Wed 26 Jul 2017
ཟླ་བར་བཏགས་པའི་འབོད་སྒྲ་སྙི་མོ།
ནགས་ཀྱི་ཤིང་ལོ་ནས།
གསེར་མདོག་རྒྱ་ཕིབས་ཉི་མའི་འོད་དང་འདྲེས།།
འཁའ་རུ་འགྱིངས་པའི་རི་དྭག་ཆོས་འཁོར་མཛེས།།
སྣ་ལྔའི་མཚོན་ལྡན་ཆོས་དར་ལྷབ་ལྷུབ་གཡོ།།
གཡས་གཡོན་ཤིང་ལོའི་གསེང་ནས་བྱ་བྱིའུ་འགྱུར།།
རབ་མཛེས་བཀོད་ལེགས་ཡིད་འོང་གཙུག་ལག་ཁང་།།
རབ་བརྗིད་འཁར་རྔའི་སྒྲ་དབྱངས་རྣ་བར་ལྷུང་།།
རབ་ཡངས་བྱེས་ཀྱི་གྲྭ་ཚང་ཆོས་ར་ན།།
རབ་དམར་འདུས་པའི་ཚོགས་ཀྱིས་ཡོངས་སུ་བཀངས།།
ཡོད་པ་མེད་པར་སྒྲུབ་པའི་ཁ་ཕོ་མེད།།
མེད་པ་ཡོད་པར་ལྟ་བའི་དམ་བཅའ་མེད།།
ཡོད་མེད་འཐའ་ལས་བྲལ་བའི་གནས་ལུགས་དངོས།།
ལུང་རིགས་དྲི་མ་མེད་པས་གཏན་ལ་འབེབ།།
སྔ་རྒོལ་ཁས་ལེན་བྲག་གི་རི་བཞིན་སྲ།།
ཕྱི་རྒོལ་རིགས་པ་གློག་གི་འཁྱུག་ལས་མྱུལ།།
རྩོད་ལན་གཞུང་གི་བློ་སྐྱེད་ཆེ་ན་ཡང་།།
འཁྱམ་པོའི་སེམས་པ་རེ་ཞིག་མཁའ་རུ་ཤོར།།
མཚན་རླུང་འཇམ་པོའི་རེག་བྱའི་བར་གསེང་ནས།།
ཤར་གྱི་ཐིག་ལེའི་འོར་གུར་ཕུབ་པའི་དུས།།
སེམས་ཀྱི་གཤོག་པ་ཐད་དུ་རྐྱོང་བཞིན་དུ།།
སྐར་མའི་གསེང་དུ་ལྷོད་ཀྱིས་འཕུར་ནས་འགྲོ།།
སྤྲིན་དང་རླུང་བུའི་རྒྱུ་ཕྱོགས་དེ་ཡི་འོག །
སུ་དང་གང་གི་རྟོགས་སུ་མེད་པ་ཡི།།
རྒྱང་བཞུད་ཚོར་བའི་ཁ་དོག་སྙི་མོ་དེ།།
མཚན་མོའི་ཟླ་བའི་གཟུགས་སུ་འཁྱུད་ནས་ཡོད།།
མཁའ་རུ་ཤར་བའི་ཟླ་བའི་འོད་དཀར་དེ།།
བྱམས་ལྡན་མ་ལོའི་འཛུམ་ཞལ་ཡིན་ན་སྙམ།།
ཟླ་གཟུགས་འོག་གི་རྣམ་ཤེས་དམར་པོ་འདི།།
ཨ་མར་དུངས་བའི་ཚོར་བ་གསོན་པོ་ཞིག །
ལྡུམ་རའི་ནང་གི་ཆུ་སྐྱེས་ཀུ་མུད་དེ།།
ཁེར་རྐྱང་འཚོ་བའི་འཁྱམ་པོ་ཡིན་ན་སྙམ།།
འདབ་མར་ཕོག་པའི་ཟླ་བའི་འོད་ཐིགས་འདི།།
བྱམས་ལྡན་ཨ་མས་བརྩེ་བའི་ཁ་དོག་ཅིག །
ཟླ་འོད་མཁའ་རུ་ཤར་བའི་མཚན་ལྗོངས་སུ།།
ཁེར་རྐྱང་ཨ་མ་དྲན་པའི་དུང་བ་འདི།།
ཟླ་བའི་འོད་ལ་བཏགས་ནས་བསྐུར་ཡོད་པས།།
བྱམས་ལྡན་མ་ལོ་ཁྱེད་ཀྱིས་ཨེ་ཚོར་ལགས།།
སྡེ་ཚན།
སྙན་རྩོམ།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
