-
མདུན་ངོས།
-
སྣ་ཚོགས།
-
རྒྱུན་ཤེས།
- ནགས་ལྷ་དྲ་མཛོད།
ནགས་ལྷ་དྲ་མཛོད།
ཁ་བ་གངས་ཅན་པའི་རིག་གཞུང་བཟང་པོ་རྣམས་མི་ཉམས་རྒྱུན་གནས་དང་། གནས་པ་གོང་འཕེལ་གྱི་ལམ་དུ་འཇུག་པ་ལ་འཛམ་གླིང་སྤྱི་འགྲོས་ལྟར་བརྡ་འཕྲིན་གློག་རླབས་དང་འགྲོགས་ནས་མདུན་བསྐྱོད་བྱ་དགོས་པ་ནི་དུས་རབས་དང་མཐུན་པའི་ཆ་རྐྱེན་མེད་དུ་མི་རུང་བ་ཞིག་ཡིན། དེར་བརྟེན་ང་ཚོས་གནའ་དེང་ཟུང་དུ་འབྲེལ་བའི་རིག་གཞུང་གི་ཆ་ཤས་སྣ་མང་འདུས་པའི་བང་མཛོད་ལྟ་བུ་(ནགས་ལྷ་གནའ་དེང་ཟུང་གི་རིག་གཞུང་འཛིན་སྐྱོང་དྲ་མཛོད།)འདི་གཉེར་བ་ཡིན། འདིའི་ནང་དུ་དཔྱད་རྩོམ་དང་སྒྲུང་རྩོམ། སྙན་རྩོམ་དང་བསྒྱུར་རྩོམ་སོགས་རྩོམ་ལུས་མི་འདྲ་བ་དུ་མའི་སྒོ་ནས་ནང་ཆོས་དང་ཚན་རིག་སོགས་གནའ་དེང་གི་རིག་པའི་གནས་ལ་འགྲེལ་བཤད་སོགས་སྣ་མང་རྩོམ་ཡིག་དང་། གཞུང་ཆེན་ཁག་དང་བརྡ་སྤྲོད་སོགས་འཆད་ཁྲིད་ཀྱི་སྒྲ་འཇུག །གཞན་ཡང་བརྙན་དང་པར་སོགས་མང་པོ་ཞིག་བཅུག་ཟིན་ལ་ད་དུང་མུ་མཐུད་འཇུག་ཐུབ་པའི་འབད་བརྩོན་བྱེད་བཞིན་ཡོད།
Fri 28 Jul 2023
རྟོག་འགྱུ།
ཐེད་པོ།
རབ་དཀར་མདངས་འོད་འཚེར་བའི་ཉ་གང་གི་དཀྱིལ་འཁོར། །
ཉམས་འགྱུར་སྟངས་སྟབས་གར་གྱི་འགྱུར་འགྲོས་ལ་བརྟེན་ནས། །
ཆུ་ལྷ་སྒེག་མོའི་རུམ་དུ་དལ་བགྲོད་ཀྱིས་སྐྱོད་པ། །
རྗེས་ཆགས་སེམས་ཀྱི་དཀྱིལ་དུ་དྲན་ཤིང་ཞིག་བསླངས་སོང་། །
བསེར་བུ་ཤེད་ཀྱིས་ལྡང་བའི་ས་སྲོད་ཀྱི་དུས་སུ། །
སྨྲ་མེད་གཅིག་པུའི་སྟབས་ཀྱིས་སྲོང་བོ་རུ་འགྲེངས་ཏེ། །
ཟླ་ཞལ་མཛེས་རིས་བཀྲ་ལ་རྒྱང་མིག་གིས་ཅེར་བཞིན། །
རླབས་རིས་སེམས་ཀྱི་འཚུབ་མ་རྒྱང་རིང་ལ་ཤོར་སོང་། །
དཀར་སྒོར་མདངས་དབྱིབས་རང་བྱུང་ལྷུན་གྲུབ་ཀྱི་བབ་རིས། །
དྲི་བྲལ་སེམས་ཀྱི་དྭངས་གཙང་ཤོག་དཀར་གྱི་ངོས་སུ། །
འགྱུར་མེད་རྡོ་རྗེའི་ཐམ་ཁའི་སྣང་རིས་ཀྱི་ཚུལ་དུ། །
ཟབ་ས་སྙིང་གི་སྦུབས་སུ་འདུན་མ་ཞིག་གཏད་ཡོད། །
དྲི་མེད་ཟླ་བ་ལྷ་མོའི་འཛུམ་ཞལ་ཞིག་སྟོན་དུས། །
སེམས་སོང་སེམས་ན་གསལ་བའི་མཛེས་ལྡན་གྱི་ལྷ་མོ། །
དྲན་སྣང་དོན་སྤྱིའི་ཡོལ་བར་རླབས་རིས་ཀྱིས་འཁྱུག་པ། །
གདུང་བའི་མནར་གཅོད་ཅིག་གི་གོ་རིམ་དུ་གྲུབ་སོང་། །
རིང་རིང་ས་མཐའི་གྲོང་ན་རྒྱང་མིག་གིས་ཅེར་བཞིན། །
དྲན་དྲན་སེམས་ཀྱི་གཤོག་པ་ཤེད་སྟོབས་ཀྱིས་བརྐྱངས་ཏེ། །
མགྱོགས་མགྱོགས་འཆར་སྣང་ཡན་པོ་སྟོང་དབྱིངས་སུ་གློད་དེ། །
བདེ་བདེའི་ཉམས་སྣང་བསྐྱེད་ལ་བརྟུན་པ་ཞིག་བསྐྱེད་ཡོད། །
དགའ་དགའ་སེམས་ཀྱི་གཏད་པ་ཤུགས་རླབས་ཀྱིས་རྒོད་པས། །
མཛེས་མཛེས་ཁྱོད་ཞལ་མཚར་བ་ཟླ་གཞོན་གྱི་ངང་ཚུལ། །
འདྲ་འདྲའི་སྣང་རིས་འཚུབ་མ་སེམས་ངོགས་ན་འཚུབ་པས། །
འདྲེས་འདྲེས་དགའ་སྐྱོའི་ཚོར་གཤིས་རྒོད་ཁ་ཞིག་བརྟས་ཡོད། །
སྣང་སྣང་ལྟ་བུར་སྙམ་པ་སྒྱུ་མ་ཡི་ངང་ཚུལ། །
ཉེ་ཉེ་ཁད་ཀྱིས་བཅར་ན་སྟོང་སང་གི་གཤིས་ལ། །
ཆགས་ཆགས་སེམས་ཀྱི་རྟ་ཕོ་དྲན་ཤེས་ཀྱིས་བསྡམས་ཏེ། །
སྐྱིད་སྐྱིད་སྣང་མཐོར་སྤོར་བ་དེ་ག་རང་འཚེངས་པ། །
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
བྲལ་ཐབས་མེད་པའི་ཚོར་བ།
ཉི་སྲས་སྒྲོལ་མ།
ཟླ་དགུ་མངལ་དུ་གཅེས་སྐྱོང་ཨ་མའི་དྲིན་ཆེན། །
ཆུང་དུས་པང་དུ་བྱམས་སྐྱོང་ཨ་མའི་དྲིན་ཆེན། །
དར་མ་སེམས་ནས་བརྩེ་སྐྱོང་ཨ་མའི་དྲིན་ཆེན། །
བཀའ་དྲིན་གཞལ་ཐབས་བྲལ་བའི་མ་དྲིན་ཆེན། །
ཉི་མ་ཡིད་བཞིན་ནོར་བུ་མཆོག །
རྒྱ་མཚོའི་མཐའ་ན་ཧ་ཅང་མཛེས། །
ཨ་མ་བྱམས་བརྩེའི་བདག་ཉིད་མ། །
བུ་ཕྲུག་འགྲམ་ན་དེ་བས་མཛེས། །
ཉི་མའི་ཐུགས་རྗེའི་བཀའ་དྲིན་གྱིས། །
ཚེ་སྲོག་ཐམས་ཅད་སྐྱོང་བ་བཞིན། །
ཨ་མའི་བཀའ་དྲིན་བླ་མེད་ཀྱིས། །
བུ་ཕྲུག་འཚར་ལོངས་གནང་བ་རྨད། །
ཉི་མ་མེད་ན་འཇིག་རྟེན་འདི། །
མཛེས་སྡུག་མེད་པའི་མུན་པ་བཞིན། །
ཨ་མ་མེད་པའི་དྭ་ཕྲུག་ཚོ། །
བདེ་སྐྱིད་བྲལ་བའི་མུན་དོང་ཡིན། །
ངའི་སྙིང་གི་དཀྱིལ་དུ་ཟུག་པའི་ཁྱེད། །
ངའི་དམར་ཆུང་སྙིང་གི་སྒོ་ལྕགས་འདི། །
རྒྱུ་གསེར་གྱི་ལྡེ་མིག་ཁྱེད་མིན་པའི། །
ངའི་གསང་བ་སུས་ཀྱང་ག་ལ་རྟོགས། །
གདོས་བཅས་ཕུང་པོ་དུར་སར་མ་ལྷུང་བར། །
ཨ་མའི་སྐྱོ་མདངས་རིང་མོ་བརྗེད་རྒྱུ་མིན། །
ཐོད་རུས་སྒོར་སྒོར་ས་རུ་མ་ཟག་བར། །
ཨ་མའི་སྐད་དང་བྱམས་སྐྱོང་དྲན་ངེས་ཡིན། །
ཁྱོད་གཟུགས་ཁྲི་གདུགས་ཉི་མའི་འོད་ཟེར་འདི། །
འཛམ་གླིང་མུན་པ་སེལ་བར་བྱོན་པའི་ཚེ། །
བལ་ལས་འཇམ་པའི་ང་ཡི་བློ་སེམས་འདི། །
མ་བཞུ་ཐབས་མེད་འཁོར་བར་འཁྱམ་སོང་ངོ་། །
ཨ་མ་སྡུག་ལ་སྦྱོར་མཁན་བུ་ཕྲུག་ཡིན།
གངས་ཆབ་བསིལ་མ།
བར་དོའི་རྣམ་ཤེས་མངལ་མཚམས་སྦྱར་བ་ནས། །
ལུས་སེམས་གཉིས་ཀར་ངལ་དུབ་གནས་སུ་བསྐྱལ། །
ཉི་མོའི་ཟས་དང་མཚན་མོའི་གཉིད་ཐེབས་བཅག །
ཨ་མའི་རང་དབང་འཕྲོག་མཁན་བུ་ཕྲུག་ཡིན། །
ཤ་རུས་ལུས་ཟུངས་རྒྱས་པའི་ཉིན་ནས་བཟུང་། །
ཨ་མའི་ལྟོ་བ་ལྒང་ལྟར་དགྱེ་སྒུར་བྲལ། །
ལུས་ཀྱི་སྟོད་སྨད་འཁྲུག་ཅིང་ནུས་སྟོབས་ཉམས། །
ཨ་མའི་ལང་ཚོ་འཇོམས་མཁན་བུ་ཕྲུག་ཡིན། །
ཟླ་ཁ་གང་ན་འཚེ་བས་མ་རུས་བཅག །
ཨ་མའི་ཟུངས་ཁྲག་ཁྲོད་ན་ངུ་ངག་ཅིག །
འཆི་གསོན་བྱེ་མའི་ལ་ཁའི་ཕ་རོལ་ན། །
ཨ་མ་གསོན་དམྱལ་སྦྱིན་མཁན་བུ་ཕྲུག་ཡིན། །
བསམ་མེད་དམར་འབྱར་ཤ་ཁྲག་རྡོག་རྡོག་ཅིག །
འཇམ་པོའི་ཕྱག་གིས་འཇུས་ནས་སྙིང་ཁར་སྦྱར། །
སྙིང་གི་ཤ་རྡོག་མཐོང་བའི་བདེ་བས་ཐལ། །
ཨ་མ་འདྲ་ལེ་འཇིག་རྟེན་སྲིད་ན་དཀོན། །
ཨམ་ཕྲག་གསེང་དང་སེན་མོའི་ཕག་ལ་སོགས། །
སྐྱག་གཅིན་ཁ་སྣབས་གཞའ་རླན་དྲེག་ཆགས་ཀྱང་། །
སུན་སྣང་གཙང་བཙོག་མེད་པར་སྙིང་ལྟར་གཅེས། །
ཨ་མ་ཛར་ཛོར་བཟོ་མཁན་བུ་ཕྲུག་ཡིན། །
ཞག་གསུམ་ཟླ་གསུམ་ལོ་གསུམ་འགྲིམ་པའི་ཁྲོད། །
གོམ་སྟབས་ཀྱར་ཀྱོར་ཁ་ལྕེ་རྡབ་རྡེབ་སོགས། །
མ་ཡི་ལུས་ངག་ཡིད་གསུམ་འདི་ན་བསྡུས། །
ཨ་མའི་དུས་བཟང་འཕྲོག་མཁན་བུ་ཕྲུག་ཡིན། །
འགྲོ་འདུག་སྤྱོད་གསུམ་འཇིག་རྟེན་ཆགས་ལུགས་དང་། །
བྱམས་དང་སྙིང་རྗེ་མི་ཡི་མཛའ་མཐུན་ཀུན། །
བཟང་པོའི་དགེ་བཅུ་ལ་སོགས་ཨ་མས་བསླབས། །
ཨ་མ་ཐམས་ཅད་དགེ་རྒན་ཐོག་མ་ཡིན། །
ཨ་མས་དཀོན་མཆོག་ཕྱག་དང་མཆོད་པ་ཕུལ། །
ཙ་རི་གཙུག་ལག་གང་སར་གནས་སྐོར་བསྐྱོད། །
རིན་བྲལ་རྒྱུ་ནོར་དུ་མ་སྤྲང་ལ་སྦྱིན། །
མདོར་ན་བུ་ཕྲུག་བདེ་ཐབས་ཁོ་ནར་བརྩོན། །
ཨ་མས་འཁོར་བའི་རི་གྲོང་ཡོད་དགུ་ཉུལ། །
སྡིག་ལས་སྣ་ཚོགས་མིག་ཆུའི་གསེབ་ནས་བསྐྲུན། །
དེ་ཡི་རྐྱེན་གྱིས་ཆོས་སྐལ་ལས་སྐལ་ཆད། །
ཨ་མ་སྡིག་ལ་སྦྱོར་མཁན་བུ་ཕྲུག་ཡིན། །
ཨ་མ་སྐྲ་དཀར་གཉེར་མས་བརྩེག་ཁ་བརྒྱབས། །
ཁ་ཡི་སོ་བུད་ལག་གཉིས་སེར་གས་འཁུམ། །
ད་དུང་འཆི་རྒྱུར་མི་དྲན་བུ་ཕྲུག་དྲན། །
ཨ་མ་འདྲ་ལེའི་བརྩེ་བ་སྲིད་ན་དཀོན། །
དེར་བརྟེན་བུ་ཕྲུག་མ་ལས་སྐྱེས་ཚད་ཀྱིས། །
ཨ་མ་ཐར་ལམ་འདྲེན་དུ་མི་ནུས་ཀྱང་། །
འཛད་མེད་ཨ་མས་བསྐྱངས་བའི་སྐུ་དྲིན་འདི། །
ནམ་ཡང་སེམས་ནས་མ་བོར་རེ་བ་ཡིན། །
ཕྱི་ལོ་༢༠༢༢།༡༠།༦ཉིན་ཨ་མ་དྲན་པའི་ཚུལ་དུ་བཏབ།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
ཨ་མ་དྲན་པ།
ཀརྨ་བདེ་ཆེན།
གྱེས་བྲལ་གཅོང་རོང་ཟབ་མོའི་ཐུ་འོག་ན། །
ཉི་ཟླའི་འཆར་ནུབ་རེས་མོས་འཁོར་བཞིན་དུ། །
ཁ་ཆར་མོད་པའི་རྒྱང་རིང་རི་གྲོང་ནས། །
བརྩེ་བའི་ཨ་མ་དྲན་པའི་གླུ་ཞིག་འཐེན། །
སྔོན་ཞིག་ལས་བསོད་ཡོད་མེད་མི་ཤེས་ཤིང་། །
མི་རྟག་སྐྱེ་འཆིའི་རྒྱུན་ཞིག་ཡོད་ཀྱང་རུང་། །
བདག་ལུས་འབྱུང་གཞི་ཨ་མ་ཁྱེད་ཉིད་ཡིན། །
བརྩེ་བའི་མ་ཁྱེད་བདག་གི་ཚེ་སྲོག་ཡིན། །
ཀུན་ལ་བརྩེ་བའི་བྱང་སེམས་ལྡན་པ་དང་། །
རིགས་དྲུག་བུ་ལྟར་སྐྱོང་བའི་བྱམས་མ་ཞིག །
འཁོར་བའི་ཀློང་ན་ཡོད་མེད་མི་ཤེས་ཀྱང་། །
བྱམས་ལྡན་མ་ཁྱེད་བདག་གི་མགོན་སྐྱབས་ཡིན། །
ཨ་མས་བཙོག་གཅིན་ཕྱག་གིས་ཕྱིས་པ་དང་། །
མི་གཙང་སྣ་ལུད་ཞལ་གྱིས་འཇིབ་པ་བཅས། །
རང་གི་སྲོག་ལྟར་གཅེས་པ་མ་དྲན་ཡང་། །
བདག་ལུས་གྲུ་བཞི་རྒྱས་པར་མ་ཁྱེད་དྲིན། །
བྲལ་དུས་མིག་ཆུས་སྐྱེལ་མ་བྱེད་ཚུལ་དང་། །
ཐུག་དུས་འཛུམ་གྱིས་བསུ་མ་བྱེད་ཚུལ་ཏེ། །
དགའ་སྐྱོའི་ཚིག་གི་མཚོན་ཐབས་མི་ཤེས་ཀྱང་། །
བདག་གི་འཇིག་རྟེན་དྲོ་སྐྱིད་མ་ཁྱེད་དྲིན། །
ས་མཐའི་བགྲང་བྱ་སོར་རྩེར་འཁོར་བའི་ཁྲོད། །
ངན་ངོན་འཚོ་བའི་གདུང་ཡུས་མོད་ཀྱང་རུང་། །
སེམས་ཀྱི་ཉིན་གསེབ་ཚ་གྲང་མི་སྙོམས་དུས། །
བྱམས་ལྡན་མ་ཁྱེད་བདག་གི་དྲན་ཤིང་ཡིན།
བཟློག་མེད་ལོ་ཟླ་རིམ་གྱིས་རྒས་པའི་ཁྲོད། །
མ་ཁྱེད་སྐྲ་ལོའི་ཁ་དོག་འགྱུར་ཚུལ་དང་། །
ལང་ཚོའི་ཚུགས་ཁ་གང་ཞིག་ཤོར་ཡང་རུང་། །
མ་ཁྱེད་བདག་གི་གངས་ལྷ་མེ་ཏོག་ཡིན། །
སྤྱི་ལོ་༢༠༢༢ཟླ་བ་༡༡ཚེས་༡༣ཉིན།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
རྒྱང་རིང་གི་གནམ་ས།
ཀུན་ཁྱབ།
སྒེའུ་ཁུང་འགྲམ་གྱི་སྡོང་ལོ་ལྷུང་ཚུལ་ལ་བལྟས་ནས། །
ལོ་ངོ་མང་པོ་འདི་ལྟར་དྲན་གདུང་གིས་བསྐྱལ་བས། །
བདག་གི་མིག་ཟུང་ཀློགས་དང་རྒྱང་རིང་གི་ཕ་ཡུལ། །
ཕྱིར་མིག་འཁྱག་པའི་ནང་དུ་ཞེན་ཆཌ་དེ་སྦས་ཡོད། །
ཡར་ཀླུང་གཞུང་གི་སྨུག་པ་ནང་སེམས་སུ་འབྱར་བ། །
ལྷ་སའི་གཞུང་གི་ངོ་གདོང་ལག་ནང་དུ་འཁྱག་པའི། །
འགྱུར་བའི་སྣེ་མོ་འདི་ལ་སིག་སིག་ཏུ་འདར་དུས། །
བདག་གི་གློ་ཁར་འབྱར་བའི་ཉི་མ་ཡང་བཞུད་ཐལ། །
མཚན་མོ་འདི་ནས་ང་རང་ཙོག་པུ་རུ་བསྡད་ནས། །
རྒྱང་རིང་ཞེས་པའི་བར་ཐག་ནང་སེམས་སུ་སླ་དུས། །
བདག་སེམས་ཆ་ཤས་མ་ལུས་དུམ་བུ་རུ་གྱུར་ནས། །
སྟོན་མཇུག་ལོ་མ་ལྷན་དུ་རེ་རེ་བཞིན་ཟགས་སོང་། །
སེམས་ཀྱི་ཕྱེད་ཀ་དྲོས་ཀྱང་ཕྱེད་ཀ་འདི་འཁྱག་པའི། །
ཡུལ་གྱར་མི་ཡི་ངོ་གདོང་འགྱུར་བ་ཞིག་མང་ཡང་། །
ཁོ་བོར་ངོ་ལོག་མ་བྱས་ཁྲེལ་གཞུང་གིས་བསྲུང་བའི། །
རྒྱང་རིང་གནམ་ས་དེ་ཡང་བརྗེད་པ་ཞིག་མི་འདུག །
ཁེར་རྐྱང་ལོ་ཟླ་རིང་མོའི་འཁྱག་རོམ་དུ་ཟགས་ནས། །
དྲན་གདུང་སྐྲ་ལོ་དག་ཀྱང་རེ་རེ་བཞིན་འཐོར་དུས། །
ཆར་ཞོད་ཆེ་བའི་ལོ་ཟླ་གྲང་རླུང་གིས་བསྐྱལ་ཡང་། །
ལོ་མ་རློན་པ་དག་ཀྱང་ནང་སེམས་སུ་འབྱར་འདུག །
རུས་རྐང་འཁྱག་པའི་ལོ་ཟླ་དུས་ཚོད་ཀྱིས་དྲུད་ནས། །
ང་རང་གཅེར་བུར་བུད་ནས་ཁེར་རྐྱང་དུ་ཆས་དུས། །
དགུན་ཟླ་གསུམ་པའི་གྲང་ངར་ཕྱི་རོལ་ན་མི་འདུག །
དྲན་པ་ཐང་ལ་ཟགས་པའི་ནང་སེམས་ལ་འདུག་གོ།
རྒྱང་མིག་ཆད་པའི་ལོ་ཟླ་རེས་མོས་ཀྱིས་འཁོར་ནས། །
སེམས་དང་གློ་བ་མ་ལུས་དེ་བཞིན་དུ་འཁྱག་དུས། །
ཐག་རིང་ཉི་འོད་དེ་ལ་ཡུན་རིང་དུ་བསྒུགས་ཀྱང་། །
དྲོ་ཞིང་འཇམ་པའི་ཉི་ཐིགས་ལྷུང་རྒྱུ་དེ་མི་འདུག །
༢༠༢༢ /༡༠ /༢༨ ཉིན།
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Fri 28 Jul 2023
སེམས་གདུང་།
འབྲི་སྐལ་ལྡན།
བདག་ནི་བག་ཡངས་སེམས་ཀྱི་ཞི་བདེ་ལ་འདོད་ཀྱང་། །
གཞན་དབང་གྲང་མོའི་ངལ་བ་གཡོལ་ཐབས་ཤིག་མི་འདུག །
ལྷ་ཡུལ་ལྟ་བུའི་སྐྱིད་པའི་མཛེས་ལྗོངས་སུ་སླེབས་ཀྱང་། །
ཕ་ཡུལ་དྲན་པའི་གདུང་བ་འགོག་ཐབས་རང་མི་འདུག །
རང་ཉིད་རང་དབང་ཆེད་དུ་ཞི་བདེ་ལ་བརྩོན་ཀྱང་། །
འཁྲུག་རྩོད་མེ་ལྕེའི་རླབས་ཕྲེང་གཡོལ་ཐབས་ཤིག་མི་འདུག །
ནང་མི་སྤུན་མཆེད་ལྟ་བུའི་གྲོགས་མཆོག་དང་མཇལ་ཡང་། །
སེམས་གཏམ་ཕན་ཚུན་ཤོད་པའི་ལམ་བུ་ཞིག་མི་འདུག །
བུ་ཆུང་གཉེན་དང་འཕྲད་པའི་ཐབས་མང་ལ་འབད་ཀྱང་། །
དགྲ་བོ་འཁྱོག་པོའི་ཕྱོགས་ལ་དྲང་བདེན་ཞིག་མི་འདུག །
སྙིང་དང་འདྲ་བའི་མཛའ་མོའི་བརྩེ་མདངས་ལ་འཁོར་ཡང་། །
ཕ་མའི་ཞལ་རས་སེམས་ནས་བརྗེད་ཐབས་ཤིག་མི་འདུག །
རང་ལུས་གྲུ་བཞི་འདི་ལ་ལོང་ཁོམ་ཞིག་མེད་ཀྱང་། །
སེམས་ཀྱི་རྟ་ཕོའི་འགྲོས་ལ་རིན་ཐང་ཞིག་ལོས་ཡོད། །
ཀྱག་ཀྱོག་མི་ཚེ་འདི་ལ་རྫོགས་མཐའ་ཞིག་མེད་ཀྱང་། །
རང་དབང་འཁོར་བའི་ལས་ལ་བདེ་སྐྱིད་ཅིག་ལོས་ཡོད། །
མ་བསམ་བརྗོད་ལས་འདས་པའི་ཞིང་ཁམས་ཤིག་མེད་ཀྱང་། །
རང་བྱུང་སྐྱེ་དངོས་ཁྲོད་ན་སྐྱིད་སྣང་ཞིག་ལོས་ཡོད། །
ཡུལ་གྱར་འཁྱམ་པོའི་གནས་ལ་རྟེན་གཞི་ཞིག་མེད་ཀྱང་། །
མ་ཉམས་སྙིང་སྟོབས་འདི་ལ་ནུས་པ་ཞིག་ལོས་ཡོད། །
སྡེ་ཚན།
སྙན་རྩོམ།
ནང་གསེས་དབྱེ་འབྱེད།
Mon 17 Jul 2023
ནགས་ལྷའི་སྒྲོན་མེ་དེབ་ཕྲེང་བཅུ་བཞི་པ།།
དུས་དེབ།
མཚན་བྱང་། ནགས་ལྷའི་སྒྲོན་མེ་དེབ་ཕྲེང་བཅུ་བཞི་པ།
རྩོམ་པ་པོ། ནགས་ཤོད་འབྲི་རུའི་སྨྱུག་ཐོགས་པ་རྣམས།
བརྗོད་བྱ། སྣ་མང་རྩོམ་ཡིག
རྩོམ་སྒྲིག་ཁང་། ནགས་ལྷ་རྩོམ་སྒྲིག་ཁང་།
༢༠༢༢ ལོར་རྩོམ་སྒྲིག་བྱས།
ངོ་སྤྲོད་མདོར་བསྡུས།
ནགས་ལྷ་རྩོམ་སྒྲིག་ཁང་གིས་ཁ་བ་གངས་ཅན་པའི་སྙིང་ནོར་ཆོས་རིག་ཉམས་པ་སོར་ཆུད་དང་མི་ཉམས་གོང་འཕེལ་ལ་དམིགས་འབེན་བཟུང་ནས། གཞོན་སྐྱེས་བློ་གསལ་རྣམས་རྩོམ་རིག་གི་སྒྱུ་རྩལ་ལ་འཇུག་པའི་ཐབས་ཚུལ་དང༌། བླ་ན་མེད་པའི་སྐད་ཡིག་བཀོལ་སྤྱོད་སོགས་ཀྱི་འཁོར་ཡུག་གི་ཆ་ཤས་ཙམ་དུ། སྣ་མང་རྩོམ་རིག་གིས་ཕྱུག་པའི་ནགས་ལྷའི་སྒྲོན་མེ་ཞེས་པའི་དུས་དེབ་འདི་བཞིན་ཕྱི་ལོ་ ༢༠༠༩ ནས་བཟུང་ད་བར་ཟམ་མ་ཆད་པར་རིམ་པ་སྟར་ཆགས་སུ་འགྲོ་མུས་ཡིན།
ཕབ་ལེན། PDF
སྡེ་ཚན།
དུས་དེབ།
ནང་གསེས་དབྱེ་འབྱེད།
