Fri 14 Jul 2017
མ་ཁྱོད་དྲན།
ལམ་བཟང་པོས།
ལང་ལོང་སྤྲིན་པ་འཕྱུར་བའི་ཉིན་མོ་དེར།།
ཤག་ཤག་ཆར་པ་འབབ་པའི་ཉིན་མོ་དེར།།
བསིལ་བསིལ་རླུང་བུ་ལྡང་བའི་ཉིན་མོ་དེར།།
ཁང་ཆུང་གྲུ་བཞིའི་ནང་ནས་མ་ཁྱོད་དྲན།།
ཉི་མ་སྤྲིན་གསེབ་ཡིབ་པའི་ཉིན་མོ་དེར།།
ཟླ་བ་ཁྲུས་ལ་བྱོན་པའི་ཉིན་མོ་དེར།།
སྐར་མ་ཁོག་འདར་ཞུགས་པའི་ཉིན་མོ་དེེར།།
ལྗོན་ལོ་སེར་པོའི་འོག་ནས་མ་ཁྱོད་དྲན།།
ཀྱག་ཀྱོག་ལམ་བུར་སྐྱོད་པའི་ཉིན་མོ་དེར།།
ཁེར་རྐྱང་གོམ་སྒྲ་ཉན་པའི་ཉིན་མོ་དེར།།
འཚོ་བའི་དཀའ་སྡུག་བགྲང་པའི་ཉིན་མོ་དེར།།
ས་མཐའི་གྲུ་ཁ་ཞིག་ནས་མ་ཁྱོད་དྲན།།
འདས་པའི་ལོ་རྒྱུས་ཀློག་པའི་ཉིན་མོ་དེར།།
ད་ལྟའི་གནས་བབ་གླེང་བའི་ཉིན་མོར་དེར།།
མ་འོངས་འཆར་སྣང་འབྲི་བའི་ཉིན་མོ་དེར།།
དཔེ་དེབ་ཆུང་ཆུང་ངོས་ནས་མ་ཁྱོད་དྲན།།
དྲན་གདུང་དབྱངས་རྟ་འཐེན་པའི་ཉིན་མོ་དེར།།
གྲིབ་སོ་རྒྱང་དུ་འགུགས་པའི་ཉིན་མོ་དེར།།
ཕ་ཡུལ་མིག་སྔར་སྣང་བའི་ཉིན་མོ་དེར།།
རྐང་ལམ་སྐྱ་བོའི་ཐོག་ནས་མ་ཁྱོད་དྲན།།
ཨ་མའི་གསུང་སྐད་མ་ཐོས་ཉིན་མོ་དེར།།
ཨ་མའི་འཛུམ་མདངས་མ་རིག་ཉིན་མོ་དེར།།
ཨ་མའི་ལག་ཟས་མ་རྙེད་ཉིན་མོ་དེར།།
ཨ་མའི་བྱམས་བརྩེ་སྒོམ་བཞིན་མ་ཁྱོད་དྲན།།
མིག་མཐའ་ཆུ་ཡིས་གང་བའི་ཉིན་མོ་དེར།།
མཁུར་བ་བརླན་གྱིས་བཤིས་པའི་ཉིན་མོ་དེར།།
དབུགས་སྣེ་གནམ་ལ་འདོགས་པའི་ཉིན་མོ་དེར།།
ལས་དབང་བཙན་པོར་འཁང་བཞིན་མ་ཁྱོད་དྲན།།
སྡེ་ཚན།
སྙན་རྩོམ།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
གསར་ཤོས་དག : ནགས་ལྷ་དྲ་མཛོད།
དཔྱད་མཆན་འགོད་ས།
རྣམ་དཔྱོད་མཚུངས་མེད་ཀློག་པ་པོ་རྣམ་པས་ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད་ལ་དཔྱད་མཆན་སྤེལ་བ་གུས་བསུ་ཞུ། ཡིན་ནའང་སྤྱི་སྒེར་གང་ལ་ཕན་མེད་ཀྱི་དམོད་ཚིག་སོགས་བཀག་འགོག་གི་དབང་ཚད་དྲ་རྒྱ་འཛིན་སྐྱོང་བ་་ལ་ཡོད་པས་དེ་དོན་དགོངས་དབྱིངས་སུ་མངའ་བ་མཁྱེན།
གཤམ་གྱི་རྟགས་འདི(*)ཅན་གྱི་བར་སྟོང་རྣམས་ངེས་པར་འགེང་དགོས།
