རྗེ་བཙུན་སྐལ་བཟང་བསླབ་བསུམ་མཆོག

ཐུན་མོང་ལམ་གྱི་བསླབ་བྱ་ལེགས་བཤད་རིན་ཆེན་ཕྲེང་བ།

རྗེ་བཙུན་བླ་མ་རྣམས་ལ་སྙིང་ནས་འདུད། །ཉམ་ཐག་སྤྲང་གི་བློ་སྣ་ཆོས་ཕྱོགས་ཤིང༌། །
ཆོས་མིན་བསམ་སྦྱོར་མཐའ་དག་ཞི་བ་དང༌། །ཆོས་མཐུན་བསམ་དོན་གེགས་མེད་ལྷུན་གྲུབ་མཛོད། །

གཞི་རྩ་བླ་མ་མཆོག་གསུམ་ལས་འབྲས་ལ། །དད་གསུམ་བཀའ་དྲིན་རྗེས་སུ་དྲན་པ་དང༌། །
དལ་འབྱོར་དོན་ཆེའི་ཚུལ་གསུམ་ངེས་བྱས་ནས། །དོན་མེད་ཆུད་ཟོས་མི་བཏང་དམ་ཆོས་སྒྲུབས། །

བློ་བཟང་ཆོས་འབྱོར།

གཅིག །གླེང་སློང་བའི་ཐོག་མའི་གཏམ།
དེ་ཡང་སྒོང་གཟུགས་གོ་ལ་ཧྲིལ་པོ་འདིའི་རྒྱ་ཕིབས་སུ་གྲགས་ཤིང། འཛམ་གླིང་སྣ་མང་མི་རིགས་ཀྱི་ཁྲོད་ལོ་ངོ་ཁྲིསྟོང་དུ་མའི་སྔ་རོལ་ནས་འཛམ་གླིང་རྒྱལ་ཁབ་ཁག་གི་ཐུན་མོང་སྤྱི་འགྲོས་ལྟར། རང་ས་རང་ཁྱིམ་དུ་བྱས་ཏེ་འཚོ་གནས་ཐུབ་པ་ནས་བཟུང༌། ཁོར་ཡུག་དང་སྤྱི་ཚོགས་ཀྱི་གནས་སྐབས་དགོས་དབང་སྣ་ཚོགས་ལ་གཞིགས་ཏེ་འཚོ་གནས་པ་དག་གིས་རྣམ་དཔྱོད་བསྲུབས་པ་ལས་འཁྲུངས་པའི་རང་མི་རིགས་ཀྱི་སྐད་ཡིག་གཉིས་གཞི་གདན་དུ་བྱས་ཏེ་ཕན་ནུས་དང༌། ཁྱད་ཡོན་འབུར་དོད་ཀྱི་རང་བཞིན་ལྡན་པའི་རིག་པའི་གཞུང་ལུགས་བགྲངས་ཡས་པ་ཞིག་བཞེངས་བསྐྲུན་ཐུབ་ཡོད་པ་འདི་ནི་ཕྱི་རབས་གདོང་དམར་པ་ཡོངས་ཀྱི་སྙིང་གསོན་པོ་ཉིད་དུ་གྱུར་ཡོད།དེ་ཙམ་དུ་མ་ཟད་པའི་ཕྱི་ཕྱོགས་ཀྱི་ཡར་ཐོན་མི་རིགས་ཚོའི་རིག་གཞུང་ལས་ཀྱང་ཇི་ལྟར་ངང་པས་ཆུ་ལས་འོ་མ་ལེན་པའི་ཚུལ་གྱིས་རང་མི་རིགས་ཀྱི་སྔར་ཡོད་ལེགས་བྱང་ལ་གསབ་འགོད་དང་ཆད་མཐུད། ཁ་སྐོང་སོགས་བླ་ལྷག་ཏུ་བགྱིས་ཏེ།བཀའ་དྲིན་གཞལ་མེད་ཀྱི་མེས་དབོན་རྣམ་གསུམ་ནས་རིམ་པས་ནང་པ་སངས་རྒྱས་པའི་བསྟན་པ་འདི་བོད་གངས་ཅན་གྱི་ཡུལ་དུ་གདན་འདྲེན་ཐུབ་པ་དེ་ཡང༌། གཟུགས་བརྙན་ཙམ་དང་ཕྱི་ཤུན་ཙམ། རྣམ་པ་ཙམ་མིན་པར་ལྟ་སྒོམ་སྤྱོད་གསུམ་གྱི་གནད་གང་ཡིན་དག་ལའང་གྲ་མ་ཆག་པ་དང་གྲུ་མ་ཉམས་པ་བརྗོད་བྱ་དང་རྗོད་བྱེད་གང་གི་ཐད་ནས་ནོར་འཛོལ་ཏིལ་འབྲུ་ཙམ་ཡང་མེད་པར། ཐེག་པ་གསུམ་དང༌། རྒྱུད་སྡེ་བཞིའི་གཞི་ལམ་འབྲས་གསུམ་གྱི་རྣམ་གཞག་ཆ་ཚང་ལ་ཕྱིན་ཅི་མ་ལོག་པར་ནང་འདྲེན་ཐུབ་ཡོད་པ་མ་ཟད་ཀློག་པ་ཐོས་བསམ་དང་སྤོང་བ་བསམ་གཏན་གྱི་བྱ་བས་བཤད་སྒྲུབ་ཀྱི་སྡེ་ཆེན་པོ་དག་གི་འཆད་ཉན་ལམ་ལུགས་རྒྱུན་བཟང་པོའང་རིག་གསར་གྱི་ལོ་བཅུའི་གོད་ཆག་སྐབས་མ་གཏོགས་བར་ཆད་མྱོང་མེད།

དགའ་ཤར་ལྷོ་པ་ནགས་ཤོད་པ་བློ་བཟང་ཕུན་ཚོགས།

རྒྱལ་ཀུན་ཐུགས་རྗེའི་རང་གཟུགས་ནི།།
གངས་ཅན་བོད་ཀྱི་ལྷ་སྐལ་ཏེ།། 
འཇིག་རྟེན་དབང་ཕྱུག་ཟློས་པའི་གར།། 
༧སྐྱབས་མགོན་བླ་མས་མི་འབྲལ་སྐྱོངས།།

སྡུག་གི་མུན་པ་བསལ་བ་དང༌།།
བདེ་བའི་སྣང་བ་སྟེར་བྱེད་པའི།།
ལུས་ངག་ཡིད་ཀྱི་ལེགས་སྤྱད་དེ།།
དགེ་བཅུའི་ཆོས་ཀྱིས་ཤིས་པ་སྩོལ།།

ནགས་ཤོད་སྐལ་རྒྱན།     སངས་རྒྱས་བཅོམ་ལྡན་འདས་འཛམ་བུ་གླིང་དུ་བྱོན་ནས་

ཆོ་འཕྲུལ་རྣམ་པ་གསུམ་གྱི་སྒོ་ནས་འགྲོ་བ་རྣམས་གྲོལ་བ་མཛད་པའི་རྣམ་ཐར་རྒྱ་མཚོ་ལྟ་བུ་ལས་མཛད་པ་བཅུ་གཉིས་ནི་རྣམ་ཐར་གྱི་སྤྱི་སྡོམ་ལྟ་བུ་ནང་པ་ཀུན་གྱིས་ངོས་འཛིན་གཅིག་གྱུར་བྱེད་ཀྱི་ཡོད། དུས་ཆེན་དེ་དག་ཏུ་བཀའ་དྲིན་རྗེས་དྲན་དང་གསོལ་འདེབས་སྨོན་ལམ། ཚོགས་བསགས་སྒྲིབ་སྦྱང་སོགས་རྣམ་དཀར་དགེ་ལས་ལ་ཆེས་ཆེར་བརྩོན་ཀྱི་ཡོད། ལྷག་པར་ས་ག་ཟླ་བའི་ཚེས་བཅོ་ལྔར་ནམ་གྱི་གུང་ལ་ལྷུམས་སུ་ཞུགས་པ་དང་། དཔྱིད་ཟླ་ཐ་ཆུང་ཡར་ངོ་སྟེ་ས་གའི་ཚེས་བདུན་ལ་སྐུ་བལྟམས། ས་བྱི་ས་གའི་ཚེས་བརྒྱད་ལ་རབ་ཏུ་བྱུང་། སོ་ལྔར་ཤིང་རྟ་ས་གའི་ཚེས་བཅོ་ལྔའི་སྲོད་ལ་བདུད་བཏུལ། གུང་ལ་མཉམ་པར་བཞག ཐོ་རངས་སུ་མངོན་པར་རྫོགས་པ་སངས་རྒྱས། དཔྱིད་ཟླ་ཐ་ཆུང་ཉ་སྟེ་ས་གའི་བཅོ་ལྔར་མྱ་ངན་ལས་འདས་ཚུལ་བསྟན་པ་སོགས་ས་ག་ཟླ་བར་མཛད་པ་དུ་མ་ཡང་ཡང་བསྟན་པས་ཆེས་ཁྱད་པར་འཕགས་པའི་དུས་ཆེན་བླ་མེད་དུ་གྱུར་པ་ཡིན། དུས་སྟོན་བྱེད་པའི་ལུགས་སྲོལ་འདི་དག་སྟོན་པ་བཞུགས་དུས་ནས་དར་ཏེ། ལུང་གཞི་ལས། བཅོམ་ལྡན་འདས་དཔྱིད་ཟླ་ཐ་ཆུང་ས་ག་ལ་སྐུ་བལྟམས་སོ་ཞེས་གསུངས་ཤིང་། འགྲེལ་ཆུང་ལས་ཚེས་བདུན་ལ་སངས་རྒྱས་ཡུམ་གྱི་ལྷུམས་ནས་བལྟམས་ཞེས་བཤད་པ་དང་། རྣམ་བཤད་ཉི་མའི་འོད་ཟེར་ལས་འགྲེལ་ཆུང་ལས་བཤད་པ་ལྟར་དཔྱིད་ཟླ་ཐ་ཆུང་ཡར་ངོའི་ཚེས་བདུན་སྐར་མ་རྒྱལ་ལ་བབ་པའི་ཚེ་ན་སྐུ་བལྟམས་པའི་དུས་སྟོན་བྱའོ། ཞེས་གསུངས་པ་ལྟར་སྐུ་བལྟམས་པའི་དུས་སྟོན་ནི་འཇིག་རྟེན་པའི་སྐྱེས་སྐར་སྲུང་བརྩི་བྱེད་པའི་ཡུལ་ཆོས་དང་མཐུན་པའི་སྒོ་ནས་སྟོན་པའི་བཀའ་དྲིན་རྗེས་དྲན་དང་བསོད་ནམས་རླབས་པོ་ཆེ་གསོག་པའི་དགའ་སྟོན་རྒྱ་ཆེར་བཤམས་ཀྱི་ཡོད་པ་རེད། དེ་བཞིན་འཇིག་རྟེན་པའི་ཚུལ་ལུགས་ལ་བྱིས་པ་ཆུང་ངུ་སྐྲ་ལན་གཅིག་བྲེགས་པ་དེ་དང་མཐུན་པར་དགུང་ལོ་ལྔ་ལོན་པ་ན་དབུ་སྐྲ་བྲེགས་པའི་དུས་སྟོན་གསུངས་པ་དང་། དགུང་ལོ་དྲུག་ལོན་པ་ན་གཙུག་ཕུད་བཞག་ནས་ད་ཕྱིན་དབུ་སྐྲ་མི་འདྲེག་ཅེས་གཙུག་ཕུད་བཞག་པའི་དགའ་སྟོན་གསུངས་པ་དང་། དགུང་ལོ་ཉེར་དགུ་ལོན་པ་ན་ཁྱིམ་ནས་མངོན་པར་བྱུང་སྟེ་ཉིད་ཀྱི་དབུ་སྐྲ་ཉིད་ཀྱིས་བྲེགས་ཏེ་སྟེང་གི་ནམ་མཁའ་ལ་བོར་བ་དང་བརྒྱ་བྱིན་གྱིས་མཁའ་ལས་བླངས་ནས་མཐོ་རིས་ཀྱི་གནས་སུ་བཞག་པ་གྱུར་པའི་ཉིན་མོ་དེར་དད་པ་ཅན་གྱི་བྲམ་ཟེ་དང་ཁྱིམ་བདག་གིས་དུས་སྟོན་བྱས་པ་དེ། གཙུག་ཕུད་འདྲེག་པའི་དུས་སྟོན་གསུངས་པ་དང་། སུམ་ཅུ་རྩ་གསུམ་གྱི་ལྷ་རྣམས་ཀྱིས་ཀྱང་མཆོད་པའི་རྟེན་དུ་བྱེད་ཅིང་ལོ་རེ་བཞིན་གཙུག་ཕུད་ཀྱི་དུས་སྟོན་བྱེད་པ་ཡང་གྲགས་སོ། ། ལུང་གཞི་ལས་ཚེས་བཅོ་ལྔ་ཟླ་བ་སྒྲ་གཅན་གྱིས་ཟིན་པའི་ནུབ་མོ་སངས་རྒྱས་པར་གསུངས་ཤིང།

སེར་ལྷོ་འབྲི་རུ་ངག་དབང་ཐོགས་མེད།

ལམ་དུ་ཞུགས་པ་ལ་ཞི་ལྷག་ཐོབ་དགོས་མིན་སྐོར་ལ་དཔྱད་པ། །གཞུང་བརྒྱའི་གར་ལ་ལྟ་བའི་བློ་གྲོས་མིག    །ཡངས་པོར་སྦྱིན་མཁན་བླ་མ་ལ་བཏུད་ནས།།རིན་ཆེན་བྱང་ཆུབ་སེམས་ཀྱི་མཚོ་ཆེན་དུ།  །ཞུགས་པའི་གྲུ་གཟིངས་འཕྲུལ་གྱིས་བསྲུབ་ལ་བྲེལ།།

དེ་ཡང་འདིར་སེམས་བསྐྱེད་ཀྱི་རྟེན་ལ་མཁས་པའི་དབང་པོ་ཁ་ཅིག་གིས། རྣམ་བཤད་སྙིང་རྒྱན་ལས། དེས་ན་བསྡུས་ནས་སྒོམ་པའི་དོན་ནི། མཚམས་སྦྱར་དུ་འབྱུང་བ་ལྟར་མཁྱེན་གསུམ་གྱི་རྣམ་པ་ཐམས་ཅད་ཞི་ལྷག་ཟུང་འབྲེལ་གྱི་སྦྱོར་བས་རྣལ་འབྱོར་བས་ཉམས་ལེན་དུ་བསྡུ་བའི་དོན་ཡིན་ནོ། ཞེས་དང། དེ་ལ་འདིར་སྦྱོར་བ་ཞེས་པ་ནི། ཞི་ལྷག་ཟུང་དུ་འབྲེལ་བར་སྟོན་པ་ཡིན་པས། ཞེས་དང། རིཌ་པའི་དབང་ཕྱུག་རྗེ་བཙུན་ཆོས་ཀྱི་རྒྱལ་མཚན་གྱིས་རང་གི་ཐོབ་བྱར་གྱུར་པའི་འབྲས་བུ་ཤེར་ཕྱིན་ཐོབ་བྱེད་ཀྱི་ཐབས་སུ་གྱུར་པའི་ཞི་ལྷག་ཟུང་འབྲེལ་གྱི་སེམས་དཔའི་རྣལ་འབྱོར་དེ། ལམ་ཤེར་ཕྱིན་གྱི་རྣལ་འབྱོར་གྱི་མཚན་ཉིད་གསུངས་པ་སོགས་ཁུངས་སུ་བྱས་ནས། བྱང་སེམས་ལ་ཞི་ལྷག་ཟུང་འབྲེལ་ཐོབ་པས་ཁྱབ་པར་བཞེད་དོ།

དགའ་ལྷོ་འབྲི་ཚུལ་ཁྲིམས་རྒྱལ་བ།

 ཀུན་གཞི་རྣམ་ཤེས་སྐོར་ལ་དཔྱད་པ།འདིར་ཀུན་གཞི་རྣམ་ཤེས་ཀྱི་སྐོར་ལ་ཅུང་ཟད་གླེང་བར་འདོད་པས་ཐོག་

མར་ཀུན་གཞིའི་རྣམ་ཤེས་འདོད་པའི་རང་སྡེ་གྲུབ་མཐའ་སྨྲ་བ་གང་དང་གང་ཡོད་སྙམ་ན། ཡོངས་གྲགས་ལྟར་ན་སེམས་ཙམ་པ་དང༌།    དེ་ཡང་སེམས་ཙམ་ལུང་གི་རྗེས་འབྲང་ཁོ་ན་ཡིན་པར་འདོད་ལ།   འོན་ཀྱང་དབུ་མ་རང་རྒྱུད་པའི་སློབ་དཔོན་འཕཌ་སེང་གཉིས་ཀྱི་གཞུང་ཉི་སྣང་དང༌།བསྡུས་འགྲེལ་གཉིས་སུ་ཀུན་གཞི་གསལ་བར་གསུངས་པ་དང༌། མཁས་གྲུབ་ཐམས་ཅད་མཁྱེན་པའི་ཕར་ཕྱིན་རྣམ་བཤད་རྟོགས་དཀའི་སྣང་བར་འཕགས་སེང་གཉིས་ཀྱིས་ཀུན་གཞིའི་རྣམ་ཤེས་བཞེད་པར་གསུངས་ཡོད། དེས་ན་འདིར་སེམས་ཙམ་ལུང་གི་རྗེས་འབྲང་གིས་འདོད་པའི་ཀུན་གཞི་རྣམ་ཤེས་ཀྱི་དོན་ལ་ཅུང་ཟད་དཔྱད་པ་ལ། དེ་ཡང་ཀུན་གཞི་རྣམ་ཤེས་ཞེས་པ་ནི་དམིགས་པ་དབང་དོན་བག་ཆཌ་གསུམ་པོ་གང་རུང་ལ་དམིགས་ཤིང་རྣམ་པ་རིས་སུ་མ་བཅད་པར་ངོ་བོ་མ་སྒྲིབ་ལུང་མ་བསྟན་དང་གྲོགས་སེམས་བྱུང་ཀུན་འགྲོ་ལྔ་པོ་ཁོ་ན་དང་མཚུངས་པར་ལྡན་པའི་གཙོ་བོ་ཡིད་ཀྱི་རྣམ་ཤེས་ཞིག་ལ་འཇོག་པ་ཡིན་ཏེ། རྩ་བ་ལས། དེ་ལ་བརྟེན་གྱུར་ཀུན་གཞི་ནི། །དོན་དང་སེམས་ཅན་བག་ཆགས་ལ། །རྣམ་པར་རིག་པ་མི་རིག་པ། །ལུང་དུ་མ་བསྟན་རེག་ལ་སོགས། །ལྔ་ཉིད་དང་ལྡན་ཞེས་གསུངས་པའི་ཕྱིར།

 ནགས་ཤོད་སྐལ་རྒྱན།

ལུས་ལང་ཚོ་དར་བའི་གཞོན་ནུ་ཚོ། ། 
ལུས་བྱད་གཟུགས་དབྱིབས་ལ་མ་ཆགས་ཤིག །
ལུས་ཡུན་རིང་མི་འཚོ་མི་རྟག་ཉིད། །
ལུས་འཚོ་བའི་འོག་རོལ་རྣམ་པར་བམ།།

ལུས་ཤ་ལྤགས་སྲ་མཁྲེགས་མངོན་ཞེན་ཀྱང་།།
ལུས་ཕྱི་ནང་མི་མཚུངས་མི་རྟག་པ།།
ལུས་ནང་དུ་རྣམ་པར་འབུ་ཡིས་གཞིགས།།
ལུས་ཁོང་སྟོང་མགྲོན་ཁང་སྟོང་པ་དངོས།།

ནགས་ཤོད་སྐལ་རྒྱན་པས།

ཐུབ་གསུང་རྒྱ་མཚོའི་གཏིང་རུམ་གནས་བཅས་ཤིང་། །

རྟེན་འབྱུང་ཞི་བའི་རླབས་ཕྲེང་རྟག་ཏུ་གཡོ། །
ལེགས་བཤད་ནོར་བུའི་མཛོད་ལ་མངའ་བརྙེས་པའི། །
བཤེས་གཉེན་ཀླུ་དབང་ཚོགས་ཀྱིས་རིང་དུ་སྐྱོངས། །

ངེས་དོན་བཤེས་ཀྱིས་གདམས་པའི་བཅུད་ཕྱུངས་པ། ། 
ཟབ་དོན་བཅུད་ལྡན་རོ་མངར་ཞིམ་པ་འདི། །
རོ་འཛིན་ལྗགས་ཀྱི་འདབ་མ་མ་ཉམས་པའི། །
བློ་ལྡན་བྱིས་པའི་ཚོགས་ལ་སྟོན་མོ་སྦྱིན། །

དགའ་ལྷོ་འབྲི་ཚུལ་ཁྲིམས་རྒྱལ་བ།

རང་ཅག་རྣམས་ཐོག་མ་མེད་པ་ནས་ད་ལྟའི་བར་དང༌།ད་ལྟ་ནས་མ་འོངས་པར་ཐར ་པའི་གོ་འཕང་མ་ཐོབ་བར་དུ་སྡུག་བསྔལ་གསུམ་གྱིས་བར་མཚམས་མེད་པར་མནར་ཞིང་འོང་བ་དང༌། འགྲོ་བཞིན་པ་དང༌། འགྲོ་བར་འགྱུར་བ་ཞིག་ཡིན་ན། སྡུག་བསྔལ་འདི་དག་རྒྱུ་མེད་རྐྱེན་མེད་ཞིག་མིན་པས། ཐར་འདོད་ཀྱི་སྐྱེས་བུ་ཞིག་ཡིན་ན་འདི་དག་གི་རྒྱུ་རྐྱེན་སྤྱི་དང༌།ཁྱད་པར་དུ་འདིའི་རྩ་བའི་རྒྱུ་གང་ཡིན་ངོས་ཟིན་པ་གལ་ཆེ་བ་ཡིན་པར་རྒྱ་བོད་མཁས་པའི་ཚད་ལྡན་གྱི་གཞུང་ལུགས་དུ་མ་ཞིག་ནས་ལན་གཅིག་མིན་པར་ཡང་ཡང་གསུངས་པ་ཡིན་ལ།དེས་ན་རང་ཅག་འགྲོ་བ་རྣམས་ལ་མི་འདོད་ཐོག་ཏུ་བབ་པའི་སྡུག་བསྔལ་འདི་ཡི་རྩ་བའི་རྒྱུ་ནི་ཐོག་མ་མེད་པ་ནས་གོམས་པའི་བདག་ཏུ་འཛིན་པའི་བདག་འཛིན་མ་རིག་པ་ཞེས་པ་འདི་ཡིན་ལ། དེ་ཡང་བློ་དེའི་འཛིན་སྟངས་ངོས་མ་ཟིན་པར་བློ་དེ་ངོས་བཟུང་དུ་མེད་པས་བདག་འཛིན་མ་རིག་པ་དེས་འཛིན་ཚུལ་ངོས་ཟིན་དགོས་པ་ཡིན་ལ། དེ་ལ་གྲུབ་མཐའ་སོ་སོའི་འདོད་ཚུལ་མི་འདྲ་བ་དུ་མ་ཞིག་ཡོད་པའི་ནང་ནས་འདིར་རང་རྒྱུད་པ་མན་ཆད་ཀྱིས་ཐུན་མོང་བར་འདོད་པའི་བདག་འཛིན་གྱིས་འཛིན་ཚུལ་རང་བློར་འཆར་ཚོད་ཙམ་ཞིག་འཆད་ན། ང་ཞེས་འཛིན་པའི་ཚེ་ལས་བྱེད་པ་པོ་དང༌། ལས་གསོགས་པ་པོ། དེ་བཞིན་ང་འགྲོ་ང་འོང་ཞེས་སོགས་ཀྱི་འཛིན་ཚུལ་ཞིག་དང༌། རང་གི་ཕུང་པོའི་ཚོགས་པ་དང་ཡ་གྱལ་གང་ལ་ཡང་མ་ལྟོས་པར་ང་ཞེས་རང་དབང་བའམ་རང་སྐྱ་བའི་འཛིན་ཚུལ་གཉིས་ཡོད་པ་ལས་སྔ་མ་ནི་འཛིན་པ་དོན་མཐུན་དང༌། དེས་བཟུང་བའི་དོན་ལ་ལས་འབྲས་དང༌། འགྲོ་འོང་གི་གཞིར་རུང་བས་ཡོད་པ་ཡིན་ལ། ཕྱི་མ་ནི་སྔར་བཤད་པའི་མི་འདོད་པའི་སྡུག་བསྔལ་འདི་དག་གི་རྩ་བའི་རྒྱུ་ཡིན་ལ་དེས་བཟུང་བ་ལྟར་གྲུབ་པ་མེད་པས་དེའི་འཛིན་སྟངས་ཀྱི་ཡུལ་དུ་གྱུར་བའི་བདག་དེ་ལ་རང་སྐྱ་ཐུབ་པའི་རྫས་ཡོད་ཀྱི་བདག་དང༌། རང་རྒྱུད་པ་མན་ཆད་ཀྱིས་འདོད་པའི་དགག་བྱའི་བདག་ཞེས་པ་དེ་ཡིན་ལ་དེ་ལྟ་བུའི་འཛིན་པ་དེ་ལ་ཀུན་བརྟགས་དང་ལྷན་སྐྱེས་གཉིས་ཡོད་ལ། བདག་འཛིན་ཀུན་བརྟགས་དང་ལྷན་སྐྱེས་གཉིས་ལ་ཕྲ་རགས་སམ་འཛིན་ཚུལ་ལ་ཁྱད་པར་ཡོད་དམ་ཞེ་ན་ཡོད་དེ། རྣམ་བཤད་ཐར་ལམ་གསལ་བྱེད་ལས། ཡང་ན་ཕུང་པོ་དང་རང་བཞིན་གཅིག་དང་ཐ་དད་དུ་མེད་པ་དེ་རང་བཞིན་མེད་པས་ཁྱབ་སྟེ།དཔེར་ན་རི་བོང་གི་རྭ་བཞིན། གང་ཟག་རང་དབང་བ་དེ་ཡང་ཕུང་པོ་དང་རང་བཞིན་གཅིག་དང་ཐ་དད་གང་དུ་ཡང་མ་གྲུབ་བོ་ཞེས་བྱའོ།།

སེརལྷོ་འབྲི་རུ་ངག་དབང་ཐོགས་མེད།

གང་ཞིག་གཟིགས་ཤིང་གསུངས་པ་ཡི། །མཁྱེན་དང་སྟོན་པ་བླ་ན་མེད། །
རྒྱལ་བ་རྟེན་ཅིང་འབྲེལ་བ་འབྱུང༌། །གཟིགས་ཤིང་འདོམས་པ་དེ་ལ་འདུད།།

ཅེས་མཆོད་བརྗོད་སྔོན་དུ་བཏང་ནས། ཇི་སྐད་དུ་མདོ་ལས། སྟོན་པ་ཞི་བ་སྐྱེ་བ་མེད་པའི་ཚུལ། །

མི་ཤེས་པས་ནི་འགྲོ་བ་འཁྱམས་གྱུར་པ། །དེ་དག་ཐུགས་རྗེ་མངའ་བས་ཐབས་ཚུལ་དང༌། །རིགས་པ་བརྒྱ་དག་གིས་ནི་འཛུད་པར་མཛད། །ཅེས་པ་ལྟར་ཐབས་མཁས་ལ་ཐུགས་རྗེ་ཆེན་པོ་དང་ལྡན་པའི་སྟོན་པ་མཆོག་གིས་བདག་སོགས་གདུལ་བྱ་རྣམས་འཁོར་བའི་སྡུག་བསྔལ་གྱི་རྒྱ་མཚོ་ལས་སྒྲོལ་བའི་ཕྱིར་དུ་ཆོས་ཀྱི་ཕུང་པོ་ཇི་སྙེད་ཅིག་གསུངས་པ་ཐམས་ཅད་དངོས་སམ་བརྒྱུད་པའི་སྒོ་ནས་དེ་ཁོ་ན་ཉིད་མ་རྟོགས་པ་རྟོགས་པ་དང་རྟོགས་ཟིན་གོང་ནས་གོང་དུ་འཕེལ་བའི་ཆེད་དུ་འདོམས་པ་ཤ་སྟག་ཡིན་ཏེ། རྟེན་འབྲེལ་བསྟོད་པ་ལས། ཁྱོད་ཀྱིས་ཇི་སྙེད་བཀའ་སྩལ་པ།། རྟེན་འབྲེལ་ཉིད་ལས་བརྩམས་ཏེ་འཇུག །དེ་ཡང་མྱ་ངན་འདའ་ཕྱིར་ཏེ། །ཞི་འགྱུར་མིན་མཛད་ཁྱོད་ལ་མེད། །ཅེས་གསུངས་ལ། དེ་ཡང༌། སྟོན་པ་འཇིག་རྟེན་དུ་ཕེབས་པའི་དགོས་དོན་ནི། འགྲོ་བ་རྣམས་འཁོར་བའི་སྡུག་བསྔལ་ལས་སྒྲོལ་བའི་ཕྱིར་དུ་ཡིན་ལ། འཁོར་བའི་སྡུག་བསྔལ་ནི་རྩ་བ་བདེན་འཛིན་མ་རིག་པ་ལས་བྱུང་བ་ཡིན་པས། རྩ་བ་བདེན་འཛིན་མ་སྤངས་པར་འཁོར་བའི་སྡུག་བསྔལ་སྤོང་བའི་གནས་མེད་ལ། བདེན་འཛིན་དེ་ཡང་གྲུབ་མཐས་འཕྲལ་དུ་སྒྲོ་བཏགས་པའི་དགག་བྱ་འཛིན་པ་ཙམ་མིན་པར་གྲུབ་མཐས་བློ་བསྒྱུར་མ་བསྒྱུར་ཐམས་ཅད་ལ་ངམ་ངམ་ཤུགས་ཀྱིས་འབྱུང་ཞིང་ཟག་བཅས་དགེ་མི་དགེ་ཐམས་ཅད་ཀྱི་རྩ་བ་བྱེད་པ་ཅན་ཞིག་གོ །འདི་ངོས་ཟིན་པ་ལ། དགག་བཞག་སྤོང་གསུམ་ལས། དང་པོ་ལ་ཁ་ཅིག་དགག་བྱ་ངོས་ཟིན་པའི་བློ་ནི་བདེན་གྲུབ་དགག་བྱར་རྟོགས་པའི་རྗེས་སུ་དཔག་པའི་ཚད་མ་ཡིན་གསུངས། དེ་ལྟར་ན་སྟོང་ཉིད་རྟོགས་པའི་ལྟ་བ་དང༌། དགག་བྱ་ངོས་འཛིན་གྱི་བློ་གཉིས་སྐྱེས་རིམ་མེད་པར་འགྱུར་ལ། སྐྱེས་རིམ་མེད་པ་མི་འཐད་དེ། སྤྱོད་འཇུག་ལས། བཏགས་པའི་དངོས་ལ་མ་རིག་པ། དེ་ཡིས་དངོས་མེད་འཛིན་མ་ཡིན། ཞེས་དང༌། དྲང་ངེས་རྣམ་འབྱེད་ལས། དེ་ཡང་རྒྱལ་བའི་གསུང་རབ་ཀྱི་དྲང་བ་དང་ངེས་པའི་དོན་རྣམ་པར་འབྱེད་པ་ལ་རག་ལས་ཤིང༌། ཞེས་གསུངས་པ་རྣམས་ཀྱི་དོན་དང་འགལ་བའི་ཕྱིར་རོ།