ཤར་ཕྱོགས་ནང་པ་དང་ནུབ་ཕྱོགས་ཚན་རིག་པ་གཉིས་ཀྱི་ལྟ་གྲུབ་མཐུན་ཆ་གནའ་དེང་ཟུང་གི་མེ་ལོང༌།  སྣང་སྟོང་ལྟོས་གྲུབ་འགལ་མེད་ཤེས་བྱའི་མཁར། །འཁོར་འདས་གསལ་བའི་ཡེ་ཤེས་ཉི་གཞོན་གྱིས།།

སྣ་ཚོགས་འགྲོ་བློ་རྨོངས་པའི་མི་ཤེས་མུན། །བསལ་མཛད་རྣམ་འདྲེན་ཤཱཀྱ་སེངྒེར་འདུད།།

ཅེས་མཆོད་པར་བརྗོད་པས་སྔོན་བསུས་ཏེ་གང་གླེང་བར་བྱ་བ་ནི། ཤར་ནུབ་ཀྱི་གནའ་དེང་ཤེས་ཡོན་མཐུན་ཆ་མང་པོར་ཡོད་པར་བརྟེན། ནང་པས་རྟེན་འབྲེལ་དང་ལྟོས་གྲུབ་ཀྱི་རྣམ་གཞག་ཇི་ལྟར་འཇོག་པ་བསྡུས་ཏེ་བཤད་པ། ནུབ་ཕྱོགས་པས་རྟེན་འབྲེལ་དང་ལྟོས་གྲུབ་ཀྱི་རྣམ་གཞག་དེ་དང་ཆ་འདྲ་བར་བཤད་ཚུལ་གཉིས་ལས། དང་པོ། ཇི་སྐད་དུ་དཔལ་མགོན་འཕགས་པ་ཀླུ་སྒྲུབ་ཀྱིས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པ་ལྟར་ལོ་ངོ་བརྒྱ་ཕྲག་ཉི་ཤུའི་སྔ་རོལ་དུ་བདག་ཅག་གི་སྟོན་མཆོག་མཉམ་མེད་ཤཱཀྱ་སེངྒེས་རྫས་འཕྲུལ་ལ་མ་བརྟེན་པར་ནང་པའི་ཚན་རིག་གི་རྣམ་གཞག་དང༌། མཐོང་སྤྱོད་ལས་འདས་པའི་ལྟ་གྲུབ་ཀྱི་རྣམ་གཞག །ཉམས་ལེན་སྒོམ་སྒྲུབ་ཀྱི་རྣམ་གཞག་གསུམ་ལས། དང་པོ་ནང་པའི་ཚན་རིག་དེང་དུས་ཀྱི་རིག་གསར་དང་མཐུན་པ་མ་ཟད། གཉིས་པ་མཐོང་སྤྱོད་ལས་འདས་པའི་ནང་པའི་ལྟ་གྲུབ་ཀྱི་རྣམ་གཞག་ཀྱང། དེང་གི་ཚན་རིག་དང་མཐུན་ཆ་ཆེ་བས་དཔེར་ན། སྟོང་པ་དང་རྟེན་འབྱུང་གི་རྣམ་གཞག་ཞིབ་ཅིང་ཕྲ་བ་མངོན་སུམ་གྱི་མྱོང་བས་དྲངས་ཤིང་དེ་ལྟར་གཞན་ལ་འདོམས་པ་དེ་དག་ནི། འཁོར་འདས་ཀྱི་ཆོས་ཐམས་ཅད་རང་བཞིན་མ་བཅོས་ཤིང་མ་ལྟོས་པ་མེད་ཅིང་ལྟོས་ནས་ཡོད་པ་དང༌། རྟེན་འབྲེལ་ལྟོས་ཤིང་བཅོས་མ་ཉིད་ཡིན་པའི་རྒྱུ་མཚན་གྱིས། བྱ་བྱེད་ཐམས་ཅད་ཕན་ཚུན་ལྟོས་གྲུབ་ཀྱིས་འཇོག་དགོས་པས་རིག་གསར་དང་མཐུན་ཆ་ཆེ་ཞིང༌། དགག་སྒྲུབ་ཀྱི་ཆ་གང་ནས་ཀྱང་གཞན་གྱིས་སུན་འབྱིན་པའི་གོ་སྐབས་དབེན་གཉིས་པ། དུས་རབས་བཅུ་དགུ་པའི་སྐབས་སུ་བྱོན་པའི་དབྱིན་ཇིའི་ཕྲ་རྡུལ་དངོས་ཁམས་ཀྱི་ཚན་རིག་པ་གྲགས་ཅན་ཏཱ་ཝུན་གྱིས་ཕྱི་ལོ་ ༡༩༣༧ ལོར་ཞི་མིའི་ཚོད་ལྟ་ཟེར་བའི་ཤི་གསོན་གྱི་དཔེ་ལ་བརྟེན་ནས་དངོས་པོའི་ཆོས་ཉིད་ལ་འགྲེལ་བཤད་བྱེད་སྐབས་སུ། གཞི་གཅིག་ཡོད་དང་མེད། ཡིན་དང་མིན། ཤི་བ་དང་གསོན་པ་སོགས་ཀྱི་ཐ་སྙད་ཡུལ་དང་ཡུལ་ཅན་ཕན་ཚུན་ལྟོས་ནས་འཇོག་དགོས་པ་ལས། ཕན་ཚུན་མ་ལྟོས་པར་ཁ་ཚོན་གཅོད་མི་ནུས་པར་གསུངས་པ་དེ་དག་ནང་པའི་ལྟོས་གྲུབ་ཀྱི་རྣམ་གཞག་དང་ཆེས་མཐུན་ཆ་ཆེ་བར་མཐོང༌། ཁོང་གིས་རང་བྱུང་གི་འདེམ་སྒྲུག་དང༌། དེང་རབས་ཀྱི་འཕེལ་འགྱུར་རིགས་པའི་རྨང་གཞི་བཙུགས་པ་དེ་དག་ཕྱིའི་སྣོད་དང༌། ནང་བཅུད་ཀྱི་སེམས་ཅན་གཉིས་ཀྱི་ལས་འབྲེལ་ལ་བརྟེན་ནས་ཡིན་པ་ནང་པའི་གཞུང་ནས་གསུངས་པ་དང་མཐུན་ཆ་ཆེ། འཕེལ་འགྱུར་ལ་བརྟེན་ནས་སེམས་ཅན་རྣམས་མེས་པོ་གཅིག་པ་དང༌། སེམས་ཅན་རྣམས་གཉེན་ཉེ་ཡིན་པའི་འགྲེལ་བཤད་ཀྱང་བྱས། གོང་དུ་བརྗོད་པ་ལྟར་གཞི་གཅིག་ཡོད་མེད་སོགས་ཁ་ཚོན་གཅོད་མི་ནུས་པ་བཞིན་རྡུལ་ཕྲན་གཅིག་གི་མོ་རྡུལ་ལམ་གློག་རྡུལ་དེ་འཇུག་པ་མྱུར་བས་དུས་གཅིག་ལ་ཡུལ་གཉིས་ལ་ཡོད་པ་ལྟར་མཐོང་སྲིད་ཀྱང༌། སྤྱིར་ཚན་རིག་པས་གཟུགས་ཅན་གཅིག་དུས་གཅིག་ལ་ཡུལ་གཉིས་ལ་ཡོད་མི་སྲིད་པར་འདོད་པས། ཆོས་མངོན་པ་མཛོད་ལས། གཅིག་ན་ལྷན་གཅིག་གཉིས་ཡོད་ཕྱིར། གསུངས་པ་དང་མཚུངས། གྷི་རིག་གི་ཚན་རིག་པ་ཧྥིལོ་ཧྥར་རྫི་ནོ་ཡིས་ལྟོས་གྲུབ་དཔེའི་ཐོག་ནས་འགྲེལ་བཤད་བྱེད་སྐབས་དུས་ཀྱི་སྐད་ཅིག་མ་གཅིག་ལ་མདའ་ཞིག་འཕངས་པས་ན་བར་སྣང་དུ་གོ་ས་ངེས་ཅན་ཞིག་ལ་ཡོད་དགོས། མདའ་དེ་རྒྱང་ཐག་ཇི་ཙམ་སོང་ཡང་དེའི་རྒྱང་ཐག་ཕྱེད་བསྐྱོད་པ་ལ་ཐོག་མ་འགོ་འཛུགས་ས་ནས་བརྩིས་པའི་རྒྱང་ཐག་ཕྱེད་བསྐྱོད་དགོས།

རིགས་པའི་མྱུ་གུ།

ང་ཚོའི་སྤྱི་ཚོགས་ཁྲོད་དུ་ཚན་རིག་ལ་ཞིབ་ཚགས་པོའི་ཐོག་ནས་བསམ་བློ་གཏོང་མཁན་ཉུང་ཞིང་དགག་པ་སྐྱོན་མཁན་མང་བ་དང་།

བོད་ཀྱི་མཁས་དབང་འགའ་ཞིག་ནས་ཀྱང་དགག་པ་སྐྱོན་གནང་གི་ཡོད་པ་རེད་དེ། དགག་པ་སྐྱོན་མཁན་དེ་དག་ལ་ཕྱོགས་སུ་མ་ལྷུང་བའི་ཐོག་ཞིབ་འཇུག་མཐིལ་ཕྱིན་ཞིག་བྱེད་ན། ཕལ་ཆེ་བ་ཚན་རིག་ལ་དོ་སྣང་བྱས་པ་ཙམ་ལས་གཏིང་ཟབ་སློབ་སྦྱོང་བྱེད་མྱོང་མེད་པ་ཤ་སྟག་རེད།

དོན་དངོས་དང་མཐུན་པའི་ཚན་རིག་སྦྱངས་པ་བྱས་པའི་ཁེ་ཕན་ལ་བསམ་གཞིག་བྱས་ཚེ། ནང་པ་ཞིག་ཡིན་པའི་ཆ་ནས་ཚན་རིག་སྦྱོང་རྒྱུ་གལ་ཆེན་ནང་གི་གལ་ཆེན་ཞིག་ཡིན་པ་ངས་སྤོབས་པ་མཐོན་པོའི་སྒོ་ནས་བཤད་ཐུབ། དེང་གི་སྐབས་ནང་བསྟན་ཆེས་ཉག་ཕྲ་བའི་སྐབས་འདིར། ནང་བསྟན་རྒྱ་ཁྱབ་ཏུ་འགྲོ་བ་ལ་མེད་དུ་མི་རུང་བའི་ཆ་རྐྱེན་ཞིག་ཡིན་པ་ལས་འགལ་རྐྱེན་དུ་དུས་ནམ་ཡང་མཐོང་གི་མེད་པ་མ་ཟད། དེ་ནང་པ་ཚང་མས་བསྒྲུབ་དགོས་པའི་ལས་འགན་ཞིག་ཡིན། དེང་གི་ཆར་ཡང་ཚན་རིག་པས་མིའི་དབང་རྩ་མ་ལག་ཕྲ་ཕུང་དེ་དག་ཡར་རྒྱས་ཚད་མཐོར་ཕྱིན་ཅིང་དེ་དག་གི་འགུལ་སྐྱོད་དང་གློག་གི་བརྡ་ལེན་བཅས་ལས་ཤེས་པ་རགས་པའི་རྣམ་གཞག་འགྲེལ་བརྗོད་ཀྱི་ལམ་ལས་འདས་པ་བཤད་དང་ཤོད་བཞིན་པའི་སྐབས་འདིར།ནང་དོན་རིགས་པའི་གཞུང་ལུགས་དག་ལས་བཤད་པའི་ཤེས་པ་ཕྲ་མོའི་རྣམ་གཞག་རིག་གསར་དང་ཟུང་དུ་འབྲེལ་ན་འཛམ་གླིང་གི་ཁྱད་ནོར་ཞིག་ཏུ་འགྱུར་རྒྱུ་གདོན་མི་ཟ་བར་སྙམ།

ནགས་ཧ་ཧ་སྐལ་བཟང་།

ནང་ཆོས་དང་ཚན་རིག་པ་གཉིས་ཀྱི་རྡུལ་ཕྲན་གྱི་བོངས་ཚད་ཀྱི་ཁྱད་པར།

དང་པོ་ཚན་རིག་པས་རྡུལ་ཕྲན་གྱི་འདོད་ཚུལ་ནི། དེ་ཡང་ཚན་རིག་ལ་སྐྱེ་དངོས་ཚན་རིག་དང་། དབང་རྩ་ཚན་རིག། རྫས་སྦྱོར་ཚན་རིག། དངོས་ཁམས་ཚན་རིག་དང་བཞི་ཡོད་པ་ལས། དངོས་ཁམས་ཚན་རིག་གི་སྐབས་སུ་འཇིག་རྟེན་ཁམས་ཀྱི་སྣོད་བཅུད་མ་ལག་དང་བཅས་པ་གང་འདྲ་ཞིག་ཡིན་རུང་ཡོངས་རྫོགས་རྡུལ་ཕྲན་ལས་མ་གྲུབ་པ་གཅིག་ཀྱང་མེད་པས། དེ་འདྲ་བའི་འདས་མ་ད་གསུམ་གྱི་སྣོད་བཅུད་ཀུན་གྱི་གཞི་རུ་གྱུར་པའི་རྡུལ་ཕྲན་དེ་དག་ཀྱང་ལོ་ཐེར་འབུམ་མང་པོའི་སྔ་རོལ་དུ་བྱུང་བ་ཤ་ཏག་ཡིན་པ་ལས། དེང་སྐབས་སུ་སྔར་མེད་གསར་སྐྱེས་ཀྱི་རྡུལ་ཕྲན་ཞིག་མེད་པར་འདོད་ལ། འོ་ན་དེ་འདྲའི་རྡུལ་ཕྲན་དེ་དག་གི་ངོ་བོའམ་རྩོམ་གཞི་དང་། ཆེ་ཆུང་སོགས་ཀྱི་ཁྱད་པར་རམ་ཁྱད་ཆོས་ག་འདྲ་ཞིག་ཡིན་མཉམ་ན། ད་སྐབས་ཡོད་བཞིན་པའི་འབྱུང་བ་བཞི་དང་རི་ལུང་ཁང་ཁྱིམ་སྐྱེ་འགྲོ་སྲོག་ལྡན་སོགས་མདོར་ན་སྣོད་བཅུད་ག་འདྲ་ཞིག་ཡིན་རུང་རྡུལ་ཕྲན་ནམ་རྩ་རྫས་ལས་མ་གྲུབ་པ་ཞིག་མེད་པས། དེ་འདྲའི་རྩ་རྫས་སམ་རྡུལ་ཕྲན་དེ་ལ་གྲངས་བརྒྱ་ལྷག་ཙམ་ཞིག་ལས་མེད་ཀྱང་ཁོ་རང་ཚོ་ནང་ཕན་ཚུན་འདྲེས་ནས་འཆིང་སྦྱོར་སྣ་ཚོགས་བྱེད་པ་ལས་གོང་ཞུས་ཀྱི་སྣོད་བཅུད་སྣ་ཚོགས་པ་གྲངས་དང་མུ་མཐའ་མེད་པ་དེ་བྱུང་བ་ཡིན། ངོ་བོ་ནི་རྡུལ་ཕྲན་གང་འདྲ་ཞིག་ཡིན་རུང་རྡུལ་མི་འདྲ་བ་གསུམ་ལས་གྲུབ་པ་ཤ་ཏག་ཡིན་པ་རེད། དེ་འདྲའི་རྡུལ་གསུམ་པོ་དེའི་མིང་ལ་ཕོ་རྡུལ་དང་། མོ་རྡུལ། བར་རྡུལ་བཅས་བཤད། དེ་གསུམ་འདུས་པའམ་འཆིང་སྦྱོར་བྱེད་པ་ལས་རྡུལ་ཕྲན་གྲུབ་པ་དང་། རྡུལ་ཕྲན་གཅིག་གི་ནང་ལ་དེ་གསུམ་གྱི་གྲངས་ཀྱི་ཆ་ནས་མང་ཉུང་མི་འདྲ་བ་ཡོད། རྡུལ་ཕྲན་མང་པོ་འདུས་པ་ལས་འདུས་རྡུལ་དང་། འདུས་རྡུལ་མང་པོ་ཚོགས་པ་ལས་དབང་ཕྲ། དེ་ལས་ཕྲ་ཕུང་། ཕྲ་ཕུང་ཚོགས་པ་ལས་ཕུང་གྲུབ། ཕུང་གྲུབ་ཚོགས་པ་ལས་དབང་པོ་སོགས་རིམ་བཞིན་གྲུབ་པར་འདོད། དེ་ཡང་དཔེར་ན་འབྱུང་བ་ཆུ་ལྟ་བུ་ལ་ཆ་མཚོན་ན། རྡུལ་ཕྲན་ནམ་རྩ་རྫས་སུ་གྱུར་པ་གོང་དུ་བཤད་པའི་གྲངས་བརྒྱ་ལྷག་ཙམ་ཡོད་པ་དེ་རྣམས་ལ་མིང་སོ་སོ་ནས་ཡོད་པ་བཞིན། ཆུ་དེ་ཉིད་གྲུབ་གཞིའི་རྩ་རྫས་ནི་ཡང་རླུང་གཉིས་དང་། འཚོ་རླུང་གཅིག་འདུས་པ་ལས་ཆུ་ཡི་རྡུལ་གཅིག་གྲུབ་པ་རེད། རྩ་རྫས་སམ་རྡུལ་ཕྲན་དེ་རྣམས་གྲངས་ཀྱི་བང་རིམ་ཡང་རྡུལ་ཕྲན་སོ་སོའི་ནང་གི་ཕོ་རྡུལ་གྱི་གྲངས་ལ་ལྟོས་ནས་གྲངས་ཀྱི་བང་རིམ་འཇོག་གི་ཡོད།

འབྲི་སྐལ་བཟང༌།

དུས་དེབ་སྔོན་མའི་ནང་དུ་ཕྲུ་གུ་སྐྱེ་འཕེལ་གྱི་བརྒྱུད་རིམ་དེ་བཤད་ཟིན་པ་ཡིན་པས་དེའི་འཕྲོ་མཐུད་པ་ལྟ་བུ་ཅུང་ཞིག་བཤད་པར་འདོད། དེ་ཡང་སྤྱིར་འགྲོ་བ་སེམས་ཅན་ཀུན་ལ་སོ་སོ་སྐྱེ་འཕེལ་བྱེད་སྟངས་དང་འཚོ་གནས་ཀྱི་བྱ་རིམ་རེ་ཡོད་ངེས་པ་ལོས་ཡིན། འདིར་ནི་འགྲོ་བ་མི་ཡི་དབང་དུ་བྱས་ནས་འཆད་ན་ཀློག་པ་པོ་རྣམས་ཀྱིས་གོ་བདེ་བ་དང་བསམ་བདེ་བ་ཞིག་ཡོང་བར་སྙམ་པས་དེ་ལྟར་འཆད་ན།

མི་རྣམས་ཀྱི་ལུས་ཀྱི་གནས་སྟངས་ནི་སྒྲིག་གཞི་དང་ལྡན་པ་ཞིག་ཡིན་ལ་ཡན་ལག་རྣམས་ཀྱིས་སྒྲིག་ཚུགས་དང་ལྡན་པའི་སྒོ་ནས་ལས་ཀ་བྱེད་ཀྱི་ཡོད། སྐབས་འགར་མཉམ་རུབ་ཀྱིས་ལས་ཀ་བྱེད་ཀྱི་ཡོད་ལ་སྐབས་འགར་ཆ་ཤས་གཅིག་ཙམ་གྱིས་ལས་ཀ་བྱེད་ཀྱི་ཡོད། ཡང་ཆ་ཤས་གཅིག་ཙམ་གྱིས་ལས་ཀ་བྱེད་ཟེར་དུས་ཆ་ཤས་གཞན་དང་འབྲེལ་བ་རྩ་བ་ཉིད་ནས་མེད་པ་ལ་ཟེར་གྱི་མེད། ལས་ཀ་དེ་དག་གི་ནུས་པ་འདོན་སྤེལ་བྱེད་པ་དང་སྟངས་འཛིན་བྱེད་མཁན་ནི་ཀླད་པ་དང་དབང་རྩ་རྣམས་ཀྱི་ནུས་པ་ལས་བྱུང་བ་ཡིན། ལུས་ཀྱི་དབང་རྩ་མ་ལག་དང་བཅས་པ་ཡོངས་རྫོགས་ཀླད་པ་ལ་འབྲེལ་མཐུད་བྱས་ཡོད་ཀྱང་ཐག་པ་མཐུད་པ་ལྟ་བུ་ནི་བསམ་མི་རུང༌། དབང་རྩའི་ཕྲ་ཕུང་རེ་རེའི་བར་དུ་མཐུད་མཚམས་གྱི་སྟོང་ཆ་རེ་རེ་ཡོད་པར་བཤད། དེ་དག་ལས་རྒལ་ཀླད་ལ་ཁ་ཐུག་འབྲེལ་བའི་དབང་རྩ་འགའ་ཞིག་གིས་བརྡ་འཕྲིན་ཁ་ཐུག་རྒལ་ཀླད་ལ་གཏོང་པའི་བྱ་བ་ཡང་བྱེད་ཀྱི་ཡོད།

འབྲི་སྐལ་བཟང༌།

དུས་དེབ་སྔོན་མའི་ནང་དུ་ཕྲུ་གུ་སྐྱེ་འཕེལ་གྱི་བརྒྱུད་རིམ་དེ་བཤད་ཟིན་པ་ཡིན་པས་དེའི་འཕྲོ་མཐུད་པ་ལྟ་བུ་ཅུང་ཞིག་བཤད་པར་འདོད། དེ་ཡང་སྤྱིར་འགྲོ་བ་སེམས་ཅན་ཀུན་ལ་སོ་སོ་སྐྱེ་འཕེལ་བྱེད་སྟངས་དང་འཚོ་གནས་ཀྱི་བྱ་རིམ་རེ་ཡོད་ངེས་པ་ལོས་ཡིན། འདིར་ནི་འགྲོ་བ་མི་ཡི་དབང་དུ་བྱས་ནས་འཆད་ན་ཀློག་པ་པོ་རྣམས་ཀྱིས་གོ་བདེ་བ་དང་བསམ་བདེ་བ་ཞིག་ཡོང་བར་སྙམ་པས་དེ་ལྟར་འཆད་ན།

མི་རྣམས་ཀྱི་ལུས་ཀྱི་གནས་སྟངས་ནི་སྒྲིག་གཞི་དང་ལྡན་པ་ཞིག་ཡིན་ལ་ཡན་ལག་རྣམས་ཀྱིས་སྒྲིག་ཚུགས་དང་ལྡན་པའི་སྒོ་ནས་ལས་ཀ་བྱེད་ཀྱི་ཡོད། སྐབས་འགར་མཉམ་རུབ་ཀྱིས་ལས་ཀ་བྱེད་ཀྱི་ཡོད་ལ་སྐབས་འགར་ཆ་ཤས་གཅིག་ཙམ་གྱིས་ལས་ཀ་བྱེད་ཀྱི་ཡོད།

ཡང་ཆ་ཤས་གཅིག་ཙམ་གྱིས་ལས་ཀ་བྱེད་ཟེར་དུས་ཆ་ཤས་གཞན་དང་འབྲེལ་བ་རྩ་བ་ཉིད་ནས་མེད་པ་ལ་ཟེར་གྱི་མེད། ལས་ཀ་དེ་དག་གི་ནུས་པ་འདོན་སྤེལ་བྱེད་པ་དང་སྟངས་འཛིན་བྱེད་མཁན་ནི་ཀླད་པ་དང་དབང་རྩ་རྣམས་ཀྱི་ནུས་པ་ལས་བྱུང་བ་ཡིན། ལུས་ཀྱི་དབང་རྩ་མ་ལག་དང་བཅས་པ་ཡོངས་རྫོགས་ཀླད་པ་ལ་འབྲེལ་མཐུད་བྱས་ཡོད་ཀྱང་ཐག་པ་མཐུད་པ་ལྟ་བུ་ནི་བསམ་མི་རུང༌། དབང་རྩའི་ཕྲ་ཕུང་རེ་རེའི་བར་དུ་མཐུད་མཚམས་གྱི་སྟོང་ཆ་རེ་རེ་ཡོད་པར་བཤད། དེ་དག་ལས་རྒལ་ཀླད་ལ་ཁ་ཐུག་འབྲེལ་བའི་དབང་རྩ་འགའ་ཞིག་གིས་བརྡ་འཕྲིན་ཁ་ཐུག་རྒལ་ཀླད་ལ་གཏོང་པའི་བྱ་བ་ཡང་བྱེད་ཀྱི་ཡོད།

འབྲི་ཁ་བའི་བུ་མོ།

ཆོས་ལུགས་རེ་ལ་རྡོ་རྗེའི་ལུང་ཚིག་རེ།།
བདེན་དང་རྫུན་ཡང་གཡོལ་དུ་མེད་མོད་ཀྱང་།།
དཔྱད་གསུམ་རིགས་པའི་ལྟ་གྲུབ་སྨད་བྱུང་བ།།
དངོས་ཐོག་བདེན་པར་སྨྲ་བའི་ཤཱཀྱའི་སྲས།།

མྱོང་བ་སེམས་ཀྱི་རྣམ་གཞག་ཕྲ་མོ་ཀུན།།
ཤེས་ནས་བདེ་སྡུག་རྒྱུ་འབྲས་འཇུག་ལྡོག་ཚུལ།།
བྱམས་དང་སྙིང་རྗེས་ཚུལ་བཞིན་སྟོན་མཛད་པ།།
སྟོན་མཆོག་སྟོན་པ་ཁྱེད་ལས་གཞན་ན་གང་།།

བདེན་དོན་འཚོལ་ལ་ནང་བསྟན་ཚན་རིག་མཐུན།།
མཐུན་པའི་རིགས་ལམ་ཐབས་ཚུལ་སྣ་ཚོགས་པ།།
ནང་བསྟན་ཚན་རིག་འགལ་མེད་གྲོགས་སུ་ཁྱེར།།
ནང་ཚན་གཉིས་ཀྱིས་འགྲོ་བའི་ལམ་ཁྲིད་མཛོད།།

 འདིར་ཅུང་ཟད་བཤད་འདོད་པ་ནི་དབང་རྩ་ཚན་རིག་གི་སྐོར་ཡིན་ལ། སྤྱིར་དབང་རྩའི་ཚན་རིག་བྱུང་རིམ་དང་ལོ་རྒྱུས་དེ་ཙམ་གཏིང་ཟབ་པོ་ཞིག་སྔོན་དུས་སུ་ཞིབ་བཤད་བྱས་པ་མེད་པ་འདྲ། འོན་ཀྱང་ཞིབ་འཇུག་པ་ཚོས་བཤད་ཚུལ་ལྟར་ན་དབང་རྩའི་ཚན་རིག་ནི་སྤྱི་ལོ་མ་ཚེས་གོང་གི་ལོ་ངོ་ ༢༠༠ཡན་མན་ཙམ་ནས་གནའ་བོའི་ཨི་ཇིབ་ཡུལ་མི་རྣམས་ཀྱིས་གཤིན་པོའི་ཕུང་པོ་ས་དོང་ལ་མ་སྦས་སྔོན་ལ་ཀླད་པ་ཉར་ཚགས་བྱེད་པ་བརྒྱུད་སེམས་ནད་བཅོས་ཐབས་འདྲ་མིན་བྱེད་པའི་རྣམ་གཞག་ཞིག་གནའ་བོའི་ཨི་ཇིབ་ཀྱི་ཡིག་ཚག་རྙིང་པ་ཞིག་ལས་སྙེད་ཡོད་པ་བཤད་སྲོལ་ཡོད་ལ། རྡོ་བསྐོས་ཡིག་རྙིང་དེ་ནི་ཡེ་ཤུའི་སྟོན་པ་མ་འཁྲུངས་གོང་གི་ལོ་༡༧༠༠ ཙམ་གྱི་སྔོན་ལ་བརྩམས་ཡོད་པ་ཚོད་དཔག་བྱེད་བཞིན་ཡོད་ལ། ཀླད་ཆེན་དང་དབང་རྩའི་ཕྲ་ཕུང་སྐོར་ལ་རིག་པའི་གཞུང་ལུགས་ལྡན་པའི་དབང་རྩའི་ཚན་རིག་དེ་དར་ནས་ལོ་ངོ་༤༠༠ ལྷག་ཙམ་ལས་སོང་མེད་པ་དང་ལྷག་པར་དུ་དབང་རྩའི་ཚན་རིག་ལ་ཆེད་དུ་དམིགས་ཏེ་བརྟག་དཔྱད་དང་ཞིབ་འཇུག་བྱས་ནས་རིག་པའི་སྡེ་ཚན་ཟུར་དུ་བཙུགས་ནས་དེ་ཙམ་ཡུན་རིང་པོ་སོང་མེད་སྐད་འདུག། །གང་ལྟར་དབང་རྩའི་ཚན་རིག་གི་རྣམ་གཞག་ནི་ནང་པའི་གཞུང་ལུགས་ནས་སེམས་ཁམས་དང་རྩ་རླུང་སོགས་ལ་འབྲེལ་བ་ཡོད་པའི་རིག་པའི་སྡེ་ཚན་དང་གཞུང་ལུགས་ཤིག་ཡིན་པར་སྙམ།

འབྲི་སྐལ་བཟང༌།

སྐྱེ་དངོས་ཚན་རིག་གི་སྐོར་འཆད་སྐབས་སྐྱེ་ལྡན་གྱི་དངོས་པོ་དེའི་བྱ་བ་དང་ཁྱད་ཆོས། དེ་ གང་ལས་བྱུང་བ་སོགས་ཀྱི་སྐོར་འཆད་དགོས་པས་དེ་དག་གི་ཐོག་མའི་བྱུང་ས་སོགས་ཡར་ དེད་ན་འཇིག་རྟེན་གྱི་ཁམས་ཐོག་མར་གྲུབ་པའི་གནས་སྐབས་ཀྱི་རྫས་དང་དངོས་པོ་དེ་དག་ལ་ཐུག་པ་འོས་མེད་ཡིན་པས་འཇིག་རྟེན་གྱི་ཁམས་ཆགས་ཚུལ་ཅུང་ཟད་འཆད་ནས་སྐྱེས་དངོས་ཚན་རིག་སྐོར་དངོས་བཤད་པ་ནི། དེ་ཡང་སྐྱེ་ལྡན་གྱི་དངོས་པོའི་བརྒྱུད་རིམ་ནི་ འཛམ་གླིང་གི་ས་གཞི་ཡངས་ཞིང་རྒྱ་ཆེ་བ་འདིའི་སྟེང་གི་རྩི་ཤིང་ནགས་ཚལ་དང༌། འབྲུ་ སྲན་སྣ་ལྔ། སྲོག་ཆགས་དུད་འགྲོའི་རིགས། རྐང་གཉིས་མི་ཡི་རིགས་སོགས་ཚེ་སྲོག་དང་ལྡན་ པའི་དངོས་པོ་རྣམས་ཀྱི་འཕེལ་རིམ་ལས་བྱུང་བའི་རྫས་ཀྱི་རྒྱུན་དེའི་ཁྱད་ཆོས་མི་འདྲ་བའི་རྐྱེན་གྱིས་འབྲས་བུ་དེའི་དབྱིབས་དང་ཁ་དོག་བོངས་ཚོད་དང་ནུས་པ་སོགས་མི་འདྲ་བའི་ཁྱད་པར་ཡོང་གི་ཡོད། དེ་དག་གི་རྒྱུན་ཡར་དེད་ན་ག་འདྲ་ཞིག་ལ་ཐུག་ཀྱི་ཡོད་ཅེ་ན། དེ་ ནི་ཚན་རིག་པ་རྣམས་ཀྱི་འདོད་ཚུལ་གཞི་ལ་བཞག་སྟེ་བཤད་ན་རིགས་རྫས་ཀྱི་ཐོག་མ་འདི་ རེད་ཅེས་པ་ཞིག་ཐག་བཅད་ནས་བཤད་དུ་མེད་ཀྱང་འདོད་ཚུལ་གཉིས་ཀྱི་སྒོ་ནས་འགྲེལ་བཤད་བྱེད་ཀྱི་ཡོད། དེ་ཡང་འགའ་ཞིག་གིས་རིགས་རྫས་ཀྱི་ཐོག་མའི་འབྱུང་ཁུངས་ནི་བར་སྣང་སྟོང་པའི་ནང་དུ་གཟའ་སྐར་གདོང་ཐུག་བྱས་པ་ལས་ཆད་པའི་དུམ་བུ་ཞིག་འཛམ་བུ་གླིང་གི་ཐོག་ཏུ་བབ་པ་དང༌། དེའི་ནང་གི་རིགས་རྫས་དེ་དག་འཛམ་བུ་གླིང་གི་སྟེང་དུ་སྐྱེ་འཕེལ་གྱི་བྱ་བ་བྱས་ནས་བྱུང་བ་ཡིན་པས་རིགས་རྫས་ཀྱི་ཐོག་མ་ནི་གཟའ་སྐར་གཞན་གྱི་སྟེང་ནས་བྱུང་བ་རེད་ཟེར་དེའི་སྒྲུབ་བྱེད་ནི་འཛམ་བུ་གླིང་གི་སྐྱེ་འཕེལ་ཅན་གྱི་དངོས་པོ་དེ་དག་ག་ནང་དུ་སྐྱེ་འཕེལ་གྱི་བྱ་བ་བྱེད་པའི་རྫས་ཀྱི་ནུས་པ་ཞིག་ཡོད་པ་དེ་དང་གཅིག་པ་ཞིག་གཟའ་སྐར་གཞན་གྱི་སྟེང་ནས་ལྷུང་བའི་སྐར་རྡོ་དེའི་སྟེང་དུ་འདུག་དེར་བརྟེན་རིགས་རྫས་ཀྱི་ཐོག་མ་ནི་དེ་ལས་བྱུང་བ་འདྲ་ཟེར།

འབྲི་སྐལ་བཟང་།

འཛམ་གླིང་འདིའི་སྟེང་གི་འགྲོ་བ་མི་རྣམས་ཀྱི་རྫས་རྒྱུན་ཡར་དེད་ན་རིགས་རྫས་ཀྱི་ཐོག་མ་པུར་ཀར་ཡོ་ཊིག་སོགས་ལ་ཐུགས་ཀྱི་ཡོད་པའི་སྐོར་ནི་དུས་དེབ་སྔོན་མའི་ནང་དུ་བཤད་ཟིན། ད་ནི་འགྲོ་བ་མི་ཞེས་པ་དེ་བྱུང་ཟིན་པའི་རྗེས་སུ་དེ་དག་སྐྱེ་འཕེལ་ཇི་ལྟར་བྱེད་པའི་སྐོར་ཅུང་ཟད་འཆད་པར་འདོད། དེའི་ཚུལ་ནི་ང་ཚོ་འགྲོ་བ་མི་ཞེས་སྤྱིའི་ཚུལ་དུ་གཅིག་མཚུངས་སུ་ཡོད་ཀྱང་འདི་དག་གི་བོངས་ཚད་དང༌།

དབྱིབས་དང་ཁ་དོག་སོགས་ལ་མི་འདྲ་བའི་རྣམ་པ་དུ་མ་ཞིག་ཡོད་པ་གསལ་པོ་ཡིན། རིགས་རྫས་ཚོགས་ཕུང་གཅིག་དུམ་བུར་ཆད་པའི་ཆ་ཤས་སོ་སོར་འཕེལ་བ་ལས་བྱུང་བའི་ཕྲུ་གུ་མཚེ་མ་ལྟ་བུ་ལ་ཡང་ཞིབ་ཏུ་བརྟག་ན་དེ་གཉིས་ཀྱིས་ཕྱི་རོལ་གྱི་རྫས་ལོངས་སྤྱོད་སྟངས་དང༌། མ་ཡི་མངལ་དུ་ཕྱོགས་གཡས་གཡོན་གནས་སྟངས་སོགས་ཀྱིས་ཁྱད་པར་ཕྲན་བུ་ཞིག་ཆུང་དུས་ནས་ཡོད་ལ། རིམ་གྱིས་ཆེན་པོར་གྱུར་བའི་ཚེ་ནི་ཁ་ཟས་ལོངས་སྤྱོད་སྟངས་དང༌། འཁོར་ཡུག་གི་ཁྱད་པར་སོགས་ལས་ཤིན་ཏུ་མངོན་གསལ་ཅན་གྱི་ཁྱད་པར་ཡོད་པ་ནི་མྱོང་བས་གྲུབ།

འབྲི་སྐལ་བཟང་།

མུ་དང་མཐའ་མི་མངོན་པའི་འཇིག་རྟེན་གྱི་ཁམས་ཆེན་པོ་འདིའི་ནང་ཚན། འཛམ་གླིང་གི་གོ་ལ་འདིའི་སྟེང་གི་སྐྱེ་དངོས་ཀྱི་རིགས་འདི་དག་ཇི་ལྟར་བྱུང་བ་དང་།

ཇི་ལྟར་གནས་པ། ཇི་ལྟར་འགྱུར་བའི་ཚུལ་སོགས་ཀྱི་སྐོར་ལ་གནའ་རབས་དང་། དེང་རབས་པ་གཉིས་ཀྱིས་འདོད་ཚུལ་དང་མཐོང་ཚུལ་མི་འདྲ་བ་མང་པོ་ཞིག་འཆད་ཀྱི་ཡོད། དེ་དག་ཚང་མ་འདིར་དགོད་དགོས་ན་དུས་དེབ་ཀྱི་ས་ཁྱོན་དང་མི་འཚམས་པས་འཆད་ཚུལ་བྱེ་བྲག་པ་ཞིག་གཞི་ལ་བཞག་ནས་འཆད་པར་འདོད། དེ་ཡང་ལཱ་མཀ་དང་ཌར་ཝིན་བཅས་ཀྱི་འཆད་ཚུལ་འདི་ཚན་རིག་པ་རྣམས་ཀྱིས་གཞི་རྩའི་རྩ་འཛིན་བྱ་ས་ཞིག་ཡིན། དེར་བརྟེན་དེའི་སྐོར་ཅུང་ཟད་བཤད་ན་ཀློག་པ་པོ་འགའ་ཞིག་ལ་གོ་བ་གསར་པ་འགའ་རྙེད་སྲིད། འཛམ་གླིང་འདིའི་སྟེང་གི་སྐྱེ་དངོས་རྣམས་སྐྱེ་འཕེལ་དང་འགྱུར་བ་འགྲོ་བཞིན་པ་ནི་ཀུན་གྱིས་མཐོང་ཐུབ་པ་ཞིག་ཡིན་པས་གསལ་བཤད་ག་ལ་དགོས།

འབྲི་སྐལ་བཟང་།

འཇིག་རྟེན་ཆགས་པའི་སྐོར། ང་ཚོ་འཚོ་བཞིན་པའི་འཇིག་རྟེན་གྱི་ཁམས་འདི་ཐོག་མར་གྲུབ་པའི་སྐོར་ལ་ཚན་རིག་པ་རྣམས་ཀྱིས་འགྲེལ་བཤད་བྱེད་པ་དེ་ལ་གདེང་འཁེལ་བ་ཞིག་དང༌། ཐག་ཆོད་པའི་སྒོ་ནས་ལུགས་སྲོལ་གཅིག་གི་སྟེང་དུ་འགྲོ་བ་ཞིག་མེད་ཀྱང་དུས་རབས་སྔོན་མའི་ནང་ཙམ་དུ་ཕལ་ཆེ་བས་འཇིག་རྟེན་གྱི་ཁམས་འདི་ཐོག་མར་ཆགས་པའི་སྐོར་འཆད་སྐབས་གས་འཐོར་ཆེན་པོའམ་གད་སྒྲ་ཆེན་པོའི་རྣམ་གཞག་དེའི་སྟེང་ནས་འགྲེལ་བཤད་བྱེད་ཀྱི་ཡོད། དེ་ཡང་ཚད་དང་ལྡན་པའི་ལུང་རིགས་ཀྱི་རྒྱབ་བརྟེན་དང༌། རྒྱུ་མཚན་ཡང་དག་གིས་གྲུབ་པ་སོགས་ནི་མིན་ལས་ཆེ། སྔོན་དུས་སུ་འགྲེལ་བྱེད་གཅིག་གིས་བསམ་ཚུལ་ཙམ་ཞིག་འགྲེལ་བ་དང༌། དེ་ལ་དཔྱད་པ་དང་བསམ་གཞིག་མ་བྱས་པར་ལད་ཟློས་ཁོ་ནས་ཕྱི་རབས་རྣམས་ལ་གོ་བརྡ་སྤྲོད་པའི་ཐབས་ལམ་ཞིག་ཏུ་བེད་སྤྱོད་བྱེད་པ་ལྟ་བུ་ཞིག་སྣང༌། འོན་ཀྱང་དེ་ལྟར་རེད་ཅེས་ཐག་ཆོད་པའི་སྒོ་ནས་བཤད་པ་ཞིག་ག་ལ་ཡིན། གང་གི་ཕྱིར་ཞེ་ན། མི་སོ་སོའི་རྣམ་དཔྱོད་དང་བསམ་ཚུལ་མཐའ་ཡས་པ་ཞིག་ཡོད་པས་རྒྱུ་མཚན་གཞན་དང་གཞན་མཐོང་ནས་འགྲེལ་བཤད་བྱེད་པ་ཡང་ཡིན་ཆོག་སྙམ། འཇིག་རྟེན་གྱི་ཁམས་འདི་འགྲེལ་བཤད་བྱེད་སྐབས་ཆེས་ ཡ་མཚན་པ་ཞིག་ནི་གད་སྒྲ་ཆེན་པོ་ཞིག་བྱུང་བའི་དབང་དུ་བཏང་ཡང་དེའི་སྔོན་གྱི་གནས་ཚུལ་ལམ་བརྒྱུད་རིམ་ཞིག་རྒྱུ་མཚན་ཡང་དག་གིས་གྲུབ་བཞིན་དུ་དེའི་སྔོན་གྱི་གནས་ཚུལ་ཚན་རིག་པས་ཁས་ལེན་མི་ཐུབ་ཅེས་པ་འདི་ཡིན། དེ་ཡང་རྒྱུ་འབྲས་ཀྱི་འབྲེལ་བ་དང༌། འགྱུར་བའི་རིམ་པ་ཙམ་ཞིག་གིས་དཔོག་ནུས་པའི་ཁྱད་ཆོས་མང་པོ་ཞིག་ཡོད་པས་དངོས་གནས་བྱེད་ན་རིག་པའི་གཞུང་ལུགས་ལ་བློ་གྲོས་ཀྱི་འཇུག་པ་ཡངས་པའི་མཁས་དབང་རྣམས་ལྟ་ཅི་རྒྱུ་མཚན་ལ་བློ་ཁ་ཅུང་ཟད་ཕྱོགས་པ་ཙམ་གྱིས་ཀྱང་ཁས་ལེན་ཐུབ་པ་ཞིག་ཡིན། དེའི་སྔོན་གྱི་ ཞིབ་ཅིང་ཕྲ་བའི་ཁྱད་ཆོས་མང་པོ་ཞིག་ཡོད་ངེས་ཀྱང་དེ་དག་ཅུང་ཟད་དཔོག་དཀའ་བས་ད་ལྟའི་སྐབས་སུ་འགྲེལ་མི་ཐུབ་ཅེས་བཤད་ན་དེ་ནི་དངོས་ཡོད་གནས་ཚུལ་གྱི་བདེན་པའི་ འགྲེལ་བཤད་ཅིག་ཡིན། ཚན་རིག་པ་རྣམས་ཀྱིས་རྒྱུ་མཚན་ཕྱོགས་རེ་བ་མཐོང་བ་ལ་བརྟེན་ ནས་ཚོད་དཔག་དང༌། དེ་གཞི་ལ་བཞག་ནས་ཐག་གཅོད་བྱེད་པ། དེ་ཅུང་ཟད་གོམས་པས་གཏན་འབེབས་བྱེད་པ་སོགས་ཀྱི་ཐབས་ལམ་ཞིག་བེད་སྤྱོད་བྱེད་ཀྱི་ཡོད།