དགེ་བཤེས་ངག་དབང་ཐོགས་མེད།

སྣ་མང་གདུལ་བྱའི་ཁམས་དང་བསམ་པ་ཀུན། །
ཇི་བཞིན་གཟིགས་ནས་འགྲོ་བློའི་རྗེས་མཐུན་པ། །
ཆོས་ཀྱི་འཁོར་ལོ་ལན་གསུམ་སྐོར་མཛད་པའི། །
འདྲེན་མཆོག་ཐུབ་པའི་དབང་པོར་གུས་ཕྱག་འཚལ། །

གཞལ་བྱ་བདེན་གཉིས་རང་སྤྱིའི་མཚན་ཉིད་དང་། །
ཁྱད་ཆོས་བཅུ་དྲུག་ཐར་ལམ་བགྲོད་ཚུལ་སོགས། །
མཆོག་གསུམ་དངོས་སྟོབས་རིགས་པས་སྒྲུབ་མཛད་པ། །
ཚད་མའི་སྲོལ་འབྱེད་སྲོལ་འཛིན་ཡོངས་ལ་འདུད། །
ཞི་བདེ་དབེན་པའི་འགྲོ་ལ་གཅིག་ཏུ་བརྩེ། །
ཞི་བདེ་བསྐྲུན་པའི་ཐབས་ལམ་སྣ་མང་གཟིགས། །
ཞི་བདེ་མ་ལུས་འབྱུང་བའི་སྒོ་གཅིག་པུ། །
ཞི་བདེའི་དེད་དཔོན་བསྟན་འཛིན་རྒྱ་མཚོར་འདུད། །

བགྲོ་གླེང་གི་བརྗོད་གཞི། ༨༽ མདོ་སྡེ་པའི་གྲུབ་མཐའི་བྱུང་རིམ་དང་དེའི་གཞུང་དང་སློབ་དཔོན་གྲགས་ཆེ་བ་ཇི་ཡོད་སྐོར། (མདོ་སྡེ་པའི་གྲུབ་མཐའི་བྱུང་རིམ་དང་། ལུང་གི་རྗེས་འབྲང་གི་མདོ་སྡེ་པ་དང་རིགས་པའི་རྗེས་འབྲང་གི་མདོ་སྡེ་པ་གཉིས་ལ་འདོད་ཚུལ་མི་འདྲ་བ་གང་ཡོད་དང་། དེ་གཉིས་ཀྱི་སློབ་དཔོན་གང་དང་གང་ཡིན། ལུང་གི་རྗེས་འབྲང་གི་མདོ་སྡེ་པས་རང་རིག་བཞེད་མིན་སྐོར)
མདོ་སྡེ་པའི་གྲུབ་མཐའི་རྣམ་གཞག་བཤད་པ་ལ། ཡིད་ཆེས་པའི་ཁུངས་འགོད་པ་དང་། གྲུབ་མཐའ་དེའི་འཕེལ་རིམ། གྲུབ་མཐའ་དེས་ཤུགས་རྐྱེན་ཇི་ལྟར་ཐེབས་མིན། གྲུབ་མཐའི་རྣམ་གཞག་དངོས། མཇུག་བསྡུ་བ་དང་བཅས་ས་བཅད་ལྔའི་སྒོ་ནས་འཆད་པ་ལ། དང་པོ་ཡིད་ཆེས་པའི་ཁུངས་འགོད་པ་ནི། འདི་ནས་ཡར་བརྩིས་པའི། མི་ལོ་ཉིས་སྟོང་དྲུག་རྒྱའི་གོང་རྩོད་ལྡན་ཚེ་ལོ་བརྒྱ་པའི་ཚེ་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ། རང་ཅག་རྣམས་ཀྱི་འདྲེན་པ་ཆེན་པོ་སྟོན་པ་ཤཱཀྱ་ཐུབ་པ་འཇིག་རྟེན་དུ་བྱོན་ཏེ་ཆོས་ཀྱི་འཁོར་ལོ་རིམ་པ་གསུམ་བསྐོར་བའི་ནང་ཚན། བཀའ་དང་པོ་བདེན་བཞིའི་ཆོས་འཁོར་གྱི་རྗེས་སུ་འབྲངས་ཏེ་ཐེག་པ་འོག་མའི་གྲུབ་མཐའ་སྨྲ་བ་ཉན་ཐོས་སྡེ་གཉིས་བྱུང་བ་ཡིན་ལ། སྤྱིར་སྟོན་པ་རང་ཉིད་ཀྱི་མདོ་རྒྱུད་ལས་གྲུབ་མཐའ་བཞིའི་རྣམ་གཞག་དངོས་སུ་གསུངས་པའི་ཁུངས་འགའ་ཞིག་བཀོད་ན། སངས་རྒྱས་ཤཱཀྱ་ཐུབ་པས་མཛད་པའི་དཔལ་དེ་བཞིན་གཤེགས་པ་ཐམས་ཅད་ཀྱི་གསང་བ་རྣལ་འབྱོར་ཆེན་པོ་རྣམ་པར་རྒྱལ་བ་ཞེས་བྱ་བ་མཉམ་པ་ཉིད་གཉིས་སུ་མེད་པའི་རྒྱུད་ཀྱི་རྒྱལ་པོ་རྡོ་རྗེ་དཔལ་མཆོག་ཆེན་པོ་བརྟག་པ་དང་པོ་ལས། གཡག་རྔ་ནེའུ་སིང་ལྟ་བུ་ལ། །བར་དུ་སྣང་མུན་ཤོང་བ་ཙམ། །སེམས་ལས་ཐ་དད་པར་གནས་པ། །སྐད་ཅིག་མི་རྟག་པར་འདོད་པས། །ཡུལ་སེམས་ཐ་དད་བྱེ་བྲག་སྨྲ། །ཕྱི་རོལ་ཡུལ་དག་ཕྲ་བ་རྣམས། །འདུས་ནས་རིགས་པ་འབྱུང་བ་ལྟར། །ཡུལ་དུས་རྣམ་པར་ངེས་པ་ལས། །རིགས་པ་འདྲ་བའི་རྣམ་པར་བཞག །ཡུལ་དགག་པ་ཡི་ཐ་མ་དང་། །ཤེས་པ་སྐྱེ་བའི་ཐོག་མ་རུ། །ཕྲད་པར་འདོད་པ་གྲུབ་པའི་མཐའ། །མདོ་སྡེ་པ་ཡི་དགོངས་པ་སྨྲ། །ཆོས་རྣམས་ཐམས་ཅད་རང་གི་སེམས། །རྣམ་པར་རིག་ཙམ་སྐད་ཅིག་མ། །རང་གསལ་རྒྱུན་གནས་སྤྲོས་བྲལ་འདོད། །རང་རིག་སྐད་ཅིག་གསལ་བ་དང་། །མི་གསལ་སྣ་ཚོགས་རྟོག་བྲལ་དུ། ། རྣམ་མེད་རྣལ་འབྱོར་སྤྱོད་པ་སྨྲ། །དངོས་རྣམས་སྟོང་པ་སྒྱུ་མ་བཞིན། །སྣང་ཡང་བདག་ལས་རང་སྟོང་པ། །སེམས་ཀྱི་རྟོག་པ་རྣམ་བཟློག་སྟེ། །མཁའ་དབྱིངས་དྲི་མེད་རྟོག་རྒྱུན་འཆད། །འདི་ལྟར་སྲིད་པ་ཞི་བ་ལས། །རྣམ་གྲོལ་སྟོང་ཉིད་སྙིང་རྗེ་དང་། །དབྱེར་མེད་བྱང་ཆུབ་སེམས་ཀྱི་མཆོག །ཟུང་འཇུག་རབ་ཏུ་མི་གནས་པ། །ཞེས་རྩོམ་གཞི་རྡུལ་ཕྲ་རབ་རྩོམ་པའི་ཕྱི་དོན་དམིགས་རྐྱེན་བྱས་ནས་ཤེས་པ་རྣམ་ལྡན་དུ་འདོད་པ་དང་། དམིགས་རྐྱེན་དང་དམིགས་བྱེད་ཤེས་པ་གཉིས་དངོས་རྒྱུ་དངོས་འབྲས་སུ་འདོད་པ་སོགས་ཀྱི་སྒོ་ནས་མདོ་སྡེ་པ་བཤད་པ་དང་།

བསྡུས་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོའི་འགྲེལ་བཤད་རྩ་བའི་རྒྱུད་ཀྱི་རྗེས་སུ་འཇུག་པ་སྟོང་ཕྲག་བཅུ་གཉིས་པ་དྲི་མ་མེད་པའི་འོད་ཅེས་བྱ་བ། འཕགས་པ་སྤྱན་རས་གཟིགས་དབང་ཕྱུག་གིས་མཛད་པའི་ཕྱི་འཇིག་རྟེན་གྱི་ལེའུ་དང་། ནང་སེམས་ཅན་གྱི་ལེའུ་གཉིས་འགྱུར་རྒྱུད་དང་འདྲ་བར་བཞུགས་པ་ལས། རྒྱུ་འདིའི་ཕྱིར་བཅོམ་ལྡན་འདས་ཀྱིས་རྒྱུད་ཀྱི་རྒྱལ་པོའི་ལེའུ་ལྔ་པ་ལས་ཚིགས་སུ་བཅད་པ་ལྔ་བཅུ་རྩ་བརྒྱད་པས་གསུངས་པ་འདི་ལྟ་སྟེ། ས་དང་ཆུ་དང་མེ་དང་རླུང་དང་རོ་དང་མཆོག་གི་རོ་སྟེ་ཕྲ་རབ་རྣམས་ནི་རྣམ་པ་དྲུག །དྲི་ལ་སོགས་པ་རེ་རེས་དམན་ཞིང་མཐའ་མ་ཡུལ་དང་རྣམ་པར་བྲལ་བ་ཡེ་ཤེས་བལྟ་བྱ་རྣམས། །འདོད་པ་གཟུགས་དང་གཟུགས་མེད་རྣམས་ནི་ཟུང་དང་ཟུང་དང་རི་བོང་ཅན་ཏེ་མཐའ་མ་ཆོས་ཀྱི་དབྱིངས། །རྣམ་པ་ཀུན་ལྡན་དེ་རྣམས་ཀུན་ནས་རྟག་ཏུ་འཕོ་མེད་བདེ་བ་ལྷན་སྐྱེས་རྟེན་དུ་གྱུར་པའོ། །ཞེས་པའོ། །རྒྱུ་དེས་ན་སེམས་ཅན་གྱི་བསམ་པའི་དབང་གིས་དེ་བཞིན་གཤེགས་པས་ཆོས་བསྟན་པ་ནི་བྱེ་བྲག་ཏུ་སྨྲ་བ་དང་མདོ་སྡེ་པ་དང་རྣལ་འབྱོར་སྤྱོད་པ་པ་དང་དབུ་མ་པའོ། །དེ་རྣམས་ལས་བྱེ་བྲག་ཏུ་སྨྲ་བ་ནི་སྐྱེ་བའི་ཆ་ཤས་ཅན་གྱི་སེམས་ཅན་རབ་ཏུ་གསལ་བར་བྱེད་པའི་བསྟན་བཅོས་སོ། །
མདོ་སྡེ་པ་ནི་དོན་རབ་ཏུ་གསལ་བར་བྱེད་པའི་བསྟན་བཅོས་སོ། །རྣལ་འབྱོར་སྤྱོད་པ་པ་ནི་རྣམ་པར་ཤེས་པ་ཙམ་རབ་ཏུ་གསལ་བར་བྱེད་པའི་བསྟན་བཅོས་སོ། །དབུ་མ་པ་ནི་དོན་དམ་པའི་དེ་ཁོ་ན་ཉིད་རབ་ཏུ་གསལ་བར་བྱེད་པའི་བསྟན་བཅོས་ཏེ་རིང་བའི་སྐལ་བ་དང་ལྡན་པ་དང་ཉེ་བའི་སྐལ་བ་དང་ལྡན་པའི་སེམས་ཀྱི་ཕྱིར་སེམས་ཅན་གྱི་བསམ་པའི་དབང་གིས་བཅོམ་ལྡན་འདས་ཀྱིས་གསུངས་སོ། །གདུལ་བྱའི་བསམ་པའི་དབང་གིས་གྲུབ་མཐའ་བཞིའི་རྣམ་གཞག་བྱུང་བར་གསུངས། དེ་ལྟར་ཡང་། བདེ་གཤེགས་གཞུང་གི་རང་འགྲེལ་ལས། དེ་ལྟར་མདོ་སྡེའི་སྒོ་ནས་སྤྱོད་པའི་མདོ་སྡེ་པ་རྣམས་ཀྱིས་ཞེས་དང། ཡེ་ཤེས་ཀུན་བཏུས་འགྲེལ་བར། འདི་ནི་སྒོ་དྲུག་པ་དང་འཕགས་པ་བཟང་པོ་སྤྱོད་པ་ལ་སོགས་པའི་མདོ་སྡེ་རྣམས་སྒྲ་ཇི་ལྟ་བར་ཁས་ལེན་ཅིང་མདོ་དེ་དང་དེ་དག་གི་རྗེས་སུ་འཇུག་པ་དང་ལྡན་པས་ན་མདོ་སྡེ་པ་དང། མིང་གཞན་དཔེས་སྟོན་པ་ལ་མཁས་པས་དཔེ་སྟོན་པའོ། །ཞེས་གསུངས་པ་ལྟར། མདོ་སྡེ་པ་དང་དཔེ་སྟོན་པ་ཞེས་བྱ་ལ།

མདོ་སྡེ་ལས་ཇི་ལྟར་འབྱུང་བ་སྒྲ་ཇི་བཞིན་དུ་ཁས་ལེན་པ་ཙམ་གྱི་སྒོ་ནས་གྲུབ་པའི་མཐའ་སྨྲ་བས་ལུང་གི་རྗེས་འབྲང་དང༌། རིགས་ལམ་དྲི་མ་མེད་པ་ཚད་མ་སྡེ་བདུན་ནས་བཤད་པ་ལྟར་གྱི་རིགས་པའི་རྗེས་སུ་འབྲངས་པའི་རིགས་པའི་རྗེས་འབྲང་གཉིས་ཡོད་པར་གསུངས། སྤྱིར་མདོ་སྡེ་པའི་གྲུབ་མཐའམ་འདོད་ཚུལ་རང་དགའ་བ་སྟོན་པའི་གཞུང་དངོས་བོད་དུ་མ་འགྱུར་བས། མདོ་སྡེ་པའི་སློབ་དཔོན་དང་མདོ་སྡེ་པའི་གྲུབ་མཐའ་རྒྱུན་འཛིན་ཁ་གསལ་ཞིག་རྙེད་པར་དཀའ། འོན་ཀྱང་ལུང་གི་རྗེས་འབྲང་གི་མདོ་སྡེ་པའི་འདོད་ཚུལ་རྣམས་མཛོད་རང་འགྲེལ་དང་འགྲེལ་བཤད་རྣམས་དང་། མངོན་པ་ཀུན་བཏུས་རྩ་འགྲེལ་སོགས་ཀྱིས་སྟོན་པ་དང་། རིགས་པའི་རྗེས་འབྲང་གི་མདོ་སྡེ་པའི་འདོད་ཚུལ་རྣམས་ཚད་མ་སྡེ་བདུན་མདོ་དང་བཅས་པས་བསྟན་པར་མཁས་པ་རྣམས་ལ་གྲགས་པ་ཡིན་ནོ། །ལུང་རིགས་ཀྱི་རྗེས་འབྲང་མདོ་སྡེ་པའི་སློབ་དཔོན་སུ་ཡིན་གྱི་མཚན་ཁ་གསལ་མ་མཇལ། འོན་ཀྱང་སྤྱིར་གྲུབ་མཐའི་རྣམ་གཞག་སྟོན་པའི་དཔེ་ཆ་རྣམས་ལས། མདོ་སྡེ་པའི་སློབ་དཔོན་མཚན་གཞི་ལྟ་བུར་བཀོད་པ་ནི། སློབ་དཔོན་ཀུ་མ་ར་ཏ་དང་། ཤི་རི་ར་ཏ་དང་། བཙུན་པ་ར་ཏ་ལ་སོགས་པ་རྣམས་ཡིན་པར་སྔ་མ་རྣམས་ལ་གྲགས་པར་གསུངས་འདུག རྗེ་བཙུན་ཆོས་རྒྱན་གྱིས། མཛོད་འགྲེལ་རྩོམ་དུས་གྱི་སློབ་དཔོན་དབྱིག་གཉེན་དེ་མདོ་སྡེ་པ་ཡིན་པར་གསུངས། སློབ་དཔོན་ཀུ་མ་ར་ཏ་ཁོང་གི་དཔེ་སྟོན་པའི་གྲུབ་མཐའ་དར་སྤེལ་དང་། ཁོང་གི་ལོ་རྒྱུས་རྒྱ་ཡི་ལོ་ཙ་བ་ཐང་སན་ལམ་ཡིག་རྒྱ་ཡིག་ནང་ཡོད་ཚུལ་དང་། ཁོང་གི་བརྩམས་ཆོས་དཔེ་ཡི་ཕྲེང་བ་སོགས་ཡོད་པ། ཁོང་ཕེབས་དུས་ཀླུ་སྒྲུབ་དང་འཕགས་པ་ལྷའི་སྐུ་དུས་སུ་ཡིན་པ་སོགས་མཁས་པའི་ངག་ལས་ཐོས། སློབ་དཔོན་དགེ་སྲུང་ཞེས་པ་ཕྱི་རོལ་དོན་གྲུབ་མཛད་མཁན་དེ་ཡང་མདོ་སྡེ་པ་ཡིན་པར་ཇོ་བོའི་གསུང་ནང་ཡོད་པར་ངག་ལས་ཐོས། ནང་པའི་མཚན་རིག་དང་ལྟ་གྲུབ་ཀུན་བཏུས། པོད་འབྲིང་བའི་སྟོད་ཆ་ལས། སློབ་དཔོན་དགེ་སྲུང་གི་ཕྱི་རོལ་གྱི་དོན་གྲུབ་པ་ལས། ཕན་ཚུན་བདག་ཉིད་མ་རེག་པ། །ཆ་ཤས་མེད་པར་རྣམ་གནས་ཏེ། །དེ་ཕྱིར་ས་ཡི་དཀྱིལ་འཁོར་སོགས། །བསགས་པ་ལས་ནི་བྱུང་བ་ཡིན། །ཞེས་དང་།

མཛོད་རང་འགྲེལ་ལས། གཟུགས་མིང་དུས་མཐའ་རྡུལ་ཡིག་དང༌། །སྐད་ཅིག་གཟུགས་འགྲིབ་པའི་མཐའ་ནི་རྡུལ་ཕྲ་རབ་ཡིན་ནོ། །དུས་ཀྱི་མཐའ་ནི་སྐད་ཅིག་མའོ། །མིང་གི་མཐའ་ནི་ཡི་གེ་སྟེ། རང་སྡེ་བྱེ་བྲག་ཏུ་སྨྲ་བས་ནི། རྩོམ་གཞིའི་རྡུལ་ཕྲ་རབ་དེ་དག་ཆ་ཤས་མེད་པའི་ཕྱིར་ཕན་ཚུན་རེག་པ་ནི་མེད་ཀྱི། རྡུལ་ཕྲ་རབ་ཆ་མེད་པ་གཅིག་ལ་དུ་མས་བསྐོར་བའི་བར་དང་བཅས་པ་ཡིན་ཏེ། གལ་ཏེ་རེག་ན་ནི་ཕྱོགས་ཐམས་ཅད་ཀྱིས་རེག་ན་ཕན་ཚུན་འདྲེས་པར་འགྱུར་ལ། ཕྱོགས་རེ་རེས་རེག་ན་ཆ་བཅས་སུ་འགྱུར་བའི་སྐྱོན་འཇུག་པ་དང་། ཡང་གལ་ཏེ་བསགས་པའི་གཟུགས་འདི་དག་གི་རྡུལ་ཕྲ་རབ་རྣམས་ཕན་ཚུན་མ་རེག་ན་ཞིག་པར་མི་འགྱུར་རམ་ཞེ་ན། དེའི་ལན་དུ། རླུང་གིས་བཟུང་བ་དང་། རྫས་ཀྱི་མཐུ་ལ་བརྟེན་ནས་ཀྱང་ཕན་ཚུན་འབྲེལ་བས་མི་འཐོར་བར་གནས་པར་བཤད་དེ། སློབ་དཔོན་དགེ་སྲུང་གི་ཕྱི་རོལ་གྱི་དོན་གྲུབ་པ་ལས། དེ་ཕྱིར་ཕྱོགས་ཆའི་ཁྱད་པར་གྱི། །དེ་ནི་མང་པོས་ཡོངས་བསྐོར་བར། །བརྗོད་པར་ཟད་ཀྱི་རྡུལ་རྣམས་ནི། །
ཆ་ཤས་བཅས་པའི་བདག་ཉིད་མིན། །ཞེས་དང་། ཕན་ཚུན་དུ་ནི་ཕན་འདོགས་པའི། །བྱེ་བྲག་གིས་ནི་བརྒྱུས་པ་བཞིན། །རྡོ་རྗེ་ལ་སོགས་རྡུལ་ཕྲན་རྣམས། །དེ་དག་ཆད་པར་མི་འགྱུར་ཏེ། །ཇི་ལྟར་སྔགས་ཀྱི་མཐུ་ཡིས་ནི། །འདྲེ་སྦྲུལ་ལ་སོགས་འཛིན་པ་བཞིན། །རྫས་ཀྱི་མཐུ་ཡིས་ཕན་ཚུན་དུ། །རྡུལ་ཕྲན་ཁ་ཅིག་སྲིད་འགྱུར་གྱི། །གཞན་དག་ནུས་པ་སྟོབས་ཆུང་ངོ་། །ཞེས་གསུངས་ཤིང་། མཛོད་རང་འགྲེལ་དུའང་། ཅི་རྡུལ་ཕྲ་རབ་རྣམས་ཕན་ཚུན་རེག་གམ་འོན་ཏེ་མི་རེག་ཅེ་ན། ཁ་ཆེ་བ་རྣམས་ན་རེ། མི་རེག་གོ་ཞེས་ཟེར་རོ། །ཅིའི་ཕྱིར་ཞེ་ན། རེ་ཞིག་གལ་ཏེ་བདག་ཉིད་ཐམས་ཅད་ཀྱིས་རེག་པར་འགྱུར་ན་ནི་རྫས་རྣམས་འདྲེས་པར་འགྱུར་རོ། །འོན་ཏེ་ཕྱོགས་གཅིག་གིས་རེག་ན་ནི་ཆ་ཤས་དང་བཅས་པ་དག་ཏུ་ཐལ་བར་འགྱུར་བ་ཞིག་ན་རྡུལ་ཕྲ་རབ་རྣམས་ནི་ཆ་ཤས་མེད་པ་ཡིན་ནོ། །ཞེས་དང་། ཇི་ལྟར་བསགས་པ་ལ་བརྒྱབ་ན་ཞིག་པར་མི་འགྱུར་ཞེ་ན། རླུང་གི་ཁམས་ཀྱིས་བཟུང་བའི་ཕྱིར་རོ། ། ཞེས་སོགས་ཞིབ་ཏུ་གསུངས་པ་ལྟར་རོ།།

མདོ་སྡེ་པའི་སློབ་དཔོན་བཙུན་པས། རྡུལ་ཕྲ་རབ་རྣམས་ཕན་ཚུན་རེག་ན་ཆ་བཅས་སུ་འགྱུར་ཞིང་། བར་ཡོད་ན་ཉིན་མོ་སྣང་བ་དང་མཚན་མོ་མུན་པའི་རྡུལ་བར་དུ་འཇུག་པར་འགྱུར་བས། བར་མེད་ཀྱང་མ་རེག་པར་འདོད་ཚུལ། ཀ་མ་ལ་ཤཱི་ལས། དབུ་མ་རྒྱན་གྱི་དཀའ་འགྲེལ་ལས། གཞན་དག་ན་རེ། རེག་པ་ཡང་མ་ཡིན་ལ། བར་དང་བཅས་པ་དག་ཀྱང་མ་ཡིན་མོད་ཀྱི། འདབ་ཆགས་པ་ཁོ་ནར་གནས་སོ་ཞེས་ཟེར་ཏེ། ཇི་སྐད་དུ་བཙུན་པ་ན་རེ། རྡུལ་རྣམས་མི་རེག་ཀྱང་བར་མེད་པས་རེག་པར་འདུ་ཤེས་སོ་ཞེས་ཟེར་བ་ལྟ་བུའོ། །ཞེས་གསུངས།