ད་ནི་ཤི་ཁའི་ནད་པ་གཅེས་སྐྱོང་གནང་སྟངས་དང་། ཤི་ཚར་ནས་རོ་ལས་དང་། གཤིན་པོ་ལ་ཤི་ཆོས་དང་གསོན་པོའི་ཞབས་རིམ་གང་ཞིག་བསྒྲུབ་དགོས་མིན་བཅས་ཀྱི་ཐོག་ལ་བཤད་པར་བྱའོ། །དང་པོ་ནི། མི་ཤི་ཁར་སེམས་ལ་དགེ་སེམས་ཁྱད་པར་ཅན་སྐྱེ་ཐབས་དང་། སེམས་ཁྲལ་དང་ཞེན་ཆགས་ཀྱི་སེམས་གང་ཡོད་པ་རྣམས་ཤེས་པར་བྱས་ཏེ། དེ་དག་སེལ་ཐབས་ཀྱི་སྒོ་གང་ས་ནས་བསྐྲུན་དགོས། དང་པོ་ནད་གཡོག་གམ་ནད་པའི་ཉེ་འཁོར་དུ་ཤ་ཚ་སྙིང་ཉེ་གང་ཡོད་རྣམས་ཀྱིས་ནད་པའི་སེམས་ཁྲལ་དང་ཞེན་ཆགས་ཀྱི་སེམས་སོགས་ཞི་བའི་ཆེད་ནད་པའི་རེ་འདོད་གང་ཡོད་མཁྱེན་པའི་ཐོག །དེ་དག་ཡོངས་རྫོགས་བསྐང་གང་ཐུབ་བྱས་ནས་ནད་པའི་སེམས་བདེ་ཐབས་ལ་འབད་དགོས། གཞུང་ཆེན་མོ་དག་ལས་ནད་གཡོག་ནི་ཤ་ཚ་སྙིང་ཉེ་བ་ཞིག་ཡིན་མིན་ལ་མ་ལྟོས་པར་ནད་པར་བྱམས་པ་དང་སྙིང་རྗེས་བསྐྱངས་པ་ནི་བསོད་ནམས་ཀྱི་ཚོགས་གསོག་པའི་གོ་སྐབས་བཟང་པོ་ཞིག་ཡིན་པ་གསུངས་ཡོད། སྤྱིར་ཤི་རན་མིན་ལ་མ་ལྟོས་པར་ནད་པ་ཡིན་ཕྱིན་ཆད་དེ་ལ་སེམས་ཁྲལ་འབྱུང་གཞིའི་གཏམ་ངན་རིགས་གང་ཡོད་པ་རྣམས། གནས་སྐབས་གསང་རྒྱ་དམ་པོ་བྱ་དགོས་པ་ལས་ནད་པ་ལ་གཏན་ནས་ཤོད་མི་རུང་། ནད་པ་ཚབས་ཆེན་མིན་ནའང་གཏམ་ངན་གོ་བས་སེམས་ཁྲལ་གྱིས་གློ་བུར་གྲོངས་པའི་ལོ་རྒྱུས་ཤིན་ཏུ་མང་། འདི་ནི་སེམས་ཀྱི་བདེ་སྡུག་དང་ལུས་ཀྱི་འཕྲོད་བསྟེན་གཉིས་འབྲེལ་བ་དམ་ཟབ་ཡོད་པ་ཚན་རིག་པ་ཚོས་བཤད་པའི་བདེན་དཔང་གཅིག་རེད་དྲན། དེ་བཞིན་འཆི་ཁའི་ནད་པའི་མཐོང་ཐོས་སུ་གྱུར་སར་ནང་མི་ནང་འཁྲུགས་བྱས་པ་སོགས་ནད་པར་སེམས་ཁྲལ་སྐྱེ་བའི་ལས་གཞི་གང་ཡང་བརྩམ་མི་རུང་། ནད་པར་དབུགས་ཆད་ཁར་ངུ་ངག་ཤུགས་ཆེན་འདོན་ནས་འཐམ་པ་སོགས་ཤུལ་ལུས་ནང་མི་རྣམས་སྡུག་བསྔལ་ཡོད་པའི་རྣམ་པ་ནད་པས་ཤེས་པར་བྱ་མི་རུང་། དབང་ཤེས་ལྔའི་ཡུལ་དང་འབྱུང་བའི་ཐིམ་རིམ་མ་སླེབས་བར་དུ་ནད་པ་ནི་རྒྱུན་ལྡན་གྱི་མི་ཡིན་པས་གནས་ཚུལ་ཚང་མ་ཧ་གོ་ཐུབ།

ཆོས་སྒྲ་སྙན་པོའམ་སྒྲ་སྙན་པོ་གང་རུང་ཞིག་ནད་པས་གོ་ཙམ་ཞིག་བཏང་ན་ནད་པའི་སེམས་པ་ཞི་ལྷོད་དུ་ཆགས་པ་ལ་ཕན་པར་སྙམ། ཡེ་ཤུའི་ཆོས་ལུགས་པ་ཚོས་དེ་ལྟར་བྱེད་སྲོལ་ཡོད་འདུག །སྤྱིར་ཆོས་པ་ཡང་དག་ཅིག་ཡིན་ན། རྣལ་འབྱོར་པ་ན་དགའ་ཤི་སྐྱིད། ཅེས་པ་ལྟར། ཤི་ཁར་བུ་ཕ་ཁྱིམ་དུ་འགྲོ་བ་ལྟ་བུའམ་བཙོན་གྲོལ་ཐོབ་པའི་མི་བཞིན་སེམས་དགའ་ཡལ་ལེར་འོང་བར་གསུངས། ཐ་མལ་པ་འོ་ཅག་ལྟ་བུ་དེ་ལྟར་ཡོང་བར་དཀའ་བ་ཡིན། ལྷག་པར་ཤི་བ་ལ་ཆེས་འཇིགས་སྐྲག་ཡོད་མཁན་གྱི་ནད་པ་དག་ལ་སྨན་དང་སྨན་བཅོས་ཀྱིས་དྲག་བསྐྱེད་ཡོང་རབས་བཤད་ནས། མདོར་ན་ནད་པ་གང་ལ་འཇིགས་སྐྲག་ཡོད་པ་དེ་སེལ་བའི་ཐབས་ལམ་གང་ཡོད་སྟོན་དགོས།
སྔར་སངས་རྒྱས་ཞལ་ཞུགས་སྐབས་སུ་ཤི་བ་ལ་ཤིན་ཏུ་འཇིགས་པའི་ནད་པ་ཞིག་ལ་སངས་རྒྱས་ཀྱིས་ཤེས་རབ་སྙིང་པོ་བཏོན་ནས་འཇིགས་སྐྲག་བསལ་བའི་ལོ་རྒྱུས་ཡོད་པ་ཐོས། གང་ལྟར་ནད་པའི་སེམས་ལ་ཇི་ལྟར་བདེ་ཐབས་བསྐྲུན་ཐུབ་པ་དེ་ལྟར་གྱིས་དགེ་སེམས་སྐྱེ་བ་ལ་ཕན་ཐོགས་པ་ཡིན། ནད་པའི་ཚོར་སྣང་སྡུག་བསྔལ་གྱིས་ཟིན་ན་ཞེ་སྡང་དང་ཁོང་ཁྲོ་སོགས་འཕེལ་ནས་རྒྱུད་ལ་དགེ་སེམས་སྐྱེ་བའི་གོ་སྐབས་མེད་པ་ཡིན། སྐྱེ་བ་ཕྱི་མའི་ལུས་རྟེན་བཟང་ངན་གང་ཞིག་ཏུ་འགྲོ་མིན་ནི། འཆི་ཁའི་སེམས་ལ་རག་ལས་པ་གསུངས་ཡོད། འོ་ཅག་ལྟ་བུ་རྒྱུད་ལ་ཐོག་མེད་ནས་བསགས་པའི་ཁམས་གསུམ་འཁོར་བ་མཐའ་དག་ལ་འཕེན་བྱེད་ཀྱི་ལས་གྲངས་ཀྱིས་མི་ལང་པ་ཡོད། འཆི་ཁར་ལས་དེ་དག་ལས་དགེ་སེམས་ཀྱིས་སྣ་དྲངས་ནས་ལས་བཟང་པོ་དང་ སྡིག་སེམས་ཀྱིས་སྣ་དྲངས་ནས་ལས་ངན་པ་མངོན་དུ་གྱུར་ནས་སྐྱེ་བ་བཟང་ངན་ལེན་གྱི་ཡོད། དེས་ན་འཆི་ཁར་ནད་པའི་སེམས་ལ་དགའ་བདེ་དང་དགེ་སེམས་བསྐྱེད་པ་བྱ་རྒྱུ་གལ་ཆེན་ཡིན་པའི་རྒྱུ་མཚན་དེ་འདྲ་རེད། སྤྱིར་བཏང་མི་ཚང་མས་རང་ཉིད་ཀྱི་མི་ཚེ་ལ་དཔག་པའི་འདངས་ཤིག་བརྒྱབས་ཏེ་ཚེ་ཕྱི་མར་ཕན་པའི་དགེ་སྦྱོར་སྒྲུབ་ཕྱོགས། ཚེ་འདི་ལ་ཕན་པའི་བྱ་གཞག་སྒྲུབ་ཕྱོགས། དཔལ་འབྱོར་གསོག་སྒྲུབ་བཅས་ལ་འབད་བརྩོན་བྱ་ས་ལ་འབད་བརྩོན། སྤྲོ་འཆམ་འགྲོ་ས་ལ་སྤྲོ་འཆམ། དལ་ལྷོད་བྱ་ས་ལ་དལ་ལྷོད་བཅས་བྱས་ཏེ། མདོར་ན་ཚོད་རན་པོ་ཞིག་གི་སྒོ་ནས་ཆོས་དང་། འཕྲོད་བསྟེན། བདེ་སྐྱིད་དང་། གུ་ཡངས་བཅས་མིའི་ཚེ་ལ་དཔག་པའི་སྙོམས་སྒྲིག་བྱས་ནས་འཆི་ཁར་གང་ལའང་སེམས་ཆགས་དང་ཡིད་འགྱོད་མེད་པ་བྱ་དགོས།

དཔེར་ན། རང་ལོ་བདུན་ཅུའི་ནང་ཁུལ་གྱི་མི་ཞིག་ལ་ཨ་སྒོར་འབུམ་གཉིས་ལྷག་ཡོད་ན། ཁྱོད་ཀྱི་མི་ཚེར་འདངས་ངེས་ཡོད་པ་མ་ཟད་ཚེ་མཐར་ཕྱིན་ནས་ཤི་ནའང་ད་དུང་དངུལ་མང་པོ་ལྷག་ཡ་ཐག་ཆོད་པ་ཡིན། དེས་ན་རང་ཤི་བའི་སྐབས་སུ་རང་གི་དངུལ་ལྷག་རྣམས་བེད་སྤྱོད་གཏོང་ཕྱོགས་རང་གི་འདོད་པ་དང་མཐུན་པ་ད་ལྟ་ནས་ཐག་ཆོད་པའི་སྒོ་ནས། རང་གི་ཡིད་ཆེས་བྱ་སའི་མི་དག་ལ་མངགས་བཅོལ་བྱ་དགོས། དེ་ལྟར་མ་བྱུང་ན་འཆི་ཁར་དངུལ་དང་ཁང་པ་རྒྱུ་ནོར་སྣ་ཚོགས་ལ་སེམས་ཆགས་ཤོར་བའི་ཉེན་ཁ་ཡོད། གཞན་ཡང་ཕ་མ་དང་བུ་ཕྲུག་བཟའ་ཟླ་བཅས། གང་ལ་སེམས་ཆགས་ཡོད་པ་དེ་ལ་བལྟ་སྐྱོང་དང་རོགས་ཕན་བྱ་རྒྱུའི་ཁས་ལེན་བྱས་ནས་ནད་པའི་བསམ་བློ་སྒོ་གང་ས་ནས་བདེ་ཐབས་བྱ་དགོས། ད་ལྟ་གདན་ས་ཁག་ཏུ་ཉམས་ལེན་ཅན་གྱི་དགེ་བའི་བཤེས་གཉེན་མང་པོ་ཞིག་སྐྱེ་འཆི་ལ་རང་དབང་ཡོད་པ་ལྟ་བུས་དགོངས་པ་རྫོགས་ཁར་བསླབ་བྱ་གནང་དགོས་ས་ལ་བསླབ་བྱ། མཆོད་འབུལ་བྱ་དགོས་ས་ལ་མཆོད་འབུལ། ཐ་ན་ཞེ་དགུ་འཛིན་སྟངས་ཡན་ཆད་བཀོད་སྒྲིག་གནང་ནས་གྲོངས་ཀྱི་ཡོད་པ་ལྟ་བུ་རེད། སྤྱིར་བཏང་ལུས་ཁམས་བདེ་ཐང་དང་བཅས་ཏེ་གསོན་པའི་སྐབས་སུ་སྡིག་སྤོང་དགེ་སྒྲུབ་ཀྱི་ཉམས་ལེན་མེད་ན། འཆི་བའི་སྡུག་བསྔལ་མངོན་དུ་འགྱུར་བའི་སྐབས་སུ་དགེ་སེམས་བསྐྱེད་པ་ལ་ཅུང་ཟད་དཀའ་བ་ཡིན་པས། ཆོས་བསྒྲུབས་ན་ད་ལྟ་ཉིད་དུ་སྒྲུབས། །ཅེས་པ་ནི་གདམས་ངག་ཟབ་མོ་ཡིན། དེས་ན་ནམ་ཞག་རྒྱུན་དུ་ཉམས་ལེན་དང་སེམས་པ་བཟང་པོ་བྱ་དགོས། དེས་སྐྱེ་བ་ཕྱི་མར་ལུས་རྟེན་བཟང་པོ་ཐོབ་པ་ལ་ཕན་ཞེས་པའི་ཕན་ཚུལ་ནི། རྒྱུན་དུ་རང་ལ་སེམས་པ་བཟང་པོ་བྱམས་པ་དང་སྙིང་རྗེ་སོགས་དགེ་སེམས་གང་རུང་ལ་གོམས་འདྲིས་ཡག་པོ་ཡོད་པ་ཞིག་ཡིན་ན། འཆི་ཁར་དགེ་སེམས་དེ་དག་བདེ་བླག་ཏུ་སྐྱེ་ཐུབ་པ་དང་། དེས་ལས་བཟང་པོ་དག་གི་སྟོབས་བསྐྱེད་ནས་མངོན་དུ་འགྱུར་བ་བྱས་པ་དང་། དེས་ཕྱི་མར་སྐྱེ་བ་བཟང་པོར་འཕེན་པར་བྱེད་པ་བཅས་ཡིན།

དེས་ན་ཞབས་བརྟན་པ་བླ་མ་དགེ་འདུན་པ་ཚོས་འཆི་ཁའི་ནད་པ་ལ་དབང་བསྐུར་དང་ཞབས་རིམ་བསྒྲུབ་པ་ལས། བདག་ཉིད་བདག་གི་མགོན་ཡིན་ལ། །གཞན་ནི་སུ་ཞིག་མགོན་དུ་གྱུར། །ཞེས་པ་ལྟར། ནད་པ་ཁོ་རང་ཁོ་རང་གིས་མགོན་བྱས་ནས་འགྲོ་དགོས་དུས། ནད་པ་ཁོ་རང་དད་ཡུལ་གྱི་བླ་མ་སྤྱན་རས་གཟིགས་ཀྱི་སྐུ་པར་སྟོན་པ་དང་གསུང་ཅི་རིགས་ཉན་འཇུག་རྒྱུ། སྐྱབས་འགྲོའི་ཆོས་སྐོར་དང་། དེ་བཞིན་བྱམས་སོགས་ཚད་མེད་བཞི་དང་། བྱང་ཆུབ་ཀྱི་སེམས་སོགས་ཐབས་ཀྱི་ཕྱོགས་སུ་གཏོགས་པའི་དགེ་སེམས་ངོ་སྤྲོད་དང་། དེ་བཞིན་གང་ཟག་གི་བདག་མེད་ཕྲ་རགས་སོགས་ཤེས་རབ་ཀྱི་ཕྱོགས་སུ་གཏོགས་པའི་དགེ་སེམས་ངོ་སྤྲོད་དང་འབྲེལ་ཤིན་ཏུ་ངག་འཇམ་པོ་དང་ཚིག་སྙན་པོའི་སྒོ་ནས། ད་ཁྱོད་རང་སེམས་ཁྲལ་མ་བྱེད་བློ་བདེ་པོ་བྱོས། ཁྱེད་རང་ཡག་པོ་རེད་ཡོད་ཅེས་ནད་པའི་ཡིད་བློ་བདེ་ཐབས་གནང་ཐུབ་ན་དགེ་མཚན་ཆེ་བར་མངོན། སྤྱིར་གྲྭ་པ་དང་བླ་མ་གང་ཞིག་ཡིན་རུང་། མི་ན་ཤིའི་རྐྱེན་གྱོང་ཆགས་ཡོད་སར་ངེས་པར་ཕེབས་ནས་ཐུགས་སྨོན་མཚམས་སྦྱོར་དང་འབྲེལ་བའི་ཤི་ཆོས་དང་རྒྱབ་ཆོས་གང་ལེགས་བསྒྲུབ་རྒྱུ་ནི། ཁ་ཚ་དགོས་གཏུགས་ཀྱི་གཞན་ཕན་གྱི་བྱ་བ་རླབས་ཆེན་ཞིག་ཡིན། མ་སེམས་ཅན་ཐམས་ཅད་ཅེས་ཉིན་ལྟར་ཐུགས་སྨོན་མཛད་པ་བཞིན། སེམས་ཅན་ཐམས་ཅད་ཕྱོགས་གཅིག་ཏུ་འདུས་པའི་ས་ཞིག་ལ་ཕེབས་ནས་གཞན་ཕན་སྒྲུབ་ཚུལ་ཞིག་མེད་པས། དང་ཐོག་རང་དང་ཉེ་ཕྱོགས་དང་འབྲེལ་ཕྱོགས་ནས་འགོ་བཙུགས་ཏེ་གཞན་ལ་ཕན་འདོགས་དགོས་པ་དེ་རེད། དེས་ན་འདས་པོ་ལ་ཕན་ཇི་ཙམ་ཐོགས་མིན་དེ་ལྐོག་གྱུར་གནས་ཡིན་པས་དངོས་སུ་མིག་ལ་མངོན་རྒྱུ་ཞིག་མིན་ཡང་། ཤུལ་ལུས་ནང་མི་རྣམས་ཀྱི་སྡུག་བསྔལ་བརྒྱ་ཆ་ལྔ་བཅུ་ཉུང་དུ་བཏང་ཐུབ་ཀྱི་ཡོད་པ་དངོས་སུ་མཐོང་ཆོས་སུ་ཡོད་པ་འདི་རེད། སྤྱིར་ཆོས་རྣལ་མ་ཉམས་སུ་ལེན་མཁན་ཞིག་ཡིན་ན། ཐོས་བསམ་སྒོམ་གསུམ་ཡ་མ་བྲལ་བའི་ཐོག་ཉམས་སུ་ལེན་པའམ་སྒོམ་ཞེས་པ་ནི་བློ་ལ་གོམས་འདྲིས་བསྟེན་རྒྱུ་དེ་རེད། དགེ་སེམས་སྣ་རེ་ཡན་ཆོད་མ་སྐྱེས་པ་རྣམས་བསྐྱེད། སྐྱེས་པ་རྣམས་བློ་ལ་གོམས་འདྲིས་སུ་བསྟེན་ནས་དེ་རྒྱུན་གནས་ཐུབ་པ་བྱ་རྒྱུ་དེ་རེད། ཆོས་ཀྱི་ཉམས་ལེན་ཟེར་དུས་ལམ་གྱི་རྟོགས་པ་མཐོ་པོ་ཞིག་དགོས་པའི་ངེས་པ་མེད། མ་ཎི་ཚར་གཅིག་འདོན་འདོད་ཀྱི་ཀུན་སློང་དང་། ལྷ་དང་བླ་མ་ལ་དད་པ། ལས་འབྲས་ལ་ཡིད་ཆེས། སེམས་ཅན་གཅིག་ཙམ་ལ་དམིགས་པའི་ཕན་སེམས་ཡན་ཆད་ཚང་མ་ཆོས་ཀྱི་ཉམས་ལེན་ཡིན། དེ་དག་ལ་ཤུགས་ཇི་ཙམ་ཆེ་རུ་འགྲོ་བ་དེའི་ཚོད་ཀྱིས་ཉམས་ལེན་ཡར་རྒྱས་འགྲོ་ཡི་ཡོད། དེར་བརྟེན་འཆི་ཁར་དགེ་སེམས་མངོན་དུ་གྱུར་པ་ལ། དེ་ལྟ་བུའི་དགེ་སེམས་དེ་དག་ལ་ཇི་ཙམ་ཞིག་གོམས་པ་དགོས་སམ་ཞེ་ན། གཉིད་ལམ་གྱི་སྐབས་སུ་རྒྱུན་དུ་རང་གི་ཉམས་སུ་བླང་བྱའི་དགེ་སེམས་ངམ་ངམ་ཤུགས་ཀྱིས་བློ་ལ་འཆར་བ་ཞིག་དགོས་པ་ཡིན། བླ་མ་འཇིག་རྟེན་མགོན་པོས་ཁོང་གཉིད་ལམ་ཡན་ཆོད་བྱམས་དང་། སྙིང་རྗེ་བྱང་ཆུབ་ཀྱི་སེམས་དང་། སྟོང་པ་ཉིད་ཀྱི་དོན་བཅས་ལ་བསམ་བློ་གཏོང་ཐུབ་ཀྱི་ཡོད་པས། སྐུ་གཤེགས་པའི་སྐབས་སུའང་དེ་དག་ཏན་ཏན་བསམ་བློ་གཏང་ཐུབ་ས་རེད། དེས་ན་སྐྱེ་བ་ཕྱི་མ་ལུས་རྟེན་བཟང་པོ་ཞིག་ཐོབ་རྒྱུ་ཐག་ཆོད་པ་རེད། ཅེས་གསུངས་པ་མང་དུ་ཐོས། འོ་ཅག་ཚོ་གཉིད་ལམ་གྱི་སྐབས་སུ་ངམ་ངམ་ཤུགས་ཀྱིས་ཆགས་སྡང་གི་སྣང་བ་སྣ་ཚོགས་འཆར་འོང་བ་ནི་རང་རྒྱུད་དེ་དག་གོམས་ཆེ་བས་ལོས་ཡིན། དེས་ན་འཆི་བ་ནི་གཉིད་མཐུག་པོ་ཞིག་ཁུག་འགྲོ་བ་ལྟ་བུ་ཡིན་པས། དང་པོ་སྒོ་ལྔའི་དབང་ཤེས་འགག་པའི་སྐབས་སུ་གང་ཞིག་སྣང་བ་ནི་ད་ལྟའི་གཉིད་ལམ་ལྟར་འཆར་འོང་རྒྱུ་ཐག་ཆོད་པ་ཡིན། ང་ཚོ་གཉིད་ཁུག་ཁར་དགེ་བའི་སེམས་ཤུགས་ཆེན་པོར་བསྐྱེད་ནས་དེའི་ངང་དུ་གཉིད་ལ་ཡུར་སོང་པ་ཡིན་ན་གཉིད་དེ་དགེ་བའི་ངོ་བོ་ལ་འགྲོ་བའི་དཔེ་བཞིན། འཆི་ཁར་དགེ་སེམས་བསྐྱེད་ཐུབ་ན་དགེ་མཚན་ཡོད་པའི་རྒྱུ་མཚན་གཅིག་དེ་འདྲ་ཡིན་ནའང་ཆོག །

ཚེ་འདི་ལ་ཆོས་ཉམས་ལེན་ཡག་པོ་ཞིག་བྱེད་ཐུབ་མིན་གང་ལྟར་ཡང་རེ་བ་བཟང་ས་ནས་བརྒྱབ་སྟེ་ཞུས་ན། སུ་ཞིག་ཡིན་རུང་འཆི་ཁར་བྱམས་སྙིང་རྗེ་བྱང་ཆུབ་ཀྱི་སེམས་དང་། སྟོང་པ་ཉིད་ཀྱི་དོན་བཅས་ལ་བསམ་བློ་གཏང་ཐུབ་པ་ཞིག་བྱུང་ན་རབ་དང་ཕུལ་དུ་ཕྱིན་པ་ཡིན། དེ་ལྟར་བྱུང་བ་ལ་འཆི་ཁར་མ་སླེབས་སྔོན་དུ་ནང་པའི་ཆོས་གཞུང་ལ་སློབ་སྦྱོང་ཕྲན་བུར་བྱས་ནས་དེ་དག་གི་དོན་རོབ་ཚོད་ཙམ་ཤེས་པ་ཞིག་དགོས་པ་ཡིན། དེ་ལྟར་མ་བྱུང་ཡང་དད་པ་དང་མོས་གུས་ཀྱི་སྒོ་ནས་སྟོན་པ་བཅོམ་ལྡན་འདས་དང་། རང་གིས་གང་ལ་དད་མོས་བྱ་སའི་བླ་མ་དང་ངོ་བོ་དབྱེར་མེད་ཡིད་ལ་འཆར་བ་གང་ཐུབ་བྱ་རྒྱུ་དང་། སྔོན་བྱས་དགེ་བ་ལ་དམིགས་ནས་དགའ་བ་དང་། སྡིག་པ་ལ་དམིགས་ནས་འགྱོད་བཤགས། ལྷག་པར་རང་ཅག་གི་བླ་མ་སྤྱན་རས་གཟིགས་ལ་ནུས་པ་གང་ཡོད་ཀྱིས་གསོལ་བ་འདེབས་པ་དང་། གསོལ་བ་འདེབས་བཞིན་རང་ཉིད་ཀྱི་རྣམ་ཤེས་རང་གི་སྤྱི་ཚུགས་ནས་ཐོན་ཏེ་བླ་མ་སྤྱན་རས་གཟིགས་ཀྱི་ཐུགས་ཀར་ཐིམ་པའི་མོས་པ་བྱས་ན་སྐྱེ་བ་ཕྱི་མ་བླ་མ་སྤྱན་རས་གཟིགས་ཀྱི་རྗེས་སུ་འཛིན་པའི་རྟེན་འབྲེལ་ཡོད་པར་གསུངས། གང་ལྟར་ང་ཚོ་ཞིང་འབྲོག་གི་མང་ཚོགས་དཀྱུས་མ་ཚོ་ལའང་ནང་ཆོས་ཀྱི་སློབ་སྦྱོང་ཚད་མཐོན་པོ་ཞིག་མེད་ནའང་། སངས་རྒྱས་ཀྱི་བསྟན་པ་དར་བར་ཤོག །དགེ་འདུན་གྱི་དབུ་འཕང་མཐོ་བར་ཤོག །སེམས་ཅན་ལ་བདེ་སྐྱིད་འབྱུང་བར་ཤོག །འགྲོ་བ་རིགས་དྲུག་སེམས་ཅན་ཐམས་ཅད་བློ་ཆོས་ལ་འགྱུར་བར་ཤོག ཆོས་ལམ་དུ་འགྲོ་བར་ཤོག །བདེ་བ་ཅན་དུ་སྐྱེ་བར་ཤོག །ཅེས་དང་།

མ་ཎི་ཚར་གཅིག་བཏོན་པ་དང་བསྐོར་བ་ཐེངས་གཅིག་བརྒྱབ་པ་ཡན་ཆོད་འགྲོ་བ་རིགས་དྲུག་སེམས་ཅན་ཐམས་ཅད་ལ་ཆོས་སྐལ་ཡོང་བར་ཤོག །བླ་མ་སྤྱན་རས་གཟིགས་ཀྱི་སྐུ་ཚེ་བརྟན་པར་ཤོག །འགྲོ་བ་སེམས་ཅན་ཐམས་ཅད་དཀོན་མཆོག་གསུམ་གྱི་སྐྱབས་འོག་ཏུ་ཚུད་པར་ཤོག་ཅེས་སོགས། རྒྱུན་པར་དམངས་ཁྲོད་ཀྱི་སྨོན་ལམ་འདི་དག་ནི། མཆོད་མཇལ་སོགས་ཀྱི་སྐབས་སུ་ཞིང་འབྲོག་མང་ཚོགས་ཚང་མའི་ངག་ལས་ཆུ་རྒྱུགས་རྒྱུགས་འདོན་རྒྱུ་ཡོད་པ་ཞིག་རེད། ད་དུང་ཁོ་བོས་དྲན་མ་ཐུབ་པའི་སྨོན་ལམ་ཡག་པོ་མང་པོ་ཡོད་རེད། དེས་ན་སྨོན་ལམ་འདི་དག་གི་ཚིག་ཙམ་མ་ཡིན་པར་དོན་རོབ་ཚོད་བློ་ལ་གསལ་འདེབས་ཐུབ་ན་སྨོན་ལམ་དང་དགེ་སེམས་རླབས་ཆེན་ཤ་སྟག་རེད། ཡང་སྔོན་དུ་འགྲོ་བ་རིགས་དྲུག་སེམས་ཅན་ཐམས་ཅད་བདེ་བ་ཅན་དུ་སྐྱེ་བར་ཤོག་ཅེས་སྨོན་ལམ་བཏབ་ཚར་བའི་དེ་མ་ཐག་ཏུ་ང་ཚོའི་ནང་གི་མག་པ་སྡུག་ཤི་བརྒྱག་རྒྱུ་ཁོ་ད་དུང་ལངས་མི་འདུག །ཅེས་པ་ལྟ་བུ་རེད་སོང་ན་ཚིག་ཙམ་གྱི་སྨོན་ལམ་ཡིན་པས་ཕན་ཡོན་ཡང་ཚིག་ཙམ་ཞིག་མ་གཏོགས་ཆེན་པོ་ཞིག་མེད་ཚོད་རེད། ཧཧཧ ད་ནི་བླ་མ་སྤྱན་རས་གཟིགས་ཐུགས་རྗེ་ཅན་གྱིས་འོ་ཅག་ཚོ་ལ་ཐུགས་བརྩེ་བ་ཆེན་པོས་གནང་བའི་བྱང་ཆུབ་ཀྱི་སེམས་རིན་པོ་ཆེའི་ཉམས་ལེན་གྱི་གནད་སྟོན་པའི་མན་ངག་བྱིན་རླབས་ཅན་འགའ་བརྒྱུད་འགོད་ཞུ་བ་ནི། མགོན་པོ་ཀླུ་སྒྲུབ་ཀྱིས་རིན་ཆེན་ཕྲེང་བར། ས་དང་ཆུ་དང་མེ་དང་རླུང་། །སྨན་དང་དགོན་པའི་ཤིང་བཞིན་དུ། །རྟག་ཏུ་སེམས་ཅན་ཐམས་ཅད་ཀྱིས། །རང་དགའ་དགག་མེད་སྤྱད་བྱར་ཤོག །སེམས་ཅན་རྣམས་ལ་སྲོག་བཞིན་ཕངས། །བདག་ལ་དེ་དག་ཆེས་ཕངས་ཤོག །བདག་ལ་དེ་དག་སྡིག་སྨིན་ཅིང་། །བདག་དགེ་མ་ལུས་དེར་སྨིན་ཤོག །ཇི་སྲིད་སེམས་ཅན་འགའ་ཞིག་ཀྱང་། །གང་དུ་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་གྱུར་ཅིག །ཅེས་དང་། རྒྱལ་སྲས་ཆེན་པོ་ཞི་བ་ལྷས་སྤྱོད་འཇུག་ལས། བདག་ནི་མགོན་མེད་རྣམས་ཀྱི་མགོན། །ལམ་ཞུགས་རྣམས་ཀྱི་དེད་དཔོན་དང་། །བརྒལ་འདོད་རྣམས་ཀྱི་གྲུ་དང་ནི། །གཟེངས་དང་ཟམ་པ་ཉིད་དུ་གྱུར། །མར་མེ་འདོད་ལ་མར་མེ་དང་། །གནས་མལ་འདོད་ལ་གནས་ལམ་དང་། །བདག་ནི་ལུས་ཅན་བྲན་འདོད་པ། །ཀུན་གྱི་བྲན་དུ་འགྱུར་བར་ཤོག །ཅེས་དང་།

ཡང་དེ་ཉིད་ལས། ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །ཅེས་དང། ཡང་དེ་ཉིད་ལས། དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟ་བཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར། །ཞེས་དང་། ཡང་དེ་ཉིད་ལས། ཇི་སྲིད་ནམ་མཁའ་གནས་པ་དང་། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག །ཅེས་དང་། ཡང་དེ་ཉིད་ལས། དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པ་རབ་ཏུ་འབྱུང་། །ཞེས་བྱང་ཆུབ་ཀྱི་སེམས་རྒྱུད་ལ་སྐྱེས་པ་ནས་བཟུང་སྟེ་ཁྱོད་ལ་བསོད་ནམས་དཔག་ཏུ་མེད་པ་འབྱུང་སྟེ། གཉིད་ལོག་པ་དང་བག་མེད་དུ་གྱུར་ཀྱང་བསོད་ནམས་ཀྱི་རྒྱུན་ཆད་པ་མེད་པ་ནམ་མཁའ་ལྟར་འབྱུང་བ་བསྟན་པའི་ཕྱིར། དགེ་བཤེས་གླང་ཐང་པས་བློ་སྦྱོང་ཚིགས་བརྒྱད་མར། མདོར་ན་དངོས་དང་བརྒྱུད་པ་ཡིས། །ཕན་བདེ་མ་རྣམས་ཀུན་ལ་འབུལ། །མ་ཡི་ནད་དང་སྡུག་བསྔལ་ཀུན། །གསང་བས་བདག་ལ་ལེན་པར་ཤོག །ཅེས་དང་། པཎ་ཆེན་བློ་བཟང་ཆོས་རྒྱན་གྱིས་བླ་མ་མཆོད་པར། མ་གྱུར་འགྲོ་བའི་སྡིག་སྒྲིབ་སྡུག་བསྔལ་ཀུན། །མ་ལུས་ད་ལྟ་བདག་ལ་སྨིན་པ་དང་། །བདག་གི་བདེ་དགེ་གཞན་ལ་བཏང་བ་ཡིས། །འགྲོ་ཀུན་བདེ་དང་ལྡན་པར་བྱིན་གྱིས་རློབས། །ཞེས་དང་། པཎ་ཆེན་ཤཱཀྱ་ཤྲཱིས་སྐྱིད་སྡུག་ལམ་འཁྱེར་ལས། སྐྱིད་ན་བདེ་བ་ཚོགས་སུ་བསྔོ། །ཕན་བདེས་ནམ་མཁའ་གང་བར་ཤོག །སྡུག་ན་ཀུན་གྱི་སྡུག་བསྔལ་འཁུར། །སྡུག་བསྔལ་རྒྱ་མཚོ་སྐེམ་པར་ཤོག །ཅེས་སོགས་གསུངས། རྡོ་རྗེའི་བཀའ་ལུང་འདི་དག་ལ་བརྟེན་ནས་ཆོས་པ་ཞིག་གི་ངོས་ནས་བཤད་ན། ཕམ་ཁ་དང་གྱོང་གུད་ནི་རྒྱལ་ཁ་དང་གོ་སྐབས་ཡིན་པ་ངེས་ཡོང་། ཆོས་ཁས་སུ་འཆེས་ནས་དོན་དུ་རང་རྒྱལ་གཞན་གནོད་སེམས་སུ་ཉར་ནས་ལས་ལ་འཇུག་པ་ནི། ཁ་ཙམ་མ་གཏོགས་སེམས་གཏིང་ནས་ལས་འབྲས་ལ་ཡིད་ཆེས་དེ་ཙམ་མེད་པའི་རྟགས་ཡིན། དེས་ན་སྤྱོད་ལམ་ཀུན་ཏུ་ཚིག་གིས་སྦྱོངས། །ཞེས་པ་ལྟར་བྱང་ཆུབ་ཀྱི་སེམས་རིན་པོ་ཆེ་ཁ་ལ་ལྡུག་ནུས་པའི་གདམས་ངག་ཁྱད་པར་ཅན་འདི་དག་གི་ཚིག་ཟབ་མོ་ཞལ་ལས་འདོན་ཞིང་། དོན་ཟབ་མོ་ཐུགས་ལ་གོམས་པར་བྱས་ཏེ་ཀུན་རྫོབ་བྱང་ཆུབ་ཀྱི་སེམས་རང་རྒྱུད་ལ་ཅི་སྐྱེ་འབད་པར་འཚལ། ཞེས་སྐལ་ལྡན་ལས་འཕྲོ་ཅན་གྱི་སྐྱེས་བུ་དག་གི་སྙན་གྱི་དབང་པོར་བྱང་ཆུབ་ཀྱི་ལམ་དུ་བསྐུལ་བའི་ཆོས་དུང་དཀར་པོའི་རང་སྒྲ་འདིས་འཇིག་རྟེན་གྱི་ཁམས་ཀུན་ཏུ་གྲགས་ཤིང་དགེ་བར་གྱུར་ཅིག་ཅེས་པའོ། །འདི་ནི་རང་གིས་བྲིས་པའི་དེབ་ལས་དྲངས།

དེ་བཞིན་དུ་རྒྱལ་ཀུན་སྙིང་རྗེའི་རང་གཟུགས་བླ་མ་སྤྱན་རས་གཟིགས་མཆོག་གིས། ཟབ་མོའི་དོན་ལ་དམིགས་བསལ་གྱི་ཐུགས་ཉམས་སུ་བསྟར་བའི་གསུང་བྱིན་ཅན་དག་ནི་བརྒྱུད་འགོད་ཞུས་ན་འདི་ལྟ་སྟེ། མགོན་པོ་ཀླུ་སྒྲུབ་ཀྱིས་རིན་ཆེན་ཕྲེང་བར། སྐྱེས་བུ་ས་མིན་ཆུ་མ་ཡིན། །
མེ་མིན་རླུང་མིན་ནམ་མཁའ་མིན། །རྣམ་ཤེས་མ་ཡིན་ཀུན་མིན་ན། །དེ་ལས་གཞན་ན་སྐྱེས་བུ་གང་། །སྐྱེས་བུ་ཁམས་དྲུག་འདུས་པའི་ཕྱིར། །ཡང་དག་མ་ཡིན་ཇི་ལྟ་བར། །དེ་བཞིན་ཁམས་ནི་རེ་རེ་ཡང་། །འདུས་ཕྱིར་ཡང་དག་ཉིད་དུ་མིན། །ཞེས་ས་མིན་ཞེས་པ་ནས་རྣམ་ཤེས་མ་ཡིན་ཞེས་པའི་བར་གྱིས་ཁམས་དང་ཕུང་པོ་རེ་རེ་བ་རང་བཞིན་གྱིས་གྲུབ་པའི་སྐྱེས་བུའམ་གང་ཟག་ཡིན་པ་བཀག་པ་དང་། ཀུན་མིན་ཞེས་པས་ཁམས་ཀྱི་ཚོགས་པ་དེ་ཡིན་པ་བཀག །དེ་ལས་གཞན་ཞེས་པས་ཁམས་དང་ཕུང་པོ་ལས་ངོ་བོ་ཐ་དད་པའི་དེ་ཡོད་པ་བཀག །འོ་ན་གང་ཟག་ཁས་མི་ལེན་ནམ་ཞེ་ན། མ་ཡིན་ཏེ་སྐྱེས་བུ་མངལ་སྐྱེས་ཁམས་དྲུག་ལྡན་ཞིག་གི་དབང་དུ་བྱས་ན། གདགས་གཞི་ས་ཆུ་མེ་རླུང་ནམ་མཁའ་རྣམ་ཤེས་ཁམས་དྲུག་འདུས་པ་ལ་བརྟེན་ནས་བཏགས་པ་ཙམ་ཞིག་ཡིན་ནོ་ཞེས། སྐྱེས་བུ་ཁམས་དྲུག་ཅེས་པས་བསྟན། འོ་ན་སྟོང་ཚུལ་དེ་གདགས་གཞི་ཕུང་པོ་ལ་ལྟོས་མེད་ཀྱི་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པའི་ཚུལ་ལའང་ཡོད་པ་མ་ཡིན་ནམ་ཞེ་ན། མི་འདྲ་སྟེ། ཡང་དག་མ་ཡིན་ཞེས་པའི་ཚིག་རྐང་དེས་རང་ངོས་ནས་གྲུབ་པ་མིན་པ་བསྟན་པའི་ཕྱིར། རྐང་པ་ཕྱི་མ་གཉིས་ཀྱིས་གདགས་གཞི་ཁམས་རེ་རེ་བ་ཡང་། ཆ་ཤས་དུ་མ་འདུས་པ་ལ་བརྟེན་ནས་བཏགས་པ་ཙམ་ཡིན་པས་རང་ངོས་ནས་མ་གྲུབ་པ་བསྟན། གདགས་གཞི་ཕུང་པོ་ལ་མ་ལྟོས་པར་གང་ཟག་རང་དབང་བས་སྟོང་པ་ཙམ་ཞིག །གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་རྟོགས་ཚུལ་ལ་ཡང་ཡོད་ཀྱང་། དེ་འདྲ་བའི་སྟོང་པ་ལ་ངེས་པ་ཐོབ་ནའང་གདགས་གཞི་ཕུང་ཁམས་སྐྱེ་མཆེད་རྣམས། རང་ངོས་ནས་གྲུབ་པར་འཛིན་པའི་ཞེན་པ་ཁ་མ་བྲི་ན། གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་ཙམ་རྟོགས་པ་ཡིན་གྱི །རང་བཞིན་གྱིས་མེད་པར་རྟོགས་པའི་ལྟ་བ་རྙེད་པ་མིན་པས་འདི་གཉིས་མ་ནོར་བ་གལ་ཆེའོ་སྙམ།

དེ་ཡང་དབུ་མ་ཪིན་ཆེན་ཕྲེང་བ་ལས། ཇི་སྲིད་ཕུང་པོ་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ཅེས་གསུངས། དེ་ཡང་རྗེ་བླ་མས། དབུ་མའི་ལེགས་བཤད་རྣམས་སུ། གང་ཟག་བདེན་མེད་མ་རྟོགས་ན་ཕུང་པོ་བདེན་མེད་མི་རྟོགས་པར་གསུངས་པ་དང་། གང་ཟག་བདེན་མེད་རྟོགས་ན་ཕུང་པོའང་བདེན་མེད་ཤུགས་ཀྱིས་རྟོགས་ཞེས་གསུངས་པ་སོགས་ནི། ཉམས་མྱོང་ཚད་མའི་གསུང་ཡིན་པའི་ཡིད་ཆེས་དང་མོས་གུས་འཕེལ། ཡང་དེ་ཉིད་ལས། གཟུགས་ཀྱི་དངོས་པོ་མིང་ཙམ་ཕྱིར། །ནམ་མཁའ་ཡང་ནི་མིང་ཙམ་མོ། །འབྱུང་མེད་གཟུགས་ལྟ་ག་ལ་ཡོད། །དེ་ཕྱིར་མིང་ཙམ་ཉིད་ཀྱང་མེད། །ཅེས་སོགས་ཀྱིས་ཆོས་རྣམས་དོན་དམ་པར་མིང་ཙམ་ཡང་མེད་པར་བསྟན་པ་དང་། འོ་ན་ཡོད་ཚུལ་ཇི་ལྟ་བུ་ཡིན་ཞེ་ན། གཟུགས་སོགས་ཆོས་རྣམས་མིང་དང་རྟོག་པས་བཞག་པ་ཙམ་ཡིན་པས་ཐ་སྙད་ཙམ་དུ་ཡོད་པ་ཡིན་ནོ། །ཞེས་དང་། རྩ་ཤེས་ལས། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ནི་བརྟེན་ནས་གདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་པ་མ་ཡིན་པའི། །ཆོས་འགའང་ཡོད་པ་མ་ཡིན་ནོ། །ཞེས་རྟེན་འབྱུང་ཡིན་པའི་རྒྱུ་མཚན་གྱིས་རང་བཞིན་གྱིས་གྲུབ་པས་སྟོང་པ་ཡིན་ལ། དེ་ལྟར་རྟོགས་པའི་ཤེས་རབ་ནི་སྐྱོན་ཟད་ཅིང་ཡོན་ཏན་སྐྱེད་པར་བྱེད་པས་དབུ་མའི་ལམ་ཡིན་ནོ། །དེས་ན་རྟེན་འབྱུང་མ་ཡིན་པའི་ཆོས་གང་ཡང་མེད་ལ། རང་བཞིན་གྱིས་སྟོང་པ་མ་ཡིན་པའི་ཆོས་གང་ཡང་མེད་དོ། །རྟེན་འབྲེལ་དང་རང་བཞིན་གྱིས་སྟོང་པ་གཉིས་གཞི་གཅིག་གི་སྟེང་དུ་མི་འགལ་བར་གྲུབ་པ་ཡིན་ནོ། །ཞེས་པའོ། །རྩ་ཤེས་ལས། ཕུང་མིན་ཕུང་པོ་ལས་གཞན་མིན། །དེ་ལ་ཕུང་མེད་དེ་དེར་མེད། །དེ་བཞིན་གཤེགས་པ་ཕུང་ལྡན་མིན། །དེ་བཞིན་གཤེགས་པ་གང་ཞིག་ཡིན། །ཞེས་གསུངས་པས་ཚིག་འདི་ཉིད་སོ་སོ་རང་ཉིད་ལ་ཁ་བསྒྱུར་ཏེ་འདོན་དགོས་པ། དཔེར་ན། ཕུང་མིན་ཕུང་པོ་ལས་གཞན་མིན། །དེ་ལ་ཕུང་མེད་དེ་དེར་མེད། །བདག་ཅེས་བྱ་བ་ཕུང་ལྡན་མིན། །བདག་ཅེས་བྱ་བ་གང་ཞིག་ཡིན། །ཞེས་རྣམ་ལྔ་དང་། དེ་བཞིན་རྣམ་བདུན་གྱི་རིགས་པར་བསྟན་པའི་ཚིག་དོན་དག་རང་ལ་སྦྱར་ནས་ཡང་ནས་ཡང་དུ་དཔྱད་འཇོག་གི་གོམས་པ་བསྟེན་དགོས་པར་གསུངས། འདིའང་རང་གིས་བྲིས་པའི་དེབ་ལས་དྲངས། གང་ལྟར་རྒྱུན་དུ་ཆོས་ཀྱི་སྙིང་པོ་བྱམས་པ་དང་སྙིང་རྗེ། སྟོང་ཉིད་རྟོགས་པའི་ལྟ་བ་བཅས་ཕྱིན་ཅི་མ་ལོག་པར་གསལ་བར་སྟོན་པའི་བྱིན་རླབས་ཅན་གྱི་གཞུང་ཚིག་འདི་དག་གི་ཚིག་དོན་དང་མཐུན་པའི་ཉམས་ལེན་གནང་གལ་ཆེ་བ་ཡིན་ནོ། །

གཞན་ཡང་ཆོས་པ་དག་འཆི་ཁར་ཐེག་ཆེན་གསོ་སྦྱོང་ལྟ་བུ་བླངས་ནས། འགོ་བཤེས་གཉེན་བསྟེན་ཚུལ་ནས་མཇུག་མི་སློབ་པའི་ཟུང་འཇུག་བར་ལམ་རིམ་ཡོངས་རྫོགས་ཡོན་ཏན་གཞི་གྱུར་མའི་ཚིག་རིས་ལྟར་ཤར་སྒོམ་ཞིག་བྱས། དེ་ནས་ངེས་འབྱུང་དང་། བྱམས་པ། སྙིང་རྗེ། བྱང་ཆུབ་ཀྱི་སེམས། སྟོང་པ་ཉིད་ཀྱི་ལྟ་བ་བཅས་གང་རུང་གསལ་འདེབས་དགོས་པ་ཤིན་ཏུ་གལ་ཆེན་པོ་ཡིན། ང་ཚོར་ཆོས་པ་ཚོ་ཐུགས་དམ་ཞུགས་པའང་དགེ་སེམས་ཁྱད་པར་དེ་དག་གསལ་བཏབ་པ་ལས་འཆི་སེམས་ཕྲ་མོའི་སྐབས་སུ་གཉུག་མ་ལྷན་ཅིག་སྐྱེས་པའི་འོད་གསལ་ལམ་རླུང་སེམས་ཕྲ་མོ་མངོན་དུ་གྱུར་ནས་སེམས་དེ་ཉིད་དགེ་སེམས་དེ་དག་གི་ངོ་བོར་གྱུར་ནས་ཤི་ཁར་དགེ་སེམས་ཀྱིས་བསོད་ནམས་དང་མི་གཡོ་བའི་ལས་མངོན་དུ་བྱས་པ་ཕན་ཐོགས་ཆེ་བར་གསུངས།

གཉིས་པ། གྲོངས་ཚར་ནས་རོ་ལས་བྱ་སྟངས།
༡༽ སྤྱོད་ལམ་ནི། འཆི་ཁར་གཞོགས་གཡས་པ་འོག་ཏུ་བཅུག །ལག་པ་གཡས་པས་འགྲམ་པ་བརྟེན། མཐེའུ་ཆུང་གིས་སྣ་བུག་གཡས་བཀག་ལ་རླུང་གཡོན་ནས་རྒྱུ་བར་བྱའོ། །འདི་རྒྱུ་མཚན་ཞིག་ཡོད་ས་རེད། ༢༽ གྲོངས་ཚར་ནས་གོས་བརྗེ་བ་དང་དེ་ཡང་གོས་དཀར་གཙང་ཡོད་ན་ལེགས་པར་བརྩི། དགེ་འདུན་ཕོ་མོ་ལ་ཆོས་གོས་གསོལ་དགོས། ༣༽ ངེས་པར་ཕུང་པོའི་གདོང་པ་བཀབ་པར་བྱ་དགོས། དེའི་རྒྱུ་མཚན་ནི་ཤུལ་ལུས་ཀྱི་ནང་མི་རྣམས་ཤི་བོ་དྲན་ལམ་དུ་གསལ་ནས་སྡུག་བསྔལ་མི་ཡོང་བའི་ཆེད་དུ་ཡིན། ༤༽ ཤི་མ་ཐག་ཏུ་ཕུང་པོར་ཡོལ་བ་རྒྱག་སྲོལ་ཡོད། དེའི་རྒྱུ་མཚན་ནི། རྩིས་ལས་ཐོན་པ་ལྟར་མཐོང་མི་རུང་བ་དག་གིས་མི་མཐོང་བའི་ཆེད་དང་། གཉིས་ནི་ཕུང་པོ་ཡོད་སར་ཞི་མི་སོགས་འགོག་པའི་ཆེད་ཡིན། ཞི་མི་ནི་སེམས་ཅན་གཞན་ལ་མེད་པའི་གློག་ཤུགས་ཆེན་པོ་ཡོད་པས་ཕུང་པོའི་སར་ཕྱིན་ན་ཕུང་པོ་འགུལ་སྤྱོད་གཏོང་གི་ཡོད་པ་ཚན་རིག་པས་བཤད་པ་ལྟར་ཡིན་ངེས།

༥༽ འདས་པོའི་སྔས་མགོའི་ཕྱོགས་སམ་ཉེ་འཁོར་དུ་སྐུ་གསུང་ཐུགས་རྟེན་བཀྲམ་ནས་མཆོད་མེ་འབུལ་དགོས། རྒྱུན་དུ་རྟེན་བཀྲམ་ཚུལ་ནི། སྐུ་རྟེན་དབུས་དང་། གསུང་རྟེན་གཡས། ཐུགས་རྟེན་གཡོན་དུ་བཀྲམ་དགོས། སྐུ་རྟེན་ནི་སྐུ་འདྲ་དང་སྐུ་པར་ཡིན། གསུང་རྟེན་ནི་དཔེ་ཆ། ཐུགས་རྟེན་ནི་མཆོད་རྟེན་རྡོར་དྲིལ་བཅས་ཡིན། སྐུ་རྟེན་བསྒྲིགས་པའི་རིམ་པ་ནི། ༡བླ་མ། ༢ ཡི་དམ། ༣ སངས་རྒྱས། ༤ བྱང་སེམས། ༥ དཔའ་བོ། ༦ མཁའ་འགྲོ། ༧ ཆོས་སྐྱོང་སྲུང་མ་བཅས་ཡིན། ༦༽ ཕུང་པོའི་ཉེ་སྐོར་སྔར་སྲོལ་ལྟར་འདས་པོའི་ཕོར་པའི་ནང་ཁ་ལག་བླུགས་ནས་འཇོག་དགོས། འདས་པོ་ཤི་བའི་སེམས་ཁྲལ་མི་ཡོང་བའི་ཆེད་དུ་ཡིན་པ་ཤོད་སྲོལ་ཡོད། ༧༽ གོང་དུ་བཤད་པ་ལྟར་ཕུང་པོ་ཉིན་གསུམ་རིང་ནང་དུ་ཉར་བའམ་གང་དུ་ཉར་ཡང་ཆོག་གང་ལྟར་མེ་སྲེག་དང་བྱ་གཏོར་བྱ་མི་རུང་། ༨༽ ཞེ་དགུ་མ་ཡོལ་བར་དུ་གསུར་བསྔོའི་ཆོ་ག་དང་འབྲེལ་ཉིན་རེར་བྱུང་ན་དུས་གསུམ་དང་མ་བྱུང་ན་ཐེངས་རེ་གསུར་གཏང་དགོས། གསུར་རྩམ་ཤིན་ཏུ་གཙང་མའི་ནང་དུ་དཀར་གསུམ་མངར་གསུམ་དང་། དེ་ནས་བྱུང་ན་སྨན་རྩིས་ཁང་ནས་བཟོས་པའི་སྨན་ཕྱེ། བདུད་རྩི་རིལ་བུ་བཅས་བསྲེ་དགོས། གསུར་མེ་དུ་བ་དང་བྲལ་བའི་མེ་དམར་རྐྱང་དགོས། གསུར་དུད་ཀྱི་ཐོག་ཏུ་གཙང་ཆུས་ཆག་ཆག་བྱེད་དགོས། བར་དོ་བ་ནི་དྲི་ཟ་ཡིན་ལ་དེ་ལ་ཟས་ཀྱི་དོད་དུ་གསུར་དུད་བཏང་བས་བཀྲེས་སྐོམ་སེལ་བ་ཡིན། མ་ཚད་རྒྱུན་དུ་གསུར་བསྔོའི་ཆོ་གའམ་ཡང་ན་སྐྱབས་འགྲོ་སེམས་བསྐྱེད་ཀྱིས་བསྔོ་སྨོན་དང་འབྲེལ་གསུར་གཏང་ཐུབ་ན་གཟུགས་མེད་མང་པོ་ཞིག་ལ་བཀྲེས་སྐོམ་སེལ་བས་སྦྱིན་པའི་ཕན་ཡོན་ཆེན་པོ་ཡོད། དེའི་སྐོར་སྔོན་བྱུང་སྐྱེས་བུ་དམ་པའི་གསུང་རྒྱུན་ངོ་མཚར་ཅན་མང་པོ་ཡོད།

༩༽ དབྱངས་ཅན་དགའ་བློས། དམྱལ་བར་སྐྱེ་ན་བཤང་ལམ་ནས་འཕོ་ལ། ཡི་དྭགས་སུ་སྐྱེ་ན་ཁ་དང་། དུད་འགྲོར་སྐྱེ་ན་དྲི་ཆུའི་ལམ་དང་། མིར་སྐྱེ་ན་མིག་དང་། འདོད་ལྷར་སྐྱེ་ན་ལྟེ་བ། གནོད་སྦྱིན་དུ་སྐྱེ་ན་སྣ། འདོད་པའི་ལྷ་དང་མིའམ་ཅིར་སྐྱེ་ན་རྣ་བ། གཟུགས་ཁམས་སུ་སྐྱེ་ན་སྨིན་མཚམས་ཀྱི་དབུས། གཟུགས་མེད་དུ་སྐྱེ་ན་སྤྱི་བོ་ནས་འཕོ་བར་རྒྱུད་བརྟག་པ་བརྒྱད་པ་སོགས་ལས་བཤད། ཅེས་གསུངས།
ཡང་དེ་ཉིད་ཀྱིས། ཡང་མཛོད་ལས། རིམ་གྱིས་འཆི་ན་རྐང་པ་དང་། །ལྟེ་བ་སྙིང་གར་ཡིད་འཆི་འཕོ། །ཞེས་དང་། འགྲེལ་པར། ངན་སོང་དུ་སྐྱེ་ན་རྐང་པ་དང་། མིར་སྐྱེ་ན་ལྟེ་བ་དང་། ལྷར་སྐྱེ་བ་དང་། དགྲ་བཅོམ་པ་འཆི་ན་སྙིང་གར་རྣམ་ཤེས་འགག་གོ །ཞེས་པ་ནི་གནས་དེ་དག་ལས་ལུས་དབང་འགག་པའི་སྟོབས་ཀྱིས་ཡིད་ཤེས་འགག་ཅེས་པའི་དོན་ལས་རྣམ་ཤེས་ཕྱི་རོལ་དུ་འཕོ་བའི་དོན་མ་ཡིན་གསུངས། དེས་ན་ཕུང་པོ་ལ་དང་པོར་རེག་པའི་སྐབས་སུ་ངན་སོང་ལ་སྐྱེ་བའི་གནས་དེ་དག་དང་། ཕུང་པོ་སྨད་ལ་རེག་པའམ་ལག་པ་འཆང་མི་རུང་བའི་ཤོད་སྲོལ་ཡོད།

༡༠༽ སྤྱིར་གཤིན་པོའི་རྩིས་གཞི་ནི། འདས་པོའི་དུས་ཀྱི་གནམ་ལོ། ཟླ་བ། ཞག །དར་རྒུད། ཆུ་ཚོད། གཟའ་སྐར། ལོག་མེན། བབ་སྨེ། སྤར་ཁ། བླ་སྲོག་སོགས་ཀྱི་གཟའ་སྐར། སྲོག་ལུས་དབང་རླུང་གི་རྡེའུ་སོགས་འགྲེམས་ནས་གཤིན་རྩིས་ལྟར་ཞིབ་པར་གཟིགས་དགོས། ཡིན་ནའང་རྩིས་གཞུང་ནས་གསལ་བ་ལེགས་པའི་ཕྱོགས་མ་གཏོགས་ལྷས་གནོད་འདྲེས་གནོད་ཅེས་གསལ་ཚད་ཤུལ་ལུས་ནང་མི་ལ་མ་གསུངས་ན་ཡག་པོ་ཡོད། ལྷག་པར་དུ་གཤིན་པོ་ངན་སོང་དུ་འགྲོ་རབས་གཏན་ནས་ཤོད་མི་རིགས། དེས་རྣམ་རྟོག་དང་སེམས་ཁྲལ་སློང་བྱེད་ཙམ་ལས་གཞན་གང་ཡང་མེད། དཔེར་ན་རྒྱལ་དབང་ལྔ་པའི་རང་རྣམ་ལས། ཁོང་དང་པོ་འཁྲུངས་དུས་གཟའ་སྐར་འཕྲོད་སྦྱོར་སོགས་བཟང་རབས། དེ་རྩིས་གཞུང་ལ་སྦྱར་ནས་དགེ་མཚན་སོགས་མང་དུ་གསུངས་ནས། དེའི་ཚེས་བཟང་དུས་བཟང་ཉིན་སྐྱེས་པའི་རྒྱུ་མཚན་གྱིས་གང་ཟག་ཁྱད་པར་ཅན་བསྒྲུབ་མི་ཐུབ་ཅིང་། གལ་ཏེ་ཐུབ་ན་དེའི་ཉིན་སྐྱེས་པའི་ཁྱི་ཡང་སྐྱེས་བུ་དམ་པ་སོགས་འགྱུར་བའི་གནོད་བྱེད་བཏང་ནས་དེའི་རིགས་དེ་ཙམ་གལ་ཆེན་མ་ཡིན་པའི་ཚུལ་གསུངས་ཡོད།

༡༡༽རྩིས་གཞུང་ལས་གསལ་བ་ལྟར་གཟའ་སྐར་ལ་དཔག་པའི་བཅོས་ཀའི་རིམ་པ་སོགས་མང་པོ་ཡོད་ཆོག་པས་དེ་དག་རྩིས་མཁན་གྱིས་ངག་བཞིན་བྱོས། ༡༢༽རྩིས་བསྐོར་མཁན་ནི་ངེས་པར་བླ་མ་དང་གྲྭ་པ་མི་དགོས་པར་རྩིས་ལ་མཁས་པ་གང་ཡོད་པ་དེས་བསྐོར་ན་འགྲིག་པ་ཡིན། རྩིས་གཞི་གཅིག་པ་ཡིན་ན་རྩིས་པ་བརྒྱའི་མདུན་དུ་སོང་ཡང་རྩིས་འབྲས་གཅིག་པ་ཡིན་ངེས། ༡༣༽ ཕུང་པོ་ཕྱིར་འདོན་སྐབས། རྩིས་གཞུང་ལས་གསལ་བ་ལྟར་ཕྱཱ་དང་། གཡང་མ་ཤོར་བའི་ཆེད་ཕྱཱ་འགུག་དང་གཡང་འགུག་དང་། གད་ཕྱིས་ཀྱི་ཚུལ་སོགས་ལེགས་པར་བྱ་དགོས། སྲིད་པ་ཧོ་ཞེས་པ་དབྱུག་པའི་སྟེང་དུ་བཏགས་ནས་ཕུང་པོ་ཕྱིར་འདྲེན་གྱི་སྔོན་ནས་ཐོན་ཏེ་ཕྱོགས་བཞིར་སྟོན་དགོས།

༡༤༽ ཕྱི་རྒྱལ་ཁག་ཏུ་ཕུང་པོ་མེར་སྲེག་གཏོང་གི་ཡོད། དེའི་སྐབས་སུ་རྒྱས་བསྡུས་གང་འཐུས་དང་བསྟུན་ཏེ་ཕུང་སྲེག་གི་ཆོ་ག་དང་འབྲེལ་ནས་མེར་སྲེག་བཏང་ན་ཡག་པོ་ཡོད། བོད་དུ་ཕལ་ཆེ་བ་བྱ་གཏོར་རེད། འདི་ནི་ལུགས་སྲོལ་ཡག་པོ་ཞིག་ཡིན། སྟོན་པའི་སྐྱེས་རབས་ལས་སྟག་མ་ལྟོགས་པ་ལ་ལུས་ཤ་ཁྲག་གི་སྦྱིན་པ་བཏང་བས་ཚོགས་རླབས་པོ་བསགས་པ་བཞིན། བྱ་རྒོད་ལྟོགས་པ་ལ་དེ་མཚུངས་ལོས་ཡིན། ཀུན་སློང་རྣམ་དག་ཡོད་མེད་ཁྱད་པར་ཙམ་ལས་སྦྱིན་གཏོང་དགེ་སྦྱོར་གྱི་ཕྱོགས་མཚུངས་པ་ཡིན། དམིགས་བསལ་འགོ་ནད་ཚབས་ཆེན་ཡོད་པ་དེ་འདྲ་ཡིན་ན་བྱ་གཏོར་མ་བྱས་པར་ས་འོག་ཏུ་སྦས་ན་བཟང་། ༡༥༽ བྱ་གཏོར་བྱེད་མཁན་ཚོས་གཤིན་པོའི་རུས་པ་ཅུང་ཟད་བླངས་ནས་དེ་རུས་ཆོག་དང་འབྲེལ་ཏེ་མེར་བསྲེགས་ནས་དེའི་ཐལ་བས་སཙྪ་བདུན་ཚར་ཁ་ཤས་འདེབས་ཐུབ་ན་ཡག་པོ་ཡོད། ༡༦༽ རྒྱ་གར་སོགས་སུ་ཕུང་པོ་སྦྱིན་སྲེག་ཆོ་ག་དང་དང་འབྲེལ་ནས་མེ་སྲེག་གཏོང་གི་ཡོད་པས། ཕུང་པོ་སྒོ་མ་ཕུད་གོང་ནས་ཕུང་པོར་དྲི་བཟང་དང་སྤོས་ཆུས་གཙང་འཁྲུ་བྱེད་ཀྱི་ཡོད། དེའི་རྒྱུ་མཚན་ནི་ལྷ་ལ་འབུལ་རྒྱུའི་སྦྱིན་སྲེག་གི་རྫས་ལ་གཙང་མ་དགོས་པས་རེད། ༡༧༽སྐྱེས་བུ་དམ་པ་དག་གི་གདུང་ཐལ་ཆུ་གནས་ཀྱི་སྲོག་ཆགས་མང་པོར་ཕན་པར་བསམ་ནས་ཆུ་དང་རྒྱ་མཚོར་གཡུག་སྲོལ་ཡོད། གང་ཟག་རང་ག་བ་དག་གི་ཕུང་ཐལ་རི་འགོ་ས་གཙང་དག་ལ་གཡུག་སྲོལ་ཡོད།

གསུམ་པ། འདས་པོའི་ཤི་ཆོས་དང་གསོན་པོའི་ཞབས་རིམ་ཇི་ལྟར་བསྒྲུབ་དགོས་མིན་ནི།
༡༽ ཚེ་འདའ་ཁར་བྱིན་རྟེན་ཅན་གྱི་ཆུ་ཁར་སྦྱིན་པ་དང་། གསང་སྔགས་ཀྱི་དཀྱིལ་འཁོར་གྱི་རྡུལ་ཚོན་སོགས་ལུས་ཐོག་ལ་གཏོར་བ་སོགས་བྱེད་སྲོལ་ཡོད། གཤིན་པོའི་ཆེད་དང་པོ་སྦྱང་བ་དང་། གཉིས་པ་འཕོ་བ་གནང་ན་ཡག་པོ་ཡོད། འཕོ་བ་ཞེས་པ་ནི་གཤིན་པོའི་རྣམ་ཤེས་དག་ཞིང་དུ་འཕེན་བའི་ཆོ་ག་ཞིག་ལ་ཟེར་བ་ཡིན། དབུགས་ཆད་ཁ་མ་སོགས་མ་ཤི་བའི་སྔོན་དུ་འཕོ་བ་བྱ་མི་རིགས་ལ། ཐུགས་དམ་ལ་བཞུགས་པ་དག་ཐུགས་དམ་མ་གྲོལ་བར་དུ་འཕོ་བ་བྱ་མི་རིགས་པ་ཡིན། གལ་ཏེ་དེ་དག་གི་སྐབས་སུ་འཕོ་བ་བྱས་ན་མི་བསད་པའི་ཉེས་པ་ཡོད་པར་བཤད། ༢༽དེ་ནས་ཤེད་དང་པོ་དང་གཉིས་པ་སོགས་བཟློག་པའི་ཆེད། ཤེད་སྤོང་འདུར་བརྒྱག་པའམ་ཡང་ན་དྲུག་ཅུ་མ་དང་ཆ་གསུམ། བསྐང་གསོ་དང་འབྲེལ་ཆོས་སྐུ་མ་སོགས་འདོན་ན་འགྲིག །

རྩིས་གཞུང་ལྟར་ན་ཤེད་དང་པོ་ནི་གཤིན་པོའི་སེམས་ཆགས་ཡུལ་ལ་གནས། གཉིས་པ་ནི། ཉེ་འཁོར་གྱི་ཁྱིམ་མཚེས་དང་ཉེ་རིང་སོགས་ལ་གནས། གསུམ་པ་ནི། ཐག་རིང་ལ་གནས་པས་འདི་ལ་ཉེན་ཁ་མེད་པར་བཤད་ཡོད། ༣༽ བདུན་ཚིགས་སྲུང་སྟངས་མི་འདྲ་བ་ཡོད་ནའང་ཞགས་བདུན་གྱི་བདུན་ཚེགས་བདུན་ཏེ་ཞེ་དགུ་སྲུང་ཐུབ་ན་ཡག་པོ་ཡོད། ༤༽རྩིས་གཞུང་ལས་གསལ་བ་ལྟར་བྱུང་ན་སྐྱེ་རྟགས་སྐུ་འདྲ་བྱོན་ལེགས་པོ་དེ་འདྲ་གཅིག་ཙམ་དང་། མ་བྱུང་ན་དགོན་པར་ལྷ་བཞེངས་བྱེད་ཞལ་འདེབས་ཕུལ་ན་ཡག་པོ་ཡོད། ༥༽ སྐབས་འདིར་ནན་ཏན་གྱི་ཚུལ་དུ་ཞུ་རྒྱུ་ལ། ཁོ་རེ་འབྲོག་པ་ཚོ་ཉོན་ཨ། འདས་པོའི་ཤི་ཆོས་ཆེད་དུ་ཕྱུགས་ཟོག་བཤས་པ་ལ་བཙོང་ནས་དེའི་རིན་བབ་དངུལ་གྱིས་མཆོད་འབུལ་གཏན་ནས་མ་བྱེད་ལོ། འདི་ནི་ཤི་བོའི་ཆེད་དུ་ཆོས་བྱེད་པ་མ་ཡིན་པར་སྡིག་པ་བྱེད་པ་ཡིན་པས། ཤི་བོ་ལ་ཕན་པ་ལས་གནོད་པ་ཆེ་བ་ཡོང་ངེས་ཡིན། ཤི་ཆོས་ཀྱི་ཆེད་དུ་རང་ལ་གང་ཡོད་དང་འཚམས་པར་ཆོས་ཀྱི་ལུགས་དང་མཐུན་པའི་སྒོ་ནས་ཚོད་རན་པོ་ཞིག་བྱས་ན་དེ་གས་འགྲིགས་པ་ཡིན། དེ་བཞིན་ཨ་མཆོད་ཀྱི་ཞལ་ལག་ཆེད་དུ་སེམས་ཅན་གསར་དུ་བསད་ནས་དམར་ཟས་ཀྱི་ཞལ་ལག་འབུལ་མི་རུང་། འདི་ནི་ཨ་ཁུ་འབྲོག་པ་ཚོ་ལ་བཤད་པའི་ནང་གཏམ་ཡིན། ༦༽ འདས་པོའི་ཆེད་དུ་འགྲོ་སོང་དང་མཆོད་འབུལ་ཇི་ཙམ་ཞིག་བཏང་ཡང་སྐད་གྲགས་དང་གཞན་གྱིས་ཆེ་བསྟོད་སོགས་ཀྱི་རེ་བས་མ་བཅིངས་པ་ཞིག་དགོས་གལ་ཆེ། དེས་དགེ་སྦྱོར་གྱི་ཕན་ཡོན་ཆུང་དུ་གཏོང་གི་ཡོད།

༧༽ཡང་འགའ་ཞིག་གིས་མི་གྲོངས་ཚར་ནས་གྲོགས་པོ་དང་སྤུན་ཉེ་སོགས་ཀྱིས་དེའི་ཆེད་དུ་མཆོད་འབུལ་བྱས་ན་མི་ཕན་ཞེས་ཟེར། དེ་ནི་དེ་ལྟར་མ་ཡིན་པར་ཕན་ཡོན་ཏན་ཏན་ཡོད་པ་ཡིན། གང་ལགས་ཤེ་ན། གང་མཆོད་འབུལ་བྱ་རྒྱུའི་དངུལ་དངོས་གང་ཡིན་དོ་བདག་སོ་སོས་བློས་བཏང་ནས་འདས་པོ་ལ་སྤྲད་པ་ལྟ་བུ་ཡིན། དེས་ན་དངུལ་དངོས་དེ་དག་གི་བདག་པོ་གཤིན་པོ་དེ་ཉིད་ཆགས་ཀྱི་ཡོད་པས་དེ་དག་མཆོད་འབུལ་བྱས་པའི་ཕན་ཡོན་ཡང་གཤིན་པོ་དེ་ལ་ལོས་ཐོབ་སྟེ་ཐོབ་པ་ཡིན་ནོ། །དཔེར་ན། ཁྱོད་ཀྱིས་གྲོགས་པོ་ཞིག་ལ་ཆུ་ཚོད་ཅིག་སྤྲད་ཡོད་ན། ཆུ་ཚོད་སྤྲད་པའི་དུས་དེ་ནས་བཟུང་ཆུ་ཚོད་དེའི་བདག་པོ་གྲོགས་པོ་དེ་ཡིན་གྱི་ཁྱོད་རང་མིན་པ་བཞིན་ནོ། །

གསོན་པོའི་ཞབས་རིམ་ཆེད་མདོ་བཞི་དང་། ཤེར་མདོ་སོགས་རྩིས་གཞུང་ལས་གསལ་བ་ལྟར་གང་ཐུབ་བསྒྲུབ་ན་ཡག་པོ་ཡོད། གནས་སྐབས་ཞུ་མཚམས་འདིར་འཇོག་ཆོག་པར་ཞུ། རྗེས་སོར་དུས་ཚོད་ལ་བསྟུན་ཏེ་སྣོན་འཕྲི་ཅི་དགོས་ཐམས་ཅད་ཞུ་རྩིས་ཡོད།
བཀྲ་ཤིས་བདེ་ལེགས།

༢༠༡༩། ༡༡། ༡༧ ཉིན་སྦྱར་བས་ཀུན་ལ་ཕན་པར་ཤོག་ཅིག །