ཚེ་འདི་མི་རྟག་ཆུ་བུར་ཚུལ་ཤེས་ནས། །ཆོས་མིན་གང་གིས་ཕན་མེད་མངོན་སུམ་གཟིགས། །
འདི་ཕྱི་གཉིས་ཀྱི་དོན་སྒྲུབ་འདོད་པ་མཁན། །ཕྱི་མར་མི་ཕན་དམ་པ་དུ་མས་གསུངས། །

དལ་འབྱོར་མི་རྟག་ཚུལ་རྣམས་ལེགས་བསམ་ནས། །ཚེ་འདིའི་ཕུན་ཚོགས་བློ་ཡིས་བཏང་བྱེད་པ། །
དམ་ཆོས་སྒྲུབ་པའི་དང་པོ་ཡིན་ནོ་ཞེས། །སྔོན་བྱོན་དམ་པ་རྣམས་ཀྱིས་མགྲིན་གཅིག་གསུངས། །

བདག་འདྲ་ཉམ་ཆུང་ལས་དང་པོ་པ་ལ། །ཆོས་ཚུལ་འོག་མ་མེད་ན་གོང་མེད་ཤེས། །
དེ་དོན་ཤེས་པར་བྱས་ནས་མཐོར་མི་སྙེགས། །བདག་འདྲ་རྣམས་ལ་རིམ་གལ་ཆེ་བར་གསུངས། །

དམིགས་བསལ་དོན་གྱི་ཁྱད་པར་འགའ་རེ་ལས། །ཆོས་ཚུལ་གོང་མ་རྣམས་ལ་འོག་མ་དགོས། །
དེ་ཕྱིར་སྐྱེས་བུ་གསུམ་གྱི་ལམ་རིམ་གྱི། །འོག་མ་རྣམས་ལ་ཕལ་ཆེར་ཐུན་མོང་གསུངས། །

རང་གི་རྒྱུད་ཀྱི་ལས་ཉོན་ལེགས་བརྟགས་ན། །ཕྱི་མའི་འགྲོ་ས་ངན་སོང་གནས་སུ་ངེས། །
དེ་ལ་འཇིགས་སྐྲག་བྱུང་ཚེ་སྐྱབས་འགྲོ་དང༌། །དེ་ཡིས་དགག་སྒྲུབ་ལས་འབྲས་བླང་དོར་མཛོད། །

དེས་ནི་ཕྱི་མ་བདེ་འགྲོའི་རྟེན་ཐོབ་ཀྱང༌། །ཆོས་མེད་ཚེ་ན་སླར་ཡང་ངན་འགྲོར་ངེས། །
རྟེན་དེ་ལ་ནི་ཡིད་བརྟན་མེད་མ་ཟད། །སྡུག་བསྔལ་གསུམ་གྱིས་བར་མཚམས་མེད་པར་དགོངས། །

དེ་ཡི་ཕྱིར་ན་འཁོར་བའི་ཕུན་ཚོགས་ལ། །བློ་ཡིད་གཏིང་ནས་ཞེན་པ་ལོག་པ་དང༌། །
འཁོར་བའི་བཙོན་ར་འདི་ལས་ཐར་འདོད་ན།།ཞི་སྒོ་གཉིས་མེད་བསླབ་གསུམ་ཉམས་ལེན་མཛོད། །

དེ་རྣམས་ཉམས་སུ་བླང་པས་ཐར་པ་ཙམ། །ཐོབ་པར་ནུས་ཀྱང་དེ་ཡིས་ཆོག་མིན་ཏེ། །
མ་གྱུར་འགྲོ་རྣམས་ཕ་མ་བྱས་མ་བྱས། །དུས་རྣམས་ཀུན་ཏུ་བཀའ་དྲིན་བསམ་ལས་འདས། །

དེ་ཡི་དྲིན་ལན་མཐར་ཐུག་འཇལ་དགོས་པའི། །དེ་ཕྱིར་བྱང་ཆུབ་སེམས་མཆོག་བསྐྱེད་པ་དང༌། །
རྒྱལ་སྲས་སྤྱོད་ལ་སློབ་པའི་བཤེས་བསྟེན་ནས། །ཡང་དག་སྨོན་འཇུག་སྡོམ་པ་ལེགས་བླང་བྱ།།

འཇུག་སྡོམ་བླངས་པའི་དམ་ཚིག་ཕྱིན་དྲུག་དང༌། །བསྡུ་བཞིའི་ཉམས་ལེན་སོགས་ལ་སྙིང་ནས་འབད། །
ཁྱད་པར་བདག་གཞན་མཉམ་བརྗེའི་བློ་སྦྱོང་དང༌། །ཡང་དག་ལྟ་ལ་བརྩོན་ཆེན་བྱ་དགོས་གསུངས། །

རང་གཞན་གཅེས་འཛིན་སྐྱོན་ཡོན་ལེགས་རྟོགས་ནས། །བདག་གཞན་བརྗེ་བའི་རྣལ་འབྱོར་ཟབ་མོ་ཡིས། །
སྡིག་སྡུག་ལེན་དང་ཕན་བདེ་ཀུན་བཏང་ནས། །འགྲོ་དོན་བྱང་སེམས་སྨོན་འཇུག་ལེགས་པར་བསྐྱེད། །

བདག་གཞན་འཁོར་འདས་ཆོས་རྣམས་མ་ལུས་པ། །རྟོག་བཏགས་ཙམ་ལ་བྱ་ཀུན་འཐད་ཚུལ་གྱིས། །

ལས་དང་འབྲས་བུའི་ངེས་པ་རབ་རྙེད་ཅིང༌། །སྟོང་པས་ཆགས་སྡང་ཞེན་པ་བཟློག་དགོས་གསུངས། །
ཞེས་པ་འདི་དབེན་གནས་ཧུར་འཚེར་སྦུག་ཏུ་སྦྱར་བའོ།།