འབྲི་སྐལ་བཟང་།

སྔོ་བསངས་ནམ་མཁའི་དབྱིངས་སུ་རང་གི་འཁོར་ལམ་ལ་ལྟོས་ཏེ་དུས་བཞིའི་འགྱུར་བ་སྟོན་པའི་གོ་ལ་འདི་དང་། དེ་ལས་ གཞན་པ་ཆེ་ཆུང་དང་ལྕི་ཡང་ཚ་གྲང་སོགས་ཆ་མི་སྙོམས་པའི་གོ་ལ་གྲངས་ཀྱིས་མི་ཆོད་པ་ཞིག་ཡོད་ཀྱང་དེ་དག་གི་རྩོམ་ གཞི་ནི་རྡུལ་ཕྲན་ཉིད་ལ་རག་ལས་པར་སོང་དེའི་སྐོར་ཅུང་ཟད་བཤད་ན། དེ་ཡང་རིགས་པ་སྨྲ་བའམ་རྡུལ་ཕྲན་སྐོར་ལ་དཔྱད་པ་བྱེད་པོ་རྣམས་ཀྱིས་རྒྱུ་མཚན་དང་འཕྲུལ་ཆས་སོགས་ཐབས་ལམ་དུ་མ་ སྤྱད་དེ་རང་གི་བསམ་ངོ་ལ་ལྟོས་པའི་གཏན་འབེབ་རེ་བྱས་ཡོད། དེ་དག་ཐམས་ཅད་ཀྱི་འདོད་ཚུལ་གཅིག་གི་ཐོག་ཏུ་འགྲོ་ བ་ནི་ཤིན་ཏུ་དཀའ། གང་ཡིན་ཟེར་ན་ཡུལ་གྱི་གནས་ཚུལ་ཀྱི་ངོས་ནས་གང་ཟག་རེ་ལ་རྣམ་འགྱུར་མི་འདྲ་བ་རེ་སྟོན་པ་མེད་ ཀྱང་དཔྱོད་མཁན་གང་ཟག་གི་ངོས་ནས་བཤད་ན་ཁམས་མི་འདྲ་བ་དང་། དབང་པོ་མི་འདྲ་བ། དེ་བཞིན་དཔྱོད་ཆས་མི་ འདྲ་བ་སོགས་ལ་བརྟེན་ནས་ཐ་མའི་གྲུབ་དོན་དེ་ཡང་ཅུད་ཟད་མི་འདྲ་བ་རེ་ཡོད་སྲིད་པ་ཡིན། འོན་ཀྱང་ནང་པ་སངས་ རྒྱས་པའི་གྲུབ་མཐའ་སྨྲ་བ་རྣམས་ཀྱིས་མི་ལོ་སྟོང་ཕྲག་ཁ་ཤས་ཀྱི་སྔོན་ནས་ལྐོག་གྱུར་ངེས་པའི་རིགས་པ་ཡང་དག་གི་ལམ་ ནས་གཏན་ལ་ཕབས་ཏེ་ཐག་གཅོད་བྱས་ཟིན་པ་དང་། ཚན་རིག་པའི་ལྟ་གྲུབ་ཀྱང་མི་ཐོག་མང་པོའི་རིང་ཡར་རྒྱས་ཕྱིན་ཏེ་ དེང་རབས་ཀྱི་འཕྲུལ་ཆས་རིགས་འདྲ་མིན་ལ་བརྟེན་ནས་ད་ལྟའི་ཆར་རྡུལ་ཕྲན་ཕྲ་མོའི་གནས་སྟངས་རྣམས་དབང་པོའི་མངོན་སུམ་གྱི་ཡུལ་དུ་བསྟན་ཐུབ་པའི་སྐབས་སུ་གཏན་ལ་ཕབས་ཏེ་ཐག་གཅོད་བྱས་པ་གཉིས་ཚིག་གི་བཤད་སྟངས་ཅུང་ཟད་མི་མཐུན་པ་ཙམ་ལས་དོན་གྱི་གནས་ཚུལ་ཕལ་ཆེར་གཅིག་གི་ཐོག་ཏུ་འབབ་པ་འདི་རིགས་མཐོང་ཚེ་དངོས་གཙོ་དང་ འཕྲུལ་གཙོ་སྨྲ་བའི་ཚན་རིག་པ་དག་ཀྱང་ཧང་སང་པའི་རྣམ་འགྱུར་ཞིག་མངོན་བཞིན་ཡོད་པ་ནི་འདིར་བཤད་མ་དགོས་པར་ དེང་སང་ལོ་ན་ཅུང་ཟད་གཞོན་པའི་ཚན་རིག་པ་ཞིག་ཡིན་ཕྱིན་ངེས་པར་དུ་ནང་པ་སངས་རྒྱས་པའི་ལུགས་ཀྱི་གྲུབ་དོན་ལ་ཤེས་འདོད་དང་དོ་སྣང་བྱེད་བཞིན་ཡོད་པ་འདིས་རྟོགས་ཐུབ། དེ་ལྟར་རྡུལ་ཕྲན་གཏན་ལ་འབེབ་ཚུལ་མཚོན་པ་ཙམ་བྱས་ཏེ་ད་ནི་རྡུལ་ཕྲན་རང་གི་ངོ་བོ་ལ་ཅུང་ཟད་དཔྱད་ན། སྤྱིར་ཡན་གར་གནས་པའི་རྡུལ་ཕྲན་ཞིག་ཡིན་ཕྱིན་འགལ་རྐྱེན་གྱི་དབང་གིས་རང་དབང་དང་བྲལ་བ་ཞིག་ཡིན་ན་མ་གཏོགས་འདུས་རྡུལ་གྱི་ངོ་བོར་འགྲོ་བ་ལ་སྐབས་མཚམས་མེད་པར་བྲེལ་བཞིན་ཡོད་པ་ནི་རྡུལ་ཕྲན་ཡན་གར་བ་སྤྱིའི་གཤིས་སྤྱོད་དམ་རང་བཞིན་ཞིག་ཡིན། དེ་ལྟ་བུའི་ཡན་གར་དུ་གནས་པའི་རྡུལ་ཕྲན་དེ་ནི་སྐད་ཅིག་ཙམ་ཞིག་བརྟན་པོར་གནས་པའི་སྐབས་མེད་ཀྱང་རང་གི་གོ་ས་འཛིན་པའི་ནུས་པ་དང་ལྡན་པ། རང་གི་རིགས་མཐུན་གཞན་དང་ལྷན་ཅིག་ཏུ་ཚོགས་པའི་གོ་སྐབས་འཚོལ་བའི་རྩོལ་བ་ཅན། རྣམ་པ་ཀུན་ཏུ་གཡོ་བའི་རང་བཞིན་ཅན། རང་གང་དུ་ཕྱིན་ཀྱང་འབྲལ་བ་མེད་པར་འཐེན་ཤུགས་སམ་ནུས་པ་དང་ལྡན་པ།

གྲངས་མེད་ཚོགས་གཉིས་རྡུལ་མང་བརྩེགས་པའི་སྐུ་བཞིའི་བང་རིམ་བརླིང་བའི་སྤོར།།

མཁྱེན་བརྩེ་ཉི་ཟླའི་རྒྱུ་བ་མི་འཆོལ་བསྡུ་བཞིའི་མཁའ་ལ་མངོན་པར་མཛེས། །
རྟེན་འབྱུང་སྣང་བའི་འོད་དཀར་བཀྱེ་བས་འགྲོ་བློའི་རྨོངས་མུན་ཀུན་གཞིལ་བའི། །
སྟོན་མཆོག་ཤཱཀྱ་སེངྒེ་ཞེས་གྲགས་སྟོན་པ་གསེར་རིའི་དབུས་ན་བརྗིད། །

མཚམས་སྤྲིན་གསར་པའི་ལྡིང་ཁང་ཕུབ་པའི་དམར་སེར་བླ་བྲེ་བྲིས་པའི་དབུས། །
མཚན་དཔེའི་དྲ་བ་ཀུན་ཏུ་དཀྲིགས་ཤིང་ཉི་གཞོན་གཟི་བྱིན་སྟོང་འབར་བའི། །
མཁྱེན་རབ་རལ་གྲིའི་འོད་ཞགས་རྣོན་པོས་རྨོངས་པའི་འཁྲི་ཤིང་ཀུན་བཅད་ནས། །
བདག་མགྲིན་འཁོར་ལོའི་རྒྱན་དུ་རོལ་ཅིག་རྒྱལ་ཀུན་ཡབ་ཅིག་འཇམ་དཔལ་དབྱངས། །

རྣམ་མང་རྒྱན་འཆང་འབུམ་དུ་སྒེག་ཅིང་སྙིང་དུ་བསྙེན་པའི་དབྱངས་ཅན་ཀྱེ། །
རྣམ་བཀྲའི་བློ་གྲོས་གློག་བཞིན་མྱུར་བའི་ཞི་བསིལ་འཇམ་པོའི་ཏམྦུ་ར། །
རྣམ་དག་ལྷག་བསམ་སོར་མོའི་འཕྲུལ་གྱིས་རྒྱུད་མངས་འབུམ་ཕྲག་བརྡུང་པ་ལས། །
རྣམ་དཀར་བརྩེ་བའི་སྒྲ་བརྒྱ་བརྩེགས་པའི་རྣར་སྙན་དཔྱིད་གླུ་དེང་འདིར་ལོན། །

ཀླུ་སྒྲུབ་བསྟན་པ་ལྗོངས་འདིར་སྤེལ་བ་ལ།།གངས་ཅན་མཁས་པ་ཡོངས་ཀྱི་ཅོད་པཎ་ཞེས། །
གཟུར་གནས་བློ་ལྡན་རྣམས་ཀྱིས་མགྲིན་གཅིག་ཏུ། །བསྟོད་ཡུལ་འཇམ་མགོན་བླ་མས་བདག་སྐྱོངས་ཤིག །

ཅེས་མཆོད་པར་བརྗོད་པ་སྔོན་དུ་བཏང་ནས་བཀུར་འོས་མཁན་ཆེན་ཚུལ་ཁྲིམས་བློ་གྲོས་ཀྱིས་བསྐུལ་བར་གྲག་པའི་རྗེ་བླ་མའི་གསུང་གི་དོགས་གནས་འགའ་ཞིག་ཁོ་བོའི་ལག་སོན་བྱུང་བས་རང་གི་བློ་ནུས་དང་འཚམས་པའི་དྲིས་ལན་འབུལ་བ་ནི།

དྲི་བ་དང་པོ།

འདིར་བསྟན་ཆོས་གསུམ་གྱི་ས་མཚམས་ཐེག་ཆེན་ཚོགས་ལམ་ནས་འཇོག་པ་ཞིག་དང། ལམ་མ་ཞུགས་ནས་འཇོག་པའི་འདོད་ཚུལ་མི་འདྲ་བ་གཉིས་ཡོད་པས། ལུང་རིགས་ཀྱི་སྒྲུབ་ཚེ་གང་ཞིག་ཁུངས་བཙན་པར་བཞེད་ཅིང་དེ་ལ་སྒྲུབ་བྱེད་འགོད་རོགས།

དྲིས་ལན་དང་པོ།

འདིར་བསྟན་ཆོས་གསུམ་མ་མཐའི་ས་མཚམས་ལམ་མ་ཞུགས་ནས་འཇོག་པ་འཐད་དེ། སངས་འཕགས་ལས་ཉན་རང་དང༌། སངས་འཕགས་བྱང་ཆུབ་སེམས་དཔའ་ལས་དང། བྱང་ཆུབ་སེམས་དཔའ་ཆོས་གསུམ་ལས་འཁྲུངས་པ་འཇུག་པ་ལས་དངོས་སུ་གསུངས་པ་གང་ཞིག།།དེ་ཡང་ཐ་སྙད་ཀྱི་ཚིག་འཁྲི་སྐམ་པོ་ཙམ་མ་ཡིན་པར་དོན་གྱི་དགོངས་པ་ཐེག་པ་གསུམ་གྱི་ངེས་ལེགས་ཀྱི་རྩ་བ་སྙིང་རྗེ་ཆེན་པོ་ལ་ཐུག་པའི་གནད་ཀྱིས་ཡིན་པའི་ཕྱིར། གོང་གི་འཁྲུངས་ཚུལ་འདི་དག་ལ་རྣམ་པར་བཞག་འཇོག་གི་རྒྱུ་འབྲས་དང། རྒྱུ་འབྲས་བཏགས་པ་བ་ལ་བཞག་ན་འབྲེལ་མེད་པའི་ཕྱིར་ཏེ། འཇུག་པ་ལས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུང་སེམས་དཔའ་ལས་འཁྲུངས་ཤིང། །སྙིང་རྗེའི་སེམས་དང་གཉིས་སུ་མེད་བློ་དང། །བྱང་ཆུང་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་དང། རང་འགྲེལ་ལས། སངས་རྒྱས་རྣམས་བྱུང་བར་གྱུར་པ་ན་ཞེས་པ་ནས་མོས་པ་ཇི་ལྟ་བ་བཞིན་ཉན་ཐོས་ལ་སོགས་པ་རྣམས་ཡོངས་སུ་རྫོགས་པར་འགྱུར་བའི་ཕྱིར་རོ་ཞེས་པའི་བར་དང། བྱང་ཆུབ་སེམས་དཔའ་དེ་དག་ཅི་ཡི་རྒྱུ་ཅན་ཞིག་ཡིན་ཞེ་ན། སྙིང་རྗེའི་སེམས་དང་གཉིས་སུ་མེད་བློ་དང། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་གསུངས་པའི་ཕྱིར། ཆོས་གསུམ་དང་བྱང་སེམས་རྒྱུ་འབྲས་མཚན་ཉིད་པ་འཇོག་དགོས་སོ།།

ནགས་རོགས་འདུལ་མིང་པ།                                                                        

གསང་གསུམ་རོ་གཅིག་རིགས་ཀུན་ཁྱབ་བདག་དང་པོའི་མགོན། །

ཕྱག་རྒྱ་འབར་བའི་བདེ་ཆེན་དབྱིངས་ལས་མ་གཡོས་པར། །

མུ་མེད་མཁའ་ཁྱབ་འགྲོ་ལ་ཐུགས་བརྩེས་ཉེར་འཁྱུད་ནས། །
ངུར་སྨྲིག་རྣམ་རོལ་ཕ་གཅིག་བླ་མས་བདག་སྐྱོངས་ཤིག །

འདིར་རྩོམ་སྒྲིག་པའི་བཀའ་སྩལ་དང་ལེན་དང། རང་གི་བརྗེད་ཐོ་རུ། བླ་མ་བརྒྱུད་པའི་གསུང་རྒྱུན་དཀའ་གནད་ཁག་ལས་འགའ་ཞིག་ཟུར་དུ་བཀོད་ན། ཐ་སྙད་ཚད་གྲུབ་ཏུ་འདོད་པའི་ཕྱོགས་ལ་འདི་ལྟར་འདྲི་སྟེ། དྲི་བ་དང་པོ། ཐ་སྙད་འཇུག་ཡུལ་གྱི་གཞི་གཅིག་ཡར་ག་ལོ་འདབ་དང་ལྡན་པ་ལྟ་བུ་ལ་འགྲོ་བ་རིགས་མི་མཐུན་པ་དང་ཡུལ་ཁམས་མི་མཐུན་པའི་དབང་གིས་ལྗོན་ཤིང་དང་ཁང་ཁྱིམ་སོགས་ཐ་སྙད་སོ་སོར་བཞེད་པ་ཡོད་པ་མཁས་གྲུབ་རྗེ་སོགས་མཁས་པ་དུ་མས་གསུངས་པ་དང་རིགས་པས་ཀྱང་གྲུབ་པས། དེ་ལྟར་ཐ་སྙད་བཞེད་པའི་གྲོ་བ་གཉིས་ཀྱི་བློ་གང་ཚད་མར་བཞེད། གཉིས་ཀར་ཚད་མར་བཞེད་ན་ཤེས་བྱ་ཐམས་ཅད་ཕན་ཚུན་འཁྱོལ་བས་ཐ་སྙད་ཚད་གྲུབ་ཉམས་ལ། གཅིག་ཚད་མར་ཡིན་ལ་གཅིག་ཚད་མར་མིན་ན་དེ་ལྟར་ཁྱད་པར་འབྱེད་པའི་རིགས་པ་གང་ལགས།

དགའ་ཤར་ལྷོ་པ་ནགས་ཤོད་པ་བློ་བཟང་ཕུན་ཚོགས།   འགོག་བདེན་སྟོང་ཉིད་སྒྲུབ་པའི་གཏམ་མ་བཅོས་པ་བཅོས་བྱེད་ཀྱི་བདེན་ཚིག་ཚངས་པའི་ཐིག་ཤིང༌། མ་རིག་བློ་ཡི་རྩ་བ་ཅན་གྱི་ཉོན་མོངས་སྐྱོན་དང་ཉེས་ཚོགས་ཀུན།  །ཞི་བའི་སྒོ་ནི་གཉིས་པ་མེད་པས་གཏི་མུག་བདེན་འཛིན་ཞེན་པའི་ཡུལ།  །

གཏན་ནས་མེད་པ་མངོན་སུམ་མཐོང་བའི་བར་ཆད་མེད་པའི་ལམ་བཟང་ནས།  །

གསར་བྱུང་མི་འཇིག་འགོག་པའི་བདེན་ཞེས་དམ་པའི་ཆོས་མཆོག་དེ་ལ་འདུད།  །མཁྱེན་པའི་དཀྱིལ་འཁོར་ཡོངས་སུ་རྫོགས་པས་ཁྱེད་ནི་ཉ་གང་ཟླ་བ་སྟེ།  །མཁས་པའི་དབང་པོའི་དཔལ་གྱི་མགུལ་ལས་འགོག་བདེན་སྟོང་ཉིད་སྒྲུབ་པའི་གཏམ།  །མ་བཅོས་སེམས་ཀྱི་རང་མདངས་ཤར་ཚེ་བདག་ཡིད་དང་བའི་འདབ་བརྒྱ་གྲོལ།།

དགའ་ཤར་ལྷོ་པ་ནགས་ཤོད་པ་བློ་བཟང་ཕུན་ཚོགས།    བློ་གྲོས་ཀྱི་མཐུ་སྟོབས་ཆུང་ཞིང་བརྩོན་འགྲུས་ཀྱི་རྒྱུ་བ་ལྷོད་པའི་དབུ་མའི་གཞུང་ལ་སློབ་གཉེར་གྱི་མིང་ཙམ་འཛིན ་པ་ཁོ་བོ་ནགས་ལྷའི་སྨྱུག་གུའམ་ཨ་རྟགས་ནོར་སྨྱུག་པའི་ཡིད་མཁའ་ལ་ཤར་བའི་ཐེ་ཚོམ་རྒྱུ་སྐར་ལས་ཐོ་རངས་ཀྱི་སྐར་མདའ་ལྟ་བུའི་དྲི་བ་འགའ་ཞིག་ཡེ་གེ་འབྲི་བའི་ལས་སུ་འཇུག་པའི་སྤྲོ་བ་བརྟས་པ་ནི། མི་ཆུང་སེམས་བཟང་ཅན་ཞིག་གི་སྐབས་སུ་བབ་པའི་ལས་ཀ་བཟང་པོ་ཞིག་ཡིན།  དེ་ཡང་མཁྱེན་དཔྱོད་ཀྱི་དཀྱིལ་འཁོར་རྫོགས་ཤིང་ལུང་རིགས་ཀྱི་འོད་སྟོང་འཕྲོ་བའི་ཆོས་གྲོགས་རྣམས་ཀྱིས་ཁོ་བོའི་རྣམ་རྟོག་གི་རྒྱུ་སྐར་རྣམས་ཡིད་ཀྱི་

མཁའ་མཐའ་ནས་ཕྱིར་ཕུད་དེ་ངེས་ཤེས་ཀྱི་འོད་སྣང་དཀར་པོ་ཕྱོགས་ཀུན་ཏུ་བསྐྱེད་པའི་ཆེད་དུ་ཡིན་པ་ལས་མཁས་མང་འདུས་པའི་གདན་གྲལ་རིང་མོར་གླེང་བའི་གཞི་རུ་སློང་ཏེ་ཟབ་བརླིང་ཚིག་གི་འབེལ་གཏམ་འབབ་ས་ཞིག་ག་ནས་ཡིན་ཏེ་མ་ཡིན་ནོ།།

སེར་ལྷོ་བ་སྐལ་བཟང་བསྟན་སྐྱོང༌།

ཚད་མ་ལས་འཕྲོས་པའི་དོགས་པ།།               

རང་བློ་རང་ལ་ལྐོག་གྱུར་མིན་ཞེས་པའི་དོན་གང་ཡིན།      གང་ཟག་རང་རྒྱུད་ཀྱི་བློ་ཡི་ངོ་བོ་ཅི་འདྲ་ཡིན་གང་ཟག་རང་ཉིད་ཀྱིས་རྟོགས་པའི་དོན་ཡིན་ནམ།   གང་ཟག་རང་གི་བློ་ཡིས་ཤེས་བྱའི་གནས་ཚད་ཇི་ཙམ་འཇལ་བ་གང་ཟག་རང་ཉིད་ཀྱིས་རྟོགས་པའི་དོན་ཡིན།    དང་པོ་ལྟར་ན།    ཕྱི་རོལ་རྒྱང་འཕེན་པ་དང་།    དེང་གི་ཚན་རིག་པ་རྣམས་ ཀྱིས་བློ་ཡི་ངོ་བོ་ཅི་འདྲ་ཡིན་མིན་ངོས་འཛིན་མ་ཐུབ་པར་ལུས་ཀྱི་ཆ་ཤས་སམ་ཀླད་ རྩ་གཟུགས་ཅན་གྱི་ནུས་པ་ཞིག་ལ་ཁས་བླངས་པས་རང་གི་བློ་ཡི་ངོ་བོ་རང་ལ་ལྐོག་ཏུ་གྱུར་པ་མཐོང་ཐུབ་སྟེ།    གལ་ཏེ་ཁོང་ཚོས་བློ་ཡི་ངོ་བོ་གསལ་རིག་ཙམ་དུ་རྟོགས་ཀྱི་ཡོད་ན་དེ་ལྟར་དུ་ཁས་ལེན་དགོས་ཏེ་དགོས་པ་རྒྱུ་མཚན་ཅི་ཡང་མེད་པར་ཤེས་བཞིན་དུ་མ་རེད་ཅེས་མི་ལབ་བོ།     ད་དུང་རང་བློ་རང་གིས་རྟོགས་ཞེས་རྣ་ཅོག་ཇི་ལྟར་འཐེན་ཡང་ཁ་ནང་དུ་སླེབས་ཐབས་མེད་པས་འདོད་ཚུལ་དང་པོ་མི་འཐད།   གཉིས་པ་ལྟར་ན་།     གང་ཟག་འགའ་ཤས་ལ་རང་ཉིད་ཀྱིས་ཤེས་བྱའི་གནས་ཚད་ཅི་ཙམ་ཤེས་པ་རང་ལ་ལྐོག་ཏུ་གྱུར་པ་དེ་འདྲ་མང་པོ་ཡོད་དེ།  མི་ཁ་ཤས་ལ་འཇོན་ཐང་དང་ཤེས་ཡོན་ཇི་ཙམ་ཡོད་མེད་ཀུན་གྱིས་གསལ་གསལ་ཐིང་ཐིང་ཤེས་ཀྱང་།    ད་དུང་ཤེས་རབས་དང་འཇོན་རབས་དང་།     ཁོ་རང་ལ་བལྟས་ན་མི་གཞན་རྣམས་བ་གླང་ལྟ་བུའི་ལྐུགས་པ་ཡིན་ཚུལ་ཤོད་ཅིང་། གལ་ཏེ་ཁོ་རང་གིས་ཤེས་པའི་ཤེས་བྱ་ཕྲན་ཚེགས་འགའ་དཔེར་བཟུང་སྟེ་ཁྱོད་དེ་ལྟ་བུའི་ཤེས་བྱ་ལ་བློ་གྲོས་རྒྱས་ཚུལ་སོགས་ངོ་བསྟོད་ཚིག་གིས་སྦུད་དུས།      འུད་ཤོབ་འཐེན་ཆེ་དྲགས་པས་གདོང་པར་ཁ་ཐུག་ལྟ་མི་ཚུགས་པར་མིག་ ཕྱོགས་གཞན་ལ་བལྟས་ནས་ཉན་དགོས་པ་དེ་འདྲ་ང་རང་གིས་མི་ཚེའི་ནང་དངོས་སུ་མཐོང་ མྱོང་བ་མ་ཟད།  ལུང་པ་ཞིག་ན་བྱད་བཞིན་ཤིན་ཏུ་མི་མཛེས་པའི་བུ་མོ་གླེན་མ་ཞིག་ཡོད།    རོགས་ཟླ་བུ་མོ་གཞན་རྣམས་ཀྱིས་ཁྱོད་ཀྱི་བྱད་བཞིན་མཛེས་ཚུལ་དང་།      རྒྱ་ཁྲོམ་དཀྱིལ་ནས་མི་ཡོད་དོ་ཅོག་གིས་ཁྱེད་ཀྱི་གདོང་ལ་བལྟས་ཏེ་གཡེང་གི་ཡོད་ཚུལ་བཤད་པས་བུ་མོ་གླེན་མས་དེ་ལྟར་ཡིན་སྣང་ཤར་ནས་རྒྱ་ཁྲོམ་དཀྱིལ་དུ་རྐང་པའི་འབབ་སྟེགས་ལྟ་བུ་ཞིག་ལ་འཛེགས་ཏེ་རྣམ་འགྱུར་སྣ་ཚོགས་ཀྱིས་རྒྱ་ཁྲོམ་དཀྱིལ་དུ་ལྟ་གི་ཡོད་ཚུལ་བཤད་པ་བདེན་ན།  རང་གི་བྱད་བཞིན་ཡག་བཙོག་ཅི་ཡོད་དེ་ཙམ་གྱིས་ལྐོག་གྱུར་མིན་པ་ཤེལ་སྒོ་ལ་བལྟས་ན་མངོན་སུམ་དུ་རྟོགས་ནུས་པས་ད་དུང་ལྐོག་ཏུ་གྱུར་པའི་མི་ཡོད་ན།     ང་ཚོས་མངོན་སུམ་དུ་མཐོང་མི་ཐུབ་པ་ཤེས་པ་འམ་བློ་ལྟ་བུ་ལྐོག་ཏུ་གྱུར་པའི་གང་ཟག་ག་ཚད་དགོས་དགོས་ཡོད་རེད་དྲན།    དེས་ན་རང་བློ་རང་ལ་ལྐོག་གྱུར་མིན་ཞེས་པའི་དོན་ཅི་ཡིན་ཞེས་པ་འདི་དྲི་བ་གཅིག་ཡིན།།

ཤེས་པ་ཟེར་བ་རྩ་དང་ཀླད་པར་དབང་བསྒྱུར་མཁན་དང༌། གཟུགས་ཅན་ལས་འདས་པ། ཐོགས་རེག་དང་བྲལ་བ། ཚེ་སྔ་མ་ནས་འོངས་བ། ལུས་དང་བྲལ་ནས་ཕྱི་མར་འགྲོ་བར་འདོད་མཁན་རྣམས་ཀྱིས་འདི་དག་ལ་ལན་ཐོབ། དེ་ཡང་ཆོས་ཁས་མི་ལེན་མཁན་ཞིག་དང་ལུང་ལ་ཡིད་མི་ཆེས་མཁན་ཞིག་ལ་ལན་འདེབས་ཇི་ལྟར་དགོས་པ་ལྟར་ཐོབ་ཅིག

ལན་འདེབས་པ་པོ་སེར་བྱེས་དགེ་བཤེས་འབྲི་རུ་བསྟན་པས་གསལ་བཤད། སྐྱེ་བ་སྔ་ཕྱི་དང་འབྲེལ་བའི་དྲི་བ་སོ་ལྔ་པ་འདི་མཁས་དབང་དཔའ་བརྟུལ་ལགས་ཀྱིས་ངོ་མཚར་གཏམ་གྱི་བང་མཛོད་ནང་དུ་བཏང་ནས་བདུན་གཉིས་ལྷག་ཙམ་ཕྱིན་ཀྱང་ལན་འདེབས་ཆ་ཚང་བ་ཞིག་འབུལ་མཁན་མ་བྱུང་པ་དང་། ལྷག་ཏུ་དེང་སང་དངོས་གཙོ་སྨྲ་བ་རྣམས་ལས་དྲི་བ་འདི་འདྲ་ཡང་ནས་ཡང་དུ་བྱུང་དང་འབྱུང་བཞིན་པ་དང་། ད་དུང་ཁོང་གིས་ལྷག་བསམ་གཡོ་མེད་ཀྱིས་སྐྱེ་བ་སྔ་ཕྱི་འདོད་མཁན་རྣམས་ལ་དོགས་སློང་དང་། དེ་རྣམས་ལ་དེང་སང་གི་ཕྱོགས་སྔའི་རྩོད་པ་ངོ་སྤྲོད་བྱེད་པ་ཡིན་པས། ངས་ལན་ཐེབས་མིན་དང་། ལན་མང་ཉུང་ལ་མ་བལྟོས་པར་དྲི་བ་ཚང་མ་ལ་ལན་རེ་འབུལ་འདོད་ཡོད། དེ་ཡང་མཁས་འདོད་དང་གྲགས་འདོད་ཀྱིས་ལན་འདེབས་བྱེད་པ་དང་། ལན་འདེབས་གནད་ལ་ཁེལ་བ་ཞིག་ཐེབས་རེ་བཅངས་མེད་པས་ཀློག་པ་པོ་རྣམས་ཀྱིས་ཐུགས་བཞེས་གནང་རོགས་ཞུ།

ཀ་སོགས་དབྱངས་གསལ་འདུས་པའི་བཀའ་བསྟན་གངྒའི་ཆུ་བོའི་རྒྱུན།  །ཁ་ནས་བཤད་ཆོས་ཙམ་མིན་གདུལ་བྱའི་ཉོན་མོངས་གདུང་སེལ་དེ།  །ག་ལེར་བདག་ལ་སྩོལ་བའི་བདེ་གཤེགས་ཀུན་གྱི་ངོ་བོ་སྟེ།  །ང་ཡི་དངོས་བརྒྱུད་་བླ་མ་རྣམས་ལ་སྙིང་ནས་གུས་པས་འདུད། །

མིང་བྱུང་ཚུལ། ནང་ཆོས་ཞེས་པའི་ཡིག་འབྲུ་ཟུང་གཅིག་ལ་ལུང་ཚོགས་དང་མ་སྦྱར་བར་དོན་གྱི་སྙིང་པོ་ཞིག་གླེང་པར་འདོད་པ་ནི།  སྒྲ་དང་དོན་གཉིས་ལས། དང་པོ་ནི།  ནང་ཆོས་ཀྱི་ཚིག་ཟུར་གྱི་མིང་གི་ཆ་ཤས་ཀྱི་ནང་ཞེས་པ་དེ།  ང་ཚོའི་སྟོན་པ་བྱུང་བ་ནས་བཟུང༌།  ཕྱི་རོལ་པ་ལ་ལྟོས་པས་བཏགས་པ་ཞིག་དང༌།  ཕྱི་རོལ་པ་ཚོས་ཁོང་ཚོ་ལ་ལྟོས་པས་ང་ཚོ་ལ་དེ་

བཞིན་འདོགས་ཀྱི་ཡོད་པར་སེམས། དཔེར་ན་རང་གང་ན་ཡོད་པའི་རྒྱལ་ཁབ་ལ་ནང་གི་རྒྱལ་ཁབ་དང༌། དེ་ལས་གཞན་པ་ལ་ཕྱི་ཡི་རྒྱལ་ཁབ་འདོགས་པ་བཞིན་རེད། མིང་དེ་ནི་བལྟོས་བྱ་ལྟོས་བྱེད་ལ་བརྟེན་ནས་བཞག་པ་ཞིག་ཡིན་པ་འདྲ། འགྲེལ་ཚུལ་གཞན་ཞིག་ལ། སེམས་ལ་ནང་དང་ལུས་ལ་ཕྱི་ཡི་ཐ་སྙད་དུ་བྱས་ནས། ནང་སེམས་དགེ་བའི་ཕྱོགས་སུ་སྐུལ་བྱེད་དམ། སེམས་རྒྱུད་ཡར་རྒྱས་ཀྱི་ཕྱོགས་སུ་བཟོ་བཅོས་གཏོང་བྱེད་ཞིག་ལ་འགྲེལ་མཁན་ཡང་ཡོད། དེ་ནི་ཕྱི་རོལ་པས་ཞི་གནས་སྒྲུབ་པ་དང་སྒོམ་སྒྲུབ་བྱེད་པ་དེ་ཡང་ནང་སེམས་ལ་འགྱུར་བ་གཏོང་བྱེད་དུ་འགྱུར་བས་འཐད་པར་མི་སེམས་སོ། གཞན་ཡང་ཆོས་ཞེས་པ་ནི། རང་གི་ངོ་བོ་འཛིན་པ་ཞིག་ལ་ཆོས་ཟེར། རང་གི་ངོ་བོ་འཛིན་ཞེས་པ་གཞི་གྲུབ་ཀྱི་ཆོས་དེ་ཡོད་པར་འཇོག་པའི་བློ་ཚད་ལྡན་ཞིག་གིས་ངོ་བོ་འཛིན་པ་ལ་ལབ་ནའང་འགྲིག།།འོན་ཀྱང་སྐབས་འདིར་ཆོས་ཟེར་བ་འདི་དགེ་ཕྱོགས་ཀྱི་ལས་ཤིག་གམ་བྱ་བ་ཞིག་ལ་གོ་བ་ཡོད་དོ། སྒྲ་བཤད་པ་ལ་དཔྱད་པ་མང་ན་ཕན་འབྲས་ཆུང་བས་དེ་ཙམ་བྱས།

དགའ་ལྷོ་འབྲི་རྒྱལ་བ།

སྤྱིར་འཛམ་གླིང་འདིའི་ཐོག་འཚོ་གནས་ཐུབ་པ་ལ་ཆོས་ཞིག་ཁས་ལེན་མི་དགོས་པ་ནི་ཆོས་མེད་སྨྲ་བ་དེ་དག་ཕྱི་ཚུལ་ནས་བལྟས་ན་འདྲ་ཆགས་པོ་བྱས་ནས་འཚོ་གནས་ཐུབ་ཀྱི་ཡོད་པའི་བཟོ་འདྲ་ཡོད།        འོན་ཀྱང་བསམ་བློ་ཞིབ་ཚགས་ཞིག་བཏང་ན་ཆོས་ཁས་ལེན་མི་ལེན་དེ་དག་ལས་ཁས་ལེན་མཁན་ཚོ་སེམས་ལ་ཞི་བདེ་ཆེ་ཡི་ཡོད་པ་དེ་ཀུན་གྱིས་ཤེས་གསལ་རེད།  དེ་ནི་ཆོས་ནས་བཤད་པའི་བླངས་དོར་གྱི་བསླབ་བྱ་བཟང་པོ་དེ་དག་ལ་ཡིད་ཆེས་ཡོད་པའི་རྒྱུ་མཚན་གྱིས་རེད། ཆོས་ལུགས་ཀྱང་ཡེ་ཤུ་དང༌།  ཁ་ཆེ། ཇིའུ་ཤི།ཧི་འདུ་སོགས་དུ་མ་ཞིག་ཡོད་ཀྱང་དེ་དག་ནི་འཇིག་རྟེན་བཀོད་པ་པོ་འདོད་ཅིང་དེ་ཡང་རྟག་པ་རང་བྱུང་གི་སྐྱེས་བུ་ཞིག་གི་བློའི་གཡོ་བ་སྔོན་དུ་བཏང་ནས་སྣོད་བཅུད་ཀྱི་འཇིག་རྟེན་མཐའ་དག་བཀོད་པའམ་སྒྲུབ་པར་འདོད་ཀྱི་ཡོད། གང་ལྟར་འཇིག་རྟེན་བཀོད་པ་པོ་འདོད་ན་ང་ཚོའི་སྣོད་བཅུད་ཐམས་ཅད་འཇིག་རྟེན་བཀོད་པ་པོ་དཀོན་མཆོག་གི་ཕྱག་ལ་ཡོད་པ་མ་གཏོགས་ང་ཚོའི་ལག་པར་མེད་པའི་བཟོ་འདྲ་བོ་ཆགས་ཀྱི་ཡོད།