-
མདུན་ངོས།
-
ལོ་རྒྱུས།
-
ཡུལ་ལུང་སྤྱི།
- ནགས་ལྷ་དྲ་མཛོད།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
Sun 30 May 2021
རྗེས་དྲན་ཡིད་ཀྱི་མེ་ཏོག །
ནགས་ཤོད་སྐལ་རྒྱན།
སྐལ༵་ལྡན་སྐྱེ་བོ་ཀུན་གྱི་ཕན་བདེའི་གཞི། །
བཟང༵་པོའི་མདོ་སྔགས་རིག་པའི་གནས་འདི་ཞེས། །
རྒྱལ༵་བའི་ལུང་གིས་ཡང་ཡང་བསྔགས་པ་བཞིན། །
མཚ༵ན་ལྡན་བཤེས་ཀྱིས་ཤེས་རིག་སྐྱོང་ཚུལ་གླེང་། །
སྔོན་ཚེ་སློབ་དཔོན་ཐོན་མི་བོད་ལ་འཁྲུངས། །
བོད་ཀྱི་སྐད་ཡིག་རིག་པའི་ལམ་སྲོལ་གཏོད། །
ཤེས་རིག་ཁ་བའི་རི་བོའི་དབུ་རྩེ་འཕུར། །
སློབ་དཔོན་ཐོན་མི་བཀའ་དྲིན་ཆེ་བའི་དཔེ། །
ད་ཀོ་བོད་ཀྱི་སྐད་དང་ཡི་གེའི་སྲོག །
མི་ཚེ་གང་པོར་འཛིན་སྐྱོང་སྤེལ་གསུམ་དུ། །
དཀའ་སྤྱད་འབད་པ་བརྒྱ་ཡིས་སྲུང་བྱེད་པ། །
འབྲི༵་ཡི་དགེ༵་བཤེས༵་རིང༵་མཐོང༵་སླར་ཡང་དྲན། །
ཆུང་ཆུང་བྱིས་པའི་དབྱངས་གསལ་སློབ་གསོ་ནས། །
ཚིག་ཕྲད་རྣམ་དབྱེའི་སྦྱོར་བ་སྤེལ་སྟངས་དང་། །
དུས་གསུམ་དག་ཆ་མ་ནོར་འབྲི་ཐབས་སོགས། །
སྐད་ཡིག་རྨང་གཞི་རྩ་བ་ཚུགས་པའི་བར། །
དགག་སྒྲུབ་རིག་པའི་བརྡ་སྤྲོད་རིགས་ལམ་ནས། །
ནང་དོན་འཇམ་རྩུབ་བརྗོད་བྱའི་ཁྱད་པར་ལས། །
སྒྲིག་ལེགས་ཚིག་དོན་གོང་འོག་འབྲེལ་བ་དང་། །
སྙན་རྩོམ་ཆེན་མོའི་སྡེབ་སྦྱོར་ཉམས་འགྱུར་བར། །
ནགས༵་ལྷའི༵་སྒྲོན༵་མེའི༷་དེབ་ཕྲེང་དང་པོ་ནས། །
བོད་ཀྱི་སྐད་ཡིག་རིག་པའི་བང་མཛོད་ཆེ། །
སྙན་འཇེབས་རྣ་བའི་བདུད་རྩིས་གཏམ་པ་ཡི། །
རྩོམ༵་རིག༵་རིན་ཆེན་རིགས་པས་གང་བའི་བར། །
མདོ་སྔགས་གསུང་རབ་ཟབ་མོའི་རིགས་ལམ་ནས། །
དེང་རབས་ཚན་རིག་མཁས་པའི་དཔྱད་ཐབས་ཀྱི། །
གནའ་དེང་མཁས་པའི་རིགས་པའི་གསང་ཚིག་ཀུན། །
གདམས་ངག་བདུད་རྩིའི་རྒྱ་མཚོ་འཁྱིལ་བའི་བར། །
རིག་གནས་ཆེ་ཆུང་སྤྱི་དང་སྙན་ངག་ལ། །
ལྷག་པར་དུང་བའི་ནགས་ཤོད་སློབ་མ་ལ། །
སྙན༷་རྩོམ༵་འགྲན༵་བསྡུར་ཆེན༵་མོའི༵་བྱ་དགའ་དང་། །
ལེགས་སོ་བསྔགས་བརྗོད་སྤོབས་པ་དགེ་བའི་བར། །
སྒྱུ་རྩལ་རྩོམ་རིག་བཀོལ་སྤྱོད་བདེ་ཐབས་སུ། །
ལྷོ་མཐའི་ཁ་བ་ཨེ་ཝམ་རང་སྒྲ་སོགས། །
ལྷག་པར་ནགས་ལྷའི་སྒྲོན་མེའི་མཚན་སྙན་ལྷན། །
བོད་ཀྱི་སྐད་ཡིག་དབུ་འཕང་དགུང་དུ་བཏེགས། །
ཚོགས་ཀྱི་དབུས་སུ་གཏམ་ཁོག་འབུབས་སྟངས་ནས། །
ནང་དོན་གནས་བསྡུས་རིགས་པས་བརྡར་ཤ་དང་། །
དྲི་བ་དྲིས་ལན་སྐད་བརྡ་སྦྱོར་སྟངས་སོགས། །
ཡང་ཡང་རྩོད༵་པ༵འི་སྡིངས་ཆའི་མཐུན་རྐྱེན་བར། །
བ༵རྡ་སྤྲོད༵་རི༵ག་པ༵འི་བ༵གྲོ་གླེང༵་ཆེ༵ན་མོ༵་ནས། །
ངག་རིག་འཆད་པའི་རྩལ་ཆེན་འགྲན་པ་ལས། །
མ༵དོ་ཁམ༵ས་ནགས༵་ཤོད༵་འབྲི༵་རུ༵འི་སློ༵བ་མ༵་ཞེས། །
འཆ༵ད་རྩལ་བླ་ན་འཕགས་པའི་སྒྱུ་རྩལ་བར། །
དེང་རབས་ཡར་ཐོན་རིགས་པའི་ལམ་ངོགས་ནས། །
མདུན་བསྐྱོད་གོམ་སྒྲ་མཉམ་དུ་སྒྲིག་བྱེད་པའི། །
ཕྱི་ནང་ཀུན་ཏུ་ཡིད་སེམས་མགུ་བྱེད་པ། །
ནགས༵་ལྷའི༵་དྲ་༵མཛོད༵་ཆེན་༵མོའི༵་མཛེས་སྡུག་བར། །
དེ་དག་ཤེས་ཡོན་རིག་པའི་སློབ་གསོ་ནས། །
ལག་ལེན་ལག་ཏུ་བསྟར་བའི་མཛད་པ་རྣམས། །
རགས་རིམ་ཚིགས་སུ་བཅད་པའི་སྦྱོར་བ་ཡིས། །
ཁོང་གི་སྐུ་ཚེ་མཐའ་མའི་མཛད་པ་བར། །
ད་དུང་ཡ་རབས་བཟང་སྤྱོད་ལུགས་སྲོལ་ནས། །
མཛའ་གྲོགས་ཕན་ཚུན་ཡིད་ཆེས་བློས་འགེལ་དང་། །
སྟོད་སྨད་བར་གསུམ་ཀུན་སྙོམས་འདུ་ཤེས་སོགས། །
ཀུན་ལ་དགེ་བའི་མིག་དཔེ་བཟང་པོའི་བར། །
རིགས་ཞེན་ལྷག་བློ་དུང་ལྟར་དཀར་བ་ནས། །
གང་དགོས་འབད་བརྩོན་ནམ་ཡང་གཡོ་མེད་པ། །
རྒྱལ་རབས་ལོ་རྒྱུས་དེབ་ཐེར་གུང་བསྒྲིགས་ནས། །
ཡུལ་ལུང་དགེ་བའི་སྤོབས་པ་སྩོལ་བའི་བར། །
ལ་དང་ལུང་པའི་ཆགས་སྟངས་བཀོད་པ་ནས། །
ཆབ་དང་ཆུ་བོའི་འབབ་སྟངས་མགོ་ཁུངས་དང་། །
ཡ་མཚན་ས་གཞི་རི་བྲག་ཆུ་མཚོ་སོགས། །
གཅེས་པའི་ནོར་མཆོག་འཛིན་པའི་བསམ་སྦྱོར་བར། །
མདོར་ན་ཀུན་ལ་དགེ་བའི་བསམ་པ་ནས། །
ཚེ་འདིའི་སྣང་བ་ནུབ་པ་མ་གྱུར་བར། །
སྐད་ཡིག་རིག་གཞུང་འཛིན་སྐྱོང་སྤེལ་གསུམ་སོགས། །
སློབ་དཔོན་ཐོན་མིའི་དགོངས་པ་སྒྲུབ་ཚུལ་ཡིན། །
༢༠༢༡་ ༥་ ༢༩
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Wed 29 Dec 2021
ནགས་ལྷའི་སྒྲོན་མེ་དེབ་ཕྲེང་བཅུ་གཉིས་པ།
དུས་དེབ།
མཚན་བྱང་། ནགས་ལྷའི་སྒྲོན་མེ་དེབ་ཕྲེང་བཅུ་གཉིས་པ།
རྩོམ་པ་པོ། ནགས་ཤོད་འབྲི་རུའི་སྨྱུག་ཐོགས་པ་རྣམས།
བརྗོད་བྱ། སྣ་མང་རྩོམ་ཡིག
རྩོམ་སྒྲིག་ཁང་། ནགས་ལྷ་རྩོམ་སྒྲིག་ཁང་།
༢༠༢༠ ལོར་རྩོམ་སྒྲིག་བྱས།
ངོ་སྤྲོད་མདོར་བསྡུས།
ནགས་ལྷ་རྩོམ་སྒྲིག་ཁང་གིས་ཁ་བ་གངས་ཅན་པའི་སྙིང་ནོར་ཆོས་རིག་ཉམས་པ་སོར་ཆུད་དང་མི་ཉམས་གོང་འཕེལ་ལ་དམིགས་འབེན་བཟུང་ནས། གཞོན་སྐྱེས་བློ་གསལ་རྣམས་རྩོམ་རིག་གི་སྒྱུ་རྩལ་ལ་འཇུག་པའི་ཐབས་ཚུལ་དང༌། བླ་ན་མེད་པའི་སྐད་ཡིག་བཀོལ་སྤྱོད་སོགས་ཀྱི་འཁོར་ཡུག་གི་ཆ་ཤས་ཙམ་དུ། སྣ་མང་རྩོམ་རིག་གིས་ཕྱུག་པའི་ནགས་ལྷའི་སྒྲོན་མེ་ཞེས་པའི་དུས་དེབ་འདི་བཞིན་ཕྱི་ལོ་ ༢༠༠༩ ནས་བཟུང་ད་བར་ཟམ་མ་ཆད་པར་རིམ་པ་སྟར་ཆགས་སུ་འགྲོ་མུས་ཡིན།
ཕབ་ལེན། PDF
སྡེ་ཚན།
དུས་དེབ།
ནང་གསེས་དབྱེ་འབྱེད།
Thu 29 Dec 2022
ནགས་ལྷའི་སྒྲོན་མེ་དེབ་ཕྲེང་བཅུ་གསུམ་པ།
དུས་དེབ།
མཚན་བྱང་། ནགས་ལྷའི་སྒྲོན་མེ་དེབ་ཕྲེང་བཅུ་གསུམ་པ།
རྩོམ་པ་པོ། ནགས་ཤོད་འབྲི་རུའི་སྨྱུག་ཐོགས་པ་རྣམས།
བརྗོད་བྱ། སྣ་མང་རྩོམ་ཡིག
རྩོམ་སྒྲིག་ཁང་། ནགས་ལྷ་རྩོམ་སྒྲིག་ཁང་།
༢༠༢༡ ལོར་རྩོམ་སྒྲིག་བྱས།
ངོ་སྤྲོད་མདོར་བསྡུས།
ནགས་ལྷ་རྩོམ་སྒྲིག་ཁང་གིས་ཁ་བ་གངས་ཅན་པའི་སྙིང་ནོར་ཆོས་རིག་ཉམས་པ་སོར་ཆུད་དང་མི་ཉམས་གོང་འཕེལ་ལ་དམིགས་འབེན་བཟུང་ནས། གཞོན་སྐྱེས་བློ་གསལ་རྣམས་རྩོམ་རིག་གི་སྒྱུ་རྩལ་ལ་འཇུག་པའི་ཐབས་ཚུལ་དང༌། བླ་ན་མེད་པའི་སྐད་ཡིག་བཀོལ་སྤྱོད་སོགས་ཀྱི་འཁོར་ཡུག་གི་ཆ་ཤས་ཙམ་དུ། སྣ་མང་རྩོམ་རིག་གིས་ཕྱུག་པའི་ནགས་ལྷའི་སྒྲོན་མེ་ཞེས་པའི་དུས་དེབ་འདི་བཞིན་ཕྱི་ལོ་ ༢༠༠༩ ནས་བཟུང་ད་བར་ཟམ་མ་ཆད་པར་རིམ་པ་སྟར་ཆགས་སུ་འགྲོ་མུས་ཡིན།
ཕབ་ལེན། PDF
སྡེ་ཚན།
དུས་དེབ།
ནང་གསེས་དབྱེ་འབྱེད།
Fri 25 Dec 2020
རང་ཡུལ་གྱི་རང་བཞིན་མདོར་ཙམ་བརྗོད་པ།
གྱི་ན་བ་ལམ་བཟང་པོ།
སྣ་ལྔའི་འདབ་མ་བཞད་པའི་པདྨ་ཡི་གདན་ལ།།
བཞིན་མཛེས་ངག་གི་ལྷ་མོ་བཅུ་དྲུག་གི་ལང་ཚོ།།
འཇའ་ཚོན་དར་གོས་བཀླུབས་ཏེ་པི་ཝང་ཡང་འཁྲོལ་བ།།
བདག་གི་མགྲིན་པའི་རྩ་མདུད་འགྲོལ་ཙམ་ཞིག་གནང་རོགས།།
ལ་ལུང་ཁྲི་སྟོང་བརྒལ་ཏེ་རང་ཡུལ་ནས་བྱོལ་ཡང་།།
ས་མཐའ་གནམ་མཐར་འགྲིམ་དུས་དྲན་པ་ཡིས་མ་བཟོད།།
ཕུན་ཚོགས་རི་ཆུའི་བཀོད་པ་ལམ་ལམ་དུ་འཆར་ཚེ།།
འགོག་མེད་རང་བཞིན་བརྗོད་པའི་གླུ་དབྱངས་འདི་ཤོར་འགྲོ།།
སྤུ་རྒྱལ་བོད་ཀྱི་རྒྱལ་སའི་བྱང་ཤར་གྱི་ཕྱོགས་སུ།།
མདོ་ཁམས་ཤོད་ཆེན་བཅོ་བརྒྱད་ཡ་གྱལ་དུ་བསྔགས་ཤིང་།།
སྦལ་ཡུལ་ལུང་གསུམ་སྨན་ལྗོངས་དབུས་མ་རུ་ཆགས་པ།།
དགེ་བཅུ་ཚང་བའི་ཡུལ་འདི་ནགས་ཤོད་ཀྱི་ལུང་པ།།
མ་བཞེངས་ལྷུན་གྱིས་གྲུབ་པ་དཔལ་རི་ཡི་ཕོ་བྲང་།།
མ་བོས་མགྲོན་དུ་གཤེགས་པ་རྩ་གསུམ་གྱི་ཚོགས་ཞིང་།།
མ་བརླབས་བྱིན་ཆེན་ཆགས་པ་མཚོ་སྐྱེས་ཀྱི་གནས་མཆོག།
ཤར་གྱི་རི་བོ་སྲིན་མོ་རྫོང་གསུམ་འདི་ངོ་མཚར།།
རང་བྱུང་མཁའ་རུ་བསྙེགས་པའི་ཤེལ་དཀར་གྱི་མཆོད་རྟེན།།
ཉི་ཟླའི་རྣ་ཆ་འཕྱང་བའི་འཛམ་བུ་ཡི་ཀླུ་རི།།
མེས་པོའི་བླ་སྲོག་འཛིན་པའི་སྲིད་པ་ཡི་གངས་རྒན།།
ལྷོ་ཡི་རི་བོ་མགོན་ལྷ་དཀར་ཆུང་འདི་ཟིལ་ཆེ།།
ཆེ་དགུའི་ནོར་བུ་འཛིན་པའི་བྱང་ཕྱོགས་ཀྱི་གནོད་སྦྱིན།།
ཕུན་ཚོགས་སྡེ་བཞི་སྩོལ་བའི་མངའ་ཐང་གི་རྒྱལ་པོ།།
ཀླ་ཀློའི་དཔུང་ཚོགས་འཇོམས་པའི་ཤམ་བྷ་ལའི་དམག་དཔོན།།
ནུབ་ཀྱི་རི་བོ་ནགས་ལྷ་ཛམ་བྷ་འདི་ཉམས་བརྗིད།།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
ནགས་ལྷ་དཔེ་ཚོགས།
མཚན་བྱང་། དགེ་བཤེས་འབྲི་སྐལ་བཟང་མཆོག་གི་གསུང་འབུམ་གནའ་དེང་རིག་པའི་འོད་སྣང་།
རྩོམ་པ་པོ། དགེ་བཤེས་འབྲི་སྐལ་བཟང་།
བརྗོད་བྱ། གནའ་དེང་ཟུང་འབྲེལ་ལས་གྲུབ་པ།
རྩོམ་སྒྲིག་ཁང་། ནགས་ལྷ་རྩོམ་སྒྲིག་ཁང་།
༢༠༢༠ ལོར་རྩོམ་སྒྲིག་བྱས།
ངོ་སྤྲོད་མདོར་བསྡུས།
ནགས་ལྷ་རྩོམ་སྒྲིག་ཁང་གིས་འབད་བརྩོན་ཆེན་པོས་གནའ་དེང་ཟུང་དུ་འབྲེལ་བའི་རྩོམ་རིག་རྣམས་མ་འོངས་པའི་མི་རབས་ཀྱི་གཅེས་ནོར་དུ། མི་ཉམས་རྒྱུན་འཛིན་དང་སྲུང་སྐྱོབ་བརྒྱུད་སྤྲོད་ཀྱི་ལས་ལ་གཞོལ་བའི་རྩོམ་སྒྲིག་བགྱིས་ཏེ་དེབ་གཟུགས་སུ་བསྐྲུན་པ་དང་། གཞན་ཡང་དེང་གི་དུས་སུ་ཚན་རྩལ་རིག་གནས་དར་རྒྱས་ཚད་མཐོར་སོང་བའི་ཆ་རྐྱེན་དང་མཐུན་པར། ལྟ་ཀློག་དང་ཕབ་ལེན་བདེ་བའི་ཆེད་དུ་འཕྲུལ་དེབ་ཐོག་སྒྲིག་སྦྱོར་བྱས་ཏེ་ཀུན་གྱི་སྤྱན་སྔར་འབུལ་ལམ་ཞུས་པའི་གླེགས་བམ་ཞིག་ཡིན།
ཕབ་ལེན། PDF
སྡེ་ཚན།
ནགས་ལྷ་དཔེ་ཚོགས།
ནང་གསེས་དབྱེ་འབྱེད།
Fri 10 Apr 2020
མངོན་རྟོགས་རྒྱན་གྱི་འགྲེལ་པ་བརྗོད་བྱ་སྦས་དོན་གསལ་བའི་ཉིན་བྱེད།
དེབ་གཞན།
མཚན་བྱང་། མངོན་རྟོགས་རྒྱན་གྱི་འགྲེལ་པ་བརྗོད་བྱ་སྦས་དོན་གསལ་བའི་ཉིན་བྱེད།
རྩོམ་པ་པོ། དགའ་ཤར་དགེ་བཤེས་ལྷ་རམས་པ་བློ་བཟང་ཕུན་ཚོགས།
བརྗོད་བྱ། དངོས་པོ་བརྒྱད་དོན་བདུན་ཅུ། ཚིགས་བཅད་ལྷུག་སྤེལ་མ།
༢༠༡༩ ལོར་དཔར་བསྐྲུན་བྱས།
ངོ་སྤྲོད་མདོར་བསྡུས།
དེང་གི་དུས་སུ་འཕྲུལ་རིགས་འཕེལ་རྒྱས་དང་དཔལ་འབྱོར་འགྲན་རྩོད་ཀྱི་ཚ་རླབས་འཕྱུར་ཞིང་། བྱམས་བརྩེ་དང་བཟང་སྤྱོད་ཀྱིས་ཕོངས་པའི་དུས་འདིར་ལེགས་ཉེས་འབྱེད་པའི་བློ་གྲོས་ཀྱི་མཐུ་དམན་པའི་སྐྱེ་བོ་དག་ལ། བླང་དོར་གྱི་གནས་མ་འཆུགས་པ་སྟོན་པའི་ནང་པའི་ལྟ་གྲུབ་ཀྱིས་མཚོན་པའི་གསུང་རབ་ཀྱི་གླེགས་བམ་དག ། བརྡ་འཕྲིན་དུས་རབས་ཀྱི་དགོས་མཁོ་དང་འཚམས་པ་ཕབ་ལེན་དང་གཟིགས་ཀློག་གནང་སའི་སྟེགས་བུ་ཞིག་ཡིན།
ཕབ་ལེན། PDF
སྡེ་ཚན།
དེབ་གཞན།
ནང་གསེས་དབྱེ་འབྱེད།
Fri 10 Apr 2020
ནགས་ལྷའི་སྒྲོན་མེ་དེབ་ཕྲེང་བཅུ་གཅིག་པ།
དུས་དེབ།
མཚན་བྱང་། ནགས་ལྷའི་སྒྲོན་མེ་དེབ་ཕྲེང་བཅུ་གཅིག་པ།
རྩོམ་པ་པོ། ནགས་ཤོད་འབྲི་རུའི་སྨྱུག་ཐོགས་པ་རྣམས།
བརྗོད་བྱ། སྣ་མང་རྩོམ་ཡིག
རྩོམ་སྒྲིག་ཁང་། ནགས་ལྷ་རྩོམ་སྒྲིག་ཁང་།
༢༠༡༩ ལོར་རྩོམ་སྒྲིག་བྱས།
ངོ་སྤྲོད་མདོར་བསྡུས།
ནགས་ལྷ་རྩོམ་སྒྲིག་ཁང་གིས་ཁ་བ་གངས་ཅན་པའི་སྙིང་ནོར་ཆོས་རིག་ཉམས་པ་སོར་ཆུད་དང་མི་ཉམས་གོང་འཕེལ་ལ་དམིགས་འབེན་བཟུང་ནས། གཞོན་སྐྱེས་བློ་གསལ་རྣམས་རྩོམ་རིག་གི་སྒྱུ་རྩལ་ལ་འཇུག་པའི་ཐབས་ཚུལ་དང༌། བླ་ན་མེད་པའི་སྐད་ཡིག་བཀོལ་སྤྱོད་སོགས་ཀྱི་འཁོར་ཡུག་གི་ཆ་ཤས་ཙམ་དུ། སྣ་མང་རྩོམ་རིག་གིས་ཕྱུག་པའི་ནགས་ལྷའི་སྒྲོན་མེ་ཞེས་པའི་དུས་དེབ་འདི་བཞིན་ཕྱི་ལོ་ ༢༠༠༩ ནས་བཟུང་ད་བར་ཟམ་མ་ཆད་པར་རིམ་པ་སྟར་ཆགས་སུ་འགྲོ་མུས་ཡིན།
ཕབ་ལེན། PDF
སྡེ་ཚན།
དུས་དེབ།
ནང་གསེས་དབྱེ་འབྱེད།
Mon 17 Feb 2020
ཚད་ཆེན་དབང་ཕྱུག་རྟག་པ་འགོག་པའི་གཞུང་འགྲེལ།
དགེ་བཤེས་འབྲི་རུ་བསྟན་པ།
འདྲེན་པ་མཉམ་མེད་སྟོན་པ་བཅོམ་ལྡན་འདས། །
ཚད་མའི་ལམ་ཆེན་གསལ་བྱེད་ཞི་བ་མཚོ། །
ལྟ་ངན་ཚར་གཅོད་རྒྱལ་བའི་ངང་ཚུལ་སོགས། །
གཞུང་འདི་འགྲེལ་ཕྱིར་སྒོ་གསུམ་གུས་པས་འདུད། །
ཅེས་མཆོད་བརྗོད་སྔོན་དུ་བཏང་ནས་གཞུང་དོན་བཤད་པ་ལ། ཚད་མ་རྣམ་འགྲེལ་སོགས་ལས་མ་བཤད་པའི་རིགས་པ་གསུམ་དང་། དེ་ལས་བཤད་པའི་རིགས་པ་ལྔ་ཡི་སྒོ་ནས་དབང་ཕྱུག་རྟག་པ་འགོག་པར་བྱའོ། །སེར་སྐྱའི་རྗེས་འབྲང་གྲངས་ཅན་པ་ལ་སོགས་པའི་ཕྱི་རོལ་པ་ཁ་ཅིག དབང་ཕྱུག་རྟག་པ་སྒྲུབ་པའི་རྟགས་འགོད་པ་ལ། འཇིག་རྟེན་གྱི་གནས་ལུས་ལོངས་སྤྱོད་རྣམས་ཆོས་ཅན། བྱེད་པ་པོའི་བློ་ཡི་གཡོ་བ་སྔོན་དུ་སོང་སྟེ། རང་རྩོམ་པར་བྱེད་པའི་ཆ་ཤས་དབྱིབས་ཀྱི་ཁྱད་པར་དང་ལྡན་པའི་ཕྱིར་ཞེས་བཀོད་པ་ལ། རྣམ་འགྲེལ་ལས་མ་བཤད་པའི་རིགས་པ་དང་པོ་དང་གཉིས་པ་ནི།
སྡེ་ཚན།
སྤྱོད་པའི་སྐོར།
ནང་གསེས་དབྱེ་འབྱེད།
Mon 17 Feb 2020
མདོ་སྔགས་འཆད་ཚུལ་སྐོར་ཅུང་ཙམ་གླེང་བ།
ནགས་ཤོད་སྐལ་རྒྱན།
གཞུང་བརྒྱ་སྨྲ་བའི་ལྩེ་རྩེ་རྣོ་བརྟུལ་ནས། །
གསང་རྒྱ་གཏོར་བའི་ཀླད་རྒྱ་ཆེ་ཆུང་བར། །
རྒོལ་བ་སུས་ཀྱང་འགྲན་པ་མི་བཟོད་པའི། །
ཐུབ་ཆེན་མི་ཡི་སེང་གེ་སྐྱབས་སུ་བསྟེན། །
དངོས་སྟོབས་རིགས་པ་ཉི་ཟླའི་འོད་རབ་ཀྱི། །
ཟེར་ཕྲེང་ཟླུམ་གཟུགས་གོ་ལར་ལྷུང་བ་ནས། །
དཔྱོད་ལྡན་མཁས་ཀུན་འཇུག་པའི་འགྲམ་ངོགས་ཀྱི། །
སྒྲ་རིག་ལེགས་བཤད་སྣང་བས་ཤིས་པ་སྒྲུབས། །
དེ་ཡང་ཇི་སྐད་དུ། ཚིག་གི་ཐོག་མཐའ་ནམ་མཁའི་མཐོངས་ལྟར་ཡངས། ཞེས་པ་ལྟར་མཁས་པ་རྣམས་གཞུང་ལུགས་འགྲེལ་ཚུལ་ནི་ལུགས་བརྒྱ་ལྡན་དུ་འདོད་པ་དང་། འཆད་པའི་ཐོག་མར་སྒྲ་དང་མི་འགལ་བའི་ཚིག་རྣམ་པར་དབྱེ་སྟེ་བཤད་པ་དང་། །དེ་ཡང་འཇིག་རྟེན་ལ་གྲགས་པ་དང་། བསྟན་བཅོས་ལ་གྲགས་པ། ཐུན་མོང་མ་ཡིན་པ་ལ་གྲགས་པའི་སྒྲ་གསུམ་སྟེ། འཇིག་རྟེན་ཐུན་མོང་ལ་གྲགས་པའི་སྒྲ་ལ་འདོད་རྒྱལ་དང་རྗེས་གྲུབ་བོ། །བསྟན་བཅོས་ལ་གྲགས་པའི་སྒྲ་ནི་སྒྲ་པ་རྣམས་ལ་གྲགས་པ་རྣམ་དབྱེ་དང་བྱེད་པའི་ཚིག་ལ་སོགས་པས་བསྒྲུབས་པ་མཁས་པ་རྣམས་ཀྱིས་གོ་བའི་བརྡའོ། །ཐུན་མོང་མ་ཡིན་པ་ལ་གྲགས་པའི་སྒྲ་ནི་སྒྲ་འཇུག་པའི་རྒྱུ་མཚན་བཤད་དཀའ་ཞིང་། འཕགས་པའི་གང་ཟག་ལ་དགོས་པ་ཤིན་ཏུ་ཆེ་བ། མདོ་སྡེ་དག་ལས་ཅུང་ཟད་ལས་མ་བཤད་མོད། རྒྱུད་སྡེ་རྣམས་ལས་མང་དུ་བཤད་པ། དེ་བཞིན་གཤེགས་པའི་བརྡ་ཞེས་གྲགས་པའོ། །དེ་ལྟ་བུའི་སྒྲའི་རྣམ་དབྱེ་ལེགས་པར་ཁོང་དུ་ཆུད་ནས་གཞུང་འཆད་པའི་ཐོག་མར་གཞུང་གི་མཚམས་སོ་སོར་བཅད་པ་དང་། གཞུང་དེས་རང་གི་རྩ་བ་ཇི་ལྟར་བཤད་པ་རྣམས་བསྟན་པས་དཀྱུས་ས་བསྟན་པའི་རྟ་བཞིན་དུ་འཆད་པ་དང་ཉན་པ་རྣམས་ཀྱི་བློ་མི་འཁྲུག་ཅིང་དོན་ཚན་རྣམས་སོ་སོར་ཕྱེད་པར་འགྱུར་བའི་ཕྱིར་གཞུང་གི་ཆིངས་དང་ས་བཅད་ཀྱི་སྒོ་ནས་ལེགས་པར་འཆད་པ་དང་། གཞུང་ལས་ཁྱད་པར་གྱི་གཞི་བསྡུས་ལ་ངག་དོན་བླང་། ཁྱད་པར་གྱི་ཆོས་བཤད་དེ་ཚིག་རྣམ་པར་དབྱེ་བར་བྱའོ། །
དེ་ལྟ་བུའི་འཆད་ལུགས་ལེགས་པར་ཤེས་ན་ལེགས་པར་སྦྱར་བའི་སྒྲ་དང་མཐུན་པ་མ་ཟད་མཁས་པ་རྣམས་དགའ་བ་དང་མགུ་བ་བསྐྱེད་པ། ཚིག་དོན་ལྷག་ཆད་མེད་པ་ཤེས་པར་འགྱུར་བ་སྟེ། སེང་གེའི་ལྟ་སྟངས་ཀྱིས་ཁྱད་པར་གྱི་གཞི་བླང་། སྦལ་པའི་འཕར་བས་སྐབས་དོན་སོ་སོར་དབྱེ། རུས་སྦལ་གྱི་འགྲོས་ཀྱིས་ཚིག་དོན་འཇེབས་པར་བཤད། ཅེས་སྒྲའི་བསྟན་བཅོས་ལས་ཇི་སྐད་གསུངས་པ་ལྟར་གཞུང་ལུགས་རྒྱ་ཆེ་ཞིང་དཀའ་བ་རྣམས་བཤད་པར་བྱའོ། །དམ་པ་རྣམས་ཀྱིས་གཞུང་ལུགས་འཆད་སྐབས་མདོ་དོན་བཤད་ཐབས་ཡན་ལག་ལྔ་དང་། རྒྱུད་དོན་རྒྱན་བདུན་གྱི་སྒོ་ནས་འཆད་དགོས་པ་གསུངས་ཏེ། རྗེ་བཙུན་བྱམས་མགོན་གྱིས་མདོ་དོན་བདེ་བླག་ཏུ་རྟོགས་པའི་མན་ངག །དགོས་དོན་དང་། བསྡུས་དོན་དང་། ཚིག་དོན། མཚམས་སྦྱོར། བརྒལ་ལན་བཅས་བཤད་ཐབས་ཡན་ལག་ལྔའི་སྒོ་ནས་བསྟན་བཅོས་མངོན་རྟོགས་རྒྱན་གྱིས་མདོ་འཆད་པར་བྱེད་དོ། །མདོ་དོན་འཆད་པར་བྱེད་པ་ལ་དེ་ལྟ་བུའི་བཤད་ཐབས་ཡན་ལག་ལྔ་ཅི་དགོས་ཤེ་ན། རྣམ་བཤད་རིགས་པར། མདོ་དོན་ཆེ་བ་ཉིད་ཐོས་ནས། །ཉན་པ་དང་ནི་འཛིན་པ་ལ། །ཉན་པ་པོ་ནི་གུས་བྱེད་པས། །ཐོག་མར་དགོས་པ་བརྗོད་པར་བྱ། །དེ་འགྲུབ་དེ་ནི་བསྡུས་དོན་ལས། །བསྡུས་པའི་དོན་ནི་ཚིག་དོན་ལས། །གོ་རིམ་རིམ་པ་སྔ་ཕྱི་དག །མི་འགལ་བ་ནི་གཉིས་ལས་སོ། །ཞེས་པ་ལྟར་མདོ་དོན་གྱི་ཆེ་བ་ཐོས་ནས་ཉན་པ་དང་འཛིན་པ་ལ་གུས་པ་བསྐྱེད་པའི་ཆེད་དུ་ཐོག་མར་དགོས་དོན་གྱི་སྒོ་ནས་འཆད་པ་དང་། མདོ་དོན་བདེ་བླག་ཏུ་རྟོགས་པའི་དགོས་དོན་དེ་ཡང་བསྡུས་དོན་ལུས་རྣམ་གཞག་ལ་རག་ལས་པས་བསྡུས་དོན་གྱི་སྒོ་ནས་འཆད། བསྡུས་དོན་དེ་ཡང་ཚིག་དོན་ཡན་ལག་རྒྱས་བཤད་ལ་རག་ལས་པས་ཚིག་དོན་གྱི་སྒོ་ནས་འཆད། ཚིག་དོན་གྱི་གོ་རིམ་རྣམས་འབྲེལ་བ་ནི་མཚམས་སྦྱོར་ལ་རག་ལས་པས་མཚམས་སྦྱོར་གྱི་སྒོ་ནས་འཆད། རིགས་པ་སྔ་ཕྱི་མི་འགལ་བ་ནི་བརྒལ་ལན་ལ་རག་ལས་པས། བརྒལ་ལན་གྱི་སྒོ་ནས་ཏེ། མདོ་དོན་བདེ་བླག་ཏུ་རྟོགས་པར་བཤད་ཐབས་ཡན་ལག་ལྔའི་སྒོ་ནས་འཆད་པ་ནི་བྱམས་པའི་མན་ངག་བླ་ན་མེད་པའོ། །
རྒྱུད་དོན་རྟོགས་པའི་མན་ངག་རྒྱན་བདུན་ནི། རྒྱ་རིམ་པ་བདུན་གྱིས་བཏབ་ནས་བཞག་པའི་གསང་བའི་རྒྱ་བཀྲོལ་བའི་མན་ངག་གི་རིམ་པ་ཡིན་ལ། དེ་ལ་གང་བཤད་པར་བྱ་བའི་གཞི་གླེང་བསླང་བའི་རྒྱན། བཤད་དོན་ལམ་གྱི་རིམ་པ་བསྒྲིགས་པ་འཚང་རྒྱ་ཚུལ་གྱི་རྒྱན། གཞུང་གི་ཚིག་དང་དོན་སོ་སོའི་འཆད་ཚུལ་མཐའ་དྲུག་གི་རྒྱན། གཞུང་གཅིག་གི་དོན་རྫོགས་པར་འཆད་པ་ཚུལ་བཞིའི་རྒྱན། དོན་གང་སློབ་མ་གང་ལ་འཆད་པ་འཆད་ཚུལ་གྱི་རྒྱན། རྒྱུད་ལ་འཇུག་པ་གང་ཟག་ཉན་པ་པོའི་རྒྱན། དགོས་པ་བདེན་གཉིས་ངེས་པའི་རྒྱན་བཅས་རྒྱལ་བ་རྡོ་རྗེ་འཆང་གིས་རྩ་རྒྱུད་དང་བཤད་རྒྱུད་དུ་གསུངས་པའི་མན་ངག་རྣམས་མགོན་པོ་ཀླུ་སྒྲུབ་ཀྱིས་ལུང་རིགས་ལམ་ནས་ལེགས་པར་ཤན་སྦྱར་བའི་མན་ངག་ཟབ་མོ་འདི་དག་ལ་བརྟེན་ནས་རྒྱུད་དོན་ལེགས་པར་རྟོགས་དགོས་པར་གསུངས་སོ། །རྒྱུད་འཆད་ཉན་ཙམ་དུ་མ་ཟད་འཆད་པའི་མན་ངག་གི་རིམ་པ་འདི་དག་འཆད་ཉན་སྐབས་ཐམས་ཅད་དུ་སྦྱར་ཤེས་ན་མན་ངག་གི་གནད་དུ་མ་ཡོད་དེ། དང་པོ་གླེང་གཞིའི་རྒྱན་ལ་མཚོན་ན། རྒྱུད་འདིའི་མིང་གང་ཡིན་པ་དང་། གང་ཟག་གང་གི་དོན་མཛད་པ། མཛད་པ་པོ་སུ་ཡིན། རྒྱུད་འདིའི་ཚད་གང་ཡིན། འདི་ཡི་དགོས་པ་ཅི་ཞིག་ཡིན། ཞེས་དོན་ཚན་ལྔ་ལ་དྲི་ལན་གྱི་སྒོ་ནས་བརྡར་ཤ་བཅད་པ་བཞིན་འཆད་ཉན་བྱེད་སྐབས་ཐོག་མར་གླེང་གཞིའི་ཚུལ་དུ་བསྟན་བཅོས་དེའི་མིང་དང་། གང་ཟག་གང་གི་དོན་དུ་མཛད་པ། རྩོམ་པ་པོ་གང་གིས་མཛད་པ། བསྟན་བཅོས་དེའི་ཚིག་དོན་གྱི་ཚད་གང་ཡིན། དགོས་པ་ཅི་ཞིག་ཡིན་མིན་སོགས་བརྡར་ཤ་བཅད་ནས་འཆད་དགོས་པ་མཚོན་ཡོད།
གཉིས་པ་འཚང་རྒྱ་ཚུལ་གྱི་རྒྱན་ལ། རྒྱུད་དང་གླེང་གཞི་ངེས་ཚིག་རྒྱུ་བཅས་བཞི་གསུངས་པ་ནི་སངས་རྒྱས་བཅོམ་ལྡན་འདས་ཀྱི་རྣམ་ཐར་གྱི་སྡོམ་ལྟ་བུ་སྟེ། དང་པོར་མི་ཁོམ་བརྒྱད་སྤངས་པའི་འཛམ་བུ་གླིང་པའི་མིར་སྐྱེ་བ་འཁྲུངས་པ་ནི་རྒྱུད་དང་། དེ་ནས་རབ་ཏུ་བྱུང་བ་ནི་གླེང་གཞི། རབ་ཏུ་བྱུང་ནས་འདུལ་བ་བཞིན་སྡོམ་པ་ངེས་པར་བསྲུང་དགོས་པ་ནི་ངེས་ཚིག །དེ་ནས་འབྲས་བུ་བྱང་ཆུབ་འདོད་པས་དཀའ་བའི་ཆོས་སྤྱོད་པ་བསམ་གཏན་བཞི་པའི་རབ་མཐའི་ཏིང་ངེ་འཛིན་ཁྱད་པར་ཅན་རྙེས་པ་ནི་ཉེ་རྒྱུ། ཞེས་གསུངས་པ་ནི་ཆགས་བྲལ་ལམ་གྱི་འཚང་རྒྱ་ཚུལ་དང་ཆགས་བཅས་ལམ་གྱིས་འཚང་རྒྱ་ཚུལ་དཔེ་འདིས་འཚོན་པའོ། །
གསུམ་པ་གཞུང་གི་ཚིག་དང་དོན་སོ་སོའི་འཆད་ཚུལ་མཐའ་དྲུག་གི་རྒྱན་ལ། དྲང་དོན་ངེས་དོན་གཉིས། དགོངས་དགོངས་མིན་གཉིས། སྒྲ་ཇི་བཞིན་ཡིན་མིན་གཉིས་བཅས་དྲུག་ནི་མཐའ་དྲུག་གོ །
བཞི་པ་གཞུང་གཅིག་གི་དོན་རྫོགས་པར་འཆད་པ་ཚུལ་བཞིའི་རྒྱན་ལ། ཡིག་དོན། སྤྱི་དོན། སྦས་དོན། མཐར་ཐུག་པའི་དོན་ཏེ་བཞིའོ། །གཞུང་དོན་ཇི་ལྟར་འགྲེལ་བ་མཐའ་དྲུག་ཚུལ་བཞིའི་རྒྱན་གཉིས་ཇི་བཞིན་མ་ཤེས་ན་རྒྱུད་དོན་ཇི་བཞིན་འཆད་མི་ཐུབ་པ་ནི་འདུས་པའི་རྒྱུད་ལྟ་བུ་ལ་འཐའ་དྲུག་ཚུལ་བཞིའི་འཆིང་བས་བཅིངས་པ་སྟེ་རྒྱས་བཏབ་པས་ཤིན་ཏུ་རྟོགས་དཀའ་བའི་གནས་ཀྱིས་སོ། །འགྲེལ་ཚུལ་འདི་དག་ཡེ་ནས་མི་ཤེས་པར་རྒྱུད་དོན་དྲང་ཐད་སྒྲས་ཟིན་ཙམ་ལ་འགྲེལ་ན་སྙིང་པོ་མེད་པ་མ་ཟད་རྟོག་གེ་འགས་སངས་རྒྱས་ལ་འགལ་འདུ་སྒྲིག་ཁུལ་གྱི་རྒྱུད་ཚིག་ཐར་ཐོར་སྐྱོར་བ་ནི་རང་གི་དེ་ཉིད་སྟོན་པ་ཙམ་མོ། །མཐའ་དྲུག་མི་ཤེས་ན་མདོ་རྒྱུད་གང་བཤད་ཀྱང་ནོར་བར་འགྱུར་ཏེ། སློབ་དཔོན་ཟླ་བ་གྲགས་པས། མཐའ་དྲུག་བྲལ་བས་ངེས་པར་རྟོགས་ཞེས་གང་སྨྲ་བ། །ཟླ་བ་ལྟ་འདོད་སོར་མོའི་རྩེ་ལ་ལྟ་དང་མཚུངས། །ཞེས་གསུངས་སོ། །རྡོ་རྗེའི་ཚིག་ལྟ་ཞོག་མདོ་ཕྱོགས་ལའང་ཀླུ་སྒྲུབ་དང་ཐོགས་མེད་ཀྱིས་ཤིང་རྟའི་སྲོལ་ཕྱེ་བའི་རིགས་པའི་ལམ་ལ་མ་བསྟེན་པར་སྒྲས་ཟིན་ཙམ་དྲང་ཐད་ལ་འགྲེལ་ན་གཞུང་དོན་ཇི་བཞིན་རྟོགས་མི་ཐུབ་པས། མདོ་རྒྱུད་འཆད་ཉན་སྐབས་ཐམས་ཅད་དུ་བཤད་ཐབས་ཡན་ལག་ལྔའི་མན་ངག་དང་། མཐའ་དྲུག་ཚུལ་བཞིའི་རྒྱན་ལེགས་པར་མ་སྦྱངས་པར་མདོ་སྔགས་ཀྱི་གཞུང་ལུགས་ལ་འཆད་ཉན་དང་དགག་སྒྲུབ་བྱེད་ཁུལ་ནི་ཕོ་སྒྲོབ་ཧམ་པའི་ཁྲམ་གཏམ་ཙམ་ལས་ས་ཆོད་ཅི་ཡང་མི་འོང་ངོ་། །
ལྔ་པ་དོན་གང་སློབ་མ་གང་ལ་འཆད་པ་འཆད་ཚུལ་གྱི་རྒྱན་ལ་གཉིས། ཚོགས་པ་དང་སློབ་མ་ལ་བཤད་པའོ། །བཤད་པ་གཉིས་པོ་དེ་གང་ཡིན་སྙམ་ན། མཐའ་དྲུག་གི་ནང་ནས་སྒྲ་ཇི་བཞིན་པ་དང་། དགོངས་པ་མིན་པ་དང་། དེར་མ་ཟད་དྲང་དོན་དུ་གྱུར་པ་གང་ཡིན་པ་སྟེ་གསུམ་དང་། ཚུལ་བཞིའི་ནང་ནས་ཡིག་སྤྱི་གཉིས་བཅས་ཚོགས་པ་ལ་བཤད་པར་བྱ་བ་ཡིན་པར་བརྗོད་དོ། །མཐའ་དྲུག་གི་ནང་ནས་སྒྲ་ཇི་བཞིན་མིན་པ་དང་། ངེས་པའི་དོན་དང་། དེ་བཞིན་དགོངས་ཏེ་བཤད་པ་གསུམ་དང་། ཚུལ་བཞིའི་ནང་ནས་སྦས་དོན་དང་། མཐར་ཐུག་པའི་དོན་རྣམས་ནི་སློབ་མ་ལ་བཤད་པར་བྱ་བ་ཡིན་པར་བརྗོད་དོ། །རྒྱན་འདི་ལས་དོན་གང་ཞིག་གང་ཟག་སུ་ལ་བཤད་དགོས་དང་མི་དགོས་ཀྱི་རྣམ་དབྱེ་ལེགས་པར་ཕྱེ་ནས་འཆད་དགོས་པར་གསུངས་སོ། །
སྡེ་ཚན།
དཔྱད་རྩོམ།
ནང་གསེས་དབྱེ་འབྱེད།
Mon 17 Feb 2020
སྲིད་ཞིའི་མཐའ་འགོག་པའི་གཞུང་དོན་ལ་ཅུང་ཙམ་བཤད་པ།
ནགས་ལྷའི་གཡག་རྒོད།
རྒྱལ་བ་སངས་རྒྱས་ཀུན་གྱིས་བགྲོད་པའི་ཡུམ།།
ཡུམ་ཆེན་ཤེར་ཕྱིན་གཞུང་གི་སྦས་པའི་དོན།།
དོན་བཞིན་གཟིགས་ནས་སྟོན་པ་ཀུན་ལས་རྒྱལ།།
རྒྱལ་བ་བྱམས་པ་གང་དེར་སྤྱི་བོས་འདུད།།
དེ་ལྟར་དམ་པའི་ཕྱག་སྲོལ་ལྟར་ཕྱག་འཚལ་བ་སྔོན་དུ་བཏང་ནས་འདིར་བྱ་བ་ཅི་ཞིག་རྩོམ་པ་ནི། རྩ་བར། ཚུལ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་རྣམས་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིར་པར་འདོད། །ཅེས་པའི་གཞུང་འདིའི་དོན་བཤད་པར་བྱ་བ་ཡིན་ལ། འདི་ལ་དངོས་བསྟན་རྗེས་འགྲོའི་སྒོ་ནས་ཐེག་ཆེན་གྱི་གཞི་ཤེས་བསྟན་པ་དང་།
ཤུགས་བསྟན་ལྡོག་འགྲོའིི་སྒོ་ནས་ཐེག་དམན་གྱི་གཞི་ཤེས་བསྟན་པ་གཉིས་ནི་འགྲེལ་པ་ལས། དུས་གསུམ་པའི་ཆོས་རྣམས་ཞེས་པ་ནས་སྲིད་པ་དང་ཞི་བ་ལ་མི་གནས་པ་ཡིན་ནོ། །ཞེས་པའི་བར་དང་། ཡང་ཀུན་ཤེས་པ་ཉིད་ཀྱི་སྐབས་ལས་བཟློག་སྟེ་བསྟན་པས་ཞེས་པ་ནས་འཁོར་བ་དང་མྱ་ངན་ལས་འདས་པ་ལ་གནས་པ་ཡིན་པ་ཤེས་པར་བྱའོ། །ཞེས་གསུངས་བར་གསུངས་སོ།།
རྩ་འགྲེལ་དེ་དག་ལས། ཚུ་རོལ་ཕ་རོལ་མཐའ་ལ་མིན། །ཞེས་དང་། ཤེས་རབ་ཀྱིས་ཚུ་རོལ་གྱི་མཐའ་འཁོར་བ་དང་། སྙིང་རྗེས་ཕ་རོལ་གྱི་མཐའ་མྱ་ངན་ལས་འདས་པ་སྟེ། ཞེས་པའི་དོན་ལ། གཞན་ལུགས་འགོད་པ། ལུགས་དེ་འགོག་པའི་ཚུལ། རང་གི་ལུགས་ལ་དོགས་པ་འགོད་པའོ།། དང་པོ་ནི། བུ་སྟོན་དང་ཉ་དབོན་གྱི་ལུགས་ལ་སྐབས་འདིའི་ཀུན་རྫོབ་ལ་ལྟོས་པའི་སྲིད་མཐའ་འགོག་བྱེད་ཀྱི་ཤེས་རབ་ནི། དུས་རྣམས་མཉམ་པ་ཉིད་ཤེས་ཕྱིར། །ཞེས་པའི་སྐབས་ནས་བསྟན་པའི་དུས་གསུམ་མཉམ་པ་ཉིད་དུ་རྟོགས་པའི་ཤེས་རབ་ལ་བཞེད་པ་ཡིན་ཏེ། བུ་འགྲེལ་ལུང་གི་སྙེ་མ་ལས། སངས་རྒྱས་དང་བྱང་སེམས་རྣམས་ལ་ཉེ་བར་གྱུར་པར་འདོད་པའི་ཡུམ་གང་ཡིན་དེ་ནི་ཆོས་ཅན། སྲིད་པ་དང་ཞི་བ་ལ་མི་གནས་པ་ཡིན་ཏེ། དུས་གསུམ་གྱིས་བསྡུས་པའི་ཆོས་རྣམས་སྐྱེ་བ་མེད་པའི་མཉམ་པ་ཉིད་དུ་མངོན་སུམ་དུ་རྟོགས་པ་སྙིང་རྗེ་ཆེན་པོ་དང་འབྲེལ་བའི་ཕྱིར། ཞེས་དང་། ཉ་ཊཱིཀ་ཡིད་ཀྱི་མུན་སེལ་ལས། བྱང་འཕགས་མཉམ་གཞག་གི་ཤེར་ཕྱིན་པ་ཆོས་ཅན། ཚུལ་རོལ་འཁོར་བ་ཕ་རོལ་མྱང་འདས་ཀྱི་མཐའ་གཉིས་ལ་སྟེ་གཉིས་སུ་གནས་པ་མིན་འཁོར་འདས་དེ་དག་གི་བར་ན་ཡང་མཚན་མར་བཟུང་ནས་གནས་པ་མིན་ཏེ། དུས་གསུམ་པའི་ཆོས་རྣམས་དོན་དམ་པར་སྐྱེ་བ་སོགས་མེད་པར་མཉམ་པ་ཉིད་དུ་མངོན་སུམ་དུ་ཤེས་པའི་ཡེ་ཤེས་སྙིང་རྗེ་ཆེན་པོ་ཅན་ཡིན་པའི་ཕྱིར་ཞེས་མདོ་ལས་འདོད་དོ། །ཞེས་གསུངས་པའི་ཕྱིར། །
གཉིས་ལ་དེ་འགོག་ཚུལ་ནི། རྣམ་བཤད་ལས། སྐབས་འདིར་ཁ་ཅིག་གིས་ཀུན་རྫོབ་ལ་ལྟོས་པའི་སྲིད་མཐའ་འགོག་བྱེད་སྟོང་ཉིད་རྟོགས་པའི་ཤེས་རབ་ལ་འཆད་པ་ནི་ལམ་གྱི་རིམ་པའི་བློའི་འཇུག་ཚུལ་མི་འདྲ་བ་ཞིབ་ཏུ་མ་རྟོགས་པའི་རྣམ་འགྱུར་དུ་གསལ་ཏེ། སློབ་དཔོན་དང་འཕགས་པ་གཉིས་ཀས་ཤེས་རབ་ཀྱིས་འཁོར་བའི་སྐྱོན་མཐོང་བར་གསུངས་པའི་ཕྱིར་དང་། འཁོར་བའི་སྐྱོན་དོན་དམ་འཇལ་བའི་རིགས་ཤེས་ཀྱིས་མི་རྙེད་པའི་ཕྱིར་རོ། །ཞེས་གསུངས་པ་ཡིན་ནོ། །དེ་ལྟར་རྒྱན་སྣང་ལས། ཐམས་ཅད་ཤེེས་པ་ཉིད་བསྟན་པའི་དོན་དུ། ཤེས་རབ་ཀྱིས་འཁོར་བའི་སྐྱོན་མཐོང་བ་དང་སྙིང་རྗེས་སེམས་ཅན་གྱི་དོན་བྱེད་པའི་གཞན་གྱི་དབང་དུ་གྱུར་པས་བྱང་ཆུབ་སེམས་དཔའ་རྣམས་སྲིད་པ་དང་། ཞི་བ་ལ་མི་གནས་པའི་ཕྱིར་ན་ལྡོག་པ་སྟོན་པས་ཉན་ཐོས་དང་རང་སངས་རྒྱས་རྣམས་ནི་དེ་ལྟ་མ་ཡིན་ནོ། །ཞེས་སློན་དཔོན་གྱིས་གསུངས་མོད། འོ་ན་འཕགས་པས་གང་ནས་གསུངས་ཤེ་ན། ཉི་སྣང་དུ་ནི། ཤེས་པས་སྲིད་ལ་མི་གནས་ཤིང་། །ཞེས་སོགས་ལུས་མདོར་བསྟན་གྱི་ཐད་དུ་དང་། ཚུ་རོལ་ཕ་རོལ་མཐའ་ལ་མིན། ཞེས་སོགས་ཀྱི་ཐད་དུ་མི་གསལ་བས་འཕགས་པས་གང་དུ་གསུངས་པ་འཚོལ་བར་བྱའོ། །
གསུམ་པ་རང་གི་ལུགས་ལ་དོགས་པ་འགོད་པ་ནི། འཁོར་བའི་སྐྱོན་དོན་དམ་འཇལ་བའི་རིགས་ཤེས་ཀྱིས་མི་རྙེད་ན། ལེགས་བཤད་གསེར་ཕྲེང་ལས། རིམ་པ་ལྟར་སྲིད་པ་རང་བཞིན་མེད་རྟོགས་ཀྱི་ཤེས་རབ་ཀྱིས་དེར་མཐའ་གཅིག་ཏུ་གནས་པའི་ཉེས་དམིགས་མཐོང་བ་དང་། ཞེས་གསུངས་དོན་ཇི་ལྟར་ཡིན། དེ་འདྲའི་རང་བཞིན་མེད་རྟོགས་ཀྱི་ཤེས་རབ་དེ་སྲིད་པ་གང་ཟག་གི་བདག་མེད་པར་རྟོགས་པའི་ཤེས་རབ་ཡིན་པས་སྐྱོན་མེད་དོ་ཞེ་ན། འོ་ན་དེས་རྟོགས་པའི་འཁོར་བའི་སྐྱོན་དེ་གང་ལ་བཞེད། སྲིད་པ་གང་ཟག་གི་བདག་ཏུ་མེད་པ་དང་བདག་འཛིན་གྱི་ཞེན་ཡུལ་མེད་པ་གང་ལ་བཞེད་ཀྱང་མི་འཐད་དེ། སངས་རྒྱས་འཕགས་པ་ཡང་དེ་དང་བྲལ་བ་མི་སྲིད་པའི་ཕྱིར། ཚུལ་འདི་ལ་བདེན་འཛིན་འཁོར་རྩ་འདོད་པའི་ལུགས་ཀྱིས་ལན་ལྷག་ཏུ་དཀའ་བར་སྣང་ངོ། །རྩ་འགྲེལ་དེ་དག་ལས། དུས་རྣམས་མཉམ་པ་ཉིད་ཤེས་ཕྱིར། །ཞེས་དང་། དུས་གསུམ་པའི་ཆོས་རྣམས་སྐྱེ་བ་མེད་པའིི་རྣམ་པར་མཉམ་པ་ཉིད་དུ་རྟོགས་པས་ཞེས་པའི་དོན་ལ། གཞན་གྱི་ལུགས་འགོད་པ། ལུགས་དེ་འགོག་པའི་ཚུལ། རང་གི་ལུགས་ལ་དོགས་པ་འགོད་པའོ། །དང་པོ་ནི། གོང་གི་མཁས་པ་དེ་གཉིས་ཀྱིས་སྐབས་འདིར། དུས་རྣམས་མཉམ་པ་ཉིད་ཤེས་ཕྱིར། །ཞེས་པའི་གཞུང་འདི། དེ་དག་བར་ན་མི་གནས་པ། །ཞེས་པའི་གོང་མའི་སྒྲུབ་བྱེད་དུ་ཡར་སྦྱོར་བ་ཡིན་ལ། དེས་བཟློག་སྟེ་བསྟན་པ་སྟེ་ཉན་རང་འཁོར་འདས་ལ་བདེན་པར་བཟུང་ནས་གནས་པའི་རྒྱུ་མཚན་དེ་དག་ལ་དུས་གསུམ་པའི་ཆོས་རྣམས་དོན་དམ་པར་སྐྱེ་བ་མེད་པར་མཉམ་པ་ཉིད་དུ་རྟོགས་པའི་སྟོང་ཉིད་རྟོགས་པའི་ཤེས་རབ་དང་བྲལ་བ་ལ་བཞེད་པ་ཡིན་ཏེ། བུ་འགྲེལ་ལས། ཀུན་ཤེས་པ་ཉིད་ཀྱི་སྐབས་སུ་ཉན་རང་གི་ཡུམ་ལྡོག་སྟེ་བསྟན་པས་ན། ཉན་ཐོས་ལ་སོགས་པའི་རང་གི་རྟོགས་པ་ཙམ་གྱི་ཡུམ་ཆོས་ཅན། འཁོར་བ་དང་མྱ་ངན་ལས་འདས་པ་ལ་གནས་པ་ཡིན་པར་ཤེས་པར་བྱའོ། །དུས་གསུམ་མཉམ་པ་ཉིད་དུ་ཤེས་པ་མེད་པའི་ཕྱིར། བདག་གཞན་མཉམ་པ་སོགས་ཀྱི་སྙིང་བརྩེ་དང་། རང་བཞིན་གང་ཡང་མེད་རྟོགས་ཀྱི་ཤེས་རབ་དང་བྲལ་བའི་ཕྱིར་རོ། །ཉ་ཊཱིཀ་ལས། དུས་གསུམ་བདེན་མེད་དུ་མཉམ་པ་ཉིད་ཤེས་པ་རང་རྒྱུད་ལ་མེད་པའི་ཕྱིར། དེས་ན་དེ་ཆོས་ཅན། འཁོར་འདས་གང་རུང་ལ་གནས་པ་ཡིན་པར་ཤེས་པར་བྱའོ། །ཞེས་གསུངས་པའི་ཕྱིར་རོ། །
སྡེ་ཚན།
དཔྱད་རྩོམ།
ནང་གསེས་དབྱེ་འབྱེད།
