འབྲི་སྐལ་ལྡན།

བདག་ནི་བག་ཡངས་སེམས་ཀྱི་ཞི་བདེ་ལ་འདོད་ཀྱང་། །

གཞན་དབང་གྲང་མོའི་ངལ་བ་གཡོལ་ཐབས་ཤིག་མི་འདུག །

ལྷ་ཡུལ་ལྟ་བུའི་སྐྱིད་པའི་མཛེས་ལྗོངས་སུ་སླེབས་ཀྱང་། །

ཕ་ཡུལ་དྲན་པའི་གདུང་བ་འགོག་ཐབས་རང་མི་འདུག །

རང་ཉིད་རང་དབང་ཆེད་དུ་ཞི་བདེ་ལ་བརྩོན་ཀྱང་། །

འཁྲུག་རྩོད་མེ་ལྕེའི་རླབས་ཕྲེང་གཡོལ་ཐབས་ཤིག་མི་འདུག །

ནང་མི་སྤུན་མཆེད་ལྟ་བུའི་གྲོགས་མཆོག་དང་མཇལ་ཡང་། །

སེམས་གཏམ་ཕན་ཚུན་ཤོད་པའི་ལམ་བུ་ཞིག་མི་འདུག །

བུ་ཆུང་གཉེན་དང་འཕྲད་པའི་ཐབས་མང་ལ་འབད་ཀྱང་། །

དགྲ་བོ་འཁྱོག་པོའི་ཕྱོགས་ལ་དྲང་བདེན་ཞིག་མི་འདུག །

སྙིང་དང་འདྲ་བའི་མཛའ་མོའི་བརྩེ་མདངས་ལ་འཁོར་ཡང་། །

ཕ་མའི་ཞལ་རས་སེམས་ནས་བརྗེད་ཐབས་ཤིག་མི་འདུག །

རང་ལུས་གྲུ་བཞི་འདི་ལ་ལོང་ཁོམ་ཞིག་མེད་ཀྱང་། །

སེམས་ཀྱི་རྟ་ཕོའི་འགྲོས་ལ་རིན་ཐང་ཞིག་ལོས་ཡོད། །

ཀྱག་ཀྱོག་མི་ཚེ་འདི་ལ་རྫོགས་མཐའ་ཞིག་མེད་ཀྱང་། །

རང་དབང་འཁོར་བའི་ལས་ལ་བདེ་སྐྱིད་ཅིག་ལོས་ཡོད། །

མ་བསམ་བརྗོད་ལས་འདས་པའི་ཞིང་ཁམས་ཤིག་མེད་ཀྱང་། །

རང་བྱུང་སྐྱེ་དངོས་ཁྲོད་ན་སྐྱིད་སྣང་ཞིག་ལོས་ཡོད། །

ཡུལ་གྱར་འཁྱམ་པོའི་གནས་ལ་རྟེན་གཞི་ཞིག་མེད་ཀྱང་། །

མ་ཉམས་སྙིང་སྟོབས་འདི་ལ་ནུས་པ་ཞིག་ལོས་ཡོད། །