དེ་དག་ཤེས་པ་ཞིག་གིས་ལུང་ཚན་དེ་ལ་སློབ་གསོ་སྤེལ་ནས་གནད་དོན་དེ་ཉིད་ཤེས་སུ་འཇུག་རྒྱུ་དང་། ད་ལྟའི་དུས་རབས་འདི་ལ་བོད་ཀྱི་སྐད་ཡིག་འདི་འཆི་ལ་ཉེ་བའི་ཉེན་ཁ་ཡོད་པའི་སྐད་ཡིག་ལ་འཛམ་གླིང་སྐད་ཡིག་ཉམས་ཞིབ་ཚོགས་པས་ངོ་འཛིན་བྱེད་པ་ལྟར་སྐད་ཡིག་ཉེན་ཕྲང་ཅན་དུ་སླེབས་ཡོད་པ་ཤེས་སུ་འཇུག་རྒྱུ་དང་པོའི་ཆ་རྐྱེན་ཞིག་ཡིན། དེ་ཉིད་ཤེས་ནས་སྐད་ཡིག་ཉེན་ཁ་དེ་ལས་སྐྱོབ་པའི་ཐབས་ལམ་གང་ཞིག་བསྟན་དགོས་ཤེ་ན། དེང་རབས་ཅ་དངོས་གསར་པའི་རིགས་བོད་སྐད་དུ་བསྒྱུར་ཟིན་པ་མི་དམངས་ཀུན་གྱིས་བེད་སྤྱད་ནས་བྱང་ཆ་ཡོད་པ་དང་། སྔར་གྱི་མི་རྒན་ཚོའི་ཕ་སྐད་དྭངས་མ་ལ་དཔེར་བལྟས་ནས་དེ་ཉིད་མི་ཉམས་གོང་འཕེལ་དུ་གཏོང་བ་དང་། ལྷ་རབ་བྱུང་ན་རང་བཞིན་གྱི་རྩ་ཁྲིམས་ལྟ་བུ་སྦྲགས་སྐད་བཤད་ཤོར་ན་ཆད་པ་སྒ྄ོར་ཟུར་རེ་ཙམ་གཅོད་པ་སོགས་བྱ་རྒྱུ་བྱུང་ན་ཧ་ཅང་ཕན་ཐོགས་ཆེ། ལྷག་པར་དུ་མི་དམངས་ལ་ནང་ཆོས་ཀྱི་གོ་རྟོགས་གོང་འཕེལ་གཏོང་བ་སོགས་བྱས་ན་དེ་སྔ་བར་དུ་ནང་ཆོས་བག་ཆགས་ཀྱིས་བོད་ཀྱི་སྐད་ཡིག་བརྒྱ་ཆ་བརྒྱད་ཅུ་དགུ་བཅུ་ཙམ་ཞིག་སྲོག་བསྐྱབས་ཡོད་པ་ཚོགས་དཔགས་ཐུབ་སྟེ། ནང་ཆོས་ལ་དད་ཞེན་ཇི་ཙམ་ཆེ་བ་དགོན་སྡེ་དང་གྲྭ་པ་སོགས་ལ་མི་རིགས་ལར་ཞེན་དེ་ཙམ་གྱིས་ཆེ་བ་མངོན་སུམ་མཐོང་བཞིན་པ་འདིས་བདེན་དཔང་ཐུབ་པ་དང་། ནང་ཆོས་ནི་གཙོ་བོ་བོད་ཡིག་ལ་བརྟེན་པ་ཡིན་དུས་དེ་ཉིད་གོ་རྟོགས་ཡག་པོ་འོང་བ་ལ་བོད་ཡིག་མ་བརྟེན་ཐབས་མེད་ཡིན་པས་དེ་དང་ལྷན་དུ་གོ་རྟོགས་མཉམ་སྤེལ་བྱེད་ཡག་གལ་ཆེན་ཞིག་མཐོང་།

མི་རེ་ངོ་རེ་དང་སྡེ་ཚན་དག་གིས་ལས་རིམ་གང་གཉེར་དགོས་ཞེ་ན། མི་བུ་རང་ཉིད་བོད་ཡིག་བསླབ་སའི་ཁོར་ཡུག་ཅིག་ལ་སློབ་གཉེར་གནང་མཁན་ཡིན་ན་བཤད་མི་དགོས་ཀྱང་། རང་ཉིད་བོད་ཡིག་བསླབ་སའི་ཁོར་ཡུག་ཡག་པོ་མེད་སར་སྐད་ཡིག་གཞན་དག་རིགས་གཅིག་སྐང་འཛིན་བྱས་ནས་སྦྱང་ས་ཞིག་ལ་སློབ་གྲྭ་འགྲིམ་མཁན་ཡིན་ན། སྐད་ཡིག་རིན་ཐང་མི་ཤེས་པ་དང་གནས་སྐབས་འཚོ་བའི་ཆ་རྐྱེན་ལ་བལྟས་ན་བོད་ཡིག་གིས་མི་ཚེའི་མདུན་ལམ་མི་རག་པ་དང་། ཁ་ལག་མི་སྟེར་བ་དང་། ཐ་ན་སྨན་ཁང་དང་། མེ་འཁོར་གྱི་འཛིན་བྱང་ཉོ་བྱེད་ཙམ་ལའང་བོད་ཡིག་མི་མཁོ་བས་བོད་ཡིག་སློབ་པ་འདི་ལྐུགས་པའི་ལས་ཀ་རང་རེད་བསམ་མཁན་གྱི་བོད་པ་མི་ཉུངབ་ཞིག་ཡོད་སྲིད་པས། སྤྱིར་བཏང་དབྱིན་སྐད་དང་རྒྱ་སྐད་མ་ཤེས་ན་མདུན་ལམ་མི་རྙེད་པ་མ་ཟད་རང་ཁ་རང་གིས་གསོ་མི་ཐུབ་པའི་གནས་སུ་གྱར་བས་དེ་དག་སྦྱང་དགོས་པ་དངོས་འབྲེལ་ཡིན་ཡང་། བོད་ཡིག་འདི་ཉིད་སྤྱི་ཚོགས་སུ་བེད་སྤྱོད་མེད་པར་གྱུར་བ་ནི། བོད་མི་ང་རང་ཚོའི་མེས་པོ་གོང་མ་ཚོ་དང་། ང་ཚོ་བོད་པས་མ་འཇོན་པ་ཡིན་པ་ཙམ་ལས། སྐད་ཡིག་རང་ཉིད་ཀྱིས་བོད་མི་ཕན་ཚུན་གོ་བརྡ་མ་འཕྲོད་ནས་བེད་སྤྱོད་གཏོང་མཁན་མེད་པ་ཆགས་སོང་བ་མིན་པར་ཤེས་དགོས་པ་དང་། དེའི་གནད་དོན་མ་ཤེས་པའི་བོད་པ་རང་དང་འབྲེལ་ཡོད་གཞན་ལ་གོ་བརྡ་དེ་ལྟར་སྤྲད་ནས་ཤེས་སུ་འཇུག་རྒྱུ་ནི་གལ་ཆེན་ཡིན། བཙན་བྱོལ་སྤྱི་ཚོགས་ནང་ལོགས་ཀྱི་སློབ་གྲྭ་ཁག་ལ་མཚོན་ན་མི་རིགས་ཀྱི་ཆེད་དུ་སྤྱི་ལ་ཕན་ཐོགས་པའི་ལས་ཀ་བསྒྲུབ་ཡག་ཅུང་ཙམ་ཁག་པོ་ཡིན་ཡང་། སྐད་ཡིག་གཞན་དག་སློབ་ཞོར་དུ་ཕ་སྐད་གཙང་མ་བཤད་པ་དང་བོད་ཀྱི་མཁས་པ་རྣམ་པས་བརྩམས་པའི་སྙན་ངག་དང་ལོ་རྒྱུས་ཀྱི་དེབ་ཀློག་པ་དང་། དེ་དག་གི་ཚིག་སྦྱོར་སྤེལ་སྟངས་དང་སྐད་ཡིག་གཞན་དང་མི་འདྲ་བའི་ཐུན་མིན་ཁྱད་ཆོས་བཅས་ལ་ཉམས་ཞིབ་བྱེད་པ་དང་། སྤྱི་ཚོགས་ལས་རིགས་གཉེར་བ་ཞིག་ཡིན་ན་དུས་ཚོད་བར་གསེང་ཡོད་ཚད་ལ་བོད་ཡིག་ནང་ལ་ཡོད་པའི་སྒྲུང་དང་སྙན་ངག་བཀླགས་ནས་བོད་ཡིག་ལ་དབྱིངས་ཞུགས་ཐུབ་པ་བྱུང་ན་དེ་ནི་ཁ་ཡོད་ལག་ཡོད་ཀྱི་བོད་ཀྱི་རིག་གཞུང་ལ་ཞབས་ཕྱི་ངོ་མ་ཞིག་དང་སོ་སོའི་ཁ་ལ་དཔགས་པའི་སོ་ཟེར་བ་ལྟར་དེ་ལས་ལྷག་པ་ཞིག་ས་ཕྱོགས་འདིར་བསྒྲུབ་ཡག་ཁག་པོ་རེད་དྲན།

སྤྱིར་བཏང་ང་ཚོ་སློབ་ཕྲུག་ཡིན་ན་སོ་སོའི་མདུན་ལམ་ལ་བསམ་མནོ་གཏོང་དགོས་པ་དང་། མི་སྐྱ་ཞིག་ཡིན་ཚེ་བཟའ་ཚང་ཁ་གསོ་དགོས་པ་སོགས་ལ་སྐད་ཡིག་ཅིག་མ་སྦྱང་རང་སྦྱང་ལ་ཐུག་ཡོད་པ་མངོན་གསལ་ཡིན་ཡང་། བོད་ཀྱི་སྐད་ཡིག་འདི་ད་ལྟའི་ཆ་ལ་ཉམས་དམའ་བོ་ཞིག་ཏུ་གྱུར་ཡོད་པ་དང་། འདི་ཉིད་འཆི་གསོན་གང་དུ་འགྲོ་འོང་མི་ཤེས་པའི་སྐབས་ཡིན་པ་ཤེས་ནས་འདི་ཉིད་འཛམ་གླིང་འདི་ནས་འཆི་འཕོས་ན་བོད་མི་རིགས་འཛམ་གླིང་འདི་ནས་བརླགས་འགྲོ་བའི་སེམས་ཚོར་ཡོད་པའི་ཐོག་ནས་དུས་ཚོད་བར་གསེང་གང་ཡོད་ལ་ལྷ་རབ་བྱུང་ན་བོད་ཡིག་ཆེད་མཁས་པ་ཚོའི་མདུན་དུ་བཅར་ནས་སློབ་པ་དང་། དེ་ལྟར་མ་བྱུང་ན་ཡང་བོད་སྐད་གཙང་མ་བཤད་པ་དང་། བོད་ཡིག་རང་སྦྱོང་བྱ་དགོས་པ་སོགས་དུས་ཚོད་བར་གསེང་འཕྲོ་རླག་ཏུ་འགྲོ་མི་བཅུག་པ་ཕྱར་བ་གྲུ་འདེགས་མཉམ་རུབ་ཀྱིས་མི་ཉམས་གོང་འཕེལ་དང་ཉམས་པ་སླར་གསོའི་ལས་ལ་འབད་དགོས་པ་ཁ་ཚ་དགོས་གཏུགས་སམ་ཛ་དྲག་གིས་ལས་དགོས་པ་ཞིག་ཏུ་མཐོང་། ཐུགས་རྗེ་ཆེ་བསམ་ཚུལ་དེ་ག་རང་ཡིན།།

རྩོམ་ཡིག་འདི་ཐེངས་ 8731 བཀླགས་འདུག