དང་པོ་ཡར་ཐོན་མེད་པའི་ང་ཚོ་ལ་ཆ་བཞག་ན།བོད་ཟེར་དུས་དང་པོ་ནས་སྐྱོ་བོ་གཞན་གྱིས་དབང་སྒྱུར་བྱེད་ཆོག་ཆོག་དང་།མི་ཡི་བྲན་གཡོག་རྒྱུག་ཆོག་ཆོག་དེ་འདྲ་ཞིག་མ་རེད།ཆོས་རྒྱལ་མེས་དབོན་རྣམ་གསུམ་སྐབས་སུ་རང་ས་རང་བདག་ལོས་ཐུབ།ད་དུང་གཞན་གྱི་ལུང་པར་བཙན་འཛུལ་བྱེད་མྱོང་ཡོད།རྗེས་སུ་ཀླད་རྙིང་མཁྲེགས་བཟུང་དང་ཆོས་ཀྱི་གནས་ལུགས་དངོས་མ་ཤེས་པས་ལྷ་སྒྲུང་ཀླུ་སྒྲུང་གི་དུས་ལ་ཡོལ་ནས་གནས་བབས་འདི་ཆགས་པ་རེད།

གཉིས་པ་མི་རིགས་དབར་གྱི་མནར་གཅོད་ནི།ཆེ་ས་རང་ཡུལ་རང་དབང་མེད་པས་འུ་ཐུག་ཐབས་ཟད་ཀྱིས་འཆི་བ་སྲོག་ལ་ཡང་མི་འཇིགས་པའི་བྱ་སྤྱོད་ལག་བསྟར་བྱ་དགོས་ཆགས་ཀྱི་ཡོད།ཆུང་ས་ལུང་པ་མེད་པའི་མི་རྣམས་ནི་རང་འགུལ་གྱིས་སྔོན་ཐོན་རྒྱལ་ཁབ་ཀྱི་བྲན་གཡོག་རྒྱུག་ས་རག་ན་མི་འཇོན་པོར་ངོས་འཛིན་དགོས་པ་ཆགས་ཡོད།དེའི་མཇུག་འབྲས་མི་རིགས་རྩ་མེད་ཀྱི་བྱ་སྤྱོད་མཐའ་ཁྱོན་མུ་མེད་འབྱུང་གི་ཡོད།ད་ལྟའི་ཆར་བོད་པ་ཚོ་དེ་ལྟ་བུའི་ཉམས་མྱོང་ཕུན་སུམ་ཚོགས་པོ་མིག་ལྟོས་རྙེད་དུ་མེད་པ་ཞིག་ཆགས་ཡོད།

གསུམ་པ་སྐད་རིགས་ཁྱབ་གདལ་གྱི་བཙན་འཛུལ་ནི།ང་ཚོ་ཡུལ་ཕྱོགས་གང་སར་རང་ཡུལ་དང་རང་དབང་མེད་པས་རང་འདོད་ཀྱིས་བྲན་གཡོག་བརྒྱུགས་ནས་ཕ་མ་བོད་པ་ཡིན་ཡང་བུ་ཕྲུག་གིས་བོད་ཡིག་འབྲི་ཀློག་ཕར་ཞོག།རང་སྐད་གཙང་མ་རྒྱག་མི་ཐུབ་པའི་གནས་བབས་ལ་གཟིགས་ན་དཔོག་ནུས།ད་དུང་སྐད་རིགས་བཙན་འཛུལ་བྱེད་སྟངས་ཤིག་ལ།དེང་དུས་ཀྱི་སློབ་སྦྱོང་མེད་པས་སོ་སོས་ཅ་དངོས་གསར་པ་སྣེ་གཅིག་བཟོ་སྐྲུན་མི་ཐུབ།གཞན་གྱིས་གསར་བཟོའི་དངོས་པོ་ལ་ལུང་པ་དེའི་སྐད་ཀྱི་མིང་ཚིགསོ་སོའི་ཡུལ་སྐད་དང་མཐུན་པ་ཡིག་གཟུགས་སུ་འགོད་མ་ཐུབ་ཚེ་བརྗོད་བདེ་མེད་པའི་དཀའ་ངལ་ནི་རྒྱུན་ལྡན་གྱི་ཚོར་བ་ཞིག་རེད། སྡེ་ཚན་གཉིས་པ་ཞོར་འཕྲོས་ནི།ད་དུང་གཞན་གྱིས་ཡར་རྒྱས་གཏོང་སྟངས་སོགས་དཔྱད་ཞིབ་བྱེད་རྒྱུ་དེ་དེང་དུས་ཀྱི་སློབ་སྦྱོང་ལ་ངོས་འཛིན་གྱི་ཡོད།གཞན་གྱི་སྐད་རིགས་མ་ཤེས་ན་དེ་དང་དེའི་རྣམ་དཔྱོད་བེད་སྤྱོད་གཏོང་སྟངས་ལ་དཔྱད་ཞིབ་ཟེར་བ་ནམ་མཁའི་མེ་ཏོག་རེད།གཞན་གྱིས་ལས་ཀ་བྱེད་སྟངས་སྐོར་ལ་ཉམས་ཞིབ་གཏན་ནས་མ་བྱེད་ན།བོད་ཀྱི་མི་དྲག་ཁ་ཤས་ཀྱིས་དམག་ཆེན་གཉིས་པ་མཇུག་བསྒྲིལ་ནས་དུས་བདེ་ལྷིང་འཇགས་ཟིན་སྐབས།དམག་འཁྲུག་དེ་ག་དུས་ལོང་ཡོང་ལབ་རབས་ཡང་ཡོད།མ་ཟད་བོད་པས་མཉམ་སྦྲེལ་རྒྱལ་ཚོགས་རྐུབ་སྟེགས་རག་དང་མ་རག་སྐོར་གཏམ་དཔེ་མང་པོ་ཡོད།

གཉིས་པ་དེང་དུས་ཀྱི་སྐད་ཆ་ཤོད་སྟངས་ནི།གནད་གཅིག་རེད།ང་ཚོའི་སྤྱི་ཚོགས་ནང་ལ་སྐད་ཆ་སྙན་པོ་ཤོད་མི་ཤེས་མཁན་གྲངས་ཀྱིས་ལོང་གི་མེད།དེ་ནི་ནོར་འཁྲུལ་རེད།སོ་སོ་འགྲིམ་འགྲུལ་དང་སྡོད་གནས་ག་པར་ཡིན་ཡང་མི་དང་སྐད་ཆ་ཤོད་སྐབས་ཚིག་སྙན་པོ་བེད་སྤྱོད་དགོས།དེའི་འབྲས་བུ་གཞན་གྱིས་རང་ལ་དགའ་བོ་དང་སུས་མཐོང་ན་ཡང་དེ་དང་མཉམ་དུ་འགྲོ་སྡོད་དགའ་བོ་བྱེད་ཀྱི་ཡོད།མཐཪ་གཏུགས་ན་སོ་སོའི་ཁེ་བཟང་རང་ཡིན།རིགས་ཅིག་གིས་མི་སུ་ཡིན་ལ་གཏམ་སྡུག་པའི་རིགས་མ་གཏོགས་གཏན་ནས་ཤོད་ཀྱི་མེད།

མཐར་སོ་སོ་གཅིག་པུ་གྲོགས་མེད་ཁེར་རྐྱང་ལྷག་ཀྱི་ཡོད།དེ་ནི་སོ་སོས་བྱས་པའི་འབྲས་བུ་རེད།གནའ་སྔ་མོ་ཡིན་ན།སྐད་ཆ་རྫིག་པོ་དང་སྐད་སྦོམ་པོ་བརྒྱབ་ན་ལུང་ཁུག་གི་མི་དེ་ཚོ་ཞེད་སྣང་ཡོང་གི་ཡོད།དེ་རིང་ཁ་སང་དུས་ཚོད་དེ་རྫོགས་ཚར་བ་རེད།ད་དུང་མི་རིགས་གཅིག་གིས་ལུང་ཁུག་གི་ལྟ་གྲུབ་རྒྱབ་ཏུ་ཁུར་ནས་ཁོ་རེ།གཅིག་གཅིག་ཟེར་ནས་མིག་དེ་ཚོ་ལྟ་སྟངས་མི་འདྲ་བ་ཞིག་བྱེད་ཀྱི་ཡོད།རྣམ་དཔྱོད་ཡོད་རིགས་ཚོས་མཐོང་དུས་གད་མོ་ཤོར་གྱི་རེད།དོན་དངོས་ཀྱི་བློ་ཁོག་ཡོད་ན།དང་པོ་སློབ་སྦྱོང་བྱེད་པ་ལ་སྙིང་རུས་དགོས་པ།གཉིས་པ་བྱ་གཞག་བསྒྲུབ་པ་ལ་ཐུབ་སེམས་ཀྱི་སྤོབས་པ།གསུམ་པ་མི་མང་དཀྱིལ་དུ་སོ་སོའི་ལྟ་གྲུབ་ཕྱི་ལ་སྟོན་ཐུབ་པའི་གཏམ་བཤད་ནུས་པ།བཞི་པ་བྱ་བ་ཆེ་ཕྲ་ག་འདྲ་ཡིན་ཡང་འཇུ་ཕོད་པ་ཞིག་ཚང་ན་བློ་ཁོག་རེད།གཞན་མ་གཏོགས་གཏམ་ཚིག་གསུམ་ལབ་ལོན་མེད་པར་གྲི་འགོ་ཕུར་བ་དང་།དོན་ཆེ་ཆུང་མེད་པར་ཕུ་ཐུང་རྫེ་བ་སོགས་བྱེད་པ་ནི།མི་ཡི་གཟུགས་ལ་ལུག་གི་རྣམ་ཤེས་རང་ཆས་སུ་ཆགས་པ་རེད།

ས་བཅད་གསུམ་པ་རགས་རིམ་ཙམ་ཞིག་ཤོད་འདོད་ཀྱང་།དུས་དེབ་འདི་སྡེ་ནགས་ཤོད་འབྲི་རུའི་་སློབ་གཉེར་བ་ཀུན་གྱིས་ཐོབ་ཐང་ལེན་སའི་ཁུལ་ཡུལ་ཡང་དག་ཅིག་ཡིན་པས།མི་གཅིག་གིས་ཧམ་སེམས་ངོམས་མེད་ལོངས་སུ་སྤྱོད་རྒྱུ་དེ།ནོར་བ་ཡིན་པ་ངོས་འཛིན་ཐུབ་སོང་།

༡ དྭངས་གཙང་ལྷད་མེད་བོད་དོན་སྙིང་ལ་བསྐྱངས།།
༢ བཀའ་དྲིན་བརྗོད་མེད་མེས་པོའི་རྒྱུན་འཐུད་ཆེད།།
༣ ཐབས་ཇུས་ཕུལ་བྱུང་དུས་དེབ་ལས་ལ་རོལ།།
༤ ནགས་ལྷའི་སྒྲོན་མེའི་རྩོམ་སྒྲིག་པ་རྣམས་བསྟོད།།

༡ རང་ཡུལ་བྲལ་བའི་སྤུན་གྲོགས་ཚོས།།
༢ སོང་དང་ཤི་གཉིས་ཁྱད་ཤེས་ཆེད།།
༣ དུས་དེབ་གསལ་བའི་མེ་ལོང་ཐོག།།
༤ སྣག་ཚའི་ཐིགས་པ་བརྒྱབས་པ་ལེགས།།