༢༠༡༩ / ༡༢ / ༢༢ ཉིན་འཇམ་མགོན་རྒྱལ་བའི་གདན་ས་དགའ་ལྡན་རྣམ་པར་རྒྱལ་བའི་གླིང་དུ་རྗེ་བླ་མ་མྱ་ངན་ལས་འདས་ནས་ལོ་དྲུག་བརྒྱ་འཁོར་བའི་བཀའ་དྲིན་རྗེས་དྲན་གྱི་མཛད་སྒོ་དང་ཆབས་གཅིག་༸གོང་ས་སྐྱབས་མགོན་མཆོག་དབུ་བཞུགས་ཀྱིས་རི་བོ་དགེ་ལྡན་པའི་གཙུག་ལག་སློབ་གཉེར་ཁང་ཆེན་མོའི་དགའ་སྟོན་མཛད་སྒོ་ཐེངས་བཅུ་གཅིག་པའི་ཐོག་ལྷ་རམས་དགེ་བཤེས་ཀྱི་ཕྱག་ཁྱེར་ལེན་པའི་སྐལ་བཟང་ཐོབ།
༢༠༡༨/ ༣ /༢༧ ཉིན་གསང་ཆེན་རིག་པ་འཛིན་པའི་སྡེ་ཆེན་པོ་དཔལ་ལྡན་སྟོད་རྒྱུད་གྲྭ་ཚང་དུ་སྒྲིག་ཞུགས་བྱས་ནས་ལོ་གཅིག་རིང་གསང་སྔགས་གཞུང་ལ་ཐོས་བསམ་སློབ་གཉེར་ཚུལ་བཞིན་བྱས་ནས་ཆོས་ཐོག་གྲུབ་མཚམས་གསང་སྔགས་གཞུང་ལ་བྲིས་རྒྱུགས་དང་འབྲེལ། ༢༠༡༨/ ༡༢ /༡༥ ཉིན། ཆོས་ཐོག་དང་འཆད་ཉན་ཟིན་པའི་ཕྱག་ཁྱེར། ཞེས་པའི་ཕྱག་ཁྱེར་ཐོབ། ༢༠༡༩ /༦ / ༡༦ ᩡᨑ᪄་ནགས་ལྷ་རྩོམ་སྒྲིག་ཁང་གི་འགན་འཛིན་ལས་ཁུར་དངོས་སུ་ཞུས་ནས་<<ནགས་ལྷ་རྩོམ་སྒྲིག་ཁང་ལོ་བཅུ་འཁོར་བའི་རྗེས་དྲན་གངས་ཅན་རིག་པའི་གཏེར་མཛོད་>>ཅེས་པའི་ཆེད་དེབ་རྩོམ་སྒྲིག་དང་འདོན་སྤེལ་བྱས།
༢༠༡༩/ ༨ /༢༨ ནས་ཉིན་གསུམ་རིང་དྭགས་པོ་བཤད་སྒྲུབ་གླིང་གྲྭ་ཚང་དུ་འཇམ་མགོན་བླ་མ་ཙོང་ཁ་པ་ཆེན་པོའི་བཀའ་དྲིན་རྗེས་དྲན་དུ་བྱང་ཆུབ་ལམ་རིམ་ཆེན་མོའི་མཁས་པའི་བགྲོ་གླེང་གོ་སྒྲིག་ཞུས་དོན་ལྟར་སེར་བྱེས་གྲྭ་ཚང་གི་བཀའ་བཞིན་ཆེད་བཅར་གྱིས་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་དབུ་བཞུགས་ཐོག་རྩོམ་ཤོག་སྒྲོག་སྦྱང་དང་འབྲེལ་ཉིན་གསུམ་རིང་བགྲོ་གླེང་གི་ཆ་ཤས་བླངས།
༢༠༡༩/༡༠/༡༢ ཉིན་ནགས་ལྷ་རྩོམ་སྒྲིག་ཁང་དབུ་བརྙེས་ནས་ལོ་བཅུ་འཁོར་བའི་རྗེས་དྲན་མཛད་སྒོ་ཟབ་རྒྱས་དང་། མདོ་ཁམས་ནགས་ཤོད་འབྲི་རུའི་སློབ་མ་རྣམས་ཀྱི་བརྡ་སྤྲོད་རིག་པའི་བགྲོ་གླེང་ཐེངས་བདུན་པ་དཀྱུས་གཅིག་ཏུ་གོ་སྒྲིག་ཞུས། ༢༠༡༩ /༡༡ / ༥ ཉིན་དགེ་བཤེས་ལྷ་རམས་པའི་སྔགས་ཀྱི་རྩོད་རྒྱུགས་བྱས་ནས། དགེ་བཤེས་ལྷ་རམས་པའི་སྔགས་ཀྱི་ཕྱག་ཁྱེར། ཞེས་པའི་ཕྱག་ཁྱེར་ཐོབ། ༢༠༡༩ལོའི་ནགས་ལྷའི་སྒྲོན་མེ་འདོན་ཐེངས་བཅུ་གཅིག་པ་རྩོམ་སྒྲིག་གིས་འདོན་སྤེལ་དང་ནགས་ལྷ་རྩོམ་སྒྲིག་ཁང་གི་འགན་འཛིན་གྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་མདོར་བསྡུས་སུ་བཀོད་པའོ། །
- << སྔོན་མ
- རྗེས་མ
