མཛད་པ་བཅུ་གཉིས་ཀྱི་ཚུལ་ལ་བསྟོད་པ་ཞེས་བྱ་བ་བཞུགས་སོ།

རྒྱ་གར་སྐད་དུ། དྭཱི་ད་ཤ་ཀཱ་ར་ནཱ་མ་ན་ཡ་སྟོ་ཏྲཾ༑

བོད་སྐད་དུ། མཛད་པ་བཅུ་གཉིས་ཀྱི་ཚུལ་ལ་བསྟོད་པ། སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ༑

གང་གིས་དང་པོར་བྱང་ཆུབ་ཐུགས་བསྐྱེད་ནས། །  བསོད་ནམས་ཡེ་ཤེས་ཚོགས་གཉིས་རྫོགས་མཛད་ཅིང༌། །
དུས་འདིར་མཛད་པ་རྒྱ་ཆེན་འགྲོ་བ་ཡི།།  མགོན་གྱུར་ཁྱོད་ལ་བདག་གིས་བསྟོད་པར་བགྱི།།

ལྷ་རྣམས་འདུལ་མཛད་འདུལ་བའི་དུས་མཁྱེན་ནས།།  ལྷ་ལས་བབས་ནས་གླང་ཆེན་ལྟར་གཤེགས་ཏེ།།
རིགས་ལ་གཟིགས་ནས་ལྷ་མོ་སྒྱུ་འཕྲུལ་གྱི།  །ལྷུམས་སུ་ཞུགས་པར་མཛད་ལ་ཕྱག་འཚལ་ལོ།།

འབྲོང་ངུར་ཆོས་རྗེ་བཅུ་དྲུག་པར་འབོད་པ་ངེས་དོན་བསྟན་པའི་རྒྱལ་མཚན།

རྒྱལ་བ་འབྲོང་ངུར་ཆོས་རྗེ་བཅོ་ལྔ་པ་ཆེན་པོར་གསོལ་བ་འདེབས་པ་བྱིན་རླབས་འདོད་འཇོ་ཞེས་བྱ་བ་བཞུགས་སོ།།

རྒྱལ་ཀུན་གསང་བདག་མཁྱེན་བརྩེའི་འོད་དཀར་ལས།།

གང་འདུལ་རོལ་གར་བསྟན་དང་འགྲོ་བའི་བཤེས།།
འགྲོ་འདུལ་མཚན་ཅན་འབྲོང་ངུར་ཆོས་ཀྱི་རྗེར།།
གསོལ་བ་འདེབས་སོ་དེང་འདིར་ཐུགས་རྗེས་དགོངས།།

ཟང་ཟིང་ཁྲོད་ནས་ཞི་བའི་གོ་འཕང་བརྙེས།།
བཙན་པོའི་བཙོན་ནས་དགོངས་པའི་ཀློང་ཆེན་བརྡོལ།།
རྐྱེན་ངན་གསེང་ནས་དམ་པའི་འབྲས་རྟགས་ངོམ།།
དོན་གྱི་ཆོས་པ་འགྲོ་འདུལ་དེང་འདིར་དགོངས།།

སྙིང་སྟོབས།

འདི་ནི་ནོར་བུ་བསམ་གྲུབ་ཀྱིས་མཛད་པའི་བརྡ་སྤྲོད་བློ་གསར་ཉེར་མཁོ་དང་བསྟུན་ནས་བསྒྲིགས་པ་ཡིན།

༡༽  རབ་བྱུང་བཅུ་བཞི་པའི་ས་སྦྲུལ། སྤྱི་ལོ་ ༡༨༠༩། གཙང་གཡས་རུའི་བྱེ་བྲག་བཀྲིས་དགེ་འཕེལ་གྱི་ཉེ་འདབས་བཞད་ཅེས་པའི་ཡུལ་དུ་འཁྲུངས། ཡབ་དྷརྨ་བྷ་དྲའི་གཅུང་བཀྲིས་དང་། ཡུམ་ཚེ་རིང་སྲིད་ཆོས་སོ། མཚན་ལ་འཇམ་དབྱངས་རྡོ་རྗེ་ཞེས་གསོལ།

༢༽  དགུང་ལོ་ལྔ། ཁུ་བོ་དྷརྨ་བྷ་དྲའི་དྲུང་དུ་འབྲི་ཀློག་བསླབས།

༣༽  དགུང་ལོ་དྲུག སྦྱོར་ཀློག་བློ་འཛིན་སོགས་ལ་ཐོགས་པ་མེད་པར་གྱུར།

༤༽  དགུང་ལོ་བཅུ་གཅིག རབ་བྱུང་བཅུ་བཞི་པའི་ས་ཡོས། སྤྱི་ལོ་ ༡༨༡༩། བཀྲིས་དགེ་འཕེལ་དགོན་དུ་ཕེབས་ནས་གྲྭ་པ་མཛད། དཀའ་ཆེན་དཀོན་མཆོག་ཆོས་འཕེལ་གྱི་མདུན་དུ་སྐྲ་ཕུད་ཕུལ། བློ་བཟང་ཆོས་འཕེལ་དུ་མཚན་གསོལ།

༥༽  དགུང་ལོ་བཅུ་གཉིས། རབ་བྱུང་བཅུ་བཞི་པའི་ལྕགས་འབྲུག སྤྱི་ལོ་ ༡༨༢༠། དཀའ་ཆེན་དཀོན་མཆོག་ཆོས་འཕེལ་ལས་དགེ་བསྙེན་དང་དགེ་ཚུལ་གྱི་སྡོམ་པ་མནོས། དེ་ནས་བཟུང་མི་ལའི་རྣམ་མགུར་སོགས་གཞུང་མང་མཐར་ཕྱིན་པར་སྦྱངས།

༦༽  དགུང་ལོ་བཅུ་དགུ། བླ་མ་དྷརྨ་བྷ་དྲའི་ཞབས་བཏུགས་ཀྱིས་སྒྲ་རྩིས་སྙན་གསུམ་དང་། མདོ་སྔགས་ཀྱི་གཞུང་ཆེན་མོ་གསན་འགོ་ཚུགས།

ནགས་ཤོད་སྐལ་རྒྱན། བཅོམ་ལྡན་འདས་ཀྱིས་མཉན་ཡོད་དུ་མུ་སྟེགས་སྟོན་པ་དྲུག་ཆོ་འཕྲུལ་ཆེན་པོས་ཚར་བཅད་ནས་འགྲོ་བ་མང་པོ་གྲོལ་བའི་ལམ་བསྟན་པའི་བླ་མེད་ཀྱི་མཛད་ཆེན་དེ་ཉིད་རྗེས་དྲན་དུ། འཇམ་མགོན་བླ་མས་ཆོས་འཁོར་དཔལ་གྱི་ལྷ་སར་ཆོ་འཕྲུལ་སྨོན་ལམ་ཆེན་མོ་བཙུགས་པ་ནས་ཆོ་འཕྲུལ་སྨོན་ལམ་གྱི་ངོ་བོར་གྱུར། ད་བར་ལོ་ངོ་དྲུག་བརྒྱ་ཉེ་བར་གདན་ས་སེ་འབྲས་དགའ་གསུམ་གྱིས་སྲུང་བརྩི་བྱས་པ་མ་ཟད། དགེ་ལྡན་ཡིན་ནོ་ཅོག་ཆོ་འཕྲུལ་སྨོན་ལམ་སྟར་ཆགས་སུ་འཚོགས་སྲོལ་དར་བས་སྐྱེ་འགྲོ་མང་པོར་ཐར་པའི་དགེ་རྩ་བསྐྲུན་པ་སོགས་ཁྱད་འཕགས་ཀྱི་དུས་ཆེན་དང་། རྣམ་དཀར་དགེ་ཚོགས་སྒྲུབ་པའི་དུས་བཟང་ཞིག་ངོས་འཛིན་བྱེད། བསྟན་པའི་སྦྱིན་བདག་རྣམས་མཉན་ཡོད་དུ་རྒྱལ་པོ་རྣམས་ཀྱིས་བསྙེན་བཀུར་བ་བཞིན་བསྙེན་བཀུར་ཚད་མེད་གནང་སྲོལ་དར། སྤྱིར་སྟོན་པའི་མཛད་ཆེན་དེ་དག་དྲན་པ་དང་ཡིད་ལ་བྱས་ན་ཕན་ཡོན་དཔག་མེད་ཐོབ་ཀྱི་ཡོད་པས་ངེས་པར་དྲན་དགོས་པ་དང་། དེ་ཡང་ཚེས་གཅིག་ཉིན་བཅོམ་ལྡན་འདས་ངང་པའི་རྒྱལ་པོ་ལྟར་ནམ་མཁའ་ལས་ཆོ་འཕྲུལ་ཆེན་མོའི་འདུ་ཁང་དུ་གཤེགས། ཚེས་གཉིས་ལ་རྒྱལ་པོ་ཨུ་ཏྲཱ་ཡ་ན་ནས་རྒྱལ་པོ་རྣམས་རེས་མོས་ཀྱིས་ཉིན་བཅོ་ལྔའི་བར་བསྙེན་བཀུར་བ་ལྟར། ཚེས་བཅོ་ལྔར་རྒྱལ་པོ་གཟུགས་ཅན་སྙིང་པོས་བསྙེན་བཀུར། སྟོན་པས་ཆོ་འཕྲུལ་སྣ་ཚོགས་བསྟན་པའི་སྒོ་ནས་མུ་སྟེགས་སྟོན་པ་དྲུག་བཏུལ་འགྲོ་བ་གྲངས་མེད་མཐོ་རིས་དང་ཐར་པའི་གོ་འཕང་ལ་བཀོད། དེ་ལྟར་སྟོན་པས་མཉན་ཡོད་དུ་ཆོ་འཕྲུལ་ཆེན་མོ་བསྟན་པའི་མཛད་པ་དྲན་པ་དང་། དེ་བཞིན་རྗེ་བླ་མས་ཆོ་འཕྲུལ་སྨོན་ལམ་ཆེན་མོར་ཇོ་བོ་རིན་པོ་ཆེར་གསེར་ཟངས་དབུ་རྒྱན་སྒྲོན་པ་དང་། ཚེས་བརྒྱད་དང་བཅོ་ལྔ་ལ་སྐུ་ཡོངས་རྫོགས་གསེར་ཆབ་ཕུལ་བ་སོགས་ངོ་མཚར་བའི་བཀྲ་ཤིས་པའི་མཆོད་པའི་བྱེ་བྲག་བརྒྱ་ཕྲག་སྣ་ཚོགས་བཀོད་ནས་དེ་དག་བདེ་བ་ཆེན་པོར་བྱིན་གྱིས་བརླབས་པ་སོགས་མཆོད་པས་ཕྱོགས་བཅུའི་རྒྱལ་བ་རྣམས་མཉེས་པར་མཛད་པའི་རྗེ་བླ་མའི་རྣམ་ཐར་དག་དྲན་པའི་སྒོ་ནས་དགེ་ཚོགས་སྒྲུབ་པ་ཉམས་ལེན་དངོས་ཡིན་སྙམ་མོ། དེ་རིང་ནི་ཆོ་འཕྲུལ་དུས་ཆེན་གྱི་ཚེས་བཅོ་ལྔ་ཏག་ཏག་རེད། དགེ་ཚོགས་འགྱུར་སྟོབས་ཆེ་བས་འབུམ་འགྱུར་ཟླ་བ་ཞེས་གྲགས། ཁྱོད་ནམ་རྒྱུན་དགེ་བ་སྒྲུབ་ཁོམ་མེད་དམ། ཡང་ན་སྒྲུབ་འདོད་མེད་པ་ཞིག་ཡིན་ཀྱང་སྲིད། གང་ལྟར་རང་གི་འདོད་ཐོག་ལ་བཞག་པས་བློ་བདེ་ཡོད་ངེས། འོན་ཀྱང་སྐབས་ལ་ལར་དགེ་སྒྲུབ་ལ་ཞུགས་ན་ཁྱོད་ལ་ཚོར་བ་དང་གྲུབ་འབྲས་གསར་པ་ཞིག་ཐོབ་སྲིད། འདི་ནི་རྒྱུ་འབྲས་ཀྱི་འགྲོ་སྟངས་རེད།

འབྲོང་ངུར་ཕོ་ཉ །༼འདི་ནི་སྒྲོ་འདོགས་ཤིག་གིས་བརྡ་ཆད་བཙན་གྱིས་སྦྱར་བ་མིན་པར་འོད་གསལ་ཕྱག་རྒྱ་ཆེན་པོའི་ལམ་ནས་ཚེ་གཅིག་སྐུ་བཞིའི་རྒྱལ་སར་གཤེགས་པའི་བླ་མ་དམ་པའི་ཡིན་ལུགས་ཀྱི་སྒོ་ནས་མཚན་བརྗོད་ཚུལ་ཞིག ༽

ཁ་བྱང་གི་འགྲེལ་པ།

ང་རང་ལོ་ན་ཧ་ཅང་ཕྲ་མོའི་དུས་ཤིག་ཡིན་པས་དུས་ཚོད་ངེས་གཏན་ཁ་ཚོན་ཆོད་པ་ཞིག་མི་དྲན་མོད། ཚོད་དཔག་བགྱིས་ན་ཧ་ལམ་སྤྱི་ལོ་ ༡༩༨༧ ཡས་མས་ཤིག་ལ་ཡིན་པ་ཡོད། ངས་སྐྱབས་རྗེ་བླ་མའི་མཚན་ཐོག་མར་ཐོས་པ་དང་སེམས་ལ་བག་ཆགས་ཟབ་མོ་ཡོང་དགོས་དོན་ནི།  དྲིན་ཅན་ཨ་མ་ལགས་ཀྱི་བཀའ་དྲིན་ཡིན། དེ་ཡང་གྲུབ་དབང་བླ་མ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན།  རྗེ་བཙུན་ཆོས་བཟང་རྡོ་རྗེ་འཆང་ཆེན་པོ་གང་ཉིད་རྒྱལ་བ་འབྲོང་ངུར་པ་ཆེན་པོའི་གདན་ས་བཀའ་བརྒྱུད་འཕེལ་རྒྱས་གླིང་དུ་གདན་དྲངས་ཏེ་སྐལ་ལྡན་གདུལ་བྱ་རྣམས་ལ་དྲང་ངེས་ཀྱི་ཆོས་ཀྱི་འཁོར་ལོ་རྒྱ་ཆེར་སྐོར་སྐབས་ཕྲན་གྱི་ཕ་མ་གཉིས་ཀྱང་ཆོས་གྲལ་དེར་ཞུགས་ཐུབ་པའི་སྐལ་བཟང་མངོན་དུ་གྱུར་འདུག་པས།  ཨ་མས་རྒྱུན་དུ་རྗེ་བླ་མའི་གསང་གསུམ་གྱི་རྣམ་ཐར་མོ་རང་གི་མོས་ངོར་གང་མཇལ་གླེང་དྲག་པ་དང་། ཕ་མ་ལ་ཡག་པོ་མ་བྱས་ན།  སངས་རྒྱས་ལ་ལྟག་སྒོ་འབིགས་རྒྱུ་ཡོད་མ་རེད།  ཅེས་བླ་མས་གསུང་གི་འདུག་གདའ།  ཞེས་ཕྲུ་གུ་ཚོར་སློབ་གསོ་རྒྱག་རྒྱུའི་ལུང་འདྲེན་ཡོད་ན་མེད་ན་དེ་རེད་འདུག་པས།  ངའི་སེམས་ཀྱི་གཏིང་རུམ་ན་ཟུབ་དཀའ་བའི་རི་མོ་ལྟར་དུ་རྗེ་བཙུན་མཐོང་བ་དོན་ལྡན་གང་ཉིད་གསལ་ལེར་གནས་གདའ།  འོན་ཀྱང་ང་རང་དངོས་སུ་མཇལ་བའི་བགོ་སྐལ་ཐོབ་རྒྱུ་ལ་ད་དུང་དུས་ཚོད་རིང་པོར་ཐོགས་བྱུང་།  རྒྱུ་མཚན་ནི་རྗེ་བླ་མ་བཞུགས་ས་ས་ཐག་རིང་བ་དང་གཅིག གཙོ་བོར་ཡིད་བཞིན་ནོར་བུ་གང་ཉིད་དུས་ཚོད་ཕལ་ཆེར་སྨྲ་བཅད་དང་སྒྲུབ་པ་ཁོ་ནར་བཞུགས་ཡོད་པས་ཡིན།

འབྲི་རུ་སྐལ་བཟང་རྒྱལ་མཚན།

རྒྱལ་ཀུན་སྙིང་རྗེ་སྒྱུ་འཕྲུལ་རོལ་པའི་གར། །
གང་འདུལ་འགྲོ་བློར་ཤར་བ་མིག་མི་འཛུམ།།
གཉིས་མེད་མི་ཡི་གར་མཛད་སྟག་ཕུ་པ།།
རིགས་བརྒྱའི་ཁྱབ་བདག་པདྨ་བཛྲ་འདུད། །

གང་གི་ཐུན་མོང་རྣམ་ཐར་ལུས་ཕྲ་མར།།
མངོན་བརྗོད་གོས་བཟང་སྙན་ངག་རྒྱན་གྱིས་སྤུད།།
ཉམས་འགྱུར་ཨར་གཞས་གར་དུ་རྩེན་པ་ཡི།།
དཔྱོད་ལྡན་ཡིད་འཕྲོག་དཔལ་གྱི་ལང་ཚོའི་བདག །

བསམ་བཞིན་ཞིང་འདིར་སྲིད་པ་བཟུང་བ་ནས།།
ཐོས་བསམ་སྒོམ་པས་བསྟན་ལ་སློབ་ཚུལ་སོགས།།
མ་འདྲེས་གསལ་བ་བདེ་ཆེན་དགའ་སྟོན་དཔལ།།
ཅུང་ཟད་མྱོང་འདོད་ཅན་ལ་མདོ་ཙམ་སྤེལ།།

 སྒྲུབ་བརྒྱུད་ཀྱི་སྙིང་པོ་དཔལ་གྱ་བ་འབྲོང་ངུར་པ་རིམ་པར་བྱོན་པའི་རྣམ་ཐར་ཐར་པ་དང་ཐམས་ཅད་མཁྱེན་པར་འདྲེན་པའི་གྲུ་གཟིངས་ཞེས་བྱ་བ་བཞུགས་སོ།།
རྩོམ་པ་པོ་ཝ་ཐང་དབུ་རྒན་དམ་ཆོས།

རྩ་བརྒྱུད་བླ་མ་རྒྱལ་བ་རྒྱ་མཚོ་དང་། །
རིགས་གསུམ་སེམས་དཔའི་རྣལ་རོལ་འབྲོང་ངུར་པ། །
ཚེ་རབས་ཀུན་ཏུ་ཡིད་ཀྱི་འོ་མཚོར་རོལ།།
མཆོག་མཐུན་དངོས་གྲུབ་སྩོལ་ལ་བཀའ་གནང་སྩོལ། །

ཅེས་རྗེ་རིན་པོ་ཆེ་སྐུ་ཕྲེང་རིམ་བྱོན་གྱི་རྣམ་པར་ཐར་པ་དཔག་ཏུ་མེད་པ་དང་སྐྱེས་རབས་ཀྱི་དབང་དུ་བྱས་ན་སངས་རྒྱས་མར་མེ་མཛད་ཀྱི་སྐབས་ནས་ཉ་པའི་བུ་ཆུང་སྤང་ལེབ་འཛིན་སོགས་བྱང་སེམས་ཀྱི་རྣམ་རོལ་གྲངས་ལས་འདས་པ་དང་། བདག་ཅག་གི་སྟོན་པའི་སྤྱན་སྔར་བྲམ་ཟེ་ཧ་ལུ་པ་སོགས་དང་། སངས་རྒྱས་གཉིས་པ་པདྨ་འབྱུང་གནས་ཀྱི་སྤྱན་སྔར་ལོ་ཙཱ་བ་སྭ་ཡེ་ཤེས་སྙིང་པོའི་སྐྱེ་བ་བཞེས་ཤིང་། ཞི་ཁྲོ་ཕུར་གསུམ་མན་ངག་དང་བཅས་པ་གུ་རུ་རིན་པོ་ཆེ་ལས་ཞུས་ནས་སྐྱེ་བ་བརྒྱ་དང་བརྒྱད་བར་འགྲོ་བའི་དོན་བགྱིད་དགོས་པར་གུ་རུ་རིན་པོ་ཆེས་ལུང་བསྟན་པ་སོགས་དཔག་ཏུ་མེད་པ་ལས། འདིར་དཔལ་སྒྲུབ་བརྒྱུད་ཀྱི་སྙིང་པོ་གྱ་བ་གངས་པ་རིན་ཆེན་འོད་ཟེར་ཞེས་ཡོངས་སུ་གྲགས་པ་དེ་ཉིད་ཀྱི་སྐྱེ་བ་བཞེས་པ་ནས་བཟུང་འབྲོང་ངུར་ཆོས་རྗེ་ཞེས་སྐུ་ཕྲེང་རིམ་པར་བྱོན་པ་དག་གི་རྣམ་ཐར་ཉུང་ངུ་རྣམ་གསལ་བྱས་ཏེ་དགོད་པ་ཡིན་ནོ། །

མདོ་ཁམས་ནགས་ཤོད་ལ་རགས་ཙམ་དཔྱད་པ་བྱུང་རབས་ལ་ལྟ་བའི་འདྲེན་བྱེད།

གྲངས་མེད་ཚོགས་གཉིས་སྐྱ་རེངས་ཀྱིས་དྲངས་མཚན་དཔེའི་དྲྭ་བས་མཛེས་པའི་སྐུ། །
རྟེན་འབྱུང་གཏམ་གྱི་ཟེར་མ་འཕྲོ་བས་མ་རིག་སྨག་ཆེན་འཇོམས་པའི་གསུང༌། །
རྒྱུད་ལྔའི་འགྲོ་ལ་བྱམས་བརྩེའི་འོད་བརྒྱ་ཀུན་ལ་སྙོམས་པར་འཇུག་པའི་ཐུགས། །
ལྷ་དང་བཅས་པའི་འགྲོ་བའི་འདྲེན་མཆོག་ཐུབ༵་དབ༵ང་སྨྲ༵་བ༵འི་ཉི་མ༵ས་སྐྱོངས།།

བདེ་གཤེགས་མགྲིན་པའི་ཚངས་དབྱངས་ལས་འོང་བརྒྱད་ཁྲི་བཞི་སྟོང་དམ་པའི་ཆོས། །
མདོ་རྒྱུད་དུ་མར་ལུང་གིས་བསྔགས་པའི་གངས་ཅན་བོད་ཀྱི་རྒྱལ་ཁམས་སུ། །
རྨད་བྱུང་སྙིང་སྟོབས་གོ་ཆ་བཙན་པོས་འདྲེན་མཛད་ཆོས༵་རྒྱལ༵་ལོ་པཎ༵་ཚོགས། །
སྙིང་ནས་གུས་པས་ཡིད་ཀྱི་འོ་མཚོ་གྱེན་དུ་འཕྱུར་ཤིང་ལག་པད་ཟུམ། །

རྟོགས་དཀའི་ཟབ་གནད་ལྷུག་པོར་བཀྲལ་བའི་འཆ༵ད་པའི་ལུང་རིགས་གཏེར་ཁ་བརྡོལ། །
ངན་རྟོག་བྲག་རི་ཕྱེ་མར་གཏོར་བའི་རྩོད༵་པའི་ཐལ་ངག་ཐོག་མདའ་འཕེན། །
ཐུབ་བསྟན་ཚེ་ཡི་དཔལ་སྦྱིན་སྩོལ་བའི་རྩོམ༵་པའི་ལེགས་བཤད་ཕྲེང་བ་སྤེལ། །
མཁས་དང་གྲུབ་པའི་འཁོར་ལོས་བསྒྱུར་མཛད་རིམ༵་བྱོན༵་བཤེས༵་གཉེན༵་རྣམས་ལ་འདུད།།

རྭ་བ་གངས་རིའི་ཞིང་གི་མདོ་ཁམས་སྦས་ཡུལ་ནག༵ས་ཤོད༵་སྨན་ལྗོངས་ཀྱི། །
སྣོད་བཅུད་ཆགས་རིམ་ཆུ་ཀླུང་ཡོངས་འདུས་སྣ་ཚོགས་རིན་ཆེན་འབྱུང་གནས་ཆེར། །
འཕོ་འགྱུར་དྲི་བཞོན་ཤུགས་ཀྱིས་བསྐུལ་བའི་རླབས་ཕྲེང་བརྩེགས་པའི་གཟེགས་མ་ལས། །
དྲང་སེམས་ཀུ་ཤའི་རྩེ་མོས་བླངས་པའི་བྱུང་རབས་ཆུ་ཐིགས་ཙམ་ཞིག་སྤེལ། །

མིའུ་འདྲ་ཆཊ་ལས།མདོ་ཁམས་གདུགས་ཆེན་བརྐྱང་པ་འདྲ། །སྒང་ཆེན་ཕག་མོ་ཉལ་བ་འདྲ། །སྒང་ཕྲན་ཕོ་གུས་བསྣུར་བ་འདྲ། །རི་བོ་ཁྲི་གདུགས་བརྐྱངས་པ་འདྲ། །རི་མགོ་རྨོག་ཕོར་སྒོར་བ་འདྲ། །རི་རྩེ་མདུང་མོ་གཤིབ་པ་འདྲ། །ཐང་ནི་དར་དཀར་བདས་པ་འདྲ། །དེ་མདོ་ཁམས་ས་ཡི་འདྲ་ལུགས་ཡིན། ཞེས་པ་དང༌། དུང་དཀར་ཚིག་མཛོད། ཤོག་གྲངས། ༡༡༣༦ ཕྲེང༌།

༢༠ ལས། སོག་ལ་སྐྱ་བོ་ནས་རྨ་ཆུ་ཁུག་པ་ཡན་མདོ་སྟོད་མི་ཡི་ཆོལ་ཁ། ཡང༌། མདོ་སྟོད་ལ་ནང་གསེས་ཀྱི་ཕྱེ་ན་ཆུ་བཞི་(ནི་རྫ་ཆུ། རྒྱལ་མོ་རྔུལ་ཆུ། འབྲི་ཆུ། ཟླ་ཆུ) དང་སྒང་དྲུག་(ནི་ཟལ་མོ་སྒང༌། ཚ་བ་སྒང༌། སྨར་ཁམས་སྒང༌། སྤོ་འབོར་སྒང༌། དམར་རྫ་སྒང༌། མི་ཉག་རབ་སྒང་)ཏུ་ཕྱེ་བ་ཡིན་ནོ། ཞེས་གསུངས་པ་ལྟར་སྒང་དང༌། གཤོང་འབུར་ཐང་བཅས་ས་ཆའི་ཆགས་སྟངས་དང་བསྟུན་ནས་ཐ་སྙད་སྣ་ཚོགས་བཏགས་པ་ནི། མིའུ་འདྲ་ཆགས་ལས།ས་བཅད་ཡུལ་བགོས་སྲིད་པས་བྱས། །ཡུལ་མཚམས་ཐམས་ཅད་ཆུ་ཡིས་ཕྱེ། །ཡུལ་རེར་ཆུ་རེ་མིང་དུ་བཏགས། །ཞེས་པ་ལྟར་ཁམས་ཀྱི་སྲིང་མོ་རྫོང་གསུམ། མདོ་ཁམས་ཀྱི་ཆུ་ཆེན་གསུམ། མདོ་ཁམས་སྒང་བཞི། མདོ་ཁམས་ཆུ་བཞི་སྒང་དྲུག །མདོ་ཁམས་སྒང་ལྔ།མདོ་ཁམས་ཕྱུག་དྲུག །མདོ་ཁམས་རོང་དགུ །མདོ་ཁམས་ཤོད་ཆེན་བཅོ་བརྒྱད་བཅས་དུ་མར་བཤད་པ་ལས། ཁམས་ཀྱི་སྲིང་མོ་རྫོང་གསུམ་ནི་ནགས་ཤོད་རང་ལ་ཆགས་པ་ནི་བསླུ་མེད་རྡོ་རྗེའི་ལུང་གིས་ཟིན་པ་ཞིག་ཡིན་ཏེ། སྔ་འགྱུར་རྫོགས་ཆེན་ཆོས་འབྱུང་ཆེན་མོར་དྲངས་པའི་ལུང་བསྟན།

དར་མའི་སྲས་འོད་སྲུང་གི་གདུང་རྒྱུད་ལྷ་བླ་མ་ཡེ་ཤེས་འོད་ཀྱིས་མེ་སྤྲེལ་༩༩༦ལོར་མངའ་རིས་མཐོ་ལྡིང་གསེར་གྱི་ལྷ་ཁང་བཞེངས། རྒྱ་གར་ནས་པཎྜྀ་ཏ་དྷརྨ་པཱ་ལ་སྤྱན་དྲངས་ནས་དམ་པའི་ཆོས་འདུལ་བ་འཆད་ཉན་བྱས། དེའི་སློབ་མ་སདྷུ་པཱ་ལ། གུ་ཎ་པཱ་ལ། པྲཛྙཱ་པཱ་ལ་བཅས་པཱ་ལ་རྣམ་གསུམ་སྤྱན་དྲངས། དེ་རྣམས་ལས་ཞང་ཞུང་རྒྱལ་བའི་ཤེས་རབ་ཀྱིས་སྡོམ་པ་བླངས།

དེའི་སློབ་མ་དཔལ་འབྱོར་དང་ཞང་མོ་ཆེ་བ་བྱང་ཆུབ་སེང་གེ་ལ་སོགས་པ་ནས་བརྒྱུད་དེ་འདུལ་བའི་བསྟན་པ་སྤེལ་བ་དེ་ལ་སྟོད་འདུལ་ཞེས་གྲགས། ལྷ་བླ་མས་རིན་ཆེན་བཟང་པོ་སོགས་བློ་རྣོ་བའི་ཁྱེའུ་མང་པོ་རྒྱ་གར་དུ་ཆོས་སློབ་པར་བཏང་ལོ་ཆེན་རིན་ཆེན་བཟང་པོས་སློབ་གཉེར་མཐར་ཕྱིན་ཏེ་བོད་དུ་ཕེབས། ལོ་ཆེན་གྱིས་བོད་དུ་མདོ་རྒྱུད་མང་པོ་བསྒྱུར། བསྟན་པ་ཕྱི་དར་སྐབས་རྒྱ་དཔེ་བསྒྱུར་བ་དེ་ནས་འགོ་ཚུགས།

བསྟན་པ་བསྣུབས་པའི་ལྕགས་བྱ་ནས་རྩིས་ན་ལོ་ངོ་བརྒྱ་དང་དགུ། ཧྲིལ་པོ་བརྒྱ་དང་བརྒྱད་སོང་བ་དེར་སྔ་དར་དང་ཕྱི་དར་གཉིས་གྱི་བར་སྟོང་ཡིན་ཞེས་མཁས་དབང་དུང་དཀར་གྱི་གསུང་འབུམ་དུ་གསལ།