ནགས་ཤོད་ཅོང་བརྡ་ནས།

དུས་རབས་ཉེར་གཅིག་བརྡ་འཕྲིན་དུས་རབས་རེད། །
གནས་ཚུལ་ཆེ་ཆུང་ཁ་བ་བུ་ཡུག་འཚུབ། །
ས་མཐའ་མི་ན་ཁྱི་ཞིག་ཤི་འདུག་ཟེར། །
གནམ་མཐའ་ཡེ་ན་འོད་ཅིག་འཕྲོ་སྐད་ཟེར། །

དེ་རིང་རྒྱ་གར་སྟོད་ཀྱི་དུས་ཆེན་རེད། །
ཁ་རྩང་རྒྱ་ནག་སྨད་ཀྱི་དུས་ཆེན་རེད། །
མདང་ནུབ་བལ་པོའི་ཡུལ་ཀྱི་དུས་ཆེན་རེད།།
དེ་རིང་གཅིག་གཅིག་གཅིག་གི་འཁྲུངས་སྐར་རེད། །

ནགས་ཤོད་ཅོང་བརྡ།

བས་མཐའི་ཁེར་བུ་ཕ་ཡུལ་དྲན་སྟངས་ཟུག་གཟེར་སྣ་ཚོགས་སྙིང་ལ་རླུང་གིས་ཚ་ཚ་ལྡང་། །
བརྗོད་ཚོད་མེད་ལ་བརྗོད་ཀྱང་དཀའ་བའི་ཉིན་མཚན་འཁོར་མོར་དྲན་གདུང་ཕ་བོང་རི་ལྟར་བརྩིགས། །
ཚིག་དང་ཐ་སྙད་ཡོད་ཚད་སྤུངས་ཀྱང་མཚོན་བྱེད་མི་རྙེད་གཉུག་སེམས་འདི་ན་ནད་ཅིག་ཁོལ། །
བག་ཆགས་ཟབ་མོ་ཆུང་ནས་བཏབ་པས་ཁ་བ་བབས་ཚེ་ཕ་ཁྱིམ་མཉམ་དུ་བྱིས་དུས་དྲན། །

བྱིས་པ་ཁྱུ་ཞིག་གངས་རྡོག་འཕེན་རེས་གབ་རེས་བརྩེ་བཞིན་ལམ་ཟུར་བརྒྱུད་ནས་འགྲོ་བ་དང་། །
ནངས་སྔ་དགོང་ཕྱིར་ཁྱི་ཡན་ཟུག་སྐད་རྒྱང་རིང་གོ་བའི་འབྲོག་དུད་ཁ་བས་བསྐོར་བ་དང་། །
ཉི་མའི་གུང་ལ་འཁྱགས་དར་ཁ་རུ་བུད་མེད་རེ་འགས་ནང་འཇམ་དམར་སྐྱ་འཁྲུད་པ་དང་། །
ལོ་ཆུང་མང་པོ་འཁྱགས་ཤུད་གློད་དེ་ཡང་ཡང་དགོད་པའི་སྣང་བ་དེ་ནི་ད་དུང་འཆར། །