ཟབ་ཆེན་ཤེས་བྱའི་ཆོས་ཉིད།།
ས་དར་རྡོ་དར་བྱུང་ཞིང་།།
ཆོས་རྒྱལ་ཉི་ཟླ་ལྟ་བུའི།།
དཔོན་སློབ་འཁོར་དང་བཅས་པས།།

རིག་འབྱུང་བསམས་ཡས་དགོན་པ།།
བཞེངས་ནས་དབུ་རྩེ་བསླངས་སོང་།།
རྒོལ་ངན་ཧ་ཤང་ལྟ་བུའི།།
ལམ་དོན་འཁྲུལ་བ་ཅན་ལ།།

འཆད་རྩོད་དགག་བཞག་སྤྱད་དེ།།
ཡང་དག་སྟོན་པའི་ལམ་གསུང་།།
ལེགས་པར་བསྟན་ལ་ཕབ་སྟེ།།
འདུལ་ཁྲིམས་བཙུན་པའི་སྡོམ་པ།།

ཐོག་མའི་དབུ་རྩེ་བསླངས་ཏེ།།
གཞན་ལས་ཁྱད་དུ་འཕགས་པའི།།
བསྟན་པའི་རྗེས་འཇུག་འགྲོ་བའི།།
ལེགས་བརྟག་དཔྱད་པ་གནང་ནས།།

མི་སྐྱ་རབ་བྱུང་མཛད་ཅིང་།།
བཀའ་བསྟན་རབ་འབྱམས་སྤུངས་ཚོགས།།
རང་སྐད་ཐོག་ལ་ཕབ་སྟེ།།
རིན་ཆེན་བང་མཛོད་སྒོ་མོ།།

འབྱེད་པའི་གསར་བཏོད་གནང་ཡོད།།
སྔོན་རྒྱུད་དམངས་སྒྲུང་རིག་པ།།
གདོད་སྐྱེས་ལྷན་བྱུང་སྒྱུ་རྩལ།།
མི་ཉམས་གོང་འཕེལ་འོང་བས།།

ཕྱི་རབས་མིག་རྒྱན་འདྲེན་མཁན།།
མེས་དབོན་སྲོང་བཙན་རྒྱལ་པོས།།
ཐུགས་རིག་ཤེས་རྒྱ་ཡངས་པའི།།
མི་རིགས་གཞན་དང་འདྲ་བའི།།

ཕན་ཚུན་བསམ་པ་མཚོན་བྱེད།།
ནང་ཁུལ་བཅའ་ཁྲིམས་བཟོ་བྱེད།།
དར་བའི་ལོ་རྒྱུས་གསོག་སའི།།
སྐད་ཀྱི་བརྡ་སྤྲོད་ཐུབ་པའི།།

སྔོན་མེད་ཡི་གེ་བཟོ་རྒྱུའི།།
དགོངས་པ་འཆར་གཞི་འཁྲུངས་ནས།།
ཐུགས་རིག་འགྲན་ཟླ་བྲལ་བའི།།
ནང་བློན་ཐོན་མི་ཁོང་ལ།།

ལམ་བགྲོད་རྒྱགས་ཕྱེ་བསྐུར་ཏེ།།
གནས་ཡུལ་འཕགས་པའི་ཞིང་དུ།།
རོགས་པ་མི་བཅུ་མཉམ་དུ།།
བཏང་ནས་ཐུ་མི་ཁོང་གིས།།

བློ་རིག་རྣམ་པར་བཀྲ་བས།།
དཀའ་སྡུག་ཕྲག་ཏུ་བླངས་ཤིང་།།
ཉིན་མཚན་དབྱེར་མེད་ཀུན་ཏུ།།
བརྩོན་པའི་ངལ་བས་བསུས་པས།།

མི་ལོ་བདུན་ཙམ་རྗེས་ནས།།
ལེགས་སྦྱར་ལྷ་ཡི་སྐད་ལ།།
ཚེགས་མེད་མཁྱེན་པར་གྱུར་ཏེ།།
རང་སྐད་བརྡ་ལ་མཁོ་བའི།།

བླ་སྲོག་ཡི་གེའི་ཚེ་སྲོག།
བསྐྲུན་པའི་མ་ལག་དྲངས་ཏེ།།
ཕོ་བྲང་མ་རུ་མཁར་ན།།
བཟོས་པའི་ལོ་རྒྱུས་ཡོད་དོ།།

སྔ་རབས་ལོ་རྒྱུས་བྱུང་བ།།
ཕྱི་དར་གཞུང་ལ་སྤེལ་ཞིང་།།
མ་འོངས་ངེད་ཅག་རིག་གཞུང་།།
རིན་ཐང་ཀུན་ལས་བཀྲ་བས།།

ཐུགས་ཀྱི་དགོངས་པར་གཞིགས་ཤིང་།།
རླབས་ཆེན་བྱས་རྗེས་མཇལ་ཚེ།།
དེང་རབས་ཚན་རྩལ་བསམས་ཤིང་།།
བརྡ་འཕྲིན་བཀོལ་སྤྱོད་ཐུབ་པའི།།

ཡ་མཚན་དངོས་རིགས་མོད་པོ།།
གསར་བཏོད་མཛད་པ་ཡོད་ཀྱང་།།
སུམ་གཉིས་ས་གཞིར་བསྒྱུར་ཞིང་།།
དཔའ་མཛངས་བློ་གྲོས་ལྡན་པའི།།

གསར་གཏོད་ཁྱེད་ཉིད་འདྲ་བ།།
འགྲན་པའི་དོ་ཟླར་མི་རྙེད།།
མི་རིགས་གཅིག་ཏུ་སྒྲིལ་བྱེད།།
བཅའ་ཁྲིམས་བརྟན་སྲུང་འཛིན་བྱེད།།

དཔུང་དམག་བློ་ཇུས་རྒྱས་བྱེད།།
རྒྱལ་བློན་བཀའ་གྲོས་སྡུར་བྱེད།།
ཁྱེད་ཀྱི་བློ་ཡི་རྩལ་ལས།།
ཐོན་པའི་ཡིག་གཟུགས་དེ་ཡིས།།

བསྟན་པའི་ལེགས་བཤད་ཡིན་གྱི།།
བྱུང་བའི་བསོད་ནམས་མ་ཡིན།།
བརྡ་སྤྲོད་རིག་པའི་ལམ་ཆེན།།
བཏོད་དེ་ཡུན་རིང་སོང་ཡང་།།

བདག་འདྲའི་བློ་མིག་ལྡོངས་བའི།།
དཔྱོད་པའི་བརྩོན་འགྲུས་བྲལ་ཏེ།།
མ་ལྡེང་མི་འགྲིག་ཟེར་བཞིན།།
འཆལ་བཤད་ལུང་པ་གང་གིས།།

བཀའ་དྲིན་གཞལ་ཐབས་བྲལ་བའི།།
མཁས་མཆོག་ཀུན་གཟིགས་ཁྱེད་ལ།།
སྨད་པའི་ངོ་ཚ་བསམས་ན།།
མནོ་མེད་དུད་འགྲོ་ལས་ཀྱང་།།

དམན་པའི་བློ་ལས་མི་ལྡན།།
ཚོར་མེད་ཕུང་པོ་ལས་ཀྱང་།།
སྡུག་པའི་གཞི་ལས་མི་འདུག།
སྲོལ་བཟང་ལེགས་བཤད་སྦྲང་ཆར།།

སྙིང་བཅུད་སྦྲང་རྩིའི་རོ་བཅུད།།
རྐང་དྲུག་བུ་ཚས་མི་འཐུང་།།
སེམས་པ་སྐྱོ་བས་གདུང་བྱུང་།།
སྔོན་མེད་གསར་སྐྲུན་རིན་ཐང་།།

ཕ་ལམ་གསེར་དང་འདྲ་ཡང་།།
རྣམ་དཔྱོད་གཞན་ལུགས་ཁོ་ནར།།
ཆགས་པས་སྣང་བར་སྐྱོ་བ།།
ཡ་རབས་གོམས་གཤིས་མཛེས་པ།།

རྒན་རབས་བཀུར་སྟིའི་གུས་ཞབས།།
རྗེས་ལུས་རྨོངས་དད་ཟེར་ནས།།
ཕྱི་ལུགས་ཁྲ་ཁྲ་ཟིང་ཟིང་།།
མོས་ལ་འདོར་བས་སྐྱོ་བ།།

ཕ་སྐད་གསེར་ཟངས་རྡོ་རྗེ།།
མཆིང་བུའི་རྡོ་རུ་བཟུང་སྟེ།།
གཞན་སྐད་ར་གན་འོད་ལ།།
ཞེན་པས་སྣང་བ་སྐྱོ་བ།།

གངས་ཅན་རིག་གནས་ཀྱི་བྱེད་པོ་ཆོས་རྒྱལ་མེས་དབོན་རྣམ་གསུམ་གྱི་ཡ་གྱལ་སྲོང་བཙན་སྒམ་པོ་མཆོག་དང་མཛངས་མི་བདུན་གྱི་གཉིས་པར་གྲགས་པའི་ཐོན་མི་སམ་བྷོ་ཊ་རྣམ་གཉིས་ཀྱི་མཛད་རྗེས་མདོར་བསྡུས་ཙམ་ཞིག་ས་རཱ་མཐོ་སློབ་ནས  ༢༠༡༣ ཟླ ༨  ཚེས  ༢༥  ཉིན་སྤེལ།