ནགས་ཀྱི་ཤིང་ལོ་ནས།

ཡུལ་ལྷོ་ཕྱོགས་རྒྱ་མཚོ་ཆེན་མོའི་ཉེ་འགྲམ་ན།།

བྱེས་སེ་རའི་འཁོར་ཡུག་བཀོད་པ་ཕྱི་ནས་མཛེས།།
གྲོགས་ཕུ་ནུའི་མཛའ་བརྩེའི་དམ་ཚིག་ནང་དུ་རུམ།།
དུས་བར་མེད་བརྩོན་པའི་སྒྲ་དབྱངས་རྣ་བར་ལྷུང་།།

སྤྲིན་ལང་ལོང་མཁའ་རུ་འཁྲིགས་པའི་དབྱར་དུས་ཞིག །
ཆར་འཇམ་པོས་ས་གཞི་བརླན་པའི་ཞོགས་པ་དེར།།
རླུང་གཙང་མ་ཁ་གང་བརྔུབས་ནས་རྒྱང་ལ་བལྟས།།
ཕྱི་འཁོར་ཡུག་ལྟ་ན་སྡུག་པ་མིག་གི་ཡུལ།།

ནགས་ཀྱི་ཤིང་ལོ་ནས།

མཐོ་རི་བོའི་རྩེ་མོ་སྤྲིན་གྱིས་རུམ།།
བར་སྤང་ལྗོངས་རྟ་ནོར་ལུག་གིས་རྒྱན།།
མདའ་རྒྱལ་མོ་དངུལ་ཆུ་དལ་གྱིས་འབབ།།
ཡུལ་འབྲི་རུའི་རྒྱབ་རི་ནགས་ལྷ་རེད།།

ཕྱག་གཡས་གཡོན་ལག་སྐོར་ཕྲེང་བས་རྒྱན།།
ཞལ་མུལ་མུལ་མ་ཎི་སྐྱབས་འགྲོ་ཟློ།།
ཡིད་དད་པ་དཀོན་མཆོག་གསུམ་ལ་ཆེ།།
སྡེ་འབྲི་རུའི་རྒན་རབས་ཆོས་ལ་དགའ།།

ནགས་ཀྱི་ཤིང་ལོ་ནས།

གཅིག་པོར་སྡོད་དུས་ཀ་ཕྲེང་འབྲི་ལ་དགའ།།
ཚ་བས་གཙེས་དུས་ཁ་བའི་ལུང་པ་དྲན།།
གཞན་ཡུལ་འདི་ན་ག་ཚོད་ལྷག་ཡོང་དྲན།།
གྱེས་བྲལ་ལོ་ཟླས་ང་ཡི་སེམས་པ་གྲང་།།

སྨྲ་བའི་སྒོ་ནས་ཅ་ཅོའི་སྨྲེ་སྔགས་ཤོར།།
ལྟ་བའི་མིག་གི་ཆ་ག་མཆི་མས་སྦངས།།
དགོང་མོའི་ཚོར་བ་ཇ་ཁུའི་མདོག་ལས་སྨུག །
མཚན་མོའི་མིག་ཟུང་ཉ་གང་ཟླ་བར་འཁྱུད།།

ནགས་ཀྱི་ཤིང་ལོ་ནས།

དྲན་སེམས་རླུང་གིས་ཁྱེར་བའི་ས་སྲོད་འདིར།།
མིག་ཟུང་རྒྱང་དུ་འཕངས་པའི་གནམ་སའི་བར།།
བྱམས་བརྩེའི་འཛུམ་གྱིས་འཁྱུད་པའི་ཞལ་རས་ཞིག །
ཡང་ཡང་སྣང་བའི་ལམ་དུ་འཁོར་བཞིན་གདའ།།

དྲན་གདུང་སེམས་ན་ལྕི་བའི་འཁྱམ་པོ་ཞིག །
ཉན་བྱེད་རྒྱང་དུ་གཏད་པའི་བུ་ག་ནས།།
ཁྱེད་ཉིད་བདེ་ཐང་ཡིན་པའི་གཏམ་བཟང་ཞིག །
ཡང་ཡང་ཐོས་ན་འདོད་པའི་རེ་བ་ཆེ།།

ནགས་ཀྱི་ཤིང་ལོ་ནས།

གསེར་མདོག་རྒྱ་ཕིབས་ཉི་མའི་འོད་དང་འདྲེས།།
འཁའ་རུ་འགྱིངས་པའི་རི་དྭག་ཆོས་འཁོར་མཛེས།།
སྣ་ལྔའི་མཚོན་ལྡན་ཆོས་དར་ལྷབ་ལྷུབ་གཡོ།།
གཡས་གཡོན་ཤིང་ལོའི་གསེང་ནས་བྱ་བྱིའུ་འགྱུར།།

རབ་མཛེས་བཀོད་ལེགས་ཡིད་འོང་གཙུག་ལག་ཁང་།།
རབ་བརྗིད་འཁར་རྔའི་སྒྲ་དབྱངས་རྣ་བར་ལྷུང་།།
རབ་ཡངས་བྱེས་ཀྱི་གྲྭ་ཚང་ཆོས་ར་ན།།
རབ་དམར་འདུས་པའི་ཚོགས་ཀྱིས་ཡོངས་སུ་བཀངས།།

ནགས་ཀྱི་ཤིང་ལོ་ནས།

ལྷོ་ཕྱོགས་མ་ལ་ཡ་ཡི་ཕང་པ་རུ།།
བརྗིད་ཆགས་ནགས་ཀླུང་འཐིབས་པའི་གྲུ་ཟུར་ནས།།
མིག་ཟུང་རྒྱང་དུ་གཏད་པའི་མཚམས་སྤྲིན་འོག །
དབྱར་ཁའི་ཐེག་ཆེན་གླིང་དེ་མཛེས་ཤིང་སྡུག །

རྫོགས་ལྡན་དབྱར་གྱི་བུ་མོའི་སྐུ་ལུས་ན།།
མ་དྲས་གཡུ་མདོག་ལྭ་བ་ཡིད་དུ་འོང་།།
འདོད་ལྡན་མཁའ་རུ་འཁྲིགས་པའི་སྤྲིན་སེབ་ནས།།
ལྷད་མེད་བརྩེ་བས་གཏམས་པའི་ཆུ་ཐིགས་འཛག།།

ནགས་ཀྱི་ཤིང་ལོ་ནས།

ཀ་དག་སེམས་ཀྱི་གནས་ལུགས་ཤེལ་དཀར་གྱི་ངོས་སུ།།
ཁ་དོག་གངས་ལས་དཀར་བའི་སྒྲོལ་དཀར་གྱི་ལྷ་མོ།།
ག་དུས་སྣང་བའི་ཚོར་བ་གསོན་པོ་རེ་བྱུང་ན།།
ང་ཡི་དད་པའི་ལག་ཟུང་དབང་མེད་དུ་ཟུམ་འགྲོ །

ཅ་ཅོའི་ལོང་གཏམ་ལེ་ལོའི་གཡེང་བ་རུ་ཚུད་པའི།།
ཆ་བྱེད་བཅོས་སུ་མེད་པའི་ཚུགས་ཀ་འདི་ངར་བས།།
ཇ་ཡུན་ཙམ་གྱི་དུས་ཀྱང་གསེར་ནག་ལས་ལྷག་ཡང་།།
ཉ་མོ་ཆུ་ལ་དུངས་ལྟར་རྣམ་གཡེང་ལ་རོལ་དུས།།

ནགས་ཀྱི་ཤིང་ལོ་ནས་

ཀ་བ་མེད་པའི་ཁང་ཆུང་གྲུ་བཞི།། ཁ་དོག་དབེན་པའི་ཞ་ལ་སྐྱ་ཐིང་།།
ག་བ་སོང་ཡང་སྒོ་ལྕགས་མེད་པ།། ང་རང་རེ་ཞིག་འདུག་སའི་གནས་ཚང་།།

ཅ་ཅོ་མེད་པ་དབེན་པའི་གནས་འདྲ།། ཆ་རྐྱེན་མོད་པོ་ཀླུ་ཡི་ཡུལ་བཞིན།།
ཇ་ཤིང་འདྲ་བའི་ནགས་ཀྱི་དཀྱིལ་ན།། ཉ་ཆུ་ལྟར་དུ་དཔེ་ཀློག་རོལ་བཞིན།།

ཏ་ལེར་གསལ་བ་ཞུ་བ་སྤྱིར་བསྟན།། ཐ་ར་ར་རུ་ངག་ནས་ཐོན་དུས།།
ད་ལོའི་དགུན་གྱི་བར་སེང་འདི་ནི།། ན་ནིང་ལས་ནི་སྡུར་དུ་མི་བཏུབ།།

ནགས་ཀྱི་ཤིང་ལོ་ནས།

ཀ་མ་རུ་ཡི་རྡོ་ཡིས་བསྐྲུན་པའི་གཙང་ཞིང་དྭངས་བའི་སྨན་ཁང་དེར།།
ཁ་དོག་མི་གཅིག་མི་ཚོགས་དེ་རྣམས་འཚང་ཁ་ཤིག་ཤིག་ནང་དུ་འཛུལ།།
ག་ལེར་ཉན་དུས་ཟུག་དང་གཟེར་གྱི་སྐད་ཅོར་དེ་ཡིས་རྣ་བ་སུན།།
ང་ཡི་སེམས་འདི་རང་ལ་བསྐོར་དུས་གནས་སྐབས་བདེ་བའི་ཚོར་སྣང་སྐྱེས།།

ཅ་ཅོའི་སྐད་ཀྱིས་ག་ས་ག་ནས་ན་དང་ཚ་བའི་ཨག་སྐད་དང་།།
ཆ་ལུགས་བཞིན་གྱི་མདངས་ཤོར་མིག་ནས་མཆི་མ་འཛག་པའི་སྣང་ཚུལ་དེས།།
ཇ་ཕོར་ནང་གི་ཇ་ཡི་བྲོ་བ་རེ་ཞིག་སྟོང་པའི་ངང་དུ་འཐིམ།།
ཉ་བེ་ཉོབ་ཀྱིས་ཁང་བཟང་དེ་ཡང་མིག་གི་མཐོང་དུས་སུན་སྣང་སྐྱེས།།

ནགས་ཀྱི་ཤིང་ལོ་ནས།

སྣང་བ་རླུང་གིས་བདས་པའི་མཁའ་དབྱིངས་སུ།། དེང་རབས་ཤེས་རིག་འབུམ་གྱི་འཇའ་འོད་འཁྲིགས།།
སྟོང་བསམ་གཤོག་ཟུང་བརྐྱངས་པའི་སྣེ་མོ་ནས།། མཐོང་བྱེད་མུན་དུ་འཁྱུད་པའི་བྱ་ལོང་ཞིག །

ཟླ་བ་མཚོ་རུ་ཟག་པའི་མཚན་མོ་ན།། མིག་ཟུང་རྒྱང་དུ་གཏད་པའི་རླུང་བུའི་ཁྲོད།།
ཆུ་ཁའི་ཟིལ་བ་འཕྲོ་བའི་རྩྭ་རྩེ་ནས།། ཟླ་འོད་དཀར་འཇམ་ཞིག་གིས་སེམས་པ་གསོས།།

འཆར་ཡན་མུན་དུ་ཟུག་པའི་ཚོར་བའི་ཀློང་།། ཁ་མདོག་མོག་མོག་ཞིག་གི་དུས་ཚོད་ནང་།།
སེམས་ཀྱིས་རི་མོ་བྲིས་པའི་གྱང་ལྡེབས་ནས།། ལྷང་ལྷང་འཁྲོལ་བའི་སྙན་འཇེབས་གླིང་བུ་ཞིག །

རྐང་རྗེས་བྱེ་མར་བཞག་པའི་ལྷོ་མཐའ་རུ།། བྱེ་རླུང་ཚ་བས་གདུང་བའི་རླངས་པ་དེས།།
ལུས་ཀྱི་ཟུངས་ཁྲག་སྐམ་པའི་འཁྱམ་པོ་ཞིག །རྣམ་ཤེས་ཕྲ་མོ་ཁ་བའི་རི་ལ་ཤོར།།