༢༠༡༣ ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག་ཨང་གསུམ་པ།

སེར་ལྷོ་བསྟན་འཛིན་བསོད་ནམས།

ཡ་ཐོག་དང་པོའི་མི་ཡི་བྱུང་རབས་དག །
ཇི་ལྟར་བརྒྱུད་མིན་ཇི་བཞིན་བཤད་དཀའ་ལ།།
རྡོ་ཡི་དུས་རབས་ལ་སོགས་མུན་ཁྲོད་དུ།།
ཅི་ཞིག་མྱོང་མིན་ཇི་བཞིན་ཤེས་དཀའ་ཡང་།།

འགྲོ་བ་མི་ཡི་མེས་པོ་གོང་མ་ཚོ།།
འཇུག་ལྡོག་གནས་ལ་རྨོངས་པའི་དུད་འགྲོ་ལྟར།།
རང་རང་ལྟོ་དང་རྒྱབ་ཀྱི་དོན་ཙམ་ལས།།
རིག་གནས་ནོར་གྱིས་ཕོངས་ལ་སུ་ཡིས་བསྙོན།།

༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག

སེར་ལྷོ་བསླབ་གསུམ་ནོར་བུ།

ལུགས་གཉིས་སྐྱོང་བའི་སྟོབས་དང་དཔའ་ངར་གྱི། །
སྙན་གྲགས་གངས་རིའི་མུ་ཁྱུད་ལས་འགོངས་པའི། །
ཡབ་རྗེ་མེས་དབོན་གསུམ་གྱི་རྣམ་ཤེས་ཀྱིས། །
དུས་ཀྱི་མཐའ་ཡང་ལྗོངས་འདི་སྲུང་གྱུར་ཅིག།

ཐོན་མིས་རྒྱ་གར་ཡུལ་ནས་ཡི་གེ་བསླབས། །
བློན་པོ་མགར་གྱིས་དམག་གི་རུ་སྣ་དྲངས། །
རྒྱ་བལ་བཙུན་མོ་ཁབ་ཏུ་རོལ་པའི་དུས། །
གླིང་ཆེན་འདི་ན་རྒྱལ་པོ་སྲོང་བཙན་ཙམ། །