Mon 24 Jul 2017
འབྱུང་བཞིས་བསྡམས་པའི་བྱིས་བློ།
ནགས་ཀྱི་ཤིང་ལོ་ནས།
གང་ལའང་མ་ཁེན་སུ་ལ་མ་བརྟེན་པར།།
དངོས་པོའི་ཆོས་ཤིག་བཙལ་དུ་མེད་ན་ཡང་།།
རྟག་གཅིག་རང་དབང་ནང་དུ་ཞུགས་པ་ཡི།།
ང་དང་ང་འདྲའི་བྱིས་བློ་ཅན་པོ་རྣམས།།
རྐང་གཉིས་མ་རིག་ས་ཡིས་བཀྱགས་པ་ན།།
བལྟོས་མེད་རང་སྐྱ་སེམས་སུ་རློམ་པ་དེས།།
གཞན་ལ་མ་བརྟེན་གྱེན་དུ་ལངས་སྙམ་པའི།།
བྱིས་བློ་ཁྱོར་ཆུང་འདྲ་འདི་རང་རྐྱས་གང་།།
རང་རྒྱུ་ཉོན་མོངས་ཅན་གྱི་བདེ་བ་ཙམ།།
རྟག་བརྟན་ཞི་བའི་སིམ་པ་མིན་ན་ཡང་།།
འདི་སྣང་ཞེན་པ་ནང་དུ་ཞུགས་པ་ཡི།།
ང་དང་ང་འདྲའི་བྱིས་བློ་ཅན་པོ་རྣམས།།
སྣང་བ་འདོད་པའི་ཆུ་ཡིས་ཁུར་བའི་དུས།།
ལྦུ་བའི་སོབ་སོབ་ནོར་བུར་རློམ་པ་དེས།།
ཆུ་གཏེར་ཡོད་ཚད་ལོངས་སུ་སྤྱོད་ཡོད་སྙམ།།
བྱིས་བློ་ཁྱོར་ཆུང་འདྲ་འདི་ལྦུ་བས་གང་།།
ཤེས་བྱའི་གནས་ལུགས་མཐའ་ཡི་རྒྱ་མཚོ་བཞིན།།
རང་གིས་ཤེས་པ་རྩྭ་རྩེའི་ཟིལ་བ་ཙམ།།
རང་སྣང་དྲེད་པོ་ནང་དུ་ཞུགས་པ་ཡི།།
ང་དང་ང་འདྲའི་བྱིས་བློ་ཅན་པོ་རྣམས།།
བུད་ཤིང་ང་རྒྱལ་མེ་ཡིས་སྤར་བའི་དུས།།
རྩྭ་རྩེའི་ཤེས་བྱ་རི་བོ་རློམ་པ་དེས།།
ཤེས་བྱ་ཡོད་དོ་ཁོང་དུ་ཆུད་ཡོད་སྙམ།།
བྱིས་བློ་ཁྱོར་ཆུང་འདྲ་འདི་འཁྲུལ་བས་གང་།།
རྣམ་དཔྱོད་བློ་གྲོས་བརྩོན་པས་མ་འཁྱུད་ན།།
ཤེས་རབ་འོད་སྣང་ལོན་དུ་མེད་ངེས་ཀྱང་།།
ལེ་ལོ་གཡེང་བའི་རུམ་དུ་ཉལ་བ་ཡི།།
ང་དང་ང་འདྲའི་བྱིས་བློ་ཅན་པོ་རྣམས།།
རང་སེམས་རྣམ་རྟོག་རླུང་གིས་སྤུར་བའི་དུས།།
འཆར་ཡན་སེམས་རིས་ཉི་ཟླར་རློམ་པ་དེས།།
རི་བོའི་ཚོགས་ཀྱང་རྐང་པས་གནོན་ཡོད་སྙམ།།
བྱིས་བློ་ཁྱོར་ཆུང་འདྲ་འདི་མུན་པས་གང་།།
རྫུན་ལས་བྱུང་བའི་རྫུན་གྱི་གཟུགས་བརྙན་ཞིག །
རྫུན་ལས་གྲུབ་པའི་རྫུན་པའི་མེ་ལོང་ནང་།།
རྫུན་གྱིས་སླད་པའི་རྫུན་གྱི་འཁྲུལ་ཤེས་དེས།།
རྫུན་པས་རྫུན་པ་སྒྲུབ་འདི་བྱིས་བློ་ཞིག །
སྡེ་ཚན།
སྙན་རྩོམ།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
