ལམ་བཟང་པོས།

ཅི་ཙམ་ཐོས་ཀྱང་ངོམ་པ་མེད་པའི་དབྱངས་ཀྱི་རྒྱ་མཚོའི་མ་མ་གཅིག།
མུན་པའི་ཁམས་སུ་ཤེས་རབ་འོད་ཀྱི་སྒྲོན་མེ་སྦར་བའི་དཔལ་འབར་ཆེ།།
ཟུར་ཕུད་ལྔ་པའི་བདག་མོར་གྲགས་པ་མཚུངས་མེད་མངའ་བའི་ལང་ཚོ་ཅན།།
ཚངས་པའི་སྲས་མོ་ངག་གི་ལྷ་མོ་འདིར་ཕེབས་རོགས་ཤིག་གནང་དང་ཀྱེ།།

གདོད་མ་སྔོན་མའི་གཏམ་རྒྱུད་དེད་ན་བདག་གིས་མཐའ་རུ་མི་མངོན་ཞིང་།། 
སངས་རྒྱས་བྱང་སེམས་རྣམ་ཐར་སྔོགས་ན་ཇི་བཞིན་རྗོད་པའི་སྤོབས་པ་བྲལ།།
 འགའ་ཞིག་ལྷ་སྒྲུང་འདྲེ་སྒྲུང་དགའ་ཡང་བདག་ནི་མི་ཡི་ཚུལ་ལྟར་མོས།།
 གང་ཞིག་ཆུ་བུར་མིག་གིས་ཟིན་པའི་དཔྱོད་ལྡན་གཞོན་ནུ་གླེང་རྒྱུ་ཡིན།།

འབྲི་རུ་ལམ་བཟང་།

ལོ་བཅུ་ཕྲག་ཉི་ཤུ་ཡི་ཡར་སྔོན་དུ།།
རྗེ་མི་ལ་འདྲ་བའི་གྲུབ་ཆེན་ཞིག།
ཤ་རུས་པ་བྲག་རྩི་འགོས་པ་ཞིག།
འཕྱོར་ཁ་དོག་སྔོ་གམ་ཆགས་པ་ཞིག།

མགོའི་རལ་པ་རླུང་གིས་གཡོ་བ་ཞིག།
མགུར་སང་སང་ལམ་ནས་ལེན་པ་ཞིག།
གོས་ན་བུན་ལུས་ལ་གྱོན་པ་ཞིག།
ས་མདོ་སྨད་རེབ་གོང་ཡུལ་ནས་ཡོང་།།

ལམ་བཟང་པོས།

རི་མཐོན་པོ་ཁ་བའི་ལྭ་ཐོད་ཅན།།
དེ་མཐོང་དུས་ཕ་ཡུལ་ཡང་ཡང་དྲན།།
ཡུལ་དྲན་བཞིན་རྒྱང་རིང་ཕྱོགས་སུ་ལྟ།།
སེམས་འཕྲེང་བའི་གླུ་སྐད་ཐོལ་གྱིས་ཤོར།།

སྡེ་ཁྲ་མོ་སྐར་ཚོགས་བཀྲམ་འདྲ་བོ།།
དེ་མཐོང་དུས་ཉི་འོད་གྲོང་ཁྱེར་དྲན།།
གྲོང་དྲན་བཞིན་མ་གིའི་ཕྱོགས་སུ་ལྟ།།
ཞེ་སྨྲེང་བའི་གླུ་སྐད་ཀྱུར་ཀྱུར་ཤོར།།

ལམ་བཟང་།

རི་དེས་དགོང་ཁའི་ཉི་འོད་སྐེ་དཀྲིས་བྱས།།
གྲིབ་སོའི་ཤམ་ལྭར་ནགས་ཀྱི་ཚར་ལོ་ཉིག།
"འཕུར་"ཞེས་གླུ་དེས་མི་ཚོགས་གཉིད་ལས་སློང་།།
དབྱིན་ཡིག་ཐར་ཐོར་སེང་དར་རྩེ་རུ་འཕྱོ།།

ཚད་མེད་བརྙས་དང་མཐོང་ཆུང་བྱས་སྐད་ཀྱིས།།
དབྱངས་གསལ་སོ་བཞི་ཁང་ཁུག་ཞིག་ན་ངུ་།།
སྙིང་ཉེ་ཁ་ཤས་དེ་ལ་སེམས་གསོ་བྱེད།།
དེ་དུས་མི་ནག་ཅིག་གིས་མིག་ལོག་ལྟ།།

ནགས་ཀྱི་ཤིང་ལོ་ནས།

དབྱར་ཟླ་གསུམ་ཆར་ཆུས་ས་གཞི་བརླན།།
སྤང་སྔོན་མོ་གཡུ་ཡི་མེ་ལོང་ངོས།།
ཁྲ་ཆེམ་ཆེམ་མེ་ཏོག་བརྒྱ་སྟོང་བཞད།།
ང་དེ་དུས་མེ་ཏོག་གསེང་ན་ཡོད།།

ལག་འུར་རྡོ་ཟུང་བའི་རྫི་བོ་རྣམས།།
ཕྱུགས་ནོར་ལུག་དཀར་ནག་ཐང་ན་འཚོས།།
དཀར་འོ་ཞོ་འབྲོག་ཕྲུག་ཁ་ན་མངར།།
ང་དེ་དུས་འབྲོག་པའི་སྦྲ་ནང་ཡོད།།

ནགས་ཀྱི་ཤིང་ལོ་ནས།

གལ་སྲིད་ལྡུམ་ར་འདིར་རེ་དོགས་ཀྱི་རླུང་བུ་འཚུབ་མེད་ན་་་་
ཐོབ་ཤོར་གྱིས་དབེན་པའི་མེ་ཏོག་དག་ནི་ཅི་འདྲའི་ཡིད་དུ་འོང་བ་ཞིག
དེ་བཞིན་དུ་ས་གཞི་འདིར་ཧམ་སེམས་ཀྱི་དུག་ཆུས་སྦགས་མེད་ན་་་་
ཁ་བ་ལས་གྱུར་པའི་གཙང་པོ་དག་ནི་ཅི་འདྲའི་དྭངས་ཤིང་གཙང་བ་ཞིག
ད་རུང་མཚན་མོ་འདིར་ཕྲག་དོག་ཀྱི་སྤྲིན་ནག་འཁྲིགས་མེད་ན་་་་
འོད་ཀྱིས་འཁྱུད་པའི་སྐར་ཚོགས་དག་ནི་ཅི་འདྲའི་མཛེས་ཤིང་སྡུག་པ་ཞིག
དོན་ངོ་མ་གོ་ལ་འདིར་རང་རྒྱལ་གཞན་ཕམ་གྱི་འཐབ་རྩོད་མེད་ན་་་
གཅིག་ལ་གཅིག་རྟེན་གྱི་ཚེ་སྲོག་དག་ནི་ཅི་འདྲའི་རིན་ཐང་དང་ལྡན་པ་ཞིག

ནགས་ཀྱི་ཤིང་ལོ་ནས། རི་བོ་མཐོ་ས་དང་ས་གཞི་གཙང་ས་ཞིག་ན་ཁ་བའི་འདབ་མ་རིམ་གྱིས་བརྩེགས་ནས་གོ་ལའི་ཏོག་ཏུ་གྱུར་་་་་
ཉི་འོད་ཀྱིས་དཀར་མདངས་རྒྱས་པའི་ཁ་བའི་རི་ནི་ནམ་ཡང་གཡོ་བ་མེད་ཅིང་ས་སྒང་འདིར་རྟག་ཏུ་བརྟན་་་་་
གངས་རི་ལས་བྱུང་ཞིང་ཁ་བའི་མི་ནི་རྒྱུན་དུ་འཛུམ་གྱིས་འཁྱུད་ཅིང་བག་ཕེབས་པའི་གཤིས་ཀ་དེས་་་་་
ཁ་ཆར་དང་བུ་ཡུག་མོད་པའི་མཐོ་སྒང་དེ་རུ་མ་ཎི་དབྱངས་སུ་གྱེར་ཞིང་དད་པའི་ལག་ཟུང་སྙིང་ཁར་སྦྱར།

གངས་རི་ནས་བཞུར་བའི་ཆུ་རྒྱུན་རེ་རེར་བྱིན་རླབས་ཀྱི་མངར་ཁ་རྒྱས་ནས་རྦ་རླབས་དང་ལྷན་དུ་་་་་
ཤག་ཤག་གི་འབབ་སྒྲ་དང་བཅས་ཏེ་རི་ལུང་ཡོད་ཚད་ནས་ལྷུང་ལྷུང་གི་འགྲོས་ཀྱིས་རྒྱ་མཚོ་རུ་འཁྱིལ་་་་་
གངས་ཆུ་དྭངས་མའི་འཚོ་བཅུད་ཀྱི་ཐིགས་པ་རེ་རེས་གོ་ལའི་ཚེ་སྲོག་གི་རྩ་བ་རུ་གསོན་ཤུགས་གཏམས་་་་་
ཆད་པ་མེད་པའི་ཁ་བའི་འདབ་མ་རེ་རེས་རྫོགས་པ་མེད་པའི་གངས་རིའི་ཆུ་རྒྱུན་རེ་རེའི་ས་བོན་བཏབ།

ནགས་ཀྱི་ཤིང་ལོ་ནས།

མཁའ་རུ་འཁྲིགས་པའི་ལང་ལོང་ཆུ་ཁུར་ཞིག །
སྒྲ་ལྡན་འོག་ནས་སིབ་སིབ་ཆར་ཟིམ་ཞིག །
རང་བཞིན་མ་བརྫུས་རང་བྱུང་ངོ་མ་ཞིག །
མིང་ཞིག་བོས་ན་སེམས་ཀྱི་སྦྲང་ཆར་ཡིན།།

 རྐང་འཐུང་རྩེ་ན་བཏགས་པའི་འདབ་བརྒྱ་ཞིག །
མིག་གི་ལམ་ན་མཛེས་པའི་འདབ་མ་ཞིག །
རང་བཞིན་དྲི་མས་དབེན་པའི་ཟེའུ་འབྲུ་ཞིག །
མིང་ཞིག་བཏགས་ན་སེམས་ཀྱི་མེ་ཏོག་ཡིན།།

ནགས་ཀྱི་ཤིང་ལོ་ནས།

ཕྱི་རུ་ཆར་པ་ཟིམ་ཟིམ་ཟིམ།།
ལོ་མ་ལྗང་ཁུ་ཆར་གྱིས་བཀྲུས།།
ནང་ན་ཚོར་བ་སྙི་མོ་ཞིག །
རྣམ་ཤེས་དམར་པོ་དྲན་པས་བཟི།།

ཕྱི་རུ་རླུང་བུ་འུར་འུར་འུར།།
ལྗོན་ཤིང་ཡལ་ག་རླུང་གིས་བསྒུལ།།
ནང་ན་ཐབ་ཀྱི་རླངས་པ་ཐུལ།།
ཇ་ཐང་སྨུག་ནག་བྲོ་བ་ཞིམ།།

ནགས་ཀྱི་ཤིང་ལོ་ནས།

གང་ལའང་མ་ཁེན་སུ་ལ་མ་བརྟེན་པར།།
དངོས་པོའི་ཆོས་ཤིག་བཙལ་དུ་མེད་ན་ཡང་།།
རྟག་གཅིག་རང་དབང་ནང་དུ་ཞུགས་པ་ཡི།།
ང་དང་ང་འདྲའི་བྱིས་བློ་ཅན་པོ་རྣམས།།

རྐང་གཉིས་མ་རིག་ས་ཡིས་བཀྱགས་པ་ན།།
བལྟོས་མེད་རང་སྐྱ་སེམས་སུ་རློམ་པ་དེས།།
གཞན་ལ་མ་བརྟེན་གྱེན་དུ་ལངས་སྙམ་པའི།།
བྱིས་བློ་ཁྱོར་ཆུང་འདྲ་འདི་རང་རྐྱས་གང་།།