Details

རྩོམ་པ་པོ། : ནགས་ལྷ་དྲ་མཛོད།

སྡེ་ཚན། མདུན་ངོས།

འགྲེམས་སྤེལ། Sun 18 Mar 2018

ཀློག་གྲངས། 2344

ནགས་ཤོད་འབྲི་རུ་ནི། ནགས་ཤོད་པའི་ཆབ་སྲིད་དང༌། དཔལ་འབྱོར་རིག་གནས་འགྲིམ་འགྲུལ་ས་ཚིགས་སོགས་ཀྱི་ལྟེ་བ་ལ་ཡོངས་གྲགས་སུ་ནགས་ཤོད་འབྲི་རུ་ཞེས་པ་དང༌། སྔ་དུས་སུ་ནགས་་་ར་ལྤགས་ཐང་ངམ་སྦུས་མདའ་ཞེས་ད་ལྟ་འབྲི་རུ་རྫོང་ཆགས་སའི་གནས་འདིར་ཡིན། འདིར་སྦུས་མདའ་ཞེས་འབོད་པའི་རྒྱུ་མཚན་ནི། འབྲི་རུ་དགོན་སྦུས་མདའ་རྣམ་རྒྱལ་དཔལ་འབར་གླིང་གི་གཡས་ཕྱོགས་ཀྱི་ལུང་པ་དེའི་མིང་ལ་ཡུལ་སྐད་དུ་སྦུས་ནང་ཞེས་དང༌། དེའི་མདའ་རུ་ཆགས་པས་ན་སྦུས་མདའ་ཞེས་འབོད། ས་གནས་འདིར་འབྲི་རུ་རྫོང་བཙུགས་ནས་འབྲི་རུ་ཞེས་པའི་ཐ་སྙད་འདི་བཀོལ་སྤྱོད་རྒྱ་ཁྱབ་ཏུ་སོང་ནས་དེང་སྐབས་འབྲི་རུ་ཞེས་པ་འདི་རྫོང་ཧྲིལ་པོའི་མིང་དུ་ཆགས་ཡོད། ཡུལ་སྤྱིའི་ས་བབས་ནི། ཤར་དང་ཤར་ལྷོའི་ཕྱོགས་དམའ་བ་དང༌།ནུབ་དང་ནུབ་བྱང་ཕྱོགས་ཅུང་མཐོ་བ་ཡོད་པ་དང༌། གོ་ལའི་ཤར་གྱི་གཞུང་ཐིག་༩༡་༤༧། ༩༤་༢༧ དང༌། བྱང་གི་འཕྲད་ཐིག ༣༡་༡༢། ༣༢་༢༠ བར་ན་གནས་ཡོད། རྒྱ་མཚོའི་ངོས་ནས་མཐོ་ཚད་ཆ་སྙོམས་རྨིད་ ༤༠༠༠ ཡོད། ལོ་རེའི་ཆར་ཆུའི་འབབ་ཚད་ཧོའོ་རྨིད་༥༨༠ནས་༦༥༠བར་ཟིན་གྱི་ཡོད། ས་བབས་ཀྱི་ཁྱད་ཆོས་ནི་དབྱར་ཁར་ཚ་བ་ཆུང༌། ཉི་མ་འཆར་ཡུན་རིང༌། ཉི་འོད་འོག་ཏུ་རླངས་ཆུའི་གྲུབ་ཆ་ཉུང༌། ཆར་དང་ཁ་བ་ཅུང་མང༌། མཁའ་དབུགས་དྭངས་ཤིང་ཁོར་ཡུག་གཙང༌། རྩི་ཤིང་དང་རྩ་ཆེའི་རི་སྐྱེས་སྔོ་སྨན་རིགས་ཀྱི་འབྱུང་ཁུངས་ཡིན་པ་ནི་ནགས་ཤོད་སྦས་ཡུལ་སྨན་ལྗོངས་ཞེས་མིང་དོན་མཚུངས་པ་ད་ལྟའི་དུས་སུ་སྨན་རིགས་ལག་སོན་བྱུང་བ་རྣམ་གྲངས་༣༠༠ལྷག་ཡོད་པ་འབྲི་རུའི་ལོ་རྒྱུས་སུ་གསལ་བ་བཞིན་ཡིན། གཞན་ཡང་གཏེར་དངོས་སོགས་རང་བྱུང་གི་ཐོན་ཁུངས་ཕུན་སུམ་ཚོགས་པ་ཡོད། དུས་འགྱུར་སྐབས་བོད་ཁྱོན་ཡོངས་བཞིན་ཡུལ་ལུང་འདིའི་ནང་དུ་དམྱལ་ཁམས་མི་ཡུལ་དུ་འཕོས་པ་ལྟ་བུའི་བཟོད་གླགས་དཀའ་བའི་མནར་གཅོད་དང་གསབ་ཐབས་མེད་པའི་གྱོང་གུད་ཕོག་པ་དང༌། ལྷག་པར་དུ་དགུ་གཉིས་ཀྱི་སྐབས་སུ་མི་མང་གི་གྱེན་ལངས་དང་སུམ་སྟོང་བརྒྱད་བརྒྱའི་དམག་གི་འཐབ་འཁྲུག།།བསྟན་སྲུང་ཆོས་རྒྱལ་དབང་གྲགས་དམག་གི་སྐོར་སོགས་ཁྲག་དམར་བཞུར་བའི་འཇིགས་སུ་རུང་བའི་ལོ་རྒྱུས་ཡོད་ནའང༌། སུས་ཀྱང་མ་གོ་མ་མཐོང་པའི་ཚུལ་གྱིས་གཡོལ་ཐབས་ཁོ་ན་བྱས་ནས་དངོས་བྱུང་གི་ལོ་རྒྱུས་ཡིག་ཐོག་བཀོད་པ་མཐོང་བ་དཀོན་ནོ། ནགས་ཤོད་འབྲི་རུ་རྫོང་ཁོངས་སུ་ད་ཡོད་ཀྱི་དགོན་པ། གསའ་མདའ་དགོན། སེན་ཚ་དགོན། དགའ་རི་དགོན། ཀླུ་མཁར་དགོན། དངུལ་ཁོ་དགོན། རྡོ་རྟེང་དགོན་བཅས་བོན་དགོན་དང༌། ཆགས་རི་དགོན། རྒོད་ལུང་དགོན། སེར་བཀྲ་ཤིས་དགོན་བཅས་རྙིང་མ། འགོམ་དགོན། ཝ་ཐང་དགོན། གླང་དེལ་དགོན་བཅས་བཀའ་བརྒྱུད་དང༌། ཤུག་གདོང་དགོན། གཡག་འཁྲབ་དགོན། ཆོས་སྡེ་དགོན། འབྲི་རུ་དགོན། ཆོས་གླིང་དགོན། སྒྲུབ་སྡེ་དགོན། འབྲོང་སྣ་དགོན། རྭ་ཁྱིམ་དགོན། རབ་བརྟན་དགོན། སྟག་སྨོན་དགོན། བན་སྒར་དགོན། བྱ་སྣ་དགོན་བཅས་དགེ་ལུགས་ཡིན། དགོན་ཁག་སོ་སོའི་བླ་རབས་དང༌། གཙུག་ལག་ཁང་སྐུ་གསུང་ཐུགས་རྟེན་སོགས་ཀྱི་སྐོར་ཞིབ་པར་འབྲི་རུའི་ལོ་རྒྱུས་སུ་གསལ། དེ་བཞིན་ཆོས་ལུགས་གྲུབ་མཐའ་སྣ་མང་འདུས་པའི་ཡུལ་ལུང་ཞིག་ཡིན། ངོ་སྤྲོད་མདོར་བསྡུས་སུ་འབྲི་རུ་སྐལ་བཟང་རྒྱལ་མཚན་གྱིས།།