སྟོན་པ་མཆོག་དང་བྱམས་དང་འཇམ་དཔལ་དབྱངས།།གཏད་རབས་བདུན་དང་འཕགས་ཡུལ་པཎ་གྲུབ་སྤྱི། ། ཁྱད་པར་གངས་རིའི་ལྗོངས་སུ་ཐུབ་པའི་བསྟན། སྤེལ་མཛད་རྒྱལ་བློན་ལོ་པཎ་རྣམས་ལ་འདུད།།

མདོ་ཁམས་སྦས་ཡུལ་ནགས་ཤོད་སྨན་ལྗོངས་འདིར།   །ནང་ཆོས་འཕེལ་འགྲིབ་ཇི་ལྟར་བྱུང་བའི་ཚུལ།།
སྔོན་རབས་བྱུང་བ་སྲེག་ཟའི་ཞལ་དུ་བཏབ། །བདག་བློ་མུན་ནག་འབེན་ལ་མདའ་མོ་མཚུངས།།

བྱུང་རབས་རྟོགས་པའི་མངོན་ཤེས་མིག་མེད་ཀྱང༌། །རྒྱལ་རབས་ཆོས་འབྱུང་འབྲེལ་ཡོད་ཡིག་རིགས་རྣམས།།
གུང་དུ་བསྒྲིགས་ནས་དཔྱད་གཞིའི་ཚུལ་དུ་ནི། །རབ་དཀར་ལྷག་བསམ་དག་པས་རགས་ཙམ་བཀོད།།

ཞེས་མཆོད་པ་བརྗོད་པ་སྔོན་དུ་བཏང་ནས་གང་བརྗོད་པར་བྱ་བ་ནི་མདོ་ཁམས་ནགས་ཤོད་དུ་ནང་ཆོས་དུས་གང་གི་ཚེ་བྱུང་བ་དང༌། དེ་ཉིད་འཕེལ་འགྲིབ་ཇི་ལྟར་བྱུང་བའི་ཚུལ་བཅས་ཡིན། དེ་ལ་ཐོག་མར་བོད་གངས་ཅན་གྱི་ལྗོངས་སུ་སངས་རྒྱས་ཀྱི་བསྟན་པ་བྱུང་ཚུལ་ནས་བཤད་ན། བཙན་པོའི་གདུང་རབས་ཉི་ཤུ་རྩ་བརྒྱད་པ་ལྷ་ཐོ་ཐོ་རི་གཉན་བཙན་འདིའི་འཁྲུངས་ལོ་འགྲོ་མགོན་འཕགས་པ། ངོར་པའི་ཆོས་འབྱུང༌། ས་ཆེན་སོགས་མི་མཐུན་པ་མང་དུ་ཡོད་ཀྱང༌། བཻ་དཀར་དང༌། སུམ་པ་མཁན་ཆེན་གྱི་རྩིས་གཞུང་མ་ཡིག །བྲག་དགོན་པའི་རྩིས་གཞུང་རྣམས་མཐུན་པར་སྤྱི་ལོ་ ༢༥༥ ལོར་འཁྲུངས་པར་གསུངས་ཞེས་ལོ་ཚིགས་དྭངས་ཤེལ་མེ་ལོང་དུ་གསལ། རྒྱལ་པོ་འདིའི་སྐུ་རིང་ལ་བོད་དུ་སངས་རྒྱས་ཀྱི་བསྟན་པ་དར་བའི་སྔ་ལྟས་སུ་སྤང་སྐོང་ཕྱག་རྒྱའི་གླེགས་བམ་སོགས་ནམ་མཁའ་ནས་བབས་པ་དོན་མ་ཤེས་ཀྱང་ངོ་མཚར་ཅན་དུ་གཟིགས་ནས་མཚན་གཉན་པོ་གསང་བ་བཏགས་ཏེ་མཆོད་དེ་དམ་པ་ཆོས་ཀྱི་དབུ་བརྙེས་ཞེས། ལོ་རྒྱུས་ཕལ་ཆེ་བར་གཉན་པོ་གསང་བ་ནམ་མཁའ་ནས་བབས་པ་གསུངས། སྔོན་གྱི་གཏམ་མེ་ཏོག་ཕྲེང་བ་ལས། ལྷ་ཐོ་ཐོ་རི་གཉན་བཙན་གྱི་སྐུ་དྲིན་ལ། དམ་པ་ཆོས་ཀྱི་དབུ་བརྙེས་པ་ཡིན་ལ། དེའི་ལོ་རྒྱུས་ཞིབ་ཏུ་བཤད་ན་སྐྱེས་བུ་དམ་པ་དེས་རྒྱལ་སྲིད་འཛིན་པའི་ཚེ། ལི་ཐེ་སི་དང་ཐོ་གར་གྱི་ལོ་ཙཱ་བ་བློ་སེམས་མཚོ་གཉིས་ཀྱིས། རྒྱ་གར་གྱི་པཎྜྀ་ཏ་མཁས་བ་ལེགས་བྱིན་སྤྱན་དྲངས་ནས་བྱོན་ཏེ། རྒྱལ་པོ་ལ་ཆོས་གསུངས་པས། བོད་ན་ཡི་གེ་མེད་པའི་སྟབས་ཀྱིས་བསླབ་ཏུ་མ་བཏུབ་ནས་ཟ་མ་ཏོག་བཀོད་པ། སྙིང་པོ་ཡི་གེ་དྲུག་མ་(འདི་ཤོག་དྲིལ་སེར་པོ་ན།)གསེར་གྱིས་བྲིས་པ་(ལཉྫའི་ཡི་གེ་)གཅིག་ལ་མུ་དྲའི་ཕྱག་རྒྱས་བཏབ་ནས་རྒྱལ་པོ་ལ་ཕུལ་ཏེ། འདི་ལ་ཕྱག་དང་བསྐོར་བ་དང༌། མཆོད་པ་བགྱིས་ལ་གསོལ་བ་ཐོབ། གང་འདོད་པའི་བྱིན་རླབས་འབྱུང་གིས། ངས་བོད་དུ་བསྡད་ཀྱང་ཕན་མི་ཐོག་པར་འདུག་གསུངས་ནས་རྒྱ་ནག་དུ་བཞུད་དོ། ཞེས་གསལ། གསུངས་ཚུལ་འདི་ནི་ལྷ་སྒྲུང་གི་དྲི་མས་མ་གོས་པ་ལོ་རྒྱུས་མ་བཅོས་ལྷུག་པོར་བཞག་པའི་གཏམ་རྒྱུད་ངོ་མཚར་ཅན་ཞིག་མཐོང༌། གཉན་པོ་གསང་བ་ནམ་མཁའ་ནས་བབས་པ་སྨྲ་བ་ནི་གནའ་བོའི་ལྷ་སྒྲུང་ལ་གོམས་ཤིང་གནམ་ལ་དགའ་བའི་སྐབས་དེའི་མི་རྣམས་ཀྱི་སེམས་ངོར་འཇུག་པ་བདེ་བའི་ཆེད་ཉི་ཟེར་ལ་བཅིབས་ཏེ་ཕོ་བྲང་གི་ཡང་ཐོག་ཏུ་བྱོན་ནོ་ཞེས་བཅོས་པ་མིན་ནམ་སྙམ། སྐབས་དེ་དུས་བོད་ལ་ཡི་གེ་ཡོད་མེད་དཔྱད་གཞི་ཡིན་ལ། གལ་ཏེ་མེད་ཀྱང་གཉན་པོ་གསང་བའི་དོན་པཎྜི་ཏས་བཤད་དེ་ལོ་ཙཱ་བས་བསྒྱུར་ཀྱང་ད་དུང་དོན་མ་གོ་ཞེས་བཤད་ན་རང་གི་ཡབ་མེས་ཅི་ཡང་མི་ཤེས་པའི་གླེན་པ་ཞིག་བཟོས་པ་ཡིན།

སྐད་ཡིག་ནི་ཚེ་སྲོག་དང་འབྲེལ།

མེས་པོའི་ཚེ་སྲོག་ལས་གྲུབ་པའི་བོད་ཀྱི་སྐད་ཡིག  །སྦྲ་ནག་གྲུ་བཞིའི་ཁྱིམ་གཞིས་ལས་གྲུབ་པའི་སྐད་ཡིག།

མཐོ་སྒང་འདི་ཡི་གཞི་འཛིན་དུ་གྱུར་པའི་སྐད་ཡིག  །ཐོན་མིའི་ཞལ་ཁྱིམ་དྲོ་མོ་ལས་བྱུང་བའི་སྐད་ཡིག།

བོད་ཀྱི་སྐད་ཡིག་་་་་་་་་་
ཁྱོད་ནི་མི་ལོ་སྟོང་ཕྲག་ལྷག་གི་ལོ་རྒྱུས་དང་ལྡན་ལ།  །ཁྱོད་ནི་ནང་བསྟན་འདི་ཡི་གཞི་འཛིན་གྱི་མ་མ་ཡང་ཡིན།།
ཁྱོད་ནི་མི་རིགས་ཀྱི་ལོ་རྒྱུས་གྱི་དཔང་པོ་དང་ལྡན་ལ།  །ཁྱོད་ནི་དུས་རབས་ཉི་ཤུ་པའི་ཞི་བདེའི་ཕོ་ཉ་ཡང་ཡིན།།

བོད་ཀྱི་སྐད་ཡིག་་་་་་་་་་
བོད་ཀྱི་སྐད་ཡིག་ཁྱོད་མེད་ན་བོད་མིའི་ཚེ་སྲོག་མེད་ལ།  །བོད་ཀྱི་སྐད་ཡིག་ཁྱོད་མེད་ན་བོད་མིའི་ངོ་བོ་ཡང་མེད།།
བོད་ཀྱི་སྐད་ཡིག་ཁྱོད་མེད་ན་བོད་མིའི་རྒྱུན་འཛིན་མེད་ལ།  །བོད་ཀྱི་སྐད་ཡིག་ཁྱོད་མེད་ན་བོད་མིའི་ཤེས་རིག་ཡང་མེད།།

བོད་མི་རིགས་ལ་དུང་ཞེན་ཆེ་ཞིང་གནའ་དེང་གི་རིག་གཞུང་ལ་སྦྱངས་མཐར་ཕྱིན་པའི་ཁ་བ་ཅན་པའི་མཁས་མིང་འཛིན་པའི་རིག་པའི་ཕུ་བོ་མང་དག་ཅིག་གིས།

ཆོལ་གསུམ་སྤྱི་སྐད་གཏན་འབེབས་ཀྱིས་བོད་ཡུལ་རོང་འབྲོག་སོ་སོའི་སྐད་རིགས་གཅིག་གྱུར་དགོས་ཞེས་མགྲིན་གཅིག་ཏུ་གསུངས། འདི་ནི་བོད་ཀྱི་ཡུལ་གྲུ་ཀུན་ཏུ་དཔའ་མཛངས་སྟོབས་དང་ལྡན་པའི་སྔོན་བྱོན་དམ་པ་རྣམ་པས་ཕྱི་རབས་ཁ་བའི་རྒྱུད་འཛིན་པ་རྣམས་ཀྱི་མདུན་ལམ་ལ་དམིགས་ནས། ང་ཚོ་ལ་བཞག་པའི་ནོར་བུ་རིན་ཐང་བརྗོད་དུ་མེད་པའི་སྐད་ཡིག་གཅེས་འཛིན་བྱེད་པའི་ལས་དོན་བཟང་པོ་འདི་ལ། ཤ་ཁྲག་གི་རུས་རྒྱུད་གཅིག་ཅིང་ཆོལ་གསུམ་ལས་དབང་སྙིང་ལ་བཅངས་བའི་གྲོགས་པོ་ཚང་མས་སྙིང་ཐག་པ་ནས་བཀུར་འོས་པ་ཞིག་ལོས་ཡིན།

འགྲོ་བའི་རྨོངས་ཆེན་སེལ་བའི་ཕྱིར། །མགོན་པོས་མིང་ནི་གདགས་པར་མཛད། །ཅེས་འགྲོ་བའི་མི་ཤེས་པའི་རྨོངས་པ་རྣམས་གསལ་བའི་ཕྱིར་མགོན་པོས་ཆོས་རྣམས་ ཀུན་ལ་སོ་སོར་ངོས་འཛིན་པའི་མིང་གདགས་པར་མཛད་ཅེས་འཇིག་རྟེན་གྱི་ཉེར་སྤྱོད་ ཐམས་ཅད་མིང་གིས་གསལ་བར་བྱེད་དགོས་པར་བསྟན་པ་བཞིན་མིང་གི་སྐོར་ཅུང་ཟད་བཤད་ན།

དེ་ཡང་བོད་ཀྱི་བརྡ་སྤྲོད་པའི་གཞུང་ལས་མིང་གི་ཚོགས། ཚིག་གི་ཚོགས། ཡི་གེའི་ཚོགས་ཏེ་ཚོགས་གསུམ་བཤད་པ་རྣམས་རྒྱུ་འབྲས་ཀྱི་གོ་རིམ་ལྟར་ན་ཐོག་མར་ ཡི་གེ། དེ་ནས་མིང༌། དེ་ནས་ཚིག་བཅས་གྲུབ་ཀྱི་ཡོད་ཀྱང་བཤད་པའི་གོ་རིམ་ནི་མིང་ཚིག་ཡི་གེ་གསུམ་ཞེས་ མིང་ཐོག་མར་འཆད་ཀྱི་ཡོད་པ་བཞིན་འདིར་མིང་གི་སྐོར་འཆད་པར་འདོད། སྤྱིར་མིང་ཞེས་པ་ནི་ཡི་གེ་གཉིས་ཡན་ཆད་འདུས་ནས་དོན་གྱི་ངོ་བོ་སྟོན་པ་ཞིག་ལ་ ཟེར། གཞུང་རྣམས་ལས་གཞི་གྲུབ་ན་ཁྱོད་ཅེས་པའི་སྒྲ་ཁྱོད་ཀྱི་མིང་ཡིན་དགོས་ཟེར་བའི་ མིང་དེ་ཡིན། འདིའི་མིང་དང་ཚིག་གཉིས་མི་འགལ་ཡང་མིང་ཚིག་ཡི་གེ་གསུམ་དུ་ཕྱེ་བའི་མིང་དང་ ཚིག་གཉིས་ནི་རྣམ་པ་ཐམས་ཅད་དུ་འགལ་བར་ཁས་ལེན་དགོས། འབྲི་རུའི་མཛེས་ཉམས་ཞེས་བརྗོད་པའི་སྒྲ་ལྟ་བུ་མིང་དང་ཚིག་གཉིས་ཀ་ཡིན། ཡི་གེ་གཉིས་ཡན་ཆད་འདུས་ནས་དོན་གྱི་ངོ་བོ་ཙམ་སྟོན་པ་དེ་མིང་ཚིག་ཡི་གེ་གསུམ་ དུ་ཕྱེ་བའི་མིང་གི་དོན་ཡིན། མཚན་གཞི་ནི་བུམ་པ་ཞེས་བརྗོད་པའི་སྒྲ་ལྟ་བུ་འཇོག་ཆོག །འདིའི་སྐབས་སུ་ཡི་གེ་གཉིས་ཡན་ཆད་འདུས་ནས་ཞེས་བརྗོད་པས་འོ་ན་ཕ་དང་མ་དེ་བཞིན་ར་དང་ཤ་སོགས་བརྗོད་པའི་སྒྲ་དེ་མིང་མ་ཡིན་པར་འགྱུར་ཏེ་ཡི་གེ་གཉིས་ཡན་ཆད་མ་འདུས་པའི་ཕྱིར་བསམ་ན་ཡི་གེ་གཉིས་ཡན་ཆད་བརྗོད་པ་ནི་གཉིས་ནས་འགོ་བཙུགས་པའི་དོན་ཡིན་པས་གཉིས་ལས་མང་བ་ཞིག་ངེས་པར་མི་དགོས། གཉིས་ཙམ་ཡང་མེད་པར་བསམ་ན་དེ་ནི་མ་ཡིན་ཏེ་ཕ་སོགས་བཞི་པོ་དེ་དག་རེ་རེ་ལ་འ་མཐའ་ཡོད་པ་བརྡ་སྤྲོད་གཞུང་རྣམས་ནས་གསལ་བར་གསུང་ཡོད། རྩ་བ་ལས། རྗེས་འཇུག་བཅུ་པོ་མ་ཞུགས་ན། །མིང་གཞན་སྦྱོར་བ་ཡོད་མི་སྲིད། །ཅེས་སོགས་ཀྱི་དོན་འཆད་སྐབས་སྐད་གསལ་བྱེད་ཀྱི་སྐབས་བསྡུས་པ་མ་གཏོགས་དོན་ལ་ ངེས་པར་དགོས་པའི་ཚུལ་འཆད་ཡོད། འོན་ཀྱང་འདི་ལ་བསམ་པར་བྱ་བ་འདི་འདྲ་ཞིག་ཡོད་དེ། འ་མཐའ་མེད་པའི་ཕ་དེ་ག་འདྲ་ཞིག་ངོས་འཛིན་དགོས། གསལ་བྱེད་སུམ་ཅུའི་ནང་གི་ཕ་དེ་རེད་ཅེས་ནི་འཆད་དགོས་འོ་ན་དེ་ཉིད་བརྗོད་དུ་ ཡོད་དང་མེད། བརྗོད་དུ་མེད་ན་ནི་ལེགས་སྦྱར་ལྟར་སྲོག་ཡོད་མེད་ཀྱི་ཁྱད་པར་འབྱེད་དགོས་པ་ དང༌། བརྗོད་དུ་ཡོད་ན་གདངས་ག་འདྲ་ཞིག་ཐོན། དེ་བཞིན་གསལ་བྱེད་ཀྱི་ཡི་གེ་རྣམས་རེ་རེ་བཞིན་རྗེས་འཇུག་མ་ཞུགས་པའི་སྐབས་ ཀྱི་གདངས་ག་འདྲ་ཞིག་ཡོད། དེ་དག་ལ་འ་མཐའ་ཞུགས་པའི་སྐབས་ཀྱི་གདངས་དང་རིང་ཆ་ལ་ཅུང་ཟད་ཁྱད་པར་ཡོད་པ་མ་ གཏོགས་གཞན་མི་མཚུངས་པ་ཅི་ལ་ཡོད། དེས་ན་འ་མཐའ་མེད་པའི་ཕ་དེ་རྗོད་ཚེ་སྐྱེ་བྱེད་ཀྱི་ཕ་དེ་གོ་མི་ཐུབ་པའི་རྒྱུ་ མཚན་མེད་པར་སྙམ། གོ་ཐུབ་ན་ནི་འ་མཐའ་ལ་དགོས་པ་མེད་པར་གྱུར་པ་མ་ཚད་དེ་ཉིད་མིང་ཡིན་པ་ལ་ཡང་འགལ་ བ་མེད་ན་མིང་གི་མཚན་ཉིད་ཀྱང་མི་འཐད་པར་འགྱུར་རོ། ད་ནི་དཀྱུས་ཀྱི་དོན་བཤད་ན། མིང་ལ་དབྱེ་ན་དངོས་མིང་དང་བཏགས་མིང་གཉིས། དོན་ དེ་ལ་འདོད་རྒྱལ་མཁན་པོས་ཐོག་མར་བརྡ་སྦྱར་ཞིང་སྦྱར་བ་ལྟར་དོན་དེ་འཁྲུལ་མེད་ དུ་གོ་བའི་སྙན་བྱ་དོན་དེའི་དངོས་མིང་གི་དོན། དངོས་མིང་ལ་དབྱེ་ན་འདོད་རྒྱལ་དང་རྗེས་གྲུབ་གཉིས། བུམ་པ་དང་ཀ་བ་ཞེས་བརྗོད་པའི་སྒྲ་ལྟ་བུ་དང་པོ་དང༌།

མཚམས་སྤྲིན་གསར་པའི་བླ་གོས་ཀྱིས་མཛེས་ལྷུན་ཆགས་རི་བོ་འགྱིངས་བའི་སྤོར། །མཁྱེན་རབ་རལ་གྲིའི་འོད་ཞགས་ཀློང་ནས་ཡེ་ཤེས་མེ་དཔུང་བཀྱེ་བ་ན། །

རྨོངས་མུན་ཚང་ཚིང་སྐད་ཅིག་གཞོམ་བཞིན་སྨྲ་བ་ངག་གི་སྒོ་དབྱེ་བར། །མགྲིན་པ་ལོངས་སྤྱོད་འཁོར་ལོའི་རྒྱན་བྱོན་རྒྱལ་ཀུན་ཡབ་ཅིག་འཇམ་དཔལ་དབྱངས། །

གྲངས་མེད་ཚོགས་གཉིས་ཆུ་གཏེར་ལས་འཁྲུངས་ཡིད་འོངས་ཆུ་སྐྱེས་གཞོན་ནུ་མའི། །
འཇམ་མཉེན་ཕྱག་གི་འདབ་མ་གཡོ་བས་རྒྱུད་མངས་འབུམ་ཕྲག་བསྐྱོད་པ་ན། །
སྙན་འཇེབས་དྲི་ཟའི་གླུ་རུ་འཁྲུལ་བའི་ཏམ་བུ་ར་ཡི་སྒྲ་བརྒྱ་བརྩེགས། །
འཇོ་སྒེག་གར་ལྡེམ་འཁྲི་ཤིང་བསྐྱོད་འདྲ་དབྱངས་ཅན་མ་ཀྱེ་སྙིང་དུ་བརྩེན། །

གཏིང་མཐའ་དཔག་དཀའ་སྒྲ་ཚད་རྒྱ་མཚོ་བརྩོན་པའི་མགྱོགས་འགྲོས་བསྲུབས་པ་ལས། །
དབྱངས་གསལ་ཉི་ཟླའི་རྣ་ཆ་གཡོ་བའི་འཇུག་བཞིའི་ཆུ་གཏེར་སྐ་རགས་བཅིངས། །
སྒྲ་སྦྱོར་གཟའ་ཆེན་བརྒྱད་དུ་གྲགས་པའི་བརྡ་སྤྲོད་བརྩམས་པའི་སྟོད་གཡོགས་ཅན། །
བཀའ་དྲིན་དཔལ་གྱིས་མངོན་པར་མཐོ་བའི་ལོ་ཆེན་ཐོན་མི་ལྷུན་པོ་རྒྱལ། །

སུམ་ཅུ་པའི་བརྗོད་བྱ་ཚིག་འཕྲད་བཅུ་བཞི་ནང་གསེས་དང་བཅས་པ་

ཁྱད་གཞི་གཅིག་གི་ཐོག་དཔེ་འགོད་ཚུལ་གྱི་ཟིན་བྲིས།།  འཇམ་དབྱངས་ནོར་བུ།

རྣམ་དབྱེ་དང་པོ་ ཕ་སྐད་དྭངས་མ།

རྣམ་དབྱེ་གཉིས་པ་ རྒྱ་མི་ལ་ཕ་སྐད་དྭངས་མ་ཞིག་བཤད།
རྣམ་དབྱེ་གསུམ་པ་ ར་མ་ལུག་སྐད་ཀྱིས་ཕ་སྐད་དྭངས་མ་གཏོར་བརླགས་བཏང་སོང་།
རྣམ་དབྱེ་བཞི་པ་ རང་མི་རིགས་འཚོ་ཕྱིར་དུ་ཕ་སྐད་དྭངས་མ་ཞིག་སྨྲ་དགོས།
རྣམ་དབྱེ་ལྔ་པ་ ཕ་བཟང་བུ་ཡི་ངག་ནས་ཕ་སྐད་དྭངས་མའི་རང་སྒྲ་ལྷང་ལྷང་དུ་སྒྲོག་པ།
རྣམ་དབྱེ་དྲུག་པ་ ཕ་སྐད་དྭངས་མའི་རང་མདངས།
རྣམ་དབྱེ་བདུན་པ་ ངེས་དོན་གྱི་ལ་རྒྱ་ལྡན་པའི་གངས་བུའི་ངག་ཏུ་ཕ་སྐད་དྭངས་མ་ཡོད་པར་བཤད་མི་དགོས།
རྣམ་དབྱེ་བརྒྱད་པ་ ཀྱེ་ཕ་སྐད་དྭངས་མ་སྨྲ་བའི་གངས་ཕྲུག་ལགས།
དེ་ཉིད་ ཕ་སྐད་དྭངས་མ་བཤད་དུ་ཆུག
ཚེ་སྐབས་ དེང་དུས་སུ་ཕ་སྐད་དྭངས་མ་སྨྲ་བའི་བོད་མི་ཉུང་ཤེས་ལས་མི་མཐོང་།
སླར་བསྡུ་ བདག་གིས་རྗོད་བཞིན་པ་འདི་ནི་བོད་པ་ཚང་གི་ཕ་སྐད་དྭངས་མའོ།

མི་རིགས་ཀྱི་སྐད་ཡིག་གླེང་བ།

༼༢༠༡༥ ལོའི་བགྲོ་གླེང་སྣེ་ཁྲིད་པའི་རྩོམ་ཤོག །༽

གངས་ཆབ་སིལ་མ།        

ལེགས་པར་བཤད་པའི་བང་མཛོད་མིན་ཡང་། །
གཟུར་གནས་བློ་གྲོས་གཤོག་པ་བརྐྱངས་ཏེ། །
དཀར་ནག་འདྲེས་མའི་གོ་རིམ་ཁྲོད་ནས། །
དབྱེ་འབྱེད་ལྡེ་མིག་བདག་གིས་སྟེར་འདོད། །

༡༽ བོད་ཀྱི་སྐད་ཡིག་དེ་ངེས་པར་དུ་སྦྱང་དགོས་པའི་སྐོར།
དང་པོ་ལ་བོད་ཀྱི་སྐད་ཡིག་དེ་ངེས་པར་དུ་སྦྱང་དགོས་སམ་ཞེ་ན། སྤྱིར་གོ་ལ་འདིའི་སྟེང་ལ་མི་རིགས་ཇི་སྙེད་ཅིག་ཡོད་པ་དེ་ཉིད་ལ་རང་གི་ངོ་བོ་མཚོན་པར་བྱེད་པའི་སྐད་དམ་ཡི་གེ་རེ་ཡོད་པ་བཞིན་བོད་ཁ་བ་ཅན་གྱི་མི་རིགས་དེ་ལ་ཡང་རང་སྐྱ་ཐུབ་པའི་ཕུལ་བྱུང་གི་སྐད་ཡིག་ཅིག་གདོད་མའི་མེས་པོའི་ངག་གི་རྩོལ་བ་ལས་བྱུང་སྟེ། ད་ལྟའི་བར་གངས་རིའི་མུ་ཁྱུད་ཀྱིས་བསྐོར་བའི་གོ་ལའི་ཡང་རྩེར་གནས་པའི་མི་རིགས་ཤིག་གི་ངོ་བོར་འཛིན་ཞིང་མཆིས།

བོད་ཡིག་འདི་ཉིད་ད་ལྟའི་སྐབས་སུ་སྤྱོད་སྒོ་ཇི་ཙམ་ཡོད་པ་དང་། མ་འོངས་པར་ཇི་ལྟར་འགྱུར་སྲིད་པའི་སྐོར།

༼༢༠༡༥ ལོའི་བགྲོ་གླེང་སྣེ་ཁྲིད་པའི་རྩོམ་ཤོག །༽
དཀོན་མཆོག་རབ་བརྟན།       

༡༽སྤྱོད་སྒོའི་གོ་དོན།
"ད་ལྟའི་སྐབས་སུ་བོད་ཡིག་འདི་ཉིད་སྤྱོད་སྒོ་ཇི་ཙམ་ཡོད"ཅེས་པའི་བརྗོད་གཞི་འདིའི་ཐོག་ལ་སྐད་ཆ་མ་བཤད་གོང་དུ། ང་ཚོས་ཐོག་མར་"སྤྱོད་སྒོ་"ཞེས་པའི་ཚིག་འབྲུ་འདི་གཉིས་ཀྱི་གོ་བ་ཡག་པོ་ཞིག་ལོན་པར་བྱེད་རྒྱུ་གལ་ཆེ་བ་སྣང་། གལ་སྲིད་ང་ཚོས་ཚིག་དེ་གཉིས་ཀྱི་དོན་ཡག་པོ་ཞིག་མ་རྟོགས་པ་ཡིན་ན། དེའི་སྐོར་ལ་སྐད་ཆ་བཤད་ཐབས་བྲལ་བ་དང་བཤད་ཀྱང་གནད་ལ་མི་འཁེལ་བ་ཞིག་ཡིན་པ་སྨོས་ཅི་ལ་དགོས། དེ་བས་ཐོག་མར་ང་ཚོས་"སྤྱོད་སྒོའི་"དོན་གསལ་པོ་ཞིག་རྟོགས་པ་བྱས་ནས། དེ་རྗེས་ད་ལྟའི་སྐབས་སུ་བོད་ཡིག་ལ་"དེ"ཇི་ཙམ་ཡོད་མེད་བལྟས་ན་གསལ་པོ་ཆགས་པར་མཐོང་།  བདག་གིས་བལྟས་ན། སྤྱོད་སྒོ"ཞེས་པའི་ཚིག་འདིའི་དོན་ངོ་མ་ནི་"ཕན་ཐོགས"དང་"དགོས་མཁོ"ཡིན་པ་མཐོང་སྟེ། དཔེར་ན། ང་ཚོས་ཅ་དངོས་གང་རུང་ཞིག་ལ་སྤྱོད་སྒོ་ཡོད་མེད་གླེང་སྐབས། དོན་དངོས་སུ་ང་ཚོས་ཅ་དངོས་དེས་ང་ཚོའི་འཕྲལ་ཕུགས་ཀྱི་འཚོ་གནས་ལ་ཕན་ཐོགས་མིན་དང་དགོས་མཁོ་ཡོད་མེད་གླེང་གི་ཡོད། དེར་བརྟེན་སྐབས་བབས་ཀྱི་བརྗོད་གཞི་"ད་ལྟའི་སྐབས་སུ་བོད་ཡིག་ལ་སྤྱོད་སྒོ་ཇི་ཙམ་ཡོད་པ"་གླེང་དུས། དོན་དངོས་སུ་དུས་རབས་ཉེར་གཅིག་འདིའི་ནང་དུ་ང་ཚོའི་འཚོ་གནས་ལ་བོད་ཡིག་འདི་ཉིད་དགོས་མཁོ་དང་ཕན་ཐོགས་ག་ཚོད་ཡོད་ཅེས་པའོ།།

ང་ཚོས་རྩོམ་ཡིག་འབྲི་སྐབས་རྒྱུན་དུ་འབད་བརྩོན་གནང་དགོས་པའི་དོན་གནད་ཆེ་ཤོས་གང་ཡིན་དང་དེའི་སྐོར་གྱི་རྒྱུ་མཚན་མཁས་པའི་གསུང་རྒྱུན་དང་འབྲེལ་བའི་སྒོ་ནས་རང་གི་དགོངས་ཚུལ།

༼༢༠༡༥ ལོའི་བགྲོ་གླེང་སྣེ་ཁྲིད་པའི་རྩོམ་ཤོག །༽

བསྟན་འཛིན་དམ་ཆོས།

ལྷག་བསམ་དག་པའི་དྲི་མེད་ཁ་གཡང་དཀར་པོ་ཞིག་གིས་ཐོག་དྲངས་ནས་ནགས་ལྷ་རྩོམ་སྒྲིག་ཁང་གི་འགན་འཛིན་རྣམས་དང་ཕ་ཡུལ་གཅིག་པའི་སྤུན་མཆེད་ཚང་མ་ལ་འཚམས་འདྲི་བཀྲ་ཤིས་བདེ་ལེགས་དང་ལོ་གསར་པའི་ནང་དུ་བྱ་བ་ལམ་འགྲོ་ནད་མེད་ཚེ་རིང་ཡོང་བའི་སྨོན་འདུན་ཞུ།

ནགས་ལྷ་རྩོམ་སྒྲིག་ཁང་གིས་ཞལ་བཀོད་དམ་བགོ་སྐལ་དུ་གནང་བའི་བཤད་བྱའི་སྐད་ཆའམ་བརྗོད་གཞི་ནི་༼ང་ཚོས་རྩོམ་ཡིག་འབྲི་སྐབས་རྒྱུན་དུ་འབད་བརྩོན་གནང་དགོས་པའི་དོན་གནད་ཆེ་ཤོས་གང་ཡིན་དང་དེའི་སྐོར་གྱི་རྒྱུ་མཚན་མཁས་པའི་གསུང་རྒྱུན་དང་འབྲེལ་བའི་སྒོ་ནས་རང་གི་དགོངས་ཚུལ་༽ རེད། དེས་ན་ང་ཚོས་དང་པོ་རང་གི་ལས་བྱ་རྩོམ་རིག་ཟེར་བ་དེ་གང་འདྲ་ཞིག་ལ་གོ་དགོས་མིན་དང་དེའི་སྐྱེ་གནས་དར་གསུམ་དང་ནུས་པ་སོགས་ལ་གོ་བ་རག་རིམ་ཞིག་ལྡན་དགོས།

ང་ཚོས་རང་གི་སྐད་ཡིག་སྲུང་སྐྱོབ་བྱེད་པ་ལ་ཐབས་ལམ་གང་དག་ལ་བརྟེན་དགོས་པའི་སྐོར།

ང་ཚོས་སྐད་ཡིག་སྐྱོབ་དང་སྐད་ཡིག་གིས་ང་ཚོ་སྐྱོབ་ངེས།
༼༢༠༡༥ ལོའི་བགྲོ་གླེང་སྣེ་ཁྲིད་པའི་རྩོམ་ཤོག །༽
ནགས་ཤོད་ཅོང་བརྡ།

སྔོན་གླེང་།

༡༽  མེས་པོ་གོང་མ་རྣམས་ཀྱི་དཀའ་བ་བརྒྱ་དང་ངལ་བ་སྟོང་གིས་འབད་པའི་དཀའ་དྲིན་གྱིས། ད་བར་རང་རེ་རྣམས་མགྲིན་པ་ཀྲོང་ངེར་འཛམ་གླིང་མི་མང་གི་ཁྲོད་དུ་བསྒྲེངས་མྱོང་བའི་བོད་ཀྱི་ཐུན་མིན་སྐད་དང་ཡི་གེ་ཉམས་ཐག་ཅིང་སྐྱ་ཆད་སྔོ་སྡུག་གི་དུས་འདིར། ཁྱེད་ནགས་ལྷ་རྩོམ་སྒྲིག་ཁང་གི་ལས་མི་ཡོངས་ཀྱིས་སྐུ་ལས་འཛེམ་མེད་ངང་ནས་བོད་སྤྱི་པའི་ལས་དོན་དང་། དགོས་སུ་ནགས་ཤོད་པའི་བདེ་སྡུག་གི་ཆེད་དུ་འདི་ལྟ་བུའི་ཕྱག་ལས་གནང་བ་སྙིང་དབུས་ནས་ཐུགས་རྗེ་ཆེ་ཞུ་རྒྱུ་དང་། དེ་དང་འབྲེལ་ཡོད་འདིའི་ཐད་དུ་སྐུ་ལས་ལྷོད་མེད་གནང་མཁན་རྣམ་པར་བོད་མི་ས་ཡ་དྲུག་དང་། ཡང་དགོས་ངེད་དབུ་མ་ནགས་ཤོད་པའི་སློབ་མ་ཡོངས་ཀྱི་ཚབ་བྱེད་དེ་བཀའ་དྲིན་ནམ་ཡང་བརྗེད་པ་མེད་ཞུའོ། །