ནགས་ཀྱི་ཤིང་ལོ་ནས།

བེ་ཏའི་ལྗོན་ཤིང་རྩེ་མོ་གནམ་དུ་བསྙེགས།།
ལོ་མའི་གསེང་ནས་རྟ་བདུན་འོད་ཟེར་འཕྲོས།།
ནོར་འཛིན་པང་ན་བན་བུན་སྨུག་པས་འཁྱུད།།
དཔེ་སྐྱོར་བ་ཞིག་ཞོགས་པའི་ཉི་ཟེར་གཡེང་།།

བྱང་རླུང་སེབ་སེབ་བྱང་ནས་ལྷོ་རུ་ལྡང་།།
རླུང་བུའི་སྣེ་ནས་ལྗོན་པའི་དྲི་ཞིམ་བྲོ།།
ལྕུག་ཕྲན་ཡལ་ག་རླུང་གིས་སྒུལ་དང་ལྷན།།
བྱིའུའི་ཚོགས་རྣམས་ཞོགས་པའི་ཉི་འོད་སྒུག །

ནགས་ཀྱི་ཤིང་ལོ་ནས།

ཁ་སྔོན་ཡིད་འོང་འདབ་མ་དམར་ཞིག་སྨུག །
མཐོང་ཙམ་ཉིད་ལ་སེམས་འདི་སྦྲང་མ་གྱུར།།
ཚོར་བའི་གཤོག་ཟུང་བརྐྱངས་པའི་སྣེ་མོ་ནས།།
ཟིར་ཟིར་དབྱངས་ཀྱིས་ཁྱོད་ལ་སྙན་ངག་གྱེར།།

དེ་རིང་མཐོང་དུས་འདབ་མ་རྙིད་པ་འདིས།།
ཡིད་ཀྱི་བུང་བ་སྐྱོ་བའི་དངན་པ་ཤོར།།
ཚོར་བའི་གཤོག་ཟུང་ས་རུ་ལྷུང་དང་ལྷན།།
ཟིར་ཟིར་སྐད་ཀྱི་སྙན་ངག་རླུང་གིས་ཁྱེར།།

ནགས་གྲྭ་མཁས་གྲུབ་ཤེས་རབ་ནས་སྤེལ།།

ཡུལ་སྤྱིའི་གཏམ།འབྲི་ལྗོངས་ཕྱུགས་མོའམ་སྦས་ཡུལ་ནགས་ཀྱི་ལྗོངས་ཞེས་བྱ་བ་ཡུལ་ལུང་གི་བཀོད་པའི་གྲགས་པ་སྲིད་ན་བླ་ན་མཐོ་བ། སྐྱེ་བོ་སུ་འདྲ་ཞིག་ཡིན་རུང་མཐོང་ཙམ་ཉིད་ནས་སེམས་སུ་རང་ཤུགས་ཀྱིས་སྤྲོ་བ་སྦྱིན་པ། མ་ཟད་དཔལ་དང་འབྱོར་བའི་ལེགས་ཆ་ནི་བརྒྱ་བྱིན་ལྷ་ཡི་ཡུལ་ལ་ཡང་འགྲན་ནུས་པ་ཞིག་ཡོད། འོན་ཀྱང་དེ་ཙམ་གྱིས་ནི་དགའ་རྒྱུ་ཅི་ཞིག་ཡོད་དེ། དེ་ནི་སྣོད་ཀྱི་བཀོད་པའམ་ཁོར་ཡུག་གིས་ལག་རྗེས་ཙམ་ཞིག་རེད། དེ་ཙམ་དུ་མ་ཟད་འབྲི་རུ་རྫོང་འདི་ད་ལྟའི་གནས་སྐབས་སུ་མི་རྣམས་ཀྱིས་ལྷ་ས་ཆུང་བ་ཞེས་འབོད་སྲོལ་ཡོད་པ་བཞིན། ཁོར་ཡུག་གི་གཙང་སྦྲ་དང༌། གྲོང་ཁྱེར་གྱི་བརྗིད་ཉམས། དཔའ་འབྱོར་གྱི་འབྱུང་ཁུངས། ཚོང་ལས་ཀྱི་འཕེལ་ཚད་སོགས་ནི་མི་རྣམས་ཀྱི་བསམ་ཡུལ་ལས་འདས་པ་ཞིག་ཡིན། དེ་ཡང་ཕྱིའི་སྣོད་ལ་བརྟེན་པའི་གྲགས་པ་ཙམ་ལས་ནང་མིའི་ཤེས་ཡོན་དང་བསམ་བློའི་གོ་རྟོགས་སོགས་དང་གཏན་ནས་འབྲེལ་བ་མེད། དེའི་ཕྱིར་དེ་ལ་ཧང་སངས་དགོས་པའི་རྒྱུ་མཚན་ནི་ཅི་ཞིག་ཡོད།

སྔ་འགྱུར་མཐོ་སློབ་ནས། འགོམ་བསྟན་འཛིན་ལམ་བཟང༌།

དེ་རིང་ནི་དབྱར་དུས་ཡིན་པས་ཞོགས་པ་ཆར་སིམ་སིམ་ཞིག་བབ་སོང་ལ།
རྟ་བདུན་དབང་པོ་ཡང་དལ་གྱིས་ཤར་རིའི་རྩེ་ནས་སྐྱེ་འགྲོ་ཀུན་ལ་བརྩེ་བའི་འཛུམ་གྱིས་བཞད་བྱུང༌།

རི་བོ་སྟོད་སྨད་ཀུན་ལ་ཆུ་འཛིན་ཕུང་པོ་དམ་དུམ་གཡོ་བཞིན་འདུག གཞན་གསོས་བུ་མོས་སྙན་པའི་སྒྲ་དབྱངས་ཤིག་སྐྱེ་རྒུའི་རྣ་བའི་བུ་གར་ལྷུང་དུས་རྒྱུ་དང་མི་རྒྱུ་ཀུན་ལ་དགའ་བའི་དཔལ་ཡང་སྟེར། དེ་དང་ཆབས་ཅིག་བདེ་ཆེན་གྲོང་ནི་ཁྱིམ་ཚང་ཉུང་ཡང་ཕན་ཚུན་འཆམ་ཞིང༌། ཀླ་ཀློའི་དུག་རླུང་འཚུབ་མ་ཞིག་གང་སར་རྒྱུ་བའི་གནས་བཟོད་མི་བདེ་བ་ཡོད་པ་ནི་གྲོང་དེ་གཅིག་པུར་མིན་པར་ཁ་བའི་ཡུལ་གྲུ་གང་སར་གཅིག་མཚུངས་ཡིན། གཞན་ལྷིང་འཇགས་ཀྱི་ངང་དུ་འཚོ་བཞིན་པའི་གྲོང་པ་ཆུང་ཆུང་ཞིག་རེད། གྲོང་སྟོད་དུ་ཁང་པ་ཉིས་ཐོག་ཅན་དུ་བ་སྔོ་སངས་སེ་མཁའ་ལ་འཕྱོ་བཞིན་པའི་དུད་ཚང་དེ་ལྷ་དགའ་ཚང་རེད། ཁྱིམ་ཚང་དེ་ནི་འཚོ་བ་རན་པོ་སྐྱེལ་མཁན་ཁྱིམ་ཚང་ཕལ་པ་ཞིག་ཡིན། ལྷ་དགའ་དང་བཟའ་ཟླ་འཛུམ་ཆུང་གཉིས་ལ་བུ་ཕྲུག་མིང་སྲིང་བཞི་ཡོད་པ་ལས་བུ་མོ་གཅིག་དང་བུ་གསུམ་ཡོད། བུ་བློ་དགའ་ནི་ཕྲུ་གུའི་ནང་གི་ཆུང་ཤོས་ཡིན་པས་ཁོ་རང་གྲྭ་པ་སྐྱིད་རྒྱུ་རེད་ཟེར་ནས་གྲྭ་པ་བྱ་རྒྱུ་ཐག་བཅད། ལྷ་དགའ་ནི་ཆོས་སེམས་ཆེ་བས་ཁོ་རང་ནངས་དགོང་རྟག་ཏུ་མཆོད་རྟེན་ཞིག་ཡོད་པ་དེར་སྐོར་བར་འགྲོ་ཡི་ཡོད། བཟའ་ཟླ་འཛུམ་ཆུང་ནི་བ་ཕྱུགས་ཁ་ཤས་ཤིག་དང་མཉམ་དུ་མགོ་འཁོར་ནས་བསྡད།

སེར་ལྷོ་འབྲི་རུ་བསྟན་པ།

ཐོག་མར་བརྗོད་པར་འདོད་པ་ནི། དེ་རིང་ངས་སྐྱེ་བ་སྔ་ཕྱིའི་རྒྱུ་འབྲས་ཀྱི་བྱུང་རིམ་སོགས་སྔོག་གི་མེད་ལ། སྐྱེ་རབས་ཨ་རྒྱུད་ཡང་རྒྱུད་དེ་བས་ཀྱད་གླེང་གི་མེད། ཚེ་འདི་དང་འབྲེལ་བའི་མཐོང་སྣང་ཁ་ཤས་ཤིག་བརྗོད་འདོད་བྱུང་། །དེ་རིང་བར་དུ་ངས་ནང་ཆོས་ནི། ཚེ་འདི་གཅིག་པུ་ལ་བསམ་ན་ཡང་། དམངས་ཁྲོད་ནང་ལ་གླེང་རིན་ཡོད་པའི་བསླབ་བྱ་བཟང་པོ་ཞིག་ལ་ངོས་འཛིན་གྱི་ཡོད། འོན་ཀྱང་དེང་སང་དམངས་ཁྲོད་ནང་ལ་དེ་ལས་བཟློགས་པའི་གླེང་སློང་ཇེ་རྒྱས་ཇེ་འཕེལ་དུ་འགྲོ་བཞིན་པ་ནི་མིག་མཐོང་ལག་ཟིན་གྱི་གནས་ཚུལ་ཞིག་རེད ། མཐོང་ཚུལ་རོབ་ཙམ་བརྗོད་ན། དུས་རབས་ཉེ་ཤུའི་ལོ་སྨད་ནས་བརྩམས་པའི་བོད་ཀྱི་རྩོམ་རིགས་མྱུག་ཐོགས་པ་དང་། རྒྱལ་ཞེན་ཆེ་བའི་གླུ་བ། གོ་ལའི་འགྱུར་འགྲོས་དཔྱོད་ཞིབ་པ་རྣམས་ཀྱིས་བཙན་པོའི་རྒྱལ་བརྒྱུད་ནང་ནས་རྒྱལ་པོ་གླང་དར་མ་དེ་བོད་ལ་བཀའ་དྲིན་ཤིན་ཏུ་ཆེ་བ་དང་། རྒྱལ་རབས་ནང་ནས་བྱས་རྗེས་ཆེ་ཤོས་ཀྱི་རྒྱལ་པོ་ཞིག་ལ་ངོས་འཛིན་གྱི་འདུག །ངས་དཔྱད་ན་སྲོང་བཙན་དང་། ཁྲི་སྲོང་གཉིས་བོད་ལ་བཀའ་དྲིན་ཆེ་བའི་རྒྱལ་པོ་ཞིག་ལ་ངོས་བཟུང་ན་འོས་ཤོས་དང་འཚམ་ཤོས་ཀྱི་གླེང་སློང་ཞིག་རེད།

སྙིང་སྟོབས།   ལམ་སྐྱ་བོ་འདིར་ཡར་དང་ཡར། མར་དང་མར་ཕྱིན་པ་སུན་སོང་། ལྟོ་ཕུར་ཁྲ་བོ་འདི་དང་།

ཇ་ཕུར་ལྗང་ཁུ་འདི་གཉིས་དང་ཉིན་འགྲོགས་མཚན་འགྲོགས་བྱས་པ་སུན་སོང་། ནམ་མཁའ་ནག་ནོག་ཡ་གིར་ཉིན་ལྟ་མཚན་ལྟ་བྱས་ཤིང་། རི་མ་ཐང་གི་ཕྱོགས་ཕ་ཚོར་ཡང་དང་ཡང་དུ་བལྟས་པ་སུན་སོང་། གནས་འདི་ན་ཡོད་ཚད་རྗེས་ཟློས་ཙམ་བྱས་ནས་ལོ་དང་ཟླ་བ་སྐྱེལ་བར་སུན་སྣང་སྐྱེས་བྱུང་། སུན་སྣང་གི་ཁུར་པོ་འདི་ནི། མེས་པོ་དང་མེས་པོའི་ཆད་པ་མ་རེད་ལ། མེས་པོ་དང་མེས་པོའི་ནོར་འཁྲུལ་ཡང་ག་ལ་ཡིན། སུན་སྣང་གི་ཁུར་པོ་འདི་ནི། རྗེས་ལུས་ཤིག་གི་སྔོན་རྟགས་རེད། ད་དུང་། རྨོངས་འཐོམ། ལེ་ལོ། ཕྱིར་འཐེན། ་་་ མདོར་ན། འདི་ནི་སོ་སོའི་སྒལ་པར་སོ་སོས་བཀལ་བའི་ཁུར་པོ་རེད། འདི་ནི། སོ་སོའི་འགྲོ་ལམ་སོ་སོས་མ་བརྙེད་པའི་ལན་ཁག་རེད། འདི་ནི། སོ་སོས་སོ་སོ་གཉའ་གནོན་བྱས་པའི་རྟགས་མཚན་རེད།

༡༢/༡༡/༢༠༡༣།

འབྲི་རུ་བྱ་ལག །

ལས་དབང་ནི་ཅི་འདྲའི་གདུག་རྩུབ་དང་མནར་གཅོད་ཆེ་བ་ལ།
ངེད་ཚང་གི་ཕ་གཞིས་ཤར་གྱི་དུག་རླངས་ནག་པོས་གནམ་སར་གཏོར་ཞིང་།
ཤུལ་དུ་ལུས་པའི་དྭ་ཕྲུག་འདི་དག་གི་ལུས་སེམས་ལ་སྡུག་གི་མུན་ནག་འཁྲིགས།
སེམས་ཁོང་དུ་གྲང་འདར་དང་གྲང་རླུང་གིས་གཡོ་ཞིང་།

མཐོ་སྒང་འདིར་ཁྲག་རིས་ཀྱི་འཇའ་ཚོན་འཐེན།
བེམ་རོ་ཕ་མཁར་བརྩིགས་པའི་དུར་ས་ནས།
རླུང་ཚུབ་དང་དྲག་ཆར་གྱི་གསེབ་ནས་སྐྱོ་གདུང་གི་གྲང་འདར་ཤོར།
སྡུག་གི་མིག་ཆུས་ས་གཞི་ཐམས་ཅད་བརླན།

ནགས་གཡག

སྙན་ངག་ཡ་སྙན་ངག་ངའི་དགའ་ས་དང་དུང་ས་སྐབས་རེ་ནི་ཚོར་བའི་གཟུགས་བརྙན་དྭངས་མ་ཞིག་དང་ལན་རེ་ཚོར་བ་ལ་ཕུལ་བའི་སིལ་ཏོག་ཞིམ་པོ་ཞིག་ད་དུང་སྐབས་རེ་ནི་སྒྲིབ་ཤིང་ཞིག་གི་ཚུལ་གྱིས་གསང་བ་རྣམས་དབྱིངས་སུ་སྟིམ་པར་བྱེད་ཀྱང་ལན་རེ་གསང་བ་གཏོར་བའི་དམར་རྗེན་གྱི་ཕུང་པོ་ཞིག་ད་དུང་སྐབས་རེ་སེམས་པ་རྒྱ་ཡན་དུ་གཏོང་བའི་བདག་པོ་ཡིན་ཀྱང་ལན་རེ་གཞན་སེམས་དབང་མེད་དུ་བསྡུ་བའི་མཐུ་ལྡན་ཞིག་ད་དུང་ སྐབས་རེ་གུ་ཡངས་ཀྱི་རི་ལུང་ཐང་གསུམ་ཡིན་ཀྱང་ལན་རེ་མི་ལྕོག་པའི་སེམས་ཚོར་དྲག་པོའི་ཁུར་པོ་ལྕི་མོ་ཞིག་སྙན་ངག་ཡ་སྙན་ངག་ངའི་དགའ་ས་དང་དུང་ས་མདོར་ན་ངས་ཁྱོད་ལ་སེམས་པའི་གཟུགས་བརྙན་ཏེ་དམར་རྗེན་བ་ཞིག་ལྟ་བཞིན་ཡོད།

༢༠༡༣/༡༡/༠༢ མཚན་མོར།

ནགས་གཡག

ལྷོ་གླིང་ཟླུམ་པོ་དེའི་གྲུ་ཁུག་ཅིག་ན་ རང་ཉིད་ཡ་རབས་ཤིག་དང་ཉམ་ཆུང་ཞིག་ཡིན་པར་སྙམ་པའི་རིགས་རྒྱུད་ཅིག་ གསེར་ལ་གསེར་དུ་མཐོང་བའི་མིག་གིས་སྟོང་དེར་བརྟེན་ཕ་ཚེ་ནས་བུ་རབས་བརྒྱུད་དེ་ སོ་སོས་རྙེད་པའི་གསེར་དེ་དག་ རྡོ་རུ་བྱས་ནས་ལུག་ལ་བཞུས་མྱོང་ལ་ ལོ་ཆུང་དུས་མེ་ཏོག་ཏུ་བྱས་ནས་འགོག་མྱོང་ མ་ཟད་རྫི་གླུ་དང་གཞས་ཤགས་སོགས་བྱས་ནས་ བཏང་མ་མྱོང་མཁན་སུ་ཞིག་ཡོད་ ད་དུང་ལོ་ཆུང་དུས་ཟེར་ཞིང་ དེ་དག་ནི་ཚེ་གཅིག་གི་བདེ་སྐྱིད་ཀྱང་ཡིན་པར་འདོད་དེ་ལྟ་བུའི་ཡ་རབས་ཀླད་མེད་ཅིག་དང་ ཉམ་ཆུང་ལྐུགས་པ་ཞིག་གིས་ སོ་སོར་དབང་བའི་གསེར་ཡོད་ཚད་ སོ་སོའི་ལག་པར་ས་རོ་བེད་མེད་ཅིག་ཏུ་གྱུར་པས་ ཡར་ཐོན་གྱི་ཐག་སྣེ་ཤོར་ད་དུང་མེ་མདའ་མང་ས་ནས་མག་པ་བསུས་ཤིང་ ནོར་ལུགས་མང་ས་ན་མནའ་མ་བཏང་སྟེ་ སྲོལ་ངན་གྱི་ནད་ཡམས་དེས་ ཆིག་སྒྲིལ་རྩ་གཏོར་བཏང་ནས་སྟོབས་ཤུགས་བརླགས་ ནང་དམེ་བསླངས་ནས་ནང་མི་ལ་ཡིད་ཆེས་བོར་བ་སྟེ་ ཉམ་གུད་ཀྱི་དོང་ཁ་ན་འཁྱར་འཁྱོར་དུ་འཚོ་དུས་ གནོད་སེམས་ཅན་པོའི་ཧུ་ཕུ་ཞིག་གིས་དོང་དུ་གཡུགས་དོང་ཞབས་དེ་ན་ དབུགས་གཏོང་ལེན་མི་ཐུབ་པས་ ད་གཟོད་གཞི་ནས་གསེར་ལུག་ལ་བཞུས་པ་དེ་ཚོར་ འོན་ཀྱང་རླུང་གིས་མི་བཟིན་པའི་རྗེས་དེ་འགྱོད་པའི་ཡིན་དུས་ ང་དང་ང་ཅག་གི་ཡ་ཆུང་ན་རྫོགས་རྒྱུ་མེད་པ་དེ་ ཁྲུམ་ཁྲུམ་དུ་བཞུར་བའི་མིག་ཆུ་ཁོ་ན།

༢༠༡༣/༡༡/༠༢ ཀྱི་མཚན་མོར།

ནགས་ནམ་དུས་གྲང་མོ་དེའི་མཚན་མོར་ ཁ་བ་ལྷབ་ལྷུབ་ཏུ་བབས་དེ་ནི་སེམས་པ་གཉིས་འདྲེས་པའི་དན་རྟགས་ཏེ་ ཅི་འདྲའི་དཀར་ཞིང་གཙང་ཐོ་རངས་ཀྱི་མཚམས་དེར་ ཁེར་རྐྱང་གི་རྐང་རྗེས་ཤིག་ འཇིག་རྟེན་དཀར་གཙང་གི་ལྭ་བའི་ངོས་སུ་སྤར་བ་ན་ ད་དུང་གསང་བ་ལྷག་མ་ཞིག་ཅི་ལ་ཡོད་ཡིན་ན་ཡང་ ཁ་བ་ལ་སྟིམ་པའི་ལྷད་མེད་ཀྱི་སེམས་པ་དེ་ རྐྱེན་དབང་ཞིག་གིས་བཞུས་སོང་ཞེས་སྙན་ཚིག་སྤེལ་དུས་ སྨྱུག་འཛིན་པ་ནི་མི་བུ་མགོ་རིལ་ཞིག
༢༠༡༢/༡༡/༠༡ ཉིན།