཡིན་ཞེས་ཐག་བཅད་ནས་བཤད་པ་མིན།

འབྲི་སྐལ་བཟང་གིས།   

ཁ་བ་གངས་རིའི་ཡུལ་ལ་མདོ་དབུས་ཁམས་གསུམ་དུ་ཕྱེ་བའི་ནང་ཚན་མདོ་ཁམས་སྟོད་ཕྱོགས། བྱང་གདང་ལའི་རི་རྒྱུད་དང་ལྷོ་ཐང་ལྷའི་རི་རྒྱུད་གཉིས་ཀྱི་བར་ལ་ནགས་ཤོད་ཅེས་པའི་ཡུལ་ལུང་དེ་ཆགས་ཡོད། འདི་ལ་འགའ་ཞིག་གིས་ནགས་ཤོད་ཅེས་པའི་ནགས་དེ་ནག་ཆུ་ཁ་ཞེས་པའི་ནག་དེ་ལ་ངོས་བཟུང་ནས་ནག་ཤོད་འབྲི་དགོས་པར་གླེང་། རྒྱུ་མཚན་ནི་ཨ་མདོ་མཚོ་ནག་ནས་འབབ་པའི་ཆུ་ལ་ནག་ཆུ་དང་།ཆུ་རྒྱུད་དེའི་སྨད་ཕྱོགས་ལ་ཡིན་པས་ནག་ཆུའི་ཤོད་ཟེར་བའི་མིང་བསྡུས་ནས་ནག་ཤོད་འབོད། ཅེས་ལབ་ཀྱི་ཡོད་ཚོད་འདུག །འགྲེལ་ཚུལ་དེ་ལ་ཞིབ་ཏུ་སོམས་དང་། བོད་ཀྱི་ཐ་སྙད་འབོད་སྲོལ་ལྟར་ན་རི་བོའི་རྩེ་ཤོད་དང་ལུང་པའི་ཕུ་མདའ་ཟེར་བ་ཡོངས་གྲགས་ཀྱི་ལབ་ཚུལ་ཞིག་ཡིན། དེ་མིན་ལུང་པའི་སྟོད་སྨད་ཟེར་ནས་འབྱེད་ཚུལ་ཡོད་པ་མ་གཏོགས་ལུང་པའི་ཕུ་ཤོད་ཟེར་བ་དང་། ལུང་པའི་སྟོད་ཤོད་ཟེར་བ་སོགས་ནི་འབོད་བདེ་བའི་ཡོངས་གྲགས་ཀྱི་ཐ་སྙད་ཅིག་མིན།འདིར་སྤྱིར་བཏང་ཤོད་ཅེས་པ་ག་འདྲ་ཞིག་ལ་ལབ་ཀྱི་ཡོད་པའི་ཚུལ་བཤད་ན་ཀློག་པ་པོ་རྣམས་ཀྱིས་གོ་དོན་རྟོགས་པ་ལ་ཁྱད་པར་ཡོད་པས་དེའི་ཚུལ་ཅུང་ཟད་བཤད་ན། གོང་མ་ལ་སྟེང་དང་འོག་མ་ལ་ཤོད་འབོད་པ་ཁང་པའི་སྟེང་ཤོད་ལྟ་བུ་དང་། རི་བོའི་མཐོ་ས་ལ་རྩེ་དང་དམའ་ས་ལ་ཤོད་འབོད་པ་རི་བོའི་རྩེ་ཤོད་ལྟ་བུ་དང་། རི་བོའི་སྒང་དང་མཐོ་ས་ལ་འབྲི་གཡག་ར་ལུག་སོགས་འཚོ་སྐྱོང་བྱེད་མཁན་ལ་འབྲོག་དང་དམའ་ས་ཆུ་མཚམས་ལ་ཞིང་ལས་བྱས་ནས་སྡོད་མཁན་ཡུལ་པ་གཉིས་ལ་འབྲོག་ཤོད་ཅེས་འབོད་སྲོལ་ཡོད། མིང་གི་སྐབས་རི་བོའི་སྨད་མཚམས་ལ་རི་ཤོད། ལུང་པ་ཁ་ཡངས་ཤིང་ས་བབས་དམའ་བ་ལ་ཀླུང་ཤོད། ཁང་པ་ཐོག་བརྩེགས་ཅན་གྱི་འོག་མ་ལ་ཤོད་ཁང་ཞེས་འབོད། འདིར་ནགས་ཤོད་ཅེས་པ་ནི་ལུང་པ་ཁ་ཡངས་ཤིང་ས་བབས་དམའ་བའི་ཆ་ནས་ཀླུང་ཤོད་འབོད་ཀྱི་ཡོད། དེ་ཡང་ནགས་ལྷ་ཛམ་བྷའི་བསང་ཡིག་ལས། ནགས་ཀྱི་ཀླུང་ཤོད་མཛེས་པའི་ཡུལ་གྲུ་འདིར།།