ནགས་ཤོད་སྐལ་རྒྱན་པས།

ཀུན་གསལ་སྒེག་མོའི་བཞིན་རས་ཕྱོགས་སུ་འཛུམ།།
མཚམས་སྤྲིན་གསར་པའི་ལང་ཚོ་མཆོག་ཏུ་མཛེས།།
གྲང་རླུང་བསིལ་བསིལ་ལུས་ལ་སིམ་པ་ཡི། །
དྭངས་གཙང་མཁའ་ལ་འདྲེས་པའི་སེམས་པ་སྐྱིད། །

མཛེས་ལྡན་ལྗོན་པའི་མགོ་བོ་དལ་གྱིས་དགྱེ། །
སྒྲོ་ལྡན་སྤུ་སྡུག་གཤོག་ལྷབ་ཐིབས་ཀྱིས་གཡོ། ། 
སྐད་སྙན་འགྱུར་ཁུག་ནགས་མའི་ཀློང་ནས་གྲག།
ཡིད་འོང་སྐྱེད་ཚལ་ལྷགས་པའི་སེམས་པ་སྐྱིད། །

༢༠༡༣ལོའི་སྙན་རྩོམ་འགྲན་བསྡུར་སྐབས་ཀྱི་རྩོམ་ཡིག་ཨང་དང་པོ།

སེར་ལྷོ་འཇམ་དབྱངས་མཁས་བཙུན།

ཕན་བདེའི་བདག་ཉིད་སྟོན་པ་བཀའ་དྲིན་ཅན་དང་།།
ག་གཅིག་འཕགས་བོད་ལོ་པཎ་རྣམས་དང་།།
རིག་པའི་གཞུང་གི་ཉིན་བྱེད་མེས་པོ་རྣམས་ཀྱི།།
འཕྲིན་ལས་སྒྲུན་བྲལ་ཉིད་ལ་གུས་པས་འདུད་དོ།།

སེམས་ཀྱི་ངལ་བ་རི་བོའི་སྤོ་ཡིས་མི་དོ།།
ཕྱི་ནང་འཁྲུགས་རྩོད་ཕྲག་དོག་སྦྲུལ་ལས་ཆེ་བ།།
མ་འགྲིགས་བྱ་བ་ཐལ་བའི་རྡུལ་ལས་མང་བའི།།
དུས་རབས་འདི་ལ་ཕན་པའི་བློ་ཞིག་འདོན་འདོད།།