ནགས་ཀྱི་ཤིང་ལོ་ནས།

སྣང་བ་རླུང་གིས་བདས་པའི་མཁའ་དབྱིངས་སུ།། དེང་རབས་ཤེས་རིག་འབུམ་གྱི་འཇའ་འོད་འཁྲིགས།།
སྟོང་བསམ་གཤོག་ཟུང་བརྐྱངས་པའི་སྣེ་མོ་ནས།། མཐོང་བྱེད་མུན་དུ་འཁྱུད་པའི་བྱ་ལོང་ཞིག །

ཟླ་བ་མཚོ་རུ་ཟག་པའི་མཚན་མོ་ན།། མིག་ཟུང་རྒྱང་དུ་གཏད་པའི་རླུང་བུའི་ཁྲོད།།
ཆུ་ཁའི་ཟིལ་བ་འཕྲོ་བའི་རྩྭ་རྩེ་ནས།། ཟླ་འོད་དཀར་འཇམ་ཞིག་གིས་སེམས་པ་གསོས།།

འཆར་ཡན་མུན་དུ་ཟུག་པའི་ཚོར་བའི་ཀློང་།། ཁ་མདོག་མོག་མོག་ཞིག་གི་དུས་ཚོད་ནང་།།
སེམས་ཀྱིས་རི་མོ་བྲིས་པའི་གྱང་ལྡེབས་ནས།། ལྷང་ལྷང་འཁྲོལ་བའི་སྙན་འཇེབས་གླིང་བུ་ཞིག །

རྐང་རྗེས་བྱེ་མར་བཞག་པའི་ལྷོ་མཐའ་རུ།། བྱེ་རླུང་ཚ་བས་གདུང་བའི་རླངས་པ་དེས།།
ལུས་ཀྱི་ཟུངས་ཁྲག་སྐམ་པའི་འཁྱམ་པོ་ཞིག །རྣམ་ཤེས་ཕྲ་མོ་ཁ་བའི་རི་ལ་ཤོར།།

ནགས་ཀྱི་ཤིང་ལོ་ནས།

ཀ་མ་རུ་ཡི་རྡོ་ཡིས་བསྐྲུན་པའི་གཙང་ཞིང་དྭངས་བའི་སྨན་ཁང་དེར།།
ཁ་དོག་མི་གཅིག་མི་ཚོགས་དེ་རྣམས་འཚང་ཁ་ཤིག་ཤིག་ནང་དུ་འཛུལ།།
ག་ལེར་ཉན་དུས་ཟུག་དང་གཟེར་གྱི་སྐད་ཅོར་དེ་ཡིས་རྣ་བ་སུན།།
ང་ཡི་སེམས་འདི་རང་ལ་བསྐོར་དུས་གནས་སྐབས་བདེ་བའི་ཚོར་སྣང་སྐྱེས།།

ཅ་ཅོའི་སྐད་ཀྱིས་ག་ས་ག་ནས་ན་དང་ཚ་བའི་ཨག་སྐད་དང་།།
ཆ་ལུགས་བཞིན་གྱི་མདངས་ཤོར་མིག་ནས་མཆི་མ་འཛག་པའི་སྣང་ཚུལ་དེས།།
ཇ་ཕོར་ནང་གི་ཇ་ཡི་བྲོ་བ་རེ་ཞིག་སྟོང་པའི་ངང་དུ་འཐིམ།།
ཉ་བེ་ཉོབ་ཀྱིས་ཁང་བཟང་དེ་ཡང་མིག་གི་མཐོང་དུས་སུན་སྣང་སྐྱེས།།