འོ་ན་ཀུན་གཞིའི་དམིགས་པ་ལ་དབང་དོན་བག་ཆགས་གསུམ་པོ་གང་རུང་དགོས་ན། དེ་གསུམ་དེའི་དམིགས་པ་ཡིན་ཚུལ་གང་ཡིན་སྙམ་ན། དེ་ལ་བག་ཆགས་དམིགས་པར་འགྱུར་ཚུལ་ནི། དོན་གཟུགས་སྒྲ་སོགས་ཀུན་གཞི་ལ་སྣང་ནས་དམིགས་པར་བྱེད་པ་ལྟར་མ་ཡིན་པར་བག་ཆགས་སད་པའི་དབང་གིས་གཟུགས་སོགས་ཀུན་གཞིའི་ཡུལ་དུ་འགྱུར་བས་དེའི་དམིགས་པར་བཞག་པ་ཡིན་ཏེ། ཀུན་གཞི་རྒྱ་ཆེར་འགྲེལ་བློ་གླིང་དཔར་མ་ཤོག་གྲངས་༡༤ལས། དེ་ཡང་བག་ཆཌ་དམིགས་པར་འགྱུར་བའི་དོན་དངོས་སུ་མེད་ཀྱང་དེའི་མཐུས་གནས་དོན་ལུས་སུ་སྣང་རུང་ཡིན་པས་དམིགས་པར་འགྱུར་ཏེ། ཞེས་གསུངས་པའི་ཕྱིར་ཞེ་ན། དེ་ལྟར་ན་བག་ཆགས་ཀུན་གཞིའི་ཡུལ་མ་ཡིན་པར་ཐལ། དེའི་དམིགས་པ་དང་རྣམ་པ་གང་ཡང་མ་ཡིན་པའི་ཕྱིར། འདོད་ན། གཟུགས་མེད་ཀྱི་ཀུན་གཞི་ལ་ཡུལ་མེད་པར་འགྱུར་ཏེ། བག་ཆཌ་དམིགས་པ་མ་ཡིན་པ་གང་ཞིག།།དབང་དོན་གཉིས་ཀྱང་དེའི་ཡུལ་མ་ཡིན་པའི་ཕྱིར། འདོད་ན། གཟུགས་མེད་ཀྱི་ཀུན་གཞི་དེ་ཉིད་ཡུལ་མེད་པའི་ཡུལ་ཅན་ཡིན་པ་དང༌། གང་ཡང་མ་རིག་པའི་རིག་པ་ཡིན་པ་དང༌། ཡང་ན། ཡུལ་ཅན་དང༌། རིག་པ་ཡང་མ་ཡིན་པར་འགྱུར་བ་དང༌། མ་ཚད་འཁོར་སེམས་བྱུང་ཀུན་འགྲོ་ལྔ་དང་མཚུངས་ལྡན་རྣམ་པ་ལྔ་མཚུངྶ་མ་ཡིན་པར་འདོད་དགོས་ལ། དེ་ལྟར་ན། དམིགས་རྣམ་མི་འཛིན་པར་འགྱུར་བའི་ཕྱིར། དེ་ཡང་མི་འཐད་དེ། སུམ་ཅུ་པའི་འགྲེལ་བ་ལས། དམིགས་པ་མེད་པ་དང༌། རྣམ་པ་མེད་པའི་རྣམ་པར་ཤེས་པ་ནི་མི་རུང་ངོ། ཞེས་དང༌། དུལ་བ་ལྷའི་འགྲེལ་བཤད་ལས། ཀུན་གཞི་རྣམ་པར་ཤེས་པ་དམིགས་པ་དང༌། རྣམ་པ་མེད་པ་ནི་ཁོ་བོའང་མི་འདོད་མོད་ཀྱི། ཞེས་གསུངས་པའི་ཕྱིར་དང༌། རྩ་བ་ལས། རྫས་གཅིག་ཐ་དད་གང་ཡང་མིན། །ས་བོན་དམིཌ་རྣམ་ཡོད་པ་དང༌།།ཞེས་དང༌། ཀུན་གཞི་རྒྱ་ཆེར་འགྲེལ་ལས། ས་བོན་དང་ཀུན་གཞི་རྣམ་ཤེས་གཉིས་རྫས་གཅིག་མ་ཡིན་ཏེ།གཞན་དུ་ན་ཀུན་གཞི་ས་བོན་ཆ་དེ་ལ་དམིགས་རྣམ་ཡོད་པར་འགྱུར་རོ།ཞེས་ལུགས་འདི་ལ་ཀུན་གཞི་དང་དེའི་སྟེང་གི་ས་བོན་གཉིས་རྫས་གཅིག་ཡིན་ན་དེ་གཉིས་གཅིག་ཡིན་དགོས་ལ། དེ་ལྟར་ན་ས་བོན་ལ་དམིགས་རྣམ་ཡོད་དགོས་ཏེ། ཀུན་གཞི་ཡིན་པའི་ཕྱིར། ཞེས་པའི་དོན་ཡིན་པའི་ཕྱིར། ཡང་ཁ་ཅིག །གཟུགས་མེད་ཀྱི་ཀུན་གཞིའི་ཡུལ་དུ་དབང་དོན་གཉིས་མེད་ལ་བག་ཆགས་དམིགས་པ་མ་ཡིན་ཡང༌། དེ་ལ་དམིགས་པ་མེད་པའི་སྐྱོན་མེད་དེ། གཟུགས་མེད་ཀྱི་མིང་གཞིའི་ཕུང་པོ་དེ་དེའི་དམིགས་པ་ཡིན་པའི་ཕྱིར་ཏེ། སུམ་ཅུ་པའི་འགྲེལ་པ་ལས་བག་ཆཌ་དང༌། གནས་དང་བཅས་པའི་དབང་པོའི་གཟུགས་དང་མིང་སྟེ། དེའི་དམིགས་པ་ཤིན་ཏུ་ཕྲ་བའི་ཕྱིར་རོ།

ཞེས་གསུངས་པའི་ཕྱིར། ཁྱབ་སྟེ་དེའི་མིང་ཞེས་གཟུགས་མེད་ལ་སྦྱར་དགོས་པའི་ཕྱིར་ཞེས་དང༌།གཞན་ཡང་རིགས་པའི་སྒྲུབ་བྱེད་ལ་དབང་སོགས་དམིགས་པར་འཇོག་པའི་དོན་ཡང་དེ་དག་ཉེ་བར་བླང་བྱ་དང༌། ཀུན་གཞི་ཁོ་ན་དེ་དག་ཉེ་བར་ལེན་པ་པོའི་གང་ཟག་ཡིན་པའི་ཕྱིར་ཞེས་ཟེར། དེ་ལྟར་ན། ཟག་བཅས་ཉེ་བར་ལེན་པའི་ཕུང་པོ་ལྔ་ཀ་ཀུན་གཞིའི་དམིགས་པ་ཡིན་པར་ཐལ། དེ་དག་ཉེ་བར་བླང་བྱ་དང༌། ཀུན་གཞི་ལེན་པ་པོའི་གང་ཟག་ཡིན་པའི་ཕྱིར། འདོད་ན། ཕུང་པོ་ཕྱི་མ་བཞི་པོ་ཀུན་གཞིའི་ཡུལ་ཡིན་པར་ཐལ། དེ་དག་ཉེ་བར་བླང་བྱ་ཡིན་པའི་ཕྱིར། འདོད་ན། ལུགས་འདིའི་འདུ་བྱེད་ཀྱི་ཕུང་པོར་འདོད་པའི་གསུང་རབ་ཡན་ལག་བཅུ་གཉིས་ཀྱང་ཀུན་གཞིའི་དམིགས་པ་ཡིན་པར་ཐལ། རྒྱུ་མཚན་སྔ་མ་དེའི་ཕྱིར། འདོད་མི་རིགས་ཏེ། དབང་དོན་བག་ཆཌ་གསུམ་ལས་གཞན་པའི་ཡིད་ཤེས་ཀྱི་ཡུལ་ཡིན་པའི་ཕྱིར་ཏེ། རྩ་བ་ལས། དབང་དོན་ལས་གཞན་དྲུག་པའི་ཡུལ། །ཀུན་གཞིའི་ཡུལ་དུ་མི་འགྱུར་ཏེ། །ཞེས་དང༌། དེའི་ཐད་ཀྱི་རྒྱ་ཆེར་འགྲེལ་ཤོག་གྲངས་ ༡༧ ལས། དབང་དོན་བག་ཆགས་གསུམ་ལས་གཞན་པའི་ཡིད་ཤེས་ཀྱི་ཡུལ་ཡན་ལག་བཅུ་གཉིས་ལྟ་བུ་དང༌། འདས་སོགས་སྒྲོ་བཏགས་

རྣམས་ནི་ཀུན་གཞིའི་ཡུལ་དུ་མི་འགྱུར་ཏེ། ཞེས་གསུངས་པའི་ཕྱིར། དེས་ན་བག་ཆགས་དམིགས་པར་གསུངས་པ་ནི་ཀུན་གཞི་རྒྱ་ཆེར་འགྲེལ་ལས་གསུངས་པ་ལྟར་བག་ཆགས་དེ་དག་སད་པའི་དབང་གིས་ཀུན་གཞི་ལ་དོན་གཟུགས་སོགས་སྣང་བར་བྱེད་པས་དེའི་དམིགས་པར་གསུངས་པ་དང༌། གཟུཌ་སོཌ་ནི་དེའི་སྣང་བའི་དམིཌ་པ་དང༌། དབང་སོགས་ལྔ་ནི་དེས་ཟིན་པའི་སྒོ་ནས་དེའི་དམིགས་པར་འདོད་དགོས་པར་སྙམ། གཟུཌ་མེད་ཀྱི་ཀུན་གཞི་ལ་དམིགས་པ་ཡོད་མེད་བཤད་ཚུལ་གཉིས་ཡོད་པ་ལས་མེད་པའི་ཕྱོགས་སུ་བཟུང་ན་རྩ་བ་དང༌། དེའི་རྒྱ་ཆེར་འགྲེལ་བཅས་མཐུན་པར་མངོན་ཏེ། རྩ་བ་ལས། དོན་དང་སེམས་ཅན་བག་ཆགས་དང༌། །ཞེས་དང༌། དབང་དོན་ལས་གཞན་དྲུག་པའི་ཡུལ། །ཀུན་གཞིའི་ཡུལ་དུ་མི་འགྱུར་ཏེ། །ཞེས་ཀུན་གཞིའི་དམིགས་པ་ལ་དབང་དོན་བག་ཆགས་གསུམ་གང་རུང་ཡིན་པ་དང༌། དེ་གསུམ་ལས་གཞན་པའི་ཡིད་ཤེས་ཀྱི་ཡུལ་རྣམས་ཀུན་གཞིའི་ཡུལ་དུ་མི་འགྱུར་བར་གསུང་པ་དང༌། ཀུན་གཞི་རྒྱ་ཆེར་འགྲེལ་ལས།དེ་ལྟ་ན་གཟུགས་མེད་ཀུན་གཞི་ལ་དམིཌ་པ་མེད་པར་འགྱུར་ཏེ། གཟུགས་ཅན་གྱི་སྣོད་བཅུད་ནི་མི་སྣང་ལ་བག་ཆགས་དམིགས་པར་འཇོག་པའི་དོན་ཡང་མེད་པའི་ཕྱིར་རོ། འདོད་ན། དམིགས་པ་དང་བྲལ་བའི་ཤེས་པ་ཁས་བླངས་བར་འགྱུར་རོ་ཞེ་ན། ཉེས་པ་མེད་དེ་ཞེས་དང༌། ཤེས་པ་ཐམས་ཅད་དམིགས་པ་ཡོད་པ་ལ་ལྟོས་མི་དགོས་ཀྱི་བྱེ་བྲག་ཏུ་ཀུན་གཞི་ནི། སྔོན་གྱི་དགེ་མི་དགེའི་ལས་ཀྱིས་བདེ་འགྲོ་དང་ངན་འགྲོའི་གཞིར་འཕངས་ནས་

ཇི་སྲིད་་མ་ཤི་བར་དུ་སྐད་ཅིག་ཀྱང་མི་ལྡོག་པས་ན་འཕེན་བྱེད་ཀྱི་ལས་ཀྱི་སྟོབས་ཀྱིས་འཇུག་གི་སྣང་བའི་དམིཌ་པ་ལ་བལྟོས་ནས་ནི་མ་ཡིན་ནོ། ཞེས་གཟུགས་མེད་ཀྱི་ཀུན་གཞི་ལ་དམིགས་པ་མེད་པས་སྒྲུབ་བྱེད་དུ་གསུངས་པའི་ཕྱིར།

འོ་ན་གང་དུ་དམིགས་པ་དང་རྣམ་པ་མེད་པ་ལ་ལུང་དང་རིགས་པའི་གནོད་བྱེད་བརྗོད་པ་མ་ཡིན་ནམ་ཞེ་ན། སྤྱིར་དམིགས་རྣམ་མེད་པའི་ཤེས་པ་ཞིག་ཡོད་ན་གནོད་བྱེད་དེ་ལྟར་ཡོད་མོད། འདིར་ནི་ཀུན་གཞི་འདོད་པའི་སེམས་ཙམ་པའི་ལུགས་ལ་དེ་ལྟར་འདོད་དགོས་པར་གྲུབ་མཐའ་རང་གི་བཞེད་ཚུལ་ཡིན་པས་སྐྱོན་མེད་ཅེས་འདོད་དགོས་པར་སྙམ། སུམ་ཅུ་པའི་འགྲེལ་བ་དང༌། དུལ་ལྷའི་འགྲེལ་བཤད་ལས་གསུངས་པ་རྣམས་སྤྱིར་ཀུན་གཞི་ལ་དམིགས་རྣམ་ཡོད་དགོས་པར་གསུངས་པ་ལས་ཀུན་གཞི་ཡིན་ན་དམིགས་རྣམ་ཡོད་པས་ཁྱབ་པར་གསུངས་པ་མ་ཡིན་ནོ། ཞེས་སྨྲ་དགོས་པར་སེམས་སོ། དེས་ན་ཀུན་གཞི་ཞེས་པ་ནི། དམིགས་པའི་ཁྱད་པར་དབང་དོན་བག་ཆགས་གསུམ་པོ་ལ་དམིགས་པ་དང༌། རྣམ་པའི་ཁྱད་པར་རིས་སུ་མ་བཅད་པ་དང༌། ངོ་བོའི་ཁྱད་པར་མ་སྒྲིབ་ལུང་མ་བསྟན་དང༌། གྲོཌ་ཀྱི་ཁྱད་པར་སེམས་བྱུང་ཀུན་འགྲོ་ལྔ་དང་མཚུངས་པར་ལྡན་པ་དང༌། དྲུག་པ་ཡིད་ཀྱི་རྣམ་ཤེས་ལས་ཐ་དད་པའི་རྣམ་ཤེས་ཡིན་པ་དང༌། དགེ་སོགས་གསུམ་གྱི་ལས་ཀྱི་བག་ཆགས་སྒོ་གཞི་ཡིན་པ་དང༌། གང་ཟག་གི་མཚན་གཞི་ཡིན་པ་དང༌། རང་རྐྱ་ཐུབ་པའི་རྫས་སུ་གྲུབ་པ་ཡིན་པ་དང༌། སྐྱེ་བ་ལེན་པའི་རྣམ་ཤེས་ཡིན་པ་དང༌། གང་དུ་སྐྱེས་པ་དེའི་ས་པ་ཡིན་པ་དང༌། འཁོར་བའི་གནས་སྐབས་ཐམས་ཅད་དུ་འཇུག་ཅིང་ཐེག་དམན་གྱི་དབང་དུ་བྱས་ན་དགྲ་བཅོམ་མ་ཐོབ་བར་དུ་དང༌། ཐེག་ཆེན་གྱི་དབང་དུ་བྱས་ན་ས་བརྒྱད་པའི་བར་དུ་རྒྱུན་མི་འཆད་པར་འཇུག་པ་དང༌། དབང་ཐོབ་པའི་བྱང་སེམས་དང༌།དགྲ་བཅོམ་གཉིས་ཀྱི་རྒྱུད་ལ་ཀུན་གཞི་རང་གི་ངོ་བོ་ལོག་ཀྱང་རྫས་རྒྱུན་མ་ལོག་པས་དེ་ལ་རྣམ་སྨིན་གྱི་རྣམ་ཤེས་ཞེས་དང༌། མཐར་སངས་རྒྱས་པའི་ཚེ་མེ་ལོང་ལྟ་བུའི་ཡེ་ཤེས་ཀྱི་ངོ་བོར་འགྱུར་བ་སོཌ་ཁྱད་ཆོས་དུ་མ་དང་ལྡན་པའི་ཡིད་ཀྱི་རྣམ་ཤེས་དམིགས་བསལ་བ་ཞིག་ལ་འདོད་པ་ཡིན་ནོ།

རྩོམ་ཡིག་འདི་ཐེངས་ 4445 བཀླགས་འདུག