Details

སྡེ་ཚན། གསལ་བསྒྲགས།

འགྲེམས་སྤེལ། Sat 12 Oct 2019

ཀློག་གྲངས། 841

ནགས་ལྷ་རྩོམ་སྒྲིག་ཁང་གི་བྱུང་རིམ།
འབྲི་རུ་སྐལ་བཟང་རྒྱལ་མཚན།

གོ་ལའི་ཡང་རྩེར་རང་བྱུང་ཁོར་ཡུག་གི་མཛེས་སྡུག་རྣམ་པར་བཀྲ་བའི་ཁ་བ་གངས་ཅན་ཡུལ་དུ་རྣམ་འབྱེད་ཤེས་རབ་ཀྱིས་ཕྱུག་པའི་རང་རེའི་མེས་པོ་གོང་མ་ཕ་མེས་བཀའ་དྲིན་ཅན་རྣམས་ཀྱིས་དཀའ་སྡུག་གི་ཁྲོད་ནས་ཚེ་སྲོག་གི་འགྲོ་གྲོན་བཏང་སྟེ་འབད་པས་བསྒྲུབས་པའི་ཕ་ནོར་ཞི་བསིལ་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དང་། དེ་དང་འབྲེལ་བའི་རིག་གཞུང་ནི་བོད་མི་རིགས་ཀྱི་ངོ་བོ་མཚོན་པའི་བླ་སྲོག་གམ་ཟུངས་ཁྲག་དྭངས་མ་ཞིག་ཀྱང་ཡིན། མི་རིགས་གཅིག་འཚོ་གནས་ཐུབ་མིན་ནི་མི་རིགས་དེའི་རིག་གཞུང་དང་། རིག་གཞུང་གི་གཞི་རྟེན་སྐད་ཡིག་ལ་ཐུག་ཡོད། དེའི་ཚེ་སྲོག་གམ་ཟུངས་ཁྲག་མེད་དུ་མི་རུང་བ་ནི་རྩོམ་རིག་སྒྱུ་རྩལ་གྱི་འཁོར་རྒྱུག་ལ་ལྟོས་དགོས་པས། དེ་དང་བྲལ་ན་རྣམ་ཤེས་ཀྱིས་བོར་བའི་བེམ་རོ་བཞིན་གསོན་ཤུགས་ལྡན་པའི་བྱ་གཞག་ཅི་ཡང་བསྐྲུན་མི་ཐུབ། སྤུ་དང་རྔ་མ་བྱི་ནས་གོག་འགྲོས་རིམ་པས་ལངས་ཏེ། གོས་ཤིང་ལོ་གྱོན་ཞིང་ཟས་ཤིང་འབྲས་ལ་སྤྱོད་པའི་གདོད་མའི་སྤྲ་མི་དང་། རྡོ་ཆས་རྙིང་པ་ནས་རྫ་ཆས་སོགས་ད་བར་བཟོ་རྩལ་རིག་གནས་རིམ་གྱིས་གོང་འཕེལ་དུ་སོང་ནས། གྲོང་དང་ཁང་ཁྱིམ་ས་ཁོངས་དང་སྡེ་རིས་བཅས་གཅིག་གྱུར་རང་བཞིན་ཅན་གྱི་ལམ་ལུགས་མེད་པ་ནས་ཡོད་པའི་སྤྱི་ཚོགས་ཀྱི་རྣམ་པ་དང་ མགྱོགས་ཚད་མྱུར་བའི་ད་ལྟའི་ཚན་རིག་འཕེལ་ཤུགས་ཀྱིས་ཡངས་ཤིང་རྒྱ་ཆེ་བའི་གོ་ལ་ཧྲིལ་པོ་འདི་གཅིག་གྱུར་གྱིས་ཆུང་ཆུང་དུ་གྱུར་ཟིན་པ་མ་ཟད། ཉིན་རེ་བཞིན་སེམས་ཁམས་དང་ཁོར་ཡུག་འཕོ་འགྱུར་མི་སྡོད་པ་མཚོ་ཀློང་བརྡོལ་བ་ལྟ་བུའི་འགྱུར་འགྲོས་དུས་ཀྱི་རླབས་ཕྲེང་བརྩེགས་པའི་སྤྱི་ཚོགས་འདིའི་ནང་སྔར་མུས་བཞིན་གུ་དོགས་ཀྱི་བསམ་བློའི་འདུ་ཤེས་མ་དོར་བ། རང་སྣང་དག་པའི་སྲོལ་རྒྱུན་ཙམ་ལ་མགོ་བོ་འཁོར་ནས་བསྡད་པའི་ཉེར་ལེན་གྱིས་དུས་རབས་འདི་ལྟར་སླེབས་ཀྱང་ང་ཚོའི་སྤྱི་ཚོགས་ནང་ཁབ་དང་ཙག་སྒྲ་ཙམ་ཡང་བཟོ་མི་ཤེས་པ་འདིས་དུས་རབས་ཀྱི་རྗེས་ཟིན་མེད་པར་དྲན་སྐུལ་དང་ར་སྤྲོད་བྱས་ཡོད། ད་ནི་ང་ཚོས་རྗེས་ལུས་དང་གོད་ཆག་གི་ཀློང་ནས་མགོ་བོ་དགྱེ་སྟེ། མི་རིགས་གཞན་དང་དཔུང་པ་མཉམ་གཤིབ་ཀྱིས་གནའ་དེང་ཟུང་དུ་འབྲེལ་བའི་གཤོག་ཡངས་བསྐྱེད་ནས། དུས་རབས་ཉེར་གཅིག་གི་མཁའ་དབྱིངས་སུ་ནམ་འཕང་གཅོད་རྒྱུ་ལས། གངས་རིས་བསྐོར་བའི་དག་ཞིང་དུ་དག་སྣང་ཁོ་ན་བསྒོམས་ནས་ཨུ་ཚུགས་ཀྱིས་ཟུར་སྡོད་བྱེད་ས་གཏན་ནས་མེད། དེར་བརྟེན་འཛམ་གླིང་མི་སྡེའི་སྤྱི་ཚོགས་ཀྱི་འགྱུར་འགྲོས་ལ་ཁ་ཕྱོགས་ནས། འགྲོ་བ་མིའི་སྤྱི་ཚོགས་ཀྱི་དགོས་མཁོ་དང་ཁ་འབྲལ་ཐབས་མེད་པའི་ཚན་རིག་དང་། ཁྲིམས་ལུགས། ས་ཁམས། དཔལ་འབྱོར། སྤྱི་ཚོགས་རིག་གནས་སོགས་ཀྱི་ལེགས་ཆ་བསྡུ་ལེན་གྱིས་ནང་འདྲེན་བྱས་ནས་གསར་གཏོད་རང་བཞིན་ལྡན་པའི་བྱ་གཞག་ཅིག་ངེས་པར་དུ་བསྐྲུན་དགོས་པ་དེ་ཡིན། དེ་ཡོང་བ་ལ་མི་རིགས་རང་ཉིད་ཀྱི་སྐད་ཡིག་རྨང་གཞི་སྲ་བརྟན་དར་སྤེལ་གཏོང་དགོས་པས། རྩོམ་རིག་སྒྱུ་རྩལ་ནི་མེད་དུ་མི་རུང་བ་དེའི་ཐབས་ལམ་ཉག་གཅིག་ཡིན་པར་སོང་། རྩོམ་རིག་གི་ལམ་དུ་མ་ཞུགས་པ་རྣམས་ལ་བསྐུལ་འདེད་ཀྱི་སྣེ་ཁྲིད་དང་། ཞུགས་པ་རྣམས་ཡར་རྒྱས་གོང་འཕེལ་གྱིས་རྣམ་དཔྱོད་ལས་འཁྲུངས་པའི་སྡེབ་ལེགས་ཚིག་གི་སྙན་འགྱུར་ཚངས་སྲས་ལྷ་མོའི་འཕང་འགྲོའི་རྒྱུད་ལས་དྲངས་པའི་རྩོམ་རིག་གཏམ་གྱི་དགའ་སྟོན་སྤེལ་བའི་གར་སྟེགས་ཤིག་ཡོང་བར་དམིགས་ཡུལ་དུ་བཟུང་ཡོད།

བཀླགས་འཕྲོ......

Details

སྡེ་ཚན། གསལ་བསྒྲགས།

འགྲེམས་སྤེལ། Mon 16 Apr 2018

ཀློག་གྲངས། 662

ནགས་ལྷ་རྩོམ་སྒྲིག་ཁང་།

མཚོ་བྱུང་མགྲིན་པར་རོལ་ཞིང་རིགས་ཞེན་གྱི་སྙིང་སྟོབས་མཆོག་ཏུ་མངའ་བའི་རང་རིགས་རྩོམ་པ་པོ་རྣམས་ཀྱི་སྙན་ལམ་དུ།

ཆེད་ཞུ།

དེ་སྔོན་ང་ཚོ་རང་རིགས་ཡོངས་ཀྱིས་ཕྱར་གྲུ་མཉམ་འདེགས་ཀྱི་སྒོ་ནས་དུས་དེབ་དང་དྲྭ་རྒྱ། དེ་བཞིན་བརྡ་སྤྲོད་རིག་པའི་བགྲོ་གླེང་སོགས་ཁ་བ་གངས་ཅན་པའི་རིག་པའི་གཞུང་ལ་ཞབས་འདེགས་ཞུ་ཐུབ་པ་དང་། སྡེ་ལུང་པའི་མིང་དོན་ལ་ཕན་ཐུབ་པ། སྒེར་སོ་སོའི་སློབ་སྦྱོང་གི་གནས་ཚད་གོང་མཐོར་སྤེལ་ཐུབ་པ་བཅས་ཀྱི་ལས་རིམ་མང་པོ་ཞིག་ལག་ལེན་ཐོག་ཏུ་འཁེལ་ཐུབ་པ་དང་ལེགས་གྲུབ་བྱུང་ཡོད་པ་རེད། ལས་རིམ་དེ་དག་ནི་ང་ཚོ་ལུང་ཚན་བྱེ་བྲག་པ་ཞིག་གིས་འཐེན་འཁྱེར་བྱས་པའི་ལས་གཞི་ཞིག་མ་ཡིན་པར་བོད་སྤྱི་ཡི་རིག་གཞུང་ལ་ཞབས་འདེགས་ཞུ་སླད་ཚོགས་པ་དང་ལུང་ཚན། ཁྱིམ་ཚང་དང་མི་སྒེར་བཅས་ཀྱི་འགན་འཁུར་དགོས་པའི་གནད་དོན་རྣམས་དང་ལེན་བྱས་པ་ཞིག་ཡིན་པས་ང་ཚོས་སྤོབས་པ་དང་ལྡན་པའི་སྒོ་ནས་འགྲེལ་བཤད་རྒྱག་ཆོག་པ་ཞིག་ཡིན།

བཀླགས་འཕྲོ......