གཉིས་པ།
གལ་ཏེ་ང་སྤྱི་ཚོགས་ནས་སྤྱོད་བཟང་མི་སྣ་འདེམས་སྒྲུག་བྱེད་མཁན་ག་གེ་མོ་ཞིག་ཡིན་ཚེ།བརྩེ་སེམས་ཀྱིས་ཆེས་ཕངས་པའི་འཇིག་རྟེན་འདི་ནས། ཁྱོད་རང་གདན་ཞུས་ཀྱི་སྡིངས་ཆ་མཐོནཔོ་ཞིག་གི་ཐོག་ནས། མི་དམངས་ས་ཡ་མང་པོའི་མདུན་ནས། སྐད་གསངས་མཐོན་པོའི་ངང་ནས། ཁྱོད་རང་བུ་ཕྲུག་ཚོས་འཇིག་རྟེན་རིལ་བོ་འདིའི་ཆེད་དུ། སྨད་འཚོང་མ་ཁོང་ནང་བཞིན་གྱི་བུ་རྒྱུད་བཟང་པོ་ཞིག་བྱེད་གོས་ཞེས་བསྒྲགས་ཏེ། བུ་རྒྱུད་བཟང་པོ་ཞེས་པའི་གསེར་གྱི་རྟགས་མ་དེ་དགའ་སྤྲོ་དང་ཡི་རང་གི་མེ་ཏོག་གཏོར་བཞིན་ཁྱེད་ཀྱི་ཕྱག་ཏུ་འབུལ་དང་འབུལ།

གསུམ་པ།
མདོར་ན་ལས་ལ་གང་བཀོད་མ་གཏོགས། སྣང་བར་གང་དྲན་མེད་ཅེས་པ་ལྟར། བརྩེ་སེམས་འགྱུར་མེད་ཅིག་གིས་བཙན་བཀའ་ལེན་མང་བཏང་ཞིང་། སྔོན་བསགས་ལས་ངན་དག་གི་བཀོད་སྒྲིག་རིམ་པའི་འོག །མཐར་ཁྱོད་རང་ལ་ཕམ་ཉེས་ཚབ་ཆེན་འདི་འདྲ་ཞིག་བྱུང་ཡང་། ད་དུང་ཁྱོད་ཀྱི་ཆོད་སེམས་སམ་དམ་བཅའ་དེ་འགྱུར་བ་མེད་པར་ཨ་མ་དང་གཅུང་པོའི་ཆེད་དུ་ལས་ལ་བརྩོན་རྒྱུ་དེ་དགའ་སྤྲོ་ཞིག་ཏུ་བལྟས་འདུག་པས། ངོ་མ་ཁྱོད་ཀྱི་བརྩེ་སེམས་དེ་དང་། ཁྱོད་ཀྱི་སྙིང་སྟོབས་དེ། ཅི་འདྲའི་སྲ་བརྟན་འགྱུར་མེད་ཅིག་ཡིན་པའི་དཔེ་ཞིག་ངས་འདི་ནས་ཇི་ལྟར་བསམས་ཀྱང་མ་བརྙེད།

བཞི་པ།
གལ་ཏེ་ང་སྤྱི་ཚོགས་འདི་ནས་མཛངས་མ་འདེམས་སྒྲུག་བྱེད་མཁན་ག་གེ་མོ་ཞིག་ཡིན་ཚེ། ཁྱོད་རང་གོས་མེད་དམར་ཧྲེང་མར་ཆགས་ཉམས་སྣ་ཚོགས་ཤིག་བསྟན་དུ་བཅུག་ནས། བུ་མོ་མང་པོ་ཞིག་དང་འགྲན་སྡུར་མི་དགོས་པར་ཁ་གཏད་གང་ཡང་མེད་པའི་ཐོག་ནས། བཟང་སྤྱོད་ཀྱི་ཆེས་དབུལ་བའི་འཇིག་རྟེན་འདི་ནས། ཁྱོད་རང་གདན་ཞུས་ཀྱི་སྡིངས་ཆ་མཐོན་པོ་ཞིག་གི་ཐོག་ནས། ཁྱོང་རང་གི་མི་ཚེའི་ལོ་རྒྱུས་དེ་དམར་རྒྱན་མར་མི་དམངས་ས་ཡ་མང་པོའི་མིག་མདུན་ནས། ངས་སྐད་གསངས་མཐོན་པོའི་ངང་ནས། གསལ་ཞིང་དག་པ་ཞིག་བསྒྲགས་ནས། ཤེས་སྤྱོད་ཀུན་བཟང་གི་མཛངས་མ་ཞེས་པའི་ཕ་ལམ་གྱི་དབུ་རྒྱན་དེ་དགའ་སྤྲོ་དང་ཡི་རང་གི་སྤྲིན་ཚོགས་མཁའ་ལ་དཀྲིགས་ནས། བསྔགས་བརྗོད་ཀྱི་སྦྲང་ཆར་སིལ་མ་ཞིག་འཐོར་དང་ལྷན་ཁྱོད་ཀྱི་དབུ་ལ་སྒྲོན་དང་སྒྲོན།

ལྔ་པ།
འདི་ནི་ངས་ཁྱོད་ཀྱི་ལོ་རྒྱུས་ལས་ཁྱོད་ཀྱི་སྡུག་བསྔལ་ཤེས་པའི་ཚོར་བ་གསོན་པོ་ཞིག་ཡིན་ལ།འདི་ནི་ངས་ཁྱོད་ལ་སྡུག་སེམས་མཉམ་སྐྱེད་ཡོད་པའི་དན་རྟགས་རྣལ་མ་ཞིག་ཀྱང་ཡིན།འདི་ནི་ངས་ཁྱོད་ཀྱི་སྙིང་སྟོབས་ལ་ཡི་རང་བའི་ཕྱག་རྒྱ་ཡིན་ལ།འདི་ནི་ངས་ཁྱོད་ཀྱི་བརྩེ་སེམས་ལ་བཏེགས་པའི་མེ་ཏོག་ཀྱང་ཡིན།

དྲུག་པ།
ད་དུང་མཇེ་མ་གཏོགས་བསྟན་རྒྱུ་མེད་པའི་ཕོ་གསར་ཚོ་དང་། རྒྱོ་མ་གཏོགས་བསྒོམ་བྱ་མེད་པའི་རང་རིགས་ཟོལ་པོ་རྣམས་ལ་གཟབ་དགོས་པའི་འབོད་སྐུལ་ནན་མོ་ཞིག་དང་བཅས་ ༢༠༡༤/༠༡/༡༢ ཉིན་དྲྭ་ཐོགས་ནས་ཨི་ཙི་ན་ཚ་ཅན་གྱི་རྒྱ་མོ་སྨད་འཚོང་མ་ཞིག་གིས་ལོ་བཅོ་ལྔའི་སྐབས་རང་གི་ཨ་ཕ་དང་ཁ་བྲལ་ནས། རང་གི་ཨ་མ་ནད་པ་དང་གཅུང་པོ་དབང་པོ་སྐྱོན་ཅན་གཉིས་ཀྱི་ཆེད་དུ་གཞན་གྱི་གཡོག་རྒྱུགས་པ་དང་། ཐ་ན་དཀའ་ཚིགས་ཁྲོད་སྨད་འཚོང་མའི་ལས་ཀ་གཉེར་ནས་ཨི་ཙི་ན་ཚ་ན་བ་ན། རང་ཤི་རྒྱག་གྲབས་བྱས་ཀྱང་ཨ་མ་དང་གཅུང་པོ་གཉིས་བློས་གཏོང་མ་ཐུབ་ནས་ད་དུང་སྨན་ཅུང་རེ་བཟས་ནས་ལས་ཀ་གཉེར་བཞིན་ཡོད་པའི་ལོ་རྒྱུས་ཤིག་བཀླགས་པ་ན། ཚོར་ཤུགས་དྲག་པོ་ཞིག་གིས་དྲངས་ཏེ་ནགས་གཡག་གིས་སྡུག་སེམས་མཉམ་སྐྱེད་མཚོན་ཕྱིར་དུ་བྲིས་པ་དགེའོ།།