ནགས་ཤོད་སྐལ་རྒྱན།
གཞུང་བརྒྱ་སྨྲ་བའི་ལྩེ་རྩེ་རྣོ་བརྟུལ་ནས། །
གསང་རྒྱ་གཏོར་བའི་ཀླད་རྒྱ་ཆེ་ཆུང་བར། །
རྒོལ་བ་སུས་ཀྱང་འགྲན་པ་མི་བཟོད་པའི། །
ཐུབ་ཆེན་མི་ཡི་སེང་གེ་སྐྱབས་སུ་བསྟེན། །

དངོས་སྟོབས་རིགས་པ་ཉི་ཟླའི་འོད་རབ་ཀྱི། །
ཟེར་ཕྲེང་ཟླུམ་གཟུགས་གོ་ལར་ལྷུང་བ་ནས། །
དཔྱོད་ལྡན་མཁས་ཀུན་འཇུག་པའི་འགྲམ་ངོགས་ཀྱི། །
སྒྲ་རིག་ལེགས་བཤད་སྣང་བས་ཤིས་པ་སྒྲུབས། །
དེ་ཡང་ཇི་སྐད་དུ། ཚིག་གི་ཐོག་མཐའ་ནམ་མཁའི་མཐོངས་ལྟར་ཡངས། ཞེས་པ་ལྟར་མཁས་པ་རྣམས་གཞུང་ལུགས་འགྲེལ་ཚུལ་ནི་ལུགས་བརྒྱ་ལྡན་དུ་འདོད་པ་དང་། འཆད་པའི་ཐོག་མར་སྒྲ་དང་མི་འགལ་བའི་ཚིག་རྣམ་པར་དབྱེ་སྟེ་བཤད་པ་དང་། །དེ་ཡང་འཇིག་རྟེན་ལ་གྲགས་པ་དང་། བསྟན་བཅོས་ལ་གྲགས་པ། ཐུན་མོང་མ་ཡིན་པ་ལ་གྲགས་པའི་སྒྲ་གསུམ་སྟེ། འཇིག་རྟེན་ཐུན་མོང་ལ་གྲགས་པའི་སྒྲ་ལ་འདོད་རྒྱལ་དང་རྗེས་གྲུབ་བོ། །བསྟན་བཅོས་ལ་གྲགས་པའི་སྒྲ་ནི་སྒྲ་པ་རྣམས་ལ་གྲགས་པ་རྣམ་དབྱེ་དང་བྱེད་པའི་ཚིག་ལ་སོགས་པས་བསྒྲུབས་པ་མཁས་པ་རྣམས་ཀྱིས་གོ་བའི་བརྡའོ། །ཐུན་མོང་མ་ཡིན་པ་ལ་གྲགས་པའི་སྒྲ་ནི་སྒྲ་འཇུག་པའི་རྒྱུ་མཚན་བཤད་དཀའ་ཞིང་། འཕགས་པའི་གང་ཟག་ལ་དགོས་པ་ཤིན་ཏུ་ཆེ་བ། མདོ་སྡེ་དག་ལས་ཅུང་ཟད་ལས་མ་བཤད་མོད། རྒྱུད་སྡེ་རྣམས་ལས་མང་དུ་བཤད་པ། དེ་བཞིན་གཤེགས་པའི་བརྡ་ཞེས་གྲགས་པའོ། །དེ་ལྟ་བུའི་སྒྲའི་རྣམ་དབྱེ་ལེགས་པར་ཁོང་དུ་ཆུད་ནས་གཞུང་འཆད་པའི་ཐོག་མར་གཞུང་གི་མཚམས་སོ་སོར་བཅད་པ་དང་། གཞུང་དེས་རང་གི་རྩ་བ་ཇི་ལྟར་བཤད་པ་རྣམས་བསྟན་པས་དཀྱུས་ས་བསྟན་པའི་རྟ་བཞིན་དུ་འཆད་པ་དང་ཉན་པ་རྣམས་ཀྱི་བློ་མི་འཁྲུག་ཅིང་དོན་ཚན་རྣམས་སོ་སོར་ཕྱེད་པར་འགྱུར་བའི་ཕྱིར་གཞུང་གི་ཆིངས་དང་ས་བཅད་ཀྱི་སྒོ་ནས་ལེགས་པར་འཆད་པ་དང་། གཞུང་ལས་ཁྱད་པར་གྱི་གཞི་བསྡུས་ལ་ངག་དོན་བླང་། ཁྱད་པར་གྱི་ཆོས་བཤད་དེ་ཚིག་རྣམ་པར་དབྱེ་བར་བྱའོ། །

དེ་ལྟ་བུའི་འཆད་ལུགས་ལེགས་པར་ཤེས་ན་ལེགས་པར་སྦྱར་བའི་སྒྲ་དང་མཐུན་པ་མ་ཟད་མཁས་པ་རྣམས་དགའ་བ་དང་མགུ་བ་བསྐྱེད་པ། ཚིག་དོན་ལྷག་ཆད་མེད་པ་ཤེས་པར་འགྱུར་བ་སྟེ། སེང་གེའི་ལྟ་སྟངས་ཀྱིས་ཁྱད་པར་གྱི་གཞི་བླང་། སྦལ་པའི་འཕར་བས་སྐབས་དོན་སོ་སོར་དབྱེ། རུས་སྦལ་གྱི་འགྲོས་ཀྱིས་ཚིག་དོན་འཇེབས་པར་བཤད། ཅེས་སྒྲའི་བསྟན་བཅོས་ལས་ཇི་སྐད་གསུངས་པ་ལྟར་གཞུང་ལུགས་རྒྱ་ཆེ་ཞིང་དཀའ་བ་རྣམས་བཤད་པར་བྱའོ། །དམ་པ་རྣམས་ཀྱིས་གཞུང་ལུགས་འཆད་སྐབས་མདོ་དོན་བཤད་ཐབས་ཡན་ལག་ལྔ་དང་། རྒྱུད་དོན་རྒྱན་བདུན་གྱི་སྒོ་ནས་འཆད་དགོས་པ་གསུངས་ཏེ། རྗེ་བཙུན་བྱམས་མགོན་གྱིས་མདོ་དོན་བདེ་བླག་ཏུ་རྟོགས་པའི་མན་ངག །དགོས་དོན་དང་། བསྡུས་དོན་དང་། ཚིག་དོན། མཚམས་སྦྱོར། བརྒལ་ལན་བཅས་བཤད་ཐབས་ཡན་ལག་ལྔའི་སྒོ་ནས་བསྟན་བཅོས་མངོན་རྟོགས་རྒྱན་གྱིས་མདོ་འཆད་པར་བྱེད་དོ། །མདོ་དོན་འཆད་པར་བྱེད་པ་ལ་དེ་ལྟ་བུའི་བཤད་ཐབས་ཡན་ལག་ལྔ་ཅི་དགོས་ཤེ་ན། རྣམ་བཤད་རིགས་པར། མདོ་དོན་ཆེ་བ་ཉིད་ཐོས་ནས། །ཉན་པ་དང་ནི་འཛིན་པ་ལ། །ཉན་པ་པོ་ནི་གུས་བྱེད་པས། །ཐོག་མར་དགོས་པ་བརྗོད་པར་བྱ། །དེ་འགྲུབ་དེ་ནི་བསྡུས་དོན་ལས། །བསྡུས་པའི་དོན་ནི་ཚིག་དོན་ལས། །གོ་རིམ་རིམ་པ་སྔ་ཕྱི་དག །མི་འགལ་བ་ནི་གཉིས་ལས་སོ། །ཞེས་པ་ལྟར་མདོ་དོན་གྱི་ཆེ་བ་ཐོས་ནས་ཉན་པ་དང་འཛིན་པ་ལ་གུས་པ་བསྐྱེད་པའི་ཆེད་དུ་ཐོག་མར་དགོས་དོན་གྱི་སྒོ་ནས་འཆད་པ་དང་། མདོ་དོན་བདེ་བླག་ཏུ་རྟོགས་པའི་དགོས་དོན་དེ་ཡང་བསྡུས་དོན་ལུས་རྣམ་གཞག་ལ་རག་ལས་པས་བསྡུས་དོན་གྱི་སྒོ་ནས་འཆད། བསྡུས་དོན་དེ་ཡང་ཚིག་དོན་ཡན་ལག་རྒྱས་བཤད་ལ་རག་ལས་པས་ཚིག་དོན་གྱི་སྒོ་ནས་འཆད། ཚིག་དོན་གྱི་གོ་རིམ་རྣམས་འབྲེལ་བ་ནི་མཚམས་སྦྱོར་ལ་རག་ལས་པས་མཚམས་སྦྱོར་གྱི་སྒོ་ནས་འཆད། རིགས་པ་སྔ་ཕྱི་མི་འགལ་བ་ནི་བརྒལ་ལན་ལ་རག་ལས་པས། བརྒལ་ལན་གྱི་སྒོ་ནས་ཏེ། མདོ་དོན་བདེ་བླག་ཏུ་རྟོགས་པར་བཤད་ཐབས་ཡན་ལག་ལྔའི་སྒོ་ནས་འཆད་པ་ནི་བྱམས་པའི་མན་ངག་བླ་ན་མེད་པའོ། །

རྒྱུད་དོན་རྟོགས་པའི་མན་ངག་རྒྱན་བདུན་ནི། རྒྱ་རིམ་པ་བདུན་གྱིས་བཏབ་ནས་བཞག་པའི་གསང་བའི་རྒྱ་བཀྲོལ་བའི་མན་ངག་གི་རིམ་པ་ཡིན་ལ། དེ་ལ་གང་བཤད་པར་བྱ་བའི་གཞི་གླེང་བསླང་བའི་རྒྱན། བཤད་དོན་ལམ་གྱི་རིམ་པ་བསྒྲིགས་པ་འཚང་རྒྱ་ཚུལ་གྱི་རྒྱན། གཞུང་གི་ཚིག་དང་དོན་སོ་སོའི་འཆད་ཚུལ་མཐའ་དྲུག་གི་རྒྱན། གཞུང་གཅིག་གི་དོན་རྫོགས་པར་འཆད་པ་ཚུལ་བཞིའི་རྒྱན། དོན་གང་སློབ་མ་གང་ལ་འཆད་པ་འཆད་ཚུལ་གྱི་རྒྱན། རྒྱུད་ལ་འཇུག་པ་གང་ཟག་ཉན་པ་པོའི་རྒྱན། དགོས་པ་བདེན་གཉིས་ངེས་པའི་རྒྱན་བཅས་རྒྱལ་བ་རྡོ་རྗེ་འཆང་གིས་རྩ་རྒྱུད་དང་བཤད་རྒྱུད་དུ་གསུངས་པའི་མན་ངག་རྣམས་མགོན་པོ་ཀླུ་སྒྲུབ་ཀྱིས་ལུང་རིགས་ལམ་ནས་ལེགས་པར་ཤན་སྦྱར་བའི་མན་ངག་ཟབ་མོ་འདི་དག་ལ་བརྟེན་ནས་རྒྱུད་དོན་ལེགས་པར་རྟོགས་དགོས་པར་གསུངས་སོ། །རྒྱུད་འཆད་ཉན་ཙམ་དུ་མ་ཟད་འཆད་པའི་མན་ངག་གི་རིམ་པ་འདི་དག་འཆད་ཉན་སྐབས་ཐམས་ཅད་དུ་སྦྱར་ཤེས་ན་མན་ངག་གི་གནད་དུ་མ་ཡོད་དེ། དང་པོ་གླེང་གཞིའི་རྒྱན་ལ་མཚོན་ན། རྒྱུད་འདིའི་མིང་གང་ཡིན་པ་དང་། གང་ཟག་གང་གི་དོན་མཛད་པ། མཛད་པ་པོ་སུ་ཡིན། རྒྱུད་འདིའི་ཚད་གང་ཡིན། འདི་ཡི་དགོས་པ་ཅི་ཞིག་ཡིན། ཞེས་དོན་ཚན་ལྔ་ལ་དྲི་ལན་གྱི་སྒོ་ནས་བརྡར་ཤ་བཅད་པ་བཞིན་འཆད་ཉན་བྱེད་སྐབས་ཐོག་མར་གླེང་གཞིའི་ཚུལ་དུ་བསྟན་བཅོས་དེའི་མིང་དང་། གང་ཟག་གང་གི་དོན་དུ་མཛད་པ། རྩོམ་པ་པོ་གང་གིས་མཛད་པ། བསྟན་བཅོས་དེའི་ཚིག་དོན་གྱི་ཚད་གང་ཡིན། དགོས་པ་ཅི་ཞིག་ཡིན་མིན་སོགས་བརྡར་ཤ་བཅད་ནས་འཆད་དགོས་པ་མཚོན་ཡོད།
གཉིས་པ་འཚང་རྒྱ་ཚུལ་གྱི་རྒྱན་ལ། རྒྱུད་དང་གླེང་གཞི་ངེས་ཚིག་རྒྱུ་བཅས་བཞི་གསུངས་པ་ནི་སངས་རྒྱས་བཅོམ་ལྡན་འདས་ཀྱི་རྣམ་ཐར་གྱི་སྡོམ་ལྟ་བུ་སྟེ། དང་པོར་མི་ཁོམ་བརྒྱད་སྤངས་པའི་འཛམ་བུ་གླིང་པའི་མིར་སྐྱེ་བ་འཁྲུངས་པ་ནི་རྒྱུད་དང་། དེ་ནས་རབ་ཏུ་བྱུང་བ་ནི་གླེང་གཞི། རབ་ཏུ་བྱུང་ནས་འདུལ་བ་བཞིན་སྡོམ་པ་ངེས་པར་བསྲུང་དགོས་པ་ནི་ངེས་ཚིག །དེ་ནས་འབྲས་བུ་བྱང་ཆུབ་འདོད་པས་དཀའ་བའི་ཆོས་སྤྱོད་པ་བསམ་གཏན་བཞི་པའི་རབ་མཐའི་ཏིང་ངེ་འཛིན་ཁྱད་པར་ཅན་རྙེས་པ་ནི་ཉེ་རྒྱུ། ཞེས་གསུངས་པ་ནི་ཆགས་བྲལ་ལམ་གྱི་འཚང་རྒྱ་ཚུལ་དང་ཆགས་བཅས་ལམ་གྱིས་འཚང་རྒྱ་ཚུལ་དཔེ་འདིས་འཚོན་པའོ། །
གསུམ་པ་གཞུང་གི་ཚིག་དང་དོན་སོ་སོའི་འཆད་ཚུལ་མཐའ་དྲུག་གི་རྒྱན་ལ། དྲང་དོན་ངེས་དོན་གཉིས། དགོངས་དགོངས་མིན་གཉིས། སྒྲ་ཇི་བཞིན་ཡིན་མིན་གཉིས་བཅས་དྲུག་ནི་མཐའ་དྲུག་གོ །
བཞི་པ་གཞུང་གཅིག་གི་དོན་རྫོགས་པར་འཆད་པ་ཚུལ་བཞིའི་རྒྱན་ལ། ཡིག་དོན། སྤྱི་དོན། སྦས་དོན། མཐར་ཐུག་པའི་དོན་ཏེ་བཞིའོ། །གཞུང་དོན་ཇི་ལྟར་འགྲེལ་བ་མཐའ་དྲུག་ཚུལ་བཞིའི་རྒྱན་གཉིས་ཇི་བཞིན་མ་ཤེས་ན་རྒྱུད་དོན་ཇི་བཞིན་འཆད་མི་ཐུབ་པ་ནི་འདུས་པའི་རྒྱུད་ལྟ་བུ་ལ་འཐའ་དྲུག་ཚུལ་བཞིའི་འཆིང་བས་བཅིངས་པ་སྟེ་རྒྱས་བཏབ་པས་ཤིན་ཏུ་རྟོགས་དཀའ་བའི་གནས་ཀྱིས་སོ། །འགྲེལ་ཚུལ་འདི་དག་ཡེ་ནས་མི་ཤེས་པར་རྒྱུད་དོན་དྲང་ཐད་སྒྲས་ཟིན་ཙམ་ལ་འགྲེལ་ན་སྙིང་པོ་མེད་པ་མ་ཟད་རྟོག་གེ་འགས་སངས་རྒྱས་ལ་འགལ་འདུ་སྒྲིག་ཁུལ་གྱི་རྒྱུད་ཚིག་ཐར་ཐོར་སྐྱོར་བ་ནི་རང་གི་དེ་ཉིད་སྟོན་པ་ཙམ་མོ། །མཐའ་དྲུག་མི་ཤེས་ན་མདོ་རྒྱུད་གང་བཤད་ཀྱང་ནོར་བར་འགྱུར་ཏེ། སློབ་དཔོན་ཟླ་བ་གྲགས་པས། མཐའ་དྲུག་བྲལ་བས་ངེས་པར་རྟོགས་ཞེས་གང་སྨྲ་བ། །ཟླ་བ་ལྟ་འདོད་སོར་མོའི་རྩེ་ལ་ལྟ་དང་མཚུངས། །ཞེས་གསུངས་སོ། །རྡོ་རྗེའི་ཚིག་ལྟ་ཞོག་མདོ་ཕྱོགས་ལའང་ཀླུ་སྒྲུབ་དང་ཐོགས་མེད་ཀྱིས་ཤིང་རྟའི་སྲོལ་ཕྱེ་བའི་རིགས་པའི་ལམ་ལ་མ་བསྟེན་པར་སྒྲས་ཟིན་ཙམ་དྲང་ཐད་ལ་འགྲེལ་ན་གཞུང་དོན་ཇི་བཞིན་རྟོགས་མི་ཐུབ་པས། མདོ་རྒྱུད་འཆད་ཉན་སྐབས་ཐམས་ཅད་དུ་བཤད་ཐབས་ཡན་ལག་ལྔའི་མན་ངག་དང་། མཐའ་དྲུག་ཚུལ་བཞིའི་རྒྱན་ལེགས་པར་མ་སྦྱངས་པར་མདོ་སྔགས་ཀྱི་གཞུང་ལུགས་ལ་འཆད་ཉན་དང་དགག་སྒྲུབ་བྱེད་ཁུལ་ནི་ཕོ་སྒྲོབ་ཧམ་པའི་ཁྲམ་གཏམ་ཙམ་ལས་ས་ཆོད་ཅི་ཡང་མི་འོང་ངོ་། །

ལྔ་པ་དོན་གང་སློབ་མ་གང་ལ་འཆད་པ་འཆད་ཚུལ་གྱི་རྒྱན་ལ་གཉིས། ཚོགས་པ་དང་སློབ་མ་ལ་བཤད་པའོ། །བཤད་པ་གཉིས་པོ་དེ་གང་ཡིན་སྙམ་ན། མཐའ་དྲུག་གི་ནང་ནས་སྒྲ་ཇི་བཞིན་པ་དང་། དགོངས་པ་མིན་པ་དང་། དེར་མ་ཟད་དྲང་དོན་དུ་གྱུར་པ་གང་ཡིན་པ་སྟེ་གསུམ་དང་། ཚུལ་བཞིའི་ནང་ནས་ཡིག་སྤྱི་གཉིས་བཅས་ཚོགས་པ་ལ་བཤད་པར་བྱ་བ་ཡིན་པར་བརྗོད་དོ། །མཐའ་དྲུག་གི་ནང་ནས་སྒྲ་ཇི་བཞིན་མིན་པ་དང་། ངེས་པའི་དོན་དང་། དེ་བཞིན་དགོངས་ཏེ་བཤད་པ་གསུམ་དང་། ཚུལ་བཞིའི་ནང་ནས་སྦས་དོན་དང་། མཐར་ཐུག་པའི་དོན་རྣམས་ནི་སློབ་མ་ལ་བཤད་པར་བྱ་བ་ཡིན་པར་བརྗོད་དོ། །རྒྱན་འདི་ལས་དོན་གང་ཞིག་གང་ཟག་སུ་ལ་བཤད་དགོས་དང་མི་དགོས་ཀྱི་རྣམ་དབྱེ་ལེགས་པར་ཕྱེ་ནས་འཆད་དགོས་པར་གསུངས་སོ། །

ནགས་ལྷའི་གཡག་རྒོད།

རྒྱལ་བ་སངས་རྒྱས་ཀུན་གྱིས་བགྲོད་པའི་ཡུམ།།
ཡུམ་ཆེན་ཤེར་ཕྱིན་གཞུང་གི་སྦས་པའི་དོན།།
དོན་བཞིན་གཟིགས་ནས་སྟོན་པ་ཀུན་ལས་རྒྱལ།།
རྒྱལ་བ་བྱམས་པ་གང་དེར་སྤྱི་བོས་འདུད།།
དེ་ལྟར་དམ་པའི་ཕྱག་སྲོལ་ལྟར་ཕྱག་འཚལ་བ་སྔོན་དུ་བཏང་ནས་འདིར་བྱ་བ་ཅི་ཞིག་རྩོམ་པ་ནི། རྩ་བར། ཚུལ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་རྣམས་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིར་པར་འདོད། །ཅེས་པའི་གཞུང་འདིའི་དོན་བཤད་པར་བྱ་བ་ཡིན་ལ། འདི་ལ་དངོས་བསྟན་རྗེས་འགྲོའི་སྒོ་ནས་ཐེག་ཆེན་གྱི་གཞི་ཤེས་བསྟན་པ་དང་།
ཤུགས་བསྟན་ལྡོག་འགྲོའིི་སྒོ་ནས་ཐེག་དམན་གྱི་གཞི་ཤེས་བསྟན་པ་གཉིས་ནི་འགྲེལ་པ་ལས། དུས་གསུམ་པའི་ཆོས་རྣམས་ཞེས་པ་ནས་སྲིད་པ་དང་ཞི་བ་ལ་མི་གནས་པ་ཡིན་ནོ། །ཞེས་པའི་བར་དང་། ཡང་ཀུན་ཤེས་པ་ཉིད་ཀྱི་སྐབས་ལས་བཟློག་སྟེ་བསྟན་པས་ཞེས་པ་ནས་འཁོར་བ་དང་མྱ་ངན་ལས་འདས་པ་ལ་གནས་པ་ཡིན་པ་ཤེས་པར་བྱའོ། །ཞེས་གསུངས་བར་གསུངས་སོ།།

རྩ་འགྲེལ་དེ་དག་ལས། ཚུ་རོལ་ཕ་རོལ་མཐའ་ལ་མིན། །ཞེས་དང་། ཤེས་རབ་ཀྱིས་ཚུ་རོལ་གྱི་མཐའ་འཁོར་བ་དང་། སྙིང་རྗེས་ཕ་རོལ་གྱི་མཐའ་མྱ་ངན་ལས་འདས་པ་སྟེ། ཞེས་པའི་དོན་ལ། གཞན་ལུགས་འགོད་པ། ལུགས་དེ་འགོག་པའི་ཚུལ། རང་གི་ལུགས་ལ་དོགས་པ་འགོད་པའོ།། དང་པོ་ནི། བུ་སྟོན་དང་ཉ་དབོན་གྱི་ལུགས་ལ་སྐབས་འདིའི་ཀུན་རྫོབ་ལ་ལྟོས་པའི་སྲིད་མཐའ་འགོག་བྱེད་ཀྱི་ཤེས་རབ་ནི། དུས་རྣམས་མཉམ་པ་ཉིད་ཤེས་ཕྱིར། །ཞེས་པའི་སྐབས་ནས་བསྟན་པའི་དུས་གསུམ་མཉམ་པ་ཉིད་དུ་རྟོགས་པའི་ཤེས་རབ་ལ་བཞེད་པ་ཡིན་ཏེ། བུ་འགྲེལ་ལུང་གི་སྙེ་མ་ལས། སངས་རྒྱས་དང་བྱང་སེམས་རྣམས་ལ་ཉེ་བར་གྱུར་པར་འདོད་པའི་ཡུམ་གང་ཡིན་དེ་ནི་ཆོས་ཅན། སྲིད་པ་དང་ཞི་བ་ལ་མི་གནས་པ་ཡིན་ཏེ། དུས་གསུམ་གྱིས་བསྡུས་པའི་ཆོས་རྣམས་སྐྱེ་བ་མེད་པའི་མཉམ་པ་ཉིད་དུ་མངོན་སུམ་དུ་རྟོགས་པ་སྙིང་རྗེ་ཆེན་པོ་དང་འབྲེལ་བའི་ཕྱིར། ཞེས་དང་། ཉ་ཊཱིཀ་ཡིད་ཀྱི་མུན་སེལ་ལས། བྱང་འཕགས་མཉམ་གཞག་གི་ཤེར་ཕྱིན་པ་ཆོས་ཅན། ཚུལ་རོལ་འཁོར་བ་ཕ་རོལ་མྱང་འདས་ཀྱི་མཐའ་གཉིས་ལ་སྟེ་གཉིས་སུ་གནས་པ་མིན་འཁོར་འདས་དེ་དག་གི་བར་ན་ཡང་མཚན་མར་བཟུང་ནས་གནས་པ་མིན་ཏེ། དུས་གསུམ་པའི་ཆོས་རྣམས་དོན་དམ་པར་སྐྱེ་བ་སོགས་མེད་པར་མཉམ་པ་ཉིད་དུ་མངོན་སུམ་དུ་ཤེས་པའི་ཡེ་ཤེས་སྙིང་རྗེ་ཆེན་པོ་ཅན་ཡིན་པའི་ཕྱིར་ཞེས་མདོ་ལས་འདོད་དོ། །ཞེས་གསུངས་པའི་ཕྱིར། །

གཉིས་ལ་དེ་འགོག་ཚུལ་ནི། རྣམ་བཤད་ལས། སྐབས་འདིར་ཁ་ཅིག་གིས་ཀུན་རྫོབ་ལ་ལྟོས་པའི་སྲིད་མཐའ་འགོག་བྱེད་སྟོང་ཉིད་རྟོགས་པའི་ཤེས་རབ་ལ་འཆད་པ་ནི་ལམ་གྱི་རིམ་པའི་བློའི་འཇུག་ཚུལ་མི་འདྲ་བ་ཞིབ་ཏུ་མ་རྟོགས་པའི་རྣམ་འགྱུར་དུ་གསལ་ཏེ། སློབ་དཔོན་དང་འཕགས་པ་གཉིས་ཀས་ཤེས་རབ་ཀྱིས་འཁོར་བའི་སྐྱོན་མཐོང་བར་གསུངས་པའི་ཕྱིར་དང་། འཁོར་བའི་སྐྱོན་དོན་དམ་འཇལ་བའི་རིགས་ཤེས་ཀྱིས་མི་རྙེད་པའི་ཕྱིར་རོ། །ཞེས་གསུངས་པ་ཡིན་ནོ། །དེ་ལྟར་རྒྱན་སྣང་ལས། ཐམས་ཅད་ཤེེས་པ་ཉིད་བསྟན་པའི་དོན་དུ། ཤེས་རབ་ཀྱིས་འཁོར་བའི་སྐྱོན་མཐོང་བ་དང་སྙིང་རྗེས་སེམས་ཅན་གྱི་དོན་བྱེད་པའི་གཞན་གྱི་དབང་དུ་གྱུར་པས་བྱང་ཆུབ་སེམས་དཔའ་རྣམས་སྲིད་པ་དང་། ཞི་བ་ལ་མི་གནས་པའི་ཕྱིར་ན་ལྡོག་པ་སྟོན་པས་ཉན་ཐོས་དང་རང་སངས་རྒྱས་རྣམས་ནི་དེ་ལྟ་མ་ཡིན་ནོ། །ཞེས་སློན་དཔོན་གྱིས་གསུངས་མོད། འོ་ན་འཕགས་པས་གང་ནས་གསུངས་ཤེ་ན། ཉི་སྣང་དུ་ནི། ཤེས་པས་སྲིད་ལ་མི་གནས་ཤིང་། །ཞེས་སོགས་ལུས་མདོར་བསྟན་གྱི་ཐད་དུ་དང་། ཚུ་རོལ་ཕ་རོལ་མཐའ་ལ་མིན། ཞེས་སོགས་ཀྱི་ཐད་དུ་མི་གསལ་བས་འཕགས་པས་གང་དུ་གསུངས་པ་འཚོལ་བར་བྱའོ། །

གསུམ་པ་རང་གི་ལུགས་ལ་དོགས་པ་འགོད་པ་ནི། འཁོར་བའི་སྐྱོན་དོན་དམ་འཇལ་བའི་རིགས་ཤེས་ཀྱིས་མི་རྙེད་ན། ལེགས་བཤད་གསེར་ཕྲེང་ལས། རིམ་པ་ལྟར་སྲིད་པ་རང་བཞིན་མེད་རྟོགས་ཀྱི་ཤེས་རབ་ཀྱིས་དེར་མཐའ་གཅིག་ཏུ་གནས་པའི་ཉེས་དམིགས་མཐོང་བ་དང་། ཞེས་གསུངས་དོན་ཇི་ལྟར་ཡིན། དེ་འདྲའི་རང་བཞིན་མེད་རྟོགས་ཀྱི་ཤེས་རབ་དེ་སྲིད་པ་གང་ཟག་གི་བདག་མེད་པར་རྟོགས་པའི་ཤེས་རབ་ཡིན་པས་སྐྱོན་མེད་དོ་ཞེ་ན། འོ་ན་དེས་རྟོགས་པའི་འཁོར་བའི་སྐྱོན་དེ་གང་ལ་བཞེད། སྲིད་པ་གང་ཟག་གི་བདག་ཏུ་མེད་པ་དང་བདག་འཛིན་གྱི་ཞེན་ཡུལ་མེད་པ་གང་ལ་བཞེད་ཀྱང་མི་འཐད་དེ། སངས་རྒྱས་འཕགས་པ་ཡང་དེ་དང་བྲལ་བ་མི་སྲིད་པའི་ཕྱིར། ཚུལ་འདི་ལ་བདེན་འཛིན་འཁོར་རྩ་འདོད་པའི་ལུགས་ཀྱིས་ལན་ལྷག་ཏུ་དཀའ་བར་སྣང་ངོ། །རྩ་འགྲེལ་དེ་དག་ལས། དུས་རྣམས་མཉམ་པ་ཉིད་ཤེས་ཕྱིར། །ཞེས་དང་། དུས་གསུམ་པའི་ཆོས་རྣམས་སྐྱེ་བ་མེད་པའིི་རྣམ་པར་མཉམ་པ་ཉིད་དུ་རྟོགས་པས་ཞེས་པའི་དོན་ལ། གཞན་གྱི་ལུགས་འགོད་པ། ལུགས་དེ་འགོག་པའི་ཚུལ། རང་གི་ལུགས་ལ་དོགས་པ་འགོད་པའོ། །དང་པོ་ནི། གོང་གི་མཁས་པ་དེ་གཉིས་ཀྱིས་སྐབས་འདིར། དུས་རྣམས་མཉམ་པ་ཉིད་ཤེས་ཕྱིར། །ཞེས་པའི་གཞུང་འདི། དེ་དག་བར་ན་མི་གནས་པ། །ཞེས་པའི་གོང་མའི་སྒྲུབ་བྱེད་དུ་ཡར་སྦྱོར་བ་ཡིན་ལ། དེས་བཟློག་སྟེ་བསྟན་པ་སྟེ་ཉན་རང་འཁོར་འདས་ལ་བདེན་པར་བཟུང་ནས་གནས་པའི་རྒྱུ་མཚན་དེ་དག་ལ་དུས་གསུམ་པའི་ཆོས་རྣམས་དོན་དམ་པར་སྐྱེ་བ་མེད་པར་མཉམ་པ་ཉིད་དུ་རྟོགས་པའི་སྟོང་ཉིད་རྟོགས་པའི་ཤེས་རབ་དང་བྲལ་བ་ལ་བཞེད་པ་ཡིན་ཏེ། བུ་འགྲེལ་ལས། ཀུན་ཤེས་པ་ཉིད་ཀྱི་སྐབས་སུ་ཉན་རང་གི་ཡུམ་ལྡོག་སྟེ་བསྟན་པས་ན། ཉན་ཐོས་ལ་སོགས་པའི་རང་གི་རྟོགས་པ་ཙམ་གྱི་ཡུམ་ཆོས་ཅན། འཁོར་བ་དང་མྱ་ངན་ལས་འདས་པ་ལ་གནས་པ་ཡིན་པར་ཤེས་པར་བྱའོ། །དུས་གསུམ་མཉམ་པ་ཉིད་དུ་ཤེས་པ་མེད་པའི་ཕྱིར། བདག་གཞན་མཉམ་པ་སོགས་ཀྱི་སྙིང་བརྩེ་དང་། རང་བཞིན་གང་ཡང་མེད་རྟོགས་ཀྱི་ཤེས་རབ་དང་བྲལ་བའི་ཕྱིར་རོ། །ཉ་ཊཱིཀ་ལས། དུས་གསུམ་བདེན་མེད་དུ་མཉམ་པ་ཉིད་ཤེས་པ་རང་རྒྱུད་ལ་མེད་པའི་ཕྱིར། དེས་ན་དེ་ཆོས་ཅན། འཁོར་འདས་གང་རུང་ལ་གནས་པ་ཡིན་པར་ཤེས་པར་བྱའོ། །ཞེས་གསུངས་པའི་ཕྱིར་རོ། །