སེར་ལྷོ་ལྷ་རམས་པ་ངག་དབང་བསྟན་པ།

དུས་རབས་ཉེར་གཅིག་ནང་གི་རྐང་གཉིས་རྣམས་དུས་རབས་དང་མཐུན་པའི་མི་ཞིག་ཆགས་རྒྱུ་གལ་ཆེ།

དེ་ཆགས་པ་ལ་ཕྱོགས་གཅིག་གི་རེ་འདོད་ནི་ནོར་འཁྲུལ་ལོས་ཡིན།དེང་དུས་མི་ཞིག་ཡོང་བ་ལ་དང་པོའི་ཆ་རྐྱེན་དེང་དུས་ཀྱི་སློབ་སྦྱོང་བྱེད་སྟངས།དེང་དུས་ཀྱི་སྐད་ཆ་ཤོད་སྟངས།དེང་དུས་ཀྱི་འཚོ་བ་སྤྱོད་སྟངས་སོགས་ཀུན་ལ་རྣམ་དཔྱོད་བེད་སྤྱོད་དགོས་པ་ཞིག་མཐོང་།དང་པོ་དེང་དུས་ཀྱི་སློབ་སྦྱོང་སྐོར།སློབ་སྦྱོང་དེ་ལ་གོ་བ་འདྲ་མིན་ཡོད་ཀྱང་བསམ་ཚུལ་ཙམ་ཞིག་འགོད་པ།ང་ཚོ་བོད་པར་ཆག་བཞག་ན་ང་དགུའི་སྔོན་གྱི་ཡོངས་ཁྱབ་བོད་ཀྱི་སློབ་སྦྱོང་ལ་ངོས་འཛིན་གྱི་མེད།དེ་ལས་གཞན་གང་ཡོད་ཟེར་ན།གཙོ་བོ་མི་ལ་ཤིན་ཏུ་ནས་ཉེར་མཁོ་ཆེ་བའི་ཚན་རྩལ་གྱི་སྡེ་ཚན་ལ་གོ་དགོས།དེའི་ཞོར་དུ་ལུང་པ་གཞན་གྱི་སྐད་རིགས་ལ་ངོས་འཛིན་གྱི་ཡོད།དེ་གཉིས་གྱི་ཐོག་ནས་ཡར་ལ་འགྲོ་བ་དང་།མར་ལ་གུད་པ་གཉིས་ཀ་ཡོང་གི་ཡོད།དུས་རབས་འདི་ལ་རྒྱལ་ཁབ་དབར་གྱི་དབང་བསྒྱུར་དང་།མི་རིགས་ཕན་ཚུན་གྱི་མནར་གཅོད།སྐད་རིགས་ཁྱབ་གདལ་གྱི་བཙན་འཛུལ་སོགས་ཐམས་ཅད་ཀྱི་བྱེད་པ་པོ་ལྟ་བུར་ཆགས་ཀྱི་ཡོད།

ནགས་ཤོད་སྐལ་རྒྱན།  དེ་ཡང་འཇིག་རྟེན་འདིར་འཚོ་བའི་ཟས་སྐོམ་ནི་གསོན་རྐྱེན་ཡིན་ཡང་འཆི་རྐྱེན་དུ་ འགྱུར་བ་ཤིན་ཏུ་མང་བས་བླང་དོར་མ་ནོར་བའི་འཚོ་ཐབས་ཤིག་དགོས་མོད། ང་ཚོས་ཟས་སྐོམ་ལ་སྤྱོད་སྐབས་ཚོད་འཛིན་གང་ཡང་མི་ཐུབ་ལ་རུལ་སུངས་རྙིང་རིགས་ལ་ འཛེམ་དོགས་རྩ་བ་ནས་མི་བྱེད། དེ་བཞིན་རྫས་སྦྱོར་གྱི་ཁ་ཟས་ལ་གཟི་བརྗིད་དུ་རློམ་པས། གློ་བུར་དུ་འཆི་ལམ་དུ་བརྫངས་པ་ཉུང་ཉུང་མ་རེད། དེས་ན་རང་ཉིད་འཚོ་ས་འཇིག་རྟེན་འདིར་ཡིན་ལ་ཤི་ས་ཡང་འདིར་ཡིན་མོད། འཆི་བར་ཡོང་མེད་པས་འཆི་རྐྱེན་ཆེད་དུ་བསྟེན་མི་རུང་བ་དེ་རེད། འཆི་གསོན་གྱི་རྐྱེན་དག་ལ་རྟོག་དཔྱོད་ཡེ་མེད་པར་སྲེད་ཞེན་ཁོ་ནས་ཁྱི་ཕག་བཞིན་ གང་ཐུག་སྤྱོད་རྐྱང་བྱེད་པ་ནི་དུས་རབས་འདིར་དུད་འགྲོ་དང་འདྲ་མཚུངས་དངོས་རེད། འཆི་རྐྱེན་དག་ལ་སྙིང་རྗེ་ཅུང་ཙམ་མེད་ལ་ཚེ་སྲོག་ཀྱང་ཡིད་བརྟན་ཡེ་མེད་པས་ མྱུར་དུ་འཆི་རྒྱུ་ལས་འོས་ཅི་ཡོད། དེས་ན་རང་ཉིད་ཀྱི་ཚེ་སྲོག་ནི་ཆེས་རིན་ཐང་ལྡན་པའི་དངོས་པོ་ཞིག་ཡིན་པས་རྒྱུན་ དུ་གཅེས་སྤྲས་བྱེད་བབ་ཡོད་པ་ཡིན། ཁ་ཟས་ཀྱང་འཇུ་བདེ་དང་རན་པ་སོགས་ལུས་ཁམས་གང་འཕྲོད་བསྟེན་ནས་ལུས་སྲོག་ལ་བདག་ གཅེས་དགོས་པ་ལས་སྣང་ཆུང་དང་ལྐུགས་རྟགས་ལྟ་བུས་ཆུད་ཟོས་སུ་གཏང་མི་ཉེན་ལ་དེང་ རབས་རིམས་འགོག་གིས་ཉེན་སྲུང་ལ་ནམ་ཡང་ལྷོད་མི་ཉེན། རང་ཉིད་མིའི་རྣམ་དཔྱོད་ཀྱིས་འཇིག་རྟེན་འདིར་འཚོ་གནས་གང་ཞིག་བྱེད་ཀྱང་དུད་ འགྲོ་ལས་ཁྱད་ཐོན་པ་ཞིག་བྱ་རྒྱུ་ནི་རང་ཉིད་མི་ཡིན་པའི་འགན་འཁྲི་འཁྱེར་སྟངས་ཤིག་ཡིན། འཛམ་གླིང་གི་ས་སྒང་འདིར་སྲོག་ཆགས་གྲངས་མེད་འཚོ་སྡོད་བྱས་ཡོད་ལ་རང་རང་གིས་ འཚོ་ཐབས་གང་ཐུབ་བྱེད་པ་ནི་ཆོས་ཉིད་ལྟ་བུ་རེད།

ནགས་ཤོད་སྐལ་རྒྱན།

སྐད་འཕྲིན་ལགས་ཁྱོད་ཀྱིས་ནོར་འཁྲུལ་ཅི་ཞིག་ཤོར་བ་ཡིན་ནམ་འཁང་ར་བྱེད་མཁན་ཉུང་ཉུང་མ་རེད།

སྐབས་ལ་ལར་ལྕགས་ཐག་གིས་བསྡམས་པ་དང་མཚམས་རེར་ཐོ་བས་རྡུང་པ་སོགས་སྡིག་དམོད་བྱེད་མཁན་ཧ་ཅང་མང་། ངན་ཁག་གཡོགས་པ་ལ་དེ་བས་ཚད་དང་མཐའ་ཅི་ཡོད། མ་གཞི་སྐྱོན་རྐྱང་རྐྱང་བཙལ་ནས་མ་རྙེད་ནའང་གཞི་མེད་སྐྱོན་བརྗོད་ལ་དགའ་བའི་སྤྱི་ཚོགས་འདིས། ཁྱོད་ཀྱི་སྐྱོན་ཁོ་ན་གླེང་བ་ལས་ཡོན་ཏན་རྩ་བ་ནས་རྙེད་མེད། དེས་ན་ཁྱོད་ལ་ཡོན་ཏན་མེད་དམ་ཞེ་ན་དེ་འདྲ་མ་རེད། ཁྱོད་འཇིག་རྟེན་འདིར་སྐྱེས་ནས་འཚར་ལོང་ཁྲོད། བོད་ཀྱི་སྐད་ཡིག་དང་འགྲོགས་ནས་དགའ་བའི་རྩེད་རྒོད་དང་སྐྱོ་བའི་མིག་ཆུ་མཉམ་དུ་བཞུར་བའི་གྲོགས་པོ་ཆུང་ཆུང་ཞིག་སྟེ། ངོ་གདོང་དེར་བོད་ཀྱི་སྐད་ཡིག་ཅི་ཙམ་ཉར་ཚགས་བྱས་ཡོད། ཀ་ཁ་དང་མ་ཎིའི་དབྱངས་རྟས་མཚོན་པའི་གླུ་གར་གྱི་རྒྱ་མཚོ་དང་རིག་གཞུང་གི་ཕ་ཁྱིམ་དུ་བཞེངས་ཡོད་ལ་ལག་ཏུ་ཉར་མཁན་ཚོས་ཉིན་རེ་བཞིན་བོད་ཡིག་ལ་བཀོལ་སྤྱོད་ཅི་ཙམ་བྱེད་པ་ནི། ཁྱོད་ཀྱི་རྒྱབ་ལོགས་སུ་ཉུལ་ན་རྩོམ་ཡིག་གིས་གང་བ་ཤ་སྟག་རྙེད་ཐུབ། འདི་དག་ནི་ཁྱོད་ཀྱིས་བསྐྲུན་པའི་སྐད་ཡིག་གི་ཁོར་ཡུག་རེད། ཉེ་འགྱང་གང་དུ་འགྲོ་སྡོད་བྱས་ཀྱང་སློབ་སྦྱོང་གི་གོ་སྐབས་དང་དཔྱོད་ལྡན་པའི་བསླབ་བྱ་ལམ་སྟོན་སོགས་རིན་མེད་དང་ཚེགས་མེད་ངང་བདེ་བླག་ཏུ་ཐོབ་པ་ནི་ཁྱོད་ཀྱི་བཀའ་དྲིན་ཅིས་མ་ཡིན། ཁྱོད་དང་འབྲེལ་འདྲིས་ཆེ་བ་རྣམས་ངག་གི་སྒྱུ་རྩལ་དང་སྐད་ཡིག་ལ་ལྷག་པར་བྱང་ཆ་ལྡན། ད་དུང་བསམ་པའི་འཁྱེར་སོ་དང་། ལྟ་བའི་མིག་རྒྱང་། སེམས་ཀྱི་ཁོང་སོ་གློད་པ་སོགས་ཤུགས་རྐྱེན་ཅི་བས་ཆེ་བ་མ་ཟད། འཛེམ་ཟོན་མེད་པར་ངན་པའི་འཚང་འབྲུ་བ་དང་ཁྲམ་པའི་རྫུན་རྐུབ་བརྟོལ་བ་སོགས་བྱས་པ་ཆུང་ཆུང་ཞིག་གཏན་ནས་མ་རེད། དེས་ན་སྐད་འཕྲིན་འདིས་སྐད་ཡིག་སྲུང་སྐྱོབ་དང་དར་སྤེལ་གཏོང་བར་ཕན་ཐོགས་ངེས་ཅན་ཡོད་པ་སྨོས་ཅི་དགོས།

ནགས་ཤོད་སྐལ་རྒྱན།

ཁྱེད་ཅག་ནི་བོད་མི་རྣམས་ཆེས་དགའ་མོས་བྱ་ཡུལ་ཞིག་ཏེ།

ཁྱེད་ཅག་གི་སྙན་མོ་ངག་གི་འགྱུར་ཁུག་དང་ཡིད་འོང་ལང་ཚོའི་མེ་ཏོག་ནི་ཆེས་སྒུལ་ཤུགས་ཅན་ཞིག་རེད། རྩམ་དྲི་དང་མར་དྲི་འཐུལ་བའི་གླུ་ཚིག་དག་ཏུ་ཐུན་མིན་བོད་ཀྱི་ཁྱད་ཆོས་རྣམས་ཅི་དགར་མངོན་པ་ནི། གླུ་པ་གླུ་མ་ཁྱེད་ཅག་གི་སྟོབས་ཤུགས་སུ་གྱུར་ཡོད། ཁྱེད་ཅག་གིས་གསར་བཟོ་བྱས་པའི་གླུ་གཞས་དག་ནི་སྐར་ཆ་ཁ་ཤས་ནང་ལྟ་ཉན་བྱེད་མཁན་བརྒྱ་སྟོང་ཁྲི་འབུམ་དུ་ཟིན་ཚོད་འདུག་པས། ད་ཆར་གླུ་གཞས་ནི་བོད་མིའི་སྤྱི་ཚོགས་སུ་ཁྱབ་ཚད་ཆེ་ཤོས་དང་མགྱོགས་ཚད་མྱུར་ཤོས་མ་ཟད། སེམས་ཁམས་སུ་ཐིམ་ཚད་མཐོ་ཤོས་སུ་ངོས་འཛིན་བྱེད་ཆོག །སྤྱིར་བཏང་གླུ་གཞས་ནི་དགའ་སྤྲོའི་ཆ་ལག་ལྟ་བུ་ཡིན་མོད། བོད་ཀྱི་གླུ་གཞས་ནི་མི་རིགས་ཀྱི་ལྟ་གྲུབ་དང་། རིག་གཞུང་གི་ནང་སྙིང་བཞུར་བའི་ཉིང་ཁུ་ལྟར་རང་བཞིན་གྱི་ནུས་སྟོབས་ཤིག་མངའ་བ་ནི་སྤོབས་པ་དང་གཟི་བརྗིད་ཅིས་མ་ཡིན།  འོན་ཀྱང་གླུ་གཞས་ཀྱི་རིན་ཐང་ནི། སྤྱི་ཚོགས་སུ་གདེང་འཇོག་ཅི་ཙམ་ཐུབ་མིན་རག་ལས་པས། དབྱངས་དང་ཚིག་སོགས་གསར་བཟོ་དགོས་པ་སྨོས་མེད་ཀྱང་། གཞན་གྱི་ལད་ཟློས་རྐྱང་རྐྱང་བྱེད་པའི་གླུ་མཁན་དག་ནི།  ངག་ཚིག་ཅི་ཙམ་ཡག་ཀྱང་གཞན་ནས་བརྐུས་པ་དང་བཤུས་པ་ཞིག་ཡིན་ཕྱིན། ཁྱོད་ལ་གདེང་འཇོག་ཚད་ལྡན་ཞིག་བྱེད་ཐབས་བྲལ་འདུག །རྒྱུ་མཚན་ནི་རང་གི་རྩོམ་དེབ་ཏུ་གཞན་གྱི་རྩོམ་ཡིག་དཔར་བཤུས་བྱས་པ་དང་ཀུན་ནས་མཚུངས་པས་རེད། ཁྱོད་ཚད་ལྡན་གྱི་གླུ་མཁན་ཞིག་འདོད་ན་ནམ་ཡང་གཞན་གྱི་གཟུགས་བརྙན་དུ་ལང་མི་རུང་བ་ཡིན་མོད། གང་མང་ཞིག་གཞན་གྱི་གཟུགས་བརྙན་དུ་ལངས་ནས་གླུ་མཁན་དུ་རློམས་པ་ནི། རང་གི་ནུས་སྟོབས་ཆེད་དུ་མི་མངོན་པར་བྱེད་པ་དང་ཀུན་ནས་མཚུངས་འདུག །དེས་ན་གནས་དུས་དང་འཚམས་པའི་དབྱངས་དང་ཚིག་རང་ལུགས་ཡོད་པ་ཞིག་བཟོས་ན། ད་གཟོད་གླུ་མཁན་ཞིག་གི་སྤོབས་པ་དང་གཟི་བརྗིད་ཅིས་མ་ཡིན།།

༢༠༡༦/༡༠/༧

ནགས་ཤོད་ལྷ་རབས་དགེ་བཤེས་བློ་བཟང་ཕུན་ཚོགས།

གོ་ལ་ཡི་འཇིག་རྟེན་འདི།། འོ་ཅག་ཚོའི་ཁྱིམ་གཞིས་ཏེ།།
ཚེ་སྲོག་གི་འཚོ་གནས་དང༌།། བདེ་སྐྱིད་ཀྱི་འབྱུང་ཁུངས་ཡིན།།

སྤང་ཁ་ལ་གཅེས་སྲུང་དང༌།། ཤིང་ནགས་རིགས་འདེབས་འཛུགས་གནང༌།།
ཡིད་དབང་གི་འཇིག་རྟེན་འདིའི།། ཁོར་ཡུག་ལ་གཅེས་སྐྱོང་གྱིས།།

ལྗོན་ཤིང་གི་ང་ཚོ་ལ།། སྲོག་དབུགས་ཀྱི་དྭངས་མ་སྦྱིན།།
རང་བྱུང་གི་གནོད་འཚེ་འགོག །   བག་ཕེབས་ཀྱི་སྤྲོ་སྣང་སྟེར།།

ནགས་ཤོད་སྐལ་རྒྱན།

མི་ལ་མཁོ་བའི་བསླབ་བྱའི་གདམས་ངག་འདི།།
མི་ཆོས་གསལ་བའི་དང་ཤེལ་མེ་ལོང་ཡིན།།
མི་སྡུག་སྡུག་པའི་གཟུགས་བརྙན་སྣ་ཚོགས་ཀུན།།
གསལ་བར་མཐོང་འདོད་ཅན་ལ་མདོ་ཙམ་སྤེལ།།

དེ་ཡང་དམ་པའི་ལྷ་ཆོས་དང་འཇིག་རྟེན་མི་ཆོས་སྟོན་པའི་བསླབ་བྱའི་གནས་དག་ནི། དམ་པ་རྣམས་ཀྱི་ཐུགས་ཀྱི་ཉིང་ཁུ་ཕྱུངས་པ་ལྟ་བུ་ཡིན་པས་མི་ཚེ་དོན་ལྡན་འདོད་པ་དག་གིས་ཅི་ནས་ཀྱང་བསླབ་དགོས་པ་ཡིན་ནོ། དམ་པའི་ལྷ་ཆོས་ལས་བསླབ་བྱའི་གནས་དག་ལེགས་པར་སྟོན་མོད་སྐབས་འདིར་མི་འཆད། འཇིག་རྟེན་མི་ཆོས་སྟོན་པའི་བསླབ་བྱ་མང་པོ་ཡོད་པ་ལས་སློབ་དཔོན་ཁོང་ཙིའི་སློབ་མའི་བསླབ་བྱ་འདི་ནི་ཚིག་ཚོགས་ཆུང་ལ་དངོས་དོན་འཇིག་རྟེན་འདིར་དགོས་མཁོ་ཤིན་ཏུ་ཆེ་བ་ལྟ་བུར་འདུག་པ་ནི་བཤད་པའི་ཆོས་སོ།། འདི་འཆད་པ་ལ་གསུམ། བཤད་པ་ལ་འཇུག་པ་དང་། བཤད་པ་ཉེ་བར་དགོད་པ། བཤད་པ་ཡོངས་སུ་རྫོགས་པའི་ཚུལ་ལོ། དང་པོ་ནི།

ནགས་ཤོད་ནི་ཚོ་པ་དགུ་ལས་གྲུབ་པ་ཞིག་ཡིན། ནགས་ཤོད་ཚོ་དགུ་ནི། འབྲི་རུ།སྟག་དྲུག །བོམ་ཕན། ཁྲ་རིང༌། འགོམ། རཀྵི། ན་རོག །བུ་རྫུམ། སེན་ཚ་བཅས་ལ་ནགས་ཤོད་ཚོ་དགུ་ཞེས་འབོད། ཚོ་པ་སོ་སོའི་སྡེ་ཤོག་མང་ཉུང་ཅི་རིགས་ཡོད། འབྲི་རུ་ཚོ་པ་ལ་འབྲི་རུ་ཤོག་བཞི་ཡོད་པ་ནི། བསྐྱར་རྒྱུད་〔ཅང་རྒྱུད་〕ཤོག་ཁ། ཆུང་རྒྱུད་ཤོག་ཁ། ཉི་མ་ཤོག་ཁ། ལུང་རྒྱུད་ཤོག་ཁ་བཅས་ལ་ཤོག་བཞི། སྟག་དྲུག་ཚོ་པ་ཤོག་གསུམ་ཡོད་པ་ནི། ཁྱུང་ཁྲའི་ཤོག །རྩེ་ མགོ་ཤོག གིལ་པ་ཤོག་དང་གསུམ། བོམ་ཕན་ཚོ་པ་ལ་ཤོག་གསུམ་ཡོད་པ་ནི། ནགས་རོང༌། ལ་གོང༌། ལྕི་བ་ཤོག་བཅས་གསུམ། ཁྲ་རིང་ཚོ་པ་ལ་ཤོག་བཞི་ཡོད་པ་ནི། སྒུར་སྟོད། སྒུར་སྨད། ཀ་རོང༌། ཁ་རེ་ཤོག་བཅས་བཞི། འགོམ་ཚོ་པ་ལ་འགོམ་སྡེ་ལེང་དྲུག་ཡོད་པ་ནི། སྨྲི་ཐི་ཉུང་དཀར། ཆུ་སྲིབ། དཀར་གཞུང༌། ཉང་ཁུ་གཞུང༌། འོམ་མཐའ། ཡུལ་གྲོང་སྡེ་བཅས་ལེང་དྲུག།རཀྵི་ཚོ་པ་ལ་སྟོད་ཤོག་དང་སྨད་ཤོག་བཅས་ཁག་གཉིས་ཡོད། ན་རོག་ཚོ་པ། འདིའི་སྐོར་ནགས་ཤོད་འབྲི་རུའི་ལོ་རྒྱུས་ལས། ན་རོག་ཚོ་པ་ཞེས་པ་ནི་ཚོ་དཔོན་འགོ་དཔོན་སྒེར་འཐོབ་སྦེ་ཅང་ཞེས་པ་ལས། སྦེ་ཧུ་ཞེས་མེད་པ་རེད་གང་ཡིན་ཟེར་ན༌། ན་རོག །བུ་རྫུམ། སེན་ཚ་བཅས་ཚོ་ཤོག་དེ་རྣམས་སྐབས་དེར་ཚོ་གནས་ཆུང་ཆུང་དང་མི་གྲངས་ཉུང་ཉུང་ཞིག་ཡིན་ པར་བརྟེན་ཚོ་ཤོག་འགོ་དཔོན་རྣམས་ལ་སྒེ་ཐོབ་སྦེ་ཅང་ཟེར། ན་རོག་ཚོ་སྡེ་བརྒྱ་མགོ་བརྒྱད་ ཅེས་པ་དང༌། ཞེས་གསལ། བུ་རྫུམ་ཚོ་པ་ལ་མཐའ་ལྔ་དབུས་བཅུ་ཞེས་སྡེ་གང་སར་གྲམ་ནས་ཡོད་པ་སྟེ། ལྷ་རི་དང༌། རྒྱ་སྟོང་ལྡིང་དགུའི་ཁོངས། སྔོད་ཨ་ལ་ཅ་གོང་བརྒྱུད་དུ་ཡོད་པ་མ་ཟད། སྒེར་སྡེ་མགོ་བཏགས་ཀྱི་སྡེ་ཀོང་པོ་བྲག་གསུམ་དང༌། ཉི་ཁྲིའི་བརྒྱུད་བཅས་ཡོད།

གནའ་དུས་ནས་དམངས་ཁྲོད་དུ་དར་རྒྱས་ཡོད་པའི་རོལ་དབྱངས། གླུ། སྒྲུང་གཏམ། གཏམ་དཔེ། གཞས། ཞབས་བྲོ། སྒོར་གཞས། གཞས་ཤགས། འབྲས་དཀར། དགོད་བྲོའི་གཏམ་གླེང་སོགས་ནགས་ཤོད་སྟོད་སྨད་བར་གསུམ་དུ་གྲ་རྒྱས་ཕུན་སུམ་ཚོགས་པ་ཡོད། ལྷག་པར་དུ་གཡུ་གོང་དང་སྦྱིན་ཆེན། མོ་བ་གསུམ་གྱི་གཞས་ཞེས་སྔ་དུས་སུ་གྲགས་པ་ཆེ། ལུང་པ་འདིའི་ནང་རས་པའི་སྒྱུ་རྩལ་དུས་གང་གི་ཚེ་དར་བ་བཤད་ཚོད་དཀའ་ཡང༌། ཆ་ལག་ཡོངས་སུ་ཚང་བ་གྲ་རྒྱས་ཕུན་སུམ་ཚོགས་པ་བོད་ཡོངས་སུ་སྐད་གྲགས་ཡོད་པའི་སྟེང་དཀར་རས་པ་དང༌། སྦྱིན་ཆེན་རས་པ། མོ་བ་རས་པ་གསུམ་ཁྱབ་བདག་སྟག་ཕུ་པ་སྐུ་ཕྲེང་ལྔ་པ་གར་དབང་བློ་བཟང་ཆོས་ཀྱི་དབང་ཕྱུག་གིས་སྲོལ་གཏོད་གནང་བ་ལས་བྱུང༌། གོང་གི་རས་པ་གྲོང་ཁག་གསུམ་ལས་ད་སྐབས་སྟེང་དཀར་རས་པ་དངོས་སུ་མཐོང་རྒྱུ་ཡོད། རས་པའི་སྒྱུ་རྩལ་ནང༌། ནང་པའི་ཆོས་དང་འབྲེལ་བའི་རིག་གཞུང་དང་དམངས་ཁྲོད་ཀྱི་སྒྱུ་རྩལ་ཕུན་སུམ་ཚོགས་པའི་ཉིང་ཁུ་བསྡུས་ཡོད། རས་པའི་འཁྲབ་ཚན་གྲངས་སུམ་ཅུ་སོ་གྲངས་ལྷག་ཡོད་པ་ནི་འདི་ལྟར་སྟེ། ༡ རྔ་འུར་རྡུང༌། ༢ མ་ཎིའི་སྐུལ་འདོན། ༣ ས་འདུལ་གོང་འོག ༤ ས་འདུལ་ཕྱོགས་བཞིའི་འདུལ་རྡུང༌། ༥ཇ་མཆོད། ༦ཆོས་རྒྱལ་ནོར་བཟང༌། ༧བྲམ་ཟེ། ༨རྐང་མགྱོགས། ༩ཀླུ་རྒྱལ།༡༠སྔགས་པ། ༡༡སྲིད་པའི་ཕ་མ་རྒན་ཁོག ༡༢དྲང་སྲོང་ལྷ་མོ། ༡༣དྲང་སྲོང་ཧ་རི་ནག་པོ། ༡༤ཆོས་རྒྱལ་ནོར་བཟང་གིས་བྱང་གི་མི་རྒོད་འདུལ་བ།

བོད་སྤྱི་མཚུངས་བཞིན་རྟ་དྲེལ་མཛོ་གཡག་ལ་བརྟེན་ནས་ཡུལ་འབྲོག་བར་དང༌། ཚོང་འགྲུལ། ཚྭ་ལེན། དབྱར་དགུན་གྱི་མཚེར་ས་སྤོ་འཇོག །ཁྲལ་རྒྱུག་འུ་ལག་སོགས་ཅི་དང་གང་དགོས་ཀྱི་སྐྱེལ་འདྲེན་རྣམས་སྐམ་སར་སྟབས་བདེའི་ངང་སྒྲུབ་ཐུབ་པ་དང༌། དེ་མིན་ཆུ་ཆུང་ལ་ཟམ་པ་དང་ཆུ་ཆེན་ལ་དབྱར་དུས་སུ་འདྲེང་དང༌། ཀོ་གྲུ །དགུན་ཁར་དར་ཐོག་བཅས་ནས་སྐྱེལ་འདྲེན་བྱེད་ཀྱི་ཡོད། སྡོད་གནས།ས་ཁུལ་འདིར་མཐོ་སར་འབྲོག་ཁུལ་དང༌། དམའ་སར་ཞིང་ཁུལ་ཡིན་པས་དེ་གཉིས་ལ་ཡུལ་འབྲོག་གཉིས་ཞེས་འབོད། ཞིང་གྲོང་ཁུལ་དུ་གྲོང་དང་གྲོང་གསེབ་ཏུ་སྡོད་གནས་ཁང་པ་ཡིན་པ་དང་འབྲོག་ཁུལ་གྱི་སྡོད་གནས་དགུན་དུས་སུ་ཕལ་ཆེར་ཁང་པ་དང༌། དབྱར་དཔྱིད་སྟོན་གྱི་དུས་ཚིགས་སོ་སོར་འཁོས་འབྱོར་ཆེ་ཆུང་བཞིན་སྦྲ་གུར་ཆེ་ཆུང་སྤྱི་རིགས་པ་ཡོད།

རྩོམ་ཡིག་འདི་ཐེངས་ 9196 བཀླགས་འདུག

མིང་ལ་འདོད་རྒྱལ་དང་རྗེས་གྲུབ་གཉིས་ཡོད་པ་ལས་རྒྱུ་མཚན་ལ་ལྟོས་པའི་རྗེས་གྲུབ་ཏུ་བརྡ་བྱས་པ་ཞིག་ཡིན་ཏེ།   ཁོ་ར་འཁོར་ཡུག་ནགས་ཚལ་སྟུག་པོའི་ཚང་ཚིང་ཀུན་ཏུ་འཁྲིགས་ཤིང་རྩི་ཤིང་སྨན་རིགས་ཀྱི་དྲི་བསུང་རྣམ་པར་འཐུལ་བའི་ནགས་ཡིན་པས་ནགས་ཞེས་དང༌། རོང་གཞི་ས་བབས་དམའ་བའི་གཤོངས་སམ་ཤོད་ཡིན་པས་ཤོད་ཅེས་འབོད།

དཔེར་ན་ཐོག་རིམ་གསུམ་གྱི་ཁང་པ་ལ་སྟེང་ཤོད་བར་གསུམ་ཞེས་དང༌། དེ་བཞིན་རྩེ་ཤོད་ཅེས་རི་ཡི་གཤམ་ལ་ཤོད་ཅེས་འབོད། གོང་གི་ནགས་དང་ཤོད་གཉིས་བསྡོམས་ནས་བར་གྱི་ཚིག་སྣ་བསྡུས་པས་ནགས་ཤོད་ཅེས་པའི་ཐ་སྙད་འདི་གྲུབ། སྤྱིར་ནགས་ཤོད་འདི་ལ་མིང་གི་རྣམ་གྲངས་ལྟ་བུའི་ཐ་སྙད་སྣ་ཚོགས་པ་ཞིག་ཡོད་པ་ནི། བར་གྱི་དཔའ་སྡེ་ནགས་ཤོད་ཅེས་དང༌། ནགས་ཤོད་སྟོང་བུ་ཆུང་ཞེས་དང༌། སྦས་ཡུལ་ ནགས་ཤོད་སྨན་ལྗོངས་ཞེས་དང༌། བཀྲ་ཤིས་ནཌ་ཀླུང་འབབ་པའི་ཡུལ་གྱི་ཤོད་ཅེས་དང༌། ནགས་ཤོད་སྨན་ལྗོངས་ཕྱུག་མོ་ཞེས་དང༌། ནགས་ཤོད་སྦས་ཡུལ་ལྗོངས་ཞེས་དང༌། བཀྲ་ཤིས་ ནགས་ཀླུང་སྟུག་པོ་བཀོད་པའི་ཡུལ་གྱི་ཤོད་ཅེས་དང༌། ནགས་ཤོད་འབྲི་ལྗོངས་ཕྱུག་མོ་ཞེས་ སོགས་ཟུར་རྒྱན་གྱི་མཛེས་ཆོས་དུ་མ་དང་ལྡན་པའི་ནགས་ཤོད་ཅེས་པ་འདི། ཆབ་སྲིད་ གྱི་འཕོ་འགྱུར་དང༌། དུས་རབས་ཀྱི་འགྱུར་འགྲོས་གང་གིས་དབང་བསྒྱུར་འོག་མ་ཚུད་པར་ ནགས་ཤོད་ཅེས་པའི་ཐ་སྙད་འདི། གྲ་མ་ཉམས་གྲུ་མ་ཞིག་པར་བོད་བཙན་པོའི་དུས་རབས་ ཀྱི་སྔོན་ནས་དུས་ད་ལྟའང་གསོན་པོར་གནས་ཐུབ་པ་ནི་ནགས་ཤོད་པས་ངོམས་ཆོག་པའི་རིན་ཐང་དང་གཟི་བརྗིད་ཀྱང་ཡིན་ནོ། །