༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

སྐལ་བཟང་རབ་རྒྱས།

སྔོན་བྱོན་རྒྱལ་བློན་མཁས་གྲུབ་རྣམས་པ་དང་།།
ས་སྟེང་དགེ་ལེགས་སྩོལ་བའི་དྲིན་ཆེན་རྗེ།། 
བཀའ་དྲིན་གཞལ་མེད་ཀུན་ཏུ་བཟང་པོ་སོགས།།
གུས་པ་ཆེན་པོས་སྙིང་ནས་སྐྱབས་སུ་འཛིན།།

ཤེས་རིག་པད་དཀར་ཡངས་པའི་ཕོ་བྲང་ནས།།
བློ་གསར་སྒོ་འབྱེད་དཔྱོད་ལྡན་སློབ་དཔོན་དང་།། 
ལམ་བཟང་སྟོན་མཁན་བརྩེ་ལྡན་གོ་སྒྲིག་པ།། 
ལྷག་བསམ་དྭངས་མས་སྙིང་ནས་འཚམས་འདྲི་ཞུ།།

༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

སྐལ་བཟང་ཚེ་སྒྲོན།

གཅིག
དུས་རབས་གསར་བའི་ཁ་བའི་གཞོན་ནུ་ཚོ།།
འུ་ཅག་ཨ་མའི་མངལ་ནས་སྐྱེས་པ་ནས།།
གྲངས་ཉུང་མི་རིགས་འདི་ཡི་ཁོངས་སུ་གཏོགས།།
དེ་ལྟར་འུ་ཚོ་མེས་པོའི་ཤུལ་འཛིན་ཡིན།།

གཉིས།
དུས་འགྱུར་ནག་པོས་གངས་རིའི་རང་མདངས་འགྱུར།།
ཀླ་ཀློ་དམར་པོས་མུན་པའི་ནགས་ཁྲོད་དུ།།
གཡོ་རྫུན་ངན་པའི་འཁྲབ་སྟོན་ཐེངས་ཤིག་གིས།།
མགོ་ནག་ཚང་གི་རང་བཙན་གཞན་འོག་ཤོར།།

༢༠༡༣ ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

བསྟན་འཛིན་སྐལ་ལྡན།

རྩེ་གསུམ་གངས་དཀར་རི་བོ་གདན་ལ་བཞུགས།།
སྐེད་གསུམ་སྤང་ལྗོངས་མེ་ཏོག་གོས་ཀྱིས་བརྒྱན།།
མདའ་གསུམ་གཡུ་མདོག་ལྗོན་པའི་ཤམ་ལྭ་གྱོན།།
མཛེས་ལྗོངས་ལྷ་ཡུལ་འགྲན་པའི་གནས་མཆོག་འདིར།།

རིག་གཞུང་ལྗོན་པ་ཞེས་པའི་ལྷ་མོ་ཞིག།
འདོད་པའི་དཀྱིལ་ནས་གོམ་སྟབས་སྒྱུར་བཞིན་ཡོང་།།
ཉེར་གཅིག་རི་བོ་བརྒལ་ཏེ་འགྲོ་ལ་རྩོམ།།
མཛེས་སྡུག་ལྡན་པའི་གཞུང་ལུགས་དགའ་མ་དེ།།

༢༠༡༣ ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

འབྲི་རུ་བ་སྐལ་བཟང་འགྲོ་མགོན།

འཇིག་རྟེན་ས་ཡི་གོ་ལའི་ཡང་རྩེ་ན།།
འགྲོ་བ་མི་ཡི་སྤྱི་ཚོགས་འདྲ་མིན་ནང་།།
ལ་ལ་ཡར་ཐོན་ལ་ལ་རྗེས་ལུས་འདི།།
སློབ་གསོའི་ཁ་ཕྱོགས་བཟང་ངན་ལས་ལ་རག།

འཚོ་གནས་དཔལ་འབྱོར་ངེད་ཅག་དགོས་མཁོ་ཡིན།།
རིག་པའི་གནས་ལྔ་ཀླད་པའི་གནད་དོན་ཡིན།།
ཚན་རྩལ་ཤེས་བྱ་ཉེར་གཅིག་ལག་རྩལ་ཡིན།།
ཁ་བ་བོད་པ་ཚན་རྩལ་ལམ་དུ་སྐྱོད།།

༢༠༡༣ ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

དགའ་ལྷོ་ནགས་ཤོད་པ་བློ་བཟང་ཕུན་ཚོགས།

བརྒྱད་གཉིས་ལང་ཚོ་རྫོགས་པའི་མཚར་སྡུག་དང༌།།
འགྲོ་ལ་དགྱེས་པའི་འཛུམ་དཀར་གཡོ་བ་ཅན།།
བདག་གི་མགྲིན་མཚོར་རོལ་ཅིག་ཚངས་སྲས་ཀྱེ།།
སྨྲ་མཁས་ངག་གི་དངོས་གྲུབ་དེང་འདིར་སྩོལ།།

འདབ་དྲུག་ཁ་བའི་མེ་ཏོག་འཕུར་ལྡིང་གི།།
ངོ་མཚར་གར་རྩེད་འབུམ་གྱི་གཟིགས་མོ་ཅན།།
ཆོས་ལྡན་ཆེན་པོ་བོད་ཀྱི་རྒྱལ་ཁམས་ཀྱི།།
བཅུ་ཕྲག་རིག་པའི་གནས་ཀྱི་གཏམ་ཚོགས་གླེང༌།།

༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

སེར་ལྷོ་བསླབ་གསུམ་ནོར་བུ།

ལུགས་གཉིས་སྐྱོང་བའི་སྟོབས་དང་དཔའ་ངར་གྱི། །
སྙན་གྲགས་གངས་རིའི་མུ་ཁྱུད་ལས་འགོངས་པའི། །
ཡབ་རྗེ་མེས་དབོན་གསུམ་གྱི་རྣམ་ཤེས་ཀྱིས། །
དུས་ཀྱི་མཐའ་ཡང་ལྗོངས་འདི་སྲུང་གྱུར་ཅིག།

ཐོན་མིས་རྒྱ་གར་ཡུལ་ནས་ཡི་གེ་བསླབས། །
བློན་པོ་མགར་གྱིས་དམག་གི་རུ་སྣ་དྲངས། །
རྒྱ་བལ་བཙུན་མོ་ཁབ་ཏུ་རོལ་པའི་དུས། །
གླིང་ཆེན་འདི་ན་རྒྱལ་པོ་སྲོང་བཙན་ཙམ། །

༢༠༡༣ ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག་ཨང་གསུམ་པ།

སེར་ལྷོ་བསྟན་འཛིན་བསོད་ནམས།

ཡ་ཐོག་དང་པོའི་མི་ཡི་བྱུང་རབས་དག །
ཇི་ལྟར་བརྒྱུད་མིན་ཇི་བཞིན་བཤད་དཀའ་ལ།།
རྡོ་ཡི་དུས་རབས་ལ་སོགས་མུན་ཁྲོད་དུ།།
ཅི་ཞིག་མྱོང་མིན་ཇི་བཞིན་ཤེས་དཀའ་ཡང་།།

འགྲོ་བ་མི་ཡི་མེས་པོ་གོང་མ་ཚོ།།
འཇུག་ལྡོག་གནས་ལ་རྨོངས་པའི་དུད་འགྲོ་ལྟར།།
རང་རང་ལྟོ་དང་རྒྱབ་ཀྱི་དོན་ཙམ་ལས།།
རིག་གནས་ནོར་གྱིས་ཕོངས་ལ་སུ་ཡིས་བསྙོན།།

༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག་ཨང་གཉིས་པ།

སེར་ལྷོ་སྐལ་བཟང་ཐར་འདོད།

ར༵བ་འབྱམས་ཚོགས་གཉིས་བྱེ་བས་བསྐྲུན་པའི་ར༵བ་མཛེས་ཡིད་འོང་གང་གི་སྐུ༵།།
ར༵བ་མང་འགྲོ་བའི་རྨོངས་མུན་སེལ་མཛད་ར༵བ་མཆོག་ཡང་དག་སྟོན་པའི་གསུ༵ང་།།
ར༵བ་ཡངས་མཁྱེན་པའི་བརྩེ་ཆེན་ལས་བྱུང་ར༵བ་གསལ་ཀུན་མཁྱེན་ཡེ་ཤེས་ཐུ༵གས།།
ར༵བ་དཀར་བདག་བློའི་ལྷ་རྫས་པད་ཁ་ར༵བ་འབྱམས་མགོན་གྱི་ཕྱོགས་སུ་གྲོལ།།

ལེགས་ཉེས་བློ༵་གྲོས་རྩལ་གྱིས་རྣམ་པར་འགྱིངས།།
དཔྱད་སྟོབས་རིགས་བཟ༵ང་གད་རྒྱངས་ཕྱོགས་ཀུན་བསྒྲགས།།
གྲ༵གས་པས་མཁས་ཀུན་སྡེར་ཆགས་ཟིལ་གནོན་པའི།།
གངས་ཅན་གཡུ་རལ་བསིགས་པའི་གདོང་ལྔར་འདུད།།

༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག་ཨང་གཉིས་པ།

སྭ་ར་མཐོ་སློབ་བྱམས་པ་སྒྲོལ་མ།

རིག་པའི་གནས།

མཛེས་སྡུག་ལང་ཚོའི་མེ་ཏོག་ལ།།
མཚར་སྡུག་དྲི་བསུང་འཐུལ་བ་ཡི།།
སྙིང་སྡུག་རིག་གནས་མཛའ་གྲོགས་ཀྱིས།།
བདག་ཡིད་བརྟན་པ་གཅིག་ཅར་ཕྲོགས།།

བཀའ་བསྟན་ཤེས་བྱའི་བང་མཛོད་ན།།
རྣམ་དཔྱོད་གསེར་གྱི་ལྡེ་མིག་གིས།།
སྒྱུ་རྩལ་སྒོ་གླེགས་ཕྱེ་དང་ལྷན།།
རིན་བྲལ་ནོར་བུ་ཐང་མར་བརྡལ།།

༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག་ཨང་དང་པོ།

སེར་ལྷོ་འཇམ་དབྱངས་མཁས་བཙུན།

ཕན་བདེའི་བདག་ཉིད་སྟོན་པ་བཀའ་དྲིན་ཅན་དང་།།
ག་གཅིག་འཕགས་བོད་ལོ་པཎ་རྣམས་དང་།།
རིག་པའི་གཞུང་གི་ཉིན་བྱེད་མེས་པོ་རྣམས་ཀྱི།།
འཕྲིན་ལས་སྒྲུན་བྲལ་ཉིད་ལ་གུས་པས་འདུད་དོ།།

སེམས་ཀྱི་ངལ་བ་རི་བོའི་སྤོ་ཡིས་མི་དོ།།
ཕྱི་ནང་འཁྲུགས་རྩོད་ཕྲག་དོག་སྦྲུལ་ལས་ཆེ་བ།།
མ་འགྲིགས་བྱ་བ་ཐལ་བའི་རྡུལ་ལས་མང་བའི།།
དུས་རབས་འདི་ལ་ཕན་པའི་བློ་ཞིག་འདོན་འདོད།།